|
|
| 1. Jáeramo, Job eyeapɨsaka opaete cheñee reta re; eyeapɨsaka opaete jaeta ndeve vae re. |
| 2. Oime ma ñee anoi amboyevɨ vaerä ndeve. |
| 3. Chepɨa pe yemongeta anoi vae jaeta jupi rupi, jare chemiari yave chemiarita añete vae. |
| 4. Tumpa ko cheapo, Imbaepuere yae ete vae ko omee tekove cheve. |
| 5. Ndepuere yave emboyevɨ ñee cheve, eyeapokatu yayoaka vaerä. |
| 6. Mase, che jare nde yayovake ko Tumpa jóvai, che cheapo vi tuyuapo güi. |
| 7. Jayave agüɨye ekɨɨye chegüi, ngaraa ayapouka ndeve che jaegüeño. |
| 8. Che aendu ko reregüe, opaete jókuae rere vae aendu körai: |
| 9. “Ikɨambae ko che, jupi vae ko che, jekombae ko che, jare mbaetɨ oñeväe mbaeyoa cheré. |
| 10. Ërei Tumpa oeka mbae re chemboeko vaerä, jare cherenoi jovaicho rami; |
| 11. oñono chepɨ ɨvɨrakua pe, jare omae opaete ayapogüe re.” |
| 12. Ërei kuae rere vae mbaetɨ ko jupi, echa Tumpa tuicha ko iyemongeta pe kuimbae güi. |
| 13. ¿Maera pa nderovaicho pota jese? Jae mbaetɨ etei oyangareko reregüe re. |
| 14. Ërei ngatu Tumpa opaño mbae rupi imiari, ërei mbaetɨ kia oipota oikuaa. |
| 15. Ámope pɨ̈tu yave imiari mbaɨu rupi ani mbae oyekuaa vae rupi, kuimbae reta oke yave, topeɨ oyaporai yave. |
| 16. Jayave ko Tumpa oenduka iñee kuimbae pe, oechauka chupe oyavɨgüe jare okɨɨye, |
| 17. opia vaerä jembiapo ikavimbae güi, agüɨye vaerä oyemboete. |
| 18. Jökorai oepɨ vaerä tɨvɨa güi, güɨroasayepe vaerä mano güi. |
| 19. Ámope Tumpa oporombosɨmbi mbaerasɨ rupi. Mbae jasɨ avei opaete jete pe vae rupi. |
| 20. Güɨröɨrouka chupe tembíu, tembíu oyúe yae yepi vae. |
| 21. Ipiru yae, isoo opa okañɨ, ikägüe oyekuaa, tenonde yave mbaetɨ oyekuaa vae. |
| 22. Köiño ma oï tɨvɨa güi, jare jekove, mano güi. |
| 23. Ërei oime yave köiño oï chugüi metei araɨgua, jeta vae güi metei timiari kavi chupe, kërai oiko vaerä vae re. |
| 24. Toiparareko jare tei Tumpa pe: “Eroasayepe tɨvɨa güi, echa aväe chupe oepɨ vae.” |
| 25. Jayave jete okuera yeta, oiko yeta tenonde taɨrusu yave oikose rami. |
| 26. Oyerure Tumpa pe yave, jae oenduta chupe; omboeteta Tumpa yerovia ndive, jare otairarita kuimbae reta pe Tumpa ipɨakavi re. |
| 27. Jae omae opaete kuimbae re, jare nde rere: “Cheyoa, ayavɨ, ërei Tumpa mbaetɨ oiporarauka cheve, |
| 28. ërei ngatu chereroasayepe mano güi, jare aikoveño.” |
| 29. Jökorai Tumpa omae kuimbae re mbovɨ ye rupi, |
| 30. güɨroasayepe mano güi, omaeño oikove. |
| 31. Eyeapɨsaka kavi cheré Job, eñemokïrii chemiari ramboeve. |
