8. Амма хьо, Сан ялхо долу Исраилан халкъ, Ас хаьржина йолу Якъубан тӀаьхье, Сан доттагӀчун ИбрахӀимах схьадаьлларг, —
9. Ас лаьттан йистера схьаэцна хьо, генарчу маьӀигашкара Ас схьакхайкхина хьо. Ас аьлла хьоьга: „Хьо Сан ялхо ву“. Ас хаьржина хьо, Ас хьо дӀа ца тесна.
10. Кхера ма кхера — Со хьоьца ву. Воха ма воха — Со хьан Дела ву. Ас хьо чӀагӀ а дийр ду, хьуна гӀо а дийр ду. Со хьуна гӀортор хилла дӀахӀуттур ву нийсо лелаечу Сайн аьтту куьйгаца.
11. Хьуна оьгӀазбаханарш юьхьӀаьржачу хӀиттина а, тӀе эхь деана а хир бу. Хьуна дуьхьалбевлларш, хӀумма йоцург а хилла, хӀаллакьхир бу.
23. Ала тхоьга, хӀун хир ду йогӀучу хенахь, тӀаккха тхуна хуур ду, шу деланаш дуйла. Диканиг я вониг цхьаъ де, тхо цецдовлийта а, кхерадалийта а.
24. Амма шу хӀумма а йоцурш ю, шун гӀуллакхаш а ду пайда боцуш. Шу хоржуш верг а дегаза ву.
25. Ас къилбаседера стаг самаваьккхина, иза тӀегӀуртуш ву. Малхбалехь а волуш, Сан цӀе къобалйо цо. Цо хьоьшур бу куьйгалхой, хатт санна, кхийра пхьегӀа ечу пхьеро поппар санна, хьуьйр бу уьш.
26. Юьхьанца дуьйна хьан дийцина цунах лаьцна, вайна иза хаийтархьама? И хӀума хилале хьан дийцина цунах лаьцна, вайга: „Иза бакъ ву“ — алийтархьама? Цхьаммо а ца дийцина цунах лаьцна, иза хир ду а ца аьлла, цхьанна а ца хезна шуьгара дош.
27. Хьалхарниг санна Ас аьлла Цийоне: „ХӀорш бу хьуна уьш!“ Ярушалайме хаза кхаъ эцна геланча вахийтина Ас.
28. Со хьаьжира, амма цхьа а вацара, хьехар дала царна юкъахь цхьа а вацара. Ас хаьттинчунна жоп дала цхьа а вацара.
29. Хьажал, уьш хӀумма а яц! Церан гӀуллакхаш а пайда боцуш ду. Мох а, яьссалла а ю церан цӀуш».
1. «ХӀара Сан Ялхо ву, Ас чӀагӀвеш волу. Иза Ас хаьржина ву, Цунах воккхавеш ву Со. Сайн Са дуьллур ду Ас Цунна тӀе, Цо халкъашна нийсо схьайоккхур ю.
2. Цо мохь а хьоькхур бац, Шен аз а айдийр дац. Урамашкахь Шен аз а хозуьйтур дац Цо.
3. Кагбалла боллуш болу эрз а кагбийр бац Цо, дӀаян гӀерташ сийсаш йогуш йолу милт а дӀайойур яц. Цо баккъалла а нийсо схьайоккхур ю.
4. Иза гӀел а лур вац, дог эшна а хир вац, лаьтта тӀехь Ша нийсо дӀахӀоттаяллалц. ХӀордан йистера дехаш долу къаьмнаш Цуьнан хьехамах дог тешна хир ду».
5. Иштта боху, стигал а кхоьллина, иза дӀасаяржийначу а, латта а, цунна тӀехь долу массо хӀума а дӀасадаржийначу а, цунна тӀехула лелачу адамашна садеӀар а, дахар а лучу а Везачу Дала:
13. Веза Эла аравер ву, майра стаг санна. ТӀемалочо санна, тӀом баран лаам карзахбоккхур бу Цо. Цо кхайкхам а бийр бу, тӀеман цӀогӀа а тухур ду. Шен ницкъ гойтур бу Цо мостагӀашна тӀехь.
