ANGIMANGENG 21:1-24 1. Puwangnge suroi Musa palettu'i iyaé paréntaé lao risining imang wija-wijanna Harun, “Séddié imang dé' nawedding napanajisi' aléna nasaba maccowéi hadéré ri upacara attampungenna sumpulolona, 2. sangadinna rékko iya matéro iyanaritu indo'na, ambo'na, ana'na, padaorowanéna, 3. iyaré'ga ana' daranna iya dé'éppa nakawing, iya naéwaé sibola. 4. Dé' nawedding napanajisi' aléna sibawa maccowʻriwi upacara attampungenna sumpulolona bainéna. 5. Séddié imang dé' nawedding kellui sibagiyang polé ri ulunna sibawa dé' nawedding nagoncing janggo'na iyaré'ga loi watakkaléna sibawa anu matareng untu' mappaitangngi makkedaé mabbaratai. 6. Appunnangekkui iya ripallaingngé nadé' nawedding carépaiwi asek-Ku. Makkasuwiyangngi akkarobangeng inanré lao ri Iyya, jaji harusu'i mapaccing. 7. Séddié imang dé' nawedding kawing sibawa séddié makkunrai iya cakkuribangngé riyolo iyaré'ga séddié makkunrai iya tenniyaé parawang iyaré'ga iya massarangngénna, nasaba imangngé iyanaritu appunnangek-Ku. 8. Bangsa Israélié harusu'i mangakuiwi imangngé selaku tau iya ripallaingengngékka nasaba makkasuwiyangngi akkarobangeng inanré lao ri Iyya. Iyya'na Puwang; mapaccikka sibawa Upaccingiwi umma'-Ku. 9. Rékko ana' makkunrainna séddié imang mancaji cakkuribangngi, napakatunai ambo'na naharusu'i ritunu gangka maté. 10. Purani rilanti Imang Lompoé sibawa tirikiwi minnya upacara tompo ulunna sibawa papasangiwi pakéyang imang lompoé ri aléna. Rimakkuwannanaro dé' nawedding naleppessang gemme'na makota iyaré'ga sapé'ʻi pakéyanna selaku tanrang mabbarata. 11. Purani riyakkasuwiyangeng ri alé-Ku untu' mancaji appunnangek-Ku, jaji dé' nawedding napanajisi' aléna. Dé'to nawedding napanajisi' Kéma-Ku ri laleng massuna polé kuwaro untu' muttama ri laleng bola engkaé ujuna, namuni iyaro ujuna ambo'na iyaré'ga indo'na. 12. 13. Banna weddingngi kawing sibawa séddié parawang polé ri sukunna muto. Dé' nawedding kawing sibawa séddié janda, iyaré'ga séddié makkunrai iya massarangngénna, iyaré'ga séddié makkunrai cakkuribangngé riyolo. 14. 15. Rékko riyajjalékkaiwi iyaro peraturangngé, ana'-ana'na iya harusu'é mapaccing, najisi'i matu. Iyya'na Puwang sibawa purani Upallaing mancaji Imang Lompo.” 16. Puwangnge paréntangngi Musa 17. untu' powadai iyaé lao ri Harun, “Séddié wija-wijammu iya sala-salangngé watakkaléna dé' nawedding makkasuwiyang akkarobangeng inanré lao ri Iyya. Iyaro takkennai untu' mannennungeng. 18. Tau iya makkasuwiyangngé akkarobangeng dé' nawedding sala-salang watakkaléna, iyanaritu tau butaé, iyaré'ga péso'é, tau sala-salangngé rupanna iyaré'ga anggota watakkaléna, 19. iya maté limanna iyaré'ga képpangngé ajéna; 20. iya bukku'é iyaré'ga mapancé'é, iya mapeddi mataé iyaré'ga malasa olié sibawa iya rilase'é. 21. Tungke' wija-wijanna Imang Harun iya sala-salangngé watakkaléna dé' nawedding makkasuwiyang akkarobangeng inanré lao ri Iyya. 22. Iyakiya weddingngi manré inanré iya riyakkasuwiyangngé, muwi akkarobang inanré iya mapaccingngé muwi akkarobangeng inanré iya mapaccing senna'é. 23. Nasaba iyaro tauwé sala-salangngi watakkaléna, dé' nawedding maddeppériwi paddenring iya passarangngéngngi Bili' Mapaccingngé iyaré'ga mézbaé. Dé' nawedding napanajisi' barab-barang iya puraé ripallaing untu' Iyya, nasaba Iyya'na Puwang, sibawa Iyya'na ritu iya pallaingngéngngi iyaro barab-barangngé.” 24. Iyanaro peraturang-peraturang iya napalettu'é Musa lao ri Harun enrengngé ana'-ana'na, sibawa lao risininna bangsa Israélié.