| 32. Oime mbae rere vaerä yave, nemiari, jaekavi rere yave che amaeñota nderé; |
| 33. ërei mbaetɨ yave, eyeapɨsaka cheré nekïrii ngatu reve, jare che toromboe ndearakuaa katu vaerä. |
|
|
| 1. Jayave Eliú jekuae jei ye: |
| 2. Peyeapɨsaka cheñee re yarakuaa katu vae reta, jare pe peyemboe vae reta peyeapɨsaka kavi cheré. |
| 3. Echa yandeapɨsa rupi ko yaendu ñee reta, jare ñaneäpeku pe yaikuaa tembíu jëe ngatu vae. |
| 4. Jökorai vi yande reta ñamae kavi kuae oasa oï vae re, jare yaiparavo jaekavi vae. |
| 5. Echa Job jei: “Jekombae ko che, ërei Tumpa mbaetɨ chembojupi. |
| 6. Cheaputa apɨta ayemboeko yave jupimbae reve, chepere reta mbaetɨ okuera, yepe tëi mbaetɨ cheyoa.” |
| 7. ¡Mbaetɨ kia Job rami vae! Yavaiä etei oyóyai yóyai Tumpa, kia ɨ jou ramiño. |
| 8. Jae ojo oñemoïru jeko pɨ̈chɨi vae reta ndive, jare oguata iyoa vae reta ndive. |
| 9. Echa jei: “Kuimbae mbaetɨta mbae oväe, oipota ombopɨakatu Tumpa vae.” |
| 10. Jáeramo, pe yarakuaa katu vae reta, peyeapɨsaka cheré, ¡agüɨye peyemongeta Tumpa Imbaepuere yae ete vae kotɨ, oyapota ikavimbae vae ani jupimbae vae! |
| 11. Echa jae omboepɨta kuimbae pe iparavɨkɨ rupi, metei ñavo jeko rupi kavi. |
| 12. Añete, Tumpa Imbaepuere yae ete vae, ngaraa oyapo ikavimbae ani jupimbae. |
| 13. ¿Kia pa omee ipo pe ɨvɨ? ¿Kia jeia re pa oï kavi opaete ɨvɨ? |
| 14. Kuimbae reta güi opɨ̈ro yave tekove, opaete vae oyovake omanota, jare yogüɨraja yeta ɨvɨkuirä. |
| 15. |
| 16. Nde ndearakuaa katu yave, eyeapɨsaka; eyeapɨsaka kavi cheñee reta re. |
| 17. Tumpa omotareɨ ko jupi vae yave, mbaetɨ ipuere oporookuai, ¿kërai pa ndepuere rejäa jupi yae ete vae? |
| 18. Mburuvicha guasu reta jare mburuvicha reta ipɨapochɨ, Tumpa jeita chupe reta jova pe etei. |
| 19. Jae mbaetɨ oñeñono mburuvicha reta ndive, mbaetɨ vi omborɨ oikokatu vae reta paravete vae reta güi, echa jae jembiapo ko opareve. |
| 20. Kuimbae reta aramoete omano, pɨare mbɨte yave jäsémbai vae jare oasa, Tumpa oitɨ imbaepuere yae vae, mbaetɨ reve kia omborɨ. |
| 21. Tumpa omae opaete vae iguata re, jae oecha opaete vae jembiapo. |
| 22. Mbaetɨ ketɨ pɨtumimbía pe, ipuere oñemi mbaeyoa oyapo vae. |
| 23. Tumpa mbaetɨ ombojee ara kuimbae pe, oñeñono vaerä jóvai oñejäauka vaerä. |
| 24. Jae omboaita imbaepuere yae vae oparandumbae reve chupe, jare jekovia pe oñonota ambuae vae. |
| 25. Tumpa oikuaa opaete jembiapo reta, pɨ̈tu yave ou jare opa omokañɨtei reta. |
| 26. Jeko kavimbae reta rami oinupa, opaete vae reta jovake. |