14. «Дуккха а хенахь вист ца хуьлуш Ӏийра Со, садетташ а, собаре хилла а Ӏийра. Амма хӀинца, бер дечу зудчо санна, Ас мохь хьокхур бу, Сан садукъалур ду.
15. Ас лаьмнаш а, гунаш а дассор ду, царна тӀера буц а якъор ю. Хиш дӀа а лакъийна, гӀайренаш йийр ю Ас, Ӏаьмнаш а дакъийна дӀахӀиттор ду, хиш дӀа а даьхна.
16. БӀаьрзенаш царна ца бевзачу новкъахула дӀабуьгур бу Ас, царна ца хууш долчу некъашкахь куьйгалла а дийр ду церан. Боданах царна хьалха серло йийр ю Ас, ситтина некъаш нис а дийр ду. Иза ду Ас церан дуьхьа ден дерг. Уьш дӀатосур бац Ас.
7. Мах а белла, Дала леррина Къобалвинчо кӀелхьардаьхна вай и товрат-хьехамаш кхочуш ца барна хуьлучу неӀалтах, и неӀалт Шена тӀе а лаьцна. ХӀунда аьлча Делан Йозанаш тӀехь яздина ду: «Диттах ирхъоьллинчу хӀоранна а тӀехь неӀалт ду», — аьлла.
8. И дерриг а кхочушхилла, Дала ИбрахӀиме лур ду аьлла долу декъалалла, Дала леррина къобалвинчу Ӏийсагахула кхечу къаьмнашна а далийтархьама а, вайн Шех тешар бахьана долуш, вайна чӀагӀо еш, Ша лур ду аьлла Делан Са вайна далархьама а.
9. Динан вежарий, йижарий, аса вайн дахарехь долу цхьа масала далор ду шуна. Ур-атталла адамаша шайна юкъахь чӀагӀбина болчу бартана цхьаммо а йиш яц хӀумма а цунна я тӀетоха, я иза бохо а.
10. Ткъа Дала, чӀагӀо еш, элира Ша ИбрахӀимна а, цуьнан тӀаьхьенах волчунна а лун дерг. Дацара и аьлла: «тӀаьхьенах болчарна» бохург дуккханех лаьцна долуш санна, амма цхьаннах лаьцна долуш санна аьллера, «хьан тӀаьхьенах волчунна» аьлла. Иза ву Дала леррина Къобалвинарг.
11. Ас бохург хӀара ду: диъ бӀе ткъе итт шо даьлча а, Дала беллачу товрат-хьехамаша Дала Ша кхул хьалха бина болу барт бохо йиш яц. Цундела Ша лур ду аьлла йина чӀагӀо дӀа а ца яьккхира Дала.
12. Нагахь Дала Ша лур ду аьлларг товрат-хьехамаш кхочушбарна луш делахьара, иза Ша чӀагӀо ярна луш хир дацара. Ткъа ИбрахӀимна Дала Ша лур ду аьлларг, Шен дикалле хьаьжжина, чӀагӀо ярна делла.
13. ТӀаккха стенна оьшу те товрат-хьехамаш? Уьш тӀетоьхна бара адамашна шаьш летош долу къинош гайтархьама. Иза хир дара ИбрахӀиман тӀаьхьенах верг ваийтталц. Ткъа цу тӀаьхьенах волчунна Дала чӀагӀо йинера, Ша декъалалла лур ду аьлла. Товрат-хьехамаш адамашна юкъа маликашкахула баийтина юкъарло лелошволчун гӀоьнца.
20. Дала леррина къобалвинчу Ӏийсах тешарца шу массо а Делан кӀентий ду.
21. ХӀинца Дала леррина Къобалвинчун дола а довлуш, шаьш хих чекхдахийтина дела, Ӏийсан бедарш тӀеюьйхича санна, Цуьнан васт схьаэцна аша.
22. Бац шуна юкъахь я жуьгтий а, я кхечу къомах долу адамаш а, я лай а вац, я паргӀатниг а вац, я божарий а, я зударий а дац шу — шу массо а Дала леррина Къобалвинчуьнца цхьаьна цхьаъ ду.
23. Нагахь шу Дала леррина Къобалвинчун делахь, тӀаккха шу ИбрахӀиман тӀаьхьенах ду. Цундела шуна а кхочур ду, Дала, чӀагӀо еш, лур ду аьлларг.