| 27. Echa oeya reta Tumpa, jare mbaetɨ oyemongeta reta oyapogüe re. |
| 28. Paravete jare yogüɨrekoasɨ katu vae reta jäse, ojo oväe Tumpa jóvai, jare jae oendu. |
| 29. Tumpa mbaetɨ mbae oyapo yave, ¿kia pa ojäata? Oñomi jova yave, ¿kia pa oechata? Jae omae jeta vae re jare kia ñavo re, |
| 30. agüɨye vaerä oporookuai tëta re, metei jeko pɨ̈chɨi vae oporombotavɨ vaerä. |
| 31. Jayave ikavi jei Tumpa pe vae: “Chetavɨ ma, ngaraa ye ma cheyoa. |
| 32. Chemboe mbaetɨ aikuaa vae re, ikavimbae ayapo yave, ngaraa ma ayapo ye.” |
| 33. ¿Reipota yera Tumpa omboepɨ ndeve, nde reipota rami, yepe tëi nde reröɨro? Echa nde rereaño oiko, mbaetɨ che, ere oreve reikuaa yave. |
| 34. Kuimbae yarakuaa vae reta oyeapɨsaka cheré, yarakuaa katu vae reta jeita cheve: |
| 35. “Job oikuaambae reve imiari; iñee reta mbaetɨ etei jaekavi. |
| 36. ¡Job toikuaa kavi iyegua, echa iñee reta jae ko jeko pochɨ vae iñee! |
| 37. Job jaeñoä ko iyoa jae ko oyembopɨapochɨ vae, yanderóvai oyóyai yóyai Tumpa, jare oyoaka jae ndive.” |
|
|
| 4. Opaete ɨvɨ pegua reta, petairari yandeYa pe peyerovia reve, pesapúkai jare peyepopete petairari salmo reta. |
| 5. Petairari salmo reta yandeYa pe arpa ndive, arpa ndive petairari. |
| 6. Petairari mimbɨguasu reta iñee ndive jare vecha kuimbae-räti iñee ndive, mburuvicha guasu yandeYa jóvai. |
| 7. Tijɨapu ɨguasu jare tijäsémbai opaete pɨpegua reta, jökoraiño vi ɨvɨ jare opaete pɨpegua reta; |
| 8. toyepopete ɨ̈aka reta, tosapúkai ɨvɨtɨ guasu reta oyerovia reve, |
| 9. jókuae yandeYa ou oï vae pe. ¡Echa, jae ou oï vaerä mburuvicha guasurä kuae ɨvɨ pe, güɨroata vaerä jupi rupi jare isɨmbi rupi tëta reta kuae ɨvɨ pegua! |
|
|
| 19. Cheraɨ, eyeapɨsaka kavi, jayave ndearakuaata; eñemoäta ngatu reiko kavi vaerä. |
| 20. Agüɨye neïru pota okau vae reta ndive, ani okaru kavi vae reta ndive ave, |
| 21. echa kau regua reta jare okaru kavi vae reta iparavete yaeta ko, jare iyakɨ vae reta oyemonde temimonde ipächagüe pe. |
|
|
| 1. Cherɨvɨ reta, jáeramo mbaetɨ chepuere pomomiari Espíritu Santo ipɨa pe oiko vae reta rami. Pomomiarita ko jeigüe rupiño yogüɨreko vae reta rami, oporogüɨrovia ramo vae reta rami. |
| 2. Amee ko peve michia necheño jou vae rami, mbaetɨ tembíu okuakuaagüe jou vae rami. Echa mbaetɨ vɨteri pepuere jare mbaetɨñota pepuere. |
| 3. Echa jekuaeño peiko pe peregüe reño. Echa jekuaeño peñemoägüɨro oyoe, peñoraro jare peyoambotaä ¿jaeä pa jókuae jeigüe reño oiko vae?, jare ¿oipotagüe kuimbae ramiño? |
| 4. Echa amogüe pe reta pere: “Che añetete ko aï Pablo ndive.” Amogüe jei: “Che ko aï Apolos ndive.” ¿Jaeä pa jókuae jeigüe reño oiko vae? |
| 5. Pablo jare Apolos mbaeä ko. Ore reta ko royeokuai vaeño, orerupi peporogüɨrovia vaerä. Royapo ko mbaravɨkɨ metei ñavo yandeYa omee oreve rupi. |
| 6. Che amaetɨ, Apolos omboɨu, ërei Tumpa etei ko ombokuakuaa temitɨ. |
| 7. Jáeramo omaetɨ vae ani omboɨu vae mbaeä ko, jaeño ko Tumpa temitɨ ombokuakuaa vae. |
| 8. Omaetɨ vae jare omboɨu vae oyovakeño ko. Yepe tëi Tumpa omboekoviata metei ñavo pe iparavɨkɨ oï rupi. |
| 9. Echa ore ko roparavɨkɨ Tumpa ndive vae. Pe reta ko jae temitɨ Tumpa iko pegua rami, jare metei o Tumpa omopüa oï vae rami. |
| 10. Che ko jae ipoki o oyapo vae rami. Tumpa ipɨakavi rupi omee cheve añono vaerä o iguapɨkarä. Jare ïru vae ko jae omopüa oï o iguapɨka iárambo vae rami. Ërei metei ñavo tomae kavi kërai omopüa vaerä o iguapɨka iárambo. |
| 11. Mbaetɨ kia ipuere oñono ïru o iguapɨka oñeñono ma vae güi. Jae ko Jesucristo. |
| 12. Kia omopüa yave o iguapɨka iárambo oro, korepoti, ita ipöra yae vae, ɨvɨra, kapii ani atiɨgüe; |
| 13. metei ñavo vae iparavɨkɨ oyekuaata ko tata rupi morojäa iara pe, echa tata oechaukata mbae nunga mbaravɨkɨ oyapo metei ñavo vae. |
| 14. O iguapɨka iárambo kia nunga vae omopüa vae mbaetɨ ókai yave, jekoviata chupe jókuae. |
| 15. Ërei amogüe vae iparavɨkɨ ókai yave, mbaetɨ eteita jekovia chupe; ërei oyemboasaukata metei kuimbae ojoyepe tata güi vae rami. |
| 16. ¿Mbaetɨ pa peikuaa pe reta ko jae Tumpa jo jare Tumpa iEspíritu oiko pepɨa pe vae? |
| 17. Kia nunga vae omboai Tumpa jo vae, Tumpa omboaita vi. Echa pe reta Tumpa jo oñeñono tee vae ko. |
| 18. Agüɨye kia ave toyembotavɨ. Oime yave kia oyemongeta iyarakuaa katu ko arakuaa ɨvɨ pegua pe vae, toyeapo yarakuaambae rami, jökorai iyarakuaa katu yae vaerä. |
| 19. Echa Tumpa pe arakuaa kuae ɨvɨ pegua arakuaaä ko. Echa oyekuatía oï körai: “Tumpa oipɨɨ iyarakuaa vae reta jeko pe aeño.” |
| 20. Jare: “YandeYa oikuaa iyarakuaa katu vae reta iyemongeta, oipotagüeño ko oyemongeta reta vae.” |
| 21. Jáeramo agüɨye kia toyemboete kuimbae reta re. Echa opaete mbaembae pembae ko: |
| 22. Pablo, Apolos, Cefas, ɨvɨ, tekove, mano, añave oyeapo vae jare opaete oyeapota vae, opaete pembae ko. |
| 23. Jare pe reta ko jae Cristo imbae, jare Cristo ko jae Tumpa imbae. |
|
|
| Guarani Bible 2001 |
| Biblia DC Guaraní Bolivia Bolivian Bible Society, 2001 |