ANGIMANGENG 22:1-33 1. Puwangnge suroi Musa 2. palettu'i iyaé paréntaé lao ri Harun sibawa ana'-ana'na, “Gaukengngi sibawa siratang aga iya nakkasuwiyangengngé bangsa Israélié banna untu' Iyya, kuwammengngi dé' mucarépaiwi asek-Ku iya mapaccingngé. Iyya'na Puwang. 3. Rékko séddié tau polé ri wija-wijammu ri laleng keadaang najisi' maddeppériwi sining pakkasuwiyang mapaccingngé iya napallaingngé bangsa Israélié untu' Iyya, dé'na nawedding mattumani ri mézbaé. Iyaro peraturangngé takkennai untu' mannennungeng. Iyya'na Puwang. 4. Séddié wija-wijanna Harun iya nakennaé lasa oli iya mabbahayaé, iyaré'ga iya malasa katawangngé angkanna passu manning, riyattéyang manré pakkasuwiyang mapaccing rékko dé'pa naripannessa mapaccing. Séddié imang mancaji najisi'i rékko géssai séuwaé iya najisi'é nasaba nakennai uju. Najisi' towi rékko massui manninna, 5. iyaré'ga géssa olokolo iyaré'ga tau iya najisi'é. 6. Séddié imang iya najisi'é muwi cara aga, tette'i najisi' narapi labu essoé. Sibawa narapi labu essoé dé'pa nawedding manré inanré iya riyakkasuwiyangengngé lao ri Puwangnge rékko dé'pa nacemmé. 7. Labupi essoé namapaccing sibawa wedding manréi, nasaba iyanaro inanréna. 8. Riyattéyangngi manré juku olokolo iya maté riyalé iyaré'ga riyunoé ri olokolo masekkangngé. Rékko manréi, mancaji najisi'i. Iyya'na Puwang. 9. Sininna imangngé harusu'i naturusi sining peraturang iya Uwabbéréyangngé. Rékko dé', pasalai mennang sibawa matéi matu, nasaba najjalékkaiwi sining peraturang iya mapaccingngéro. Iyya'na Puwang, sibawa Iyya ritu pallaingngi mennang untu' alé-Ku. 10. Pakkasuwiyang iya ripallaingngé untu' alé-Ku banna weddingngi nanré kaluwargana imangngé; tau laingngé dé' nawedding, namuni iyaro tauwé sibolai imangngéro iyaré'ga tau napagajiyé. 11. Iyakiya ata-ata iya naelliyé iyaro imangngé sibawa dowi riyaléna iyaré'ga iya rijajiyangngé ri lalempolana, weddingngi manréi inanré bagiyanna imangngéro. 12. Ana' makkunrainna séddié imang iya kawingngé sibawa séddié tau iya tenniyaé imang, dé' nawedding nanré iyaro pakkasuwiyangngé. 13. Iyakiya ana' makkunrainna imangngé iya jandaénna iyaré'ga iya massarangngénna sibawa dé' nappunnai ana' nainappa lisu ri bolana ambo'na sibawa mancaji tanggungenna, weddingngi nanré inanré bagiyanna ambo'na. Banna kaluwarga imangngé bawang wedding manréi iyaro pakkasuwiyangngé. 14. Rékko séddié tau iya tenniyaé anggota kaluwargana imangngé dé' nattungkaiwi manréi inanré iya riyakkasuwiyangengngé lao ri Puwangnge, harusu'i nabbéréyang passulléna lao ri imangngé ritambai duwappulo paresséng. 15. Dé' nawedding imang-ngimangngé panajisi'i pakkasuwiyang iya ripallaingngé untu' Iyya 16. sibawa malleppessangngi nanré tau iya dé'é nappunnai ha' manréi. Iyaro gau'é napancajiwi iyaro tauwé pasala sibawa papoléngengngi pahukkungeng ri yasé'na. Iyya'na Puwang, sibawa iyya pépaccingiwi iyaro pakkasuwiyangngé.” 17. Puwangnge suroi Musa 18. mabbéréyangngi lao ri Harun, ana'-ana'na sibawa sininna bangsa Israélié iyaé sining peraturangngéwé. Rékko séddié tau Israél iyaré'ga séddié tau laing iya monro tette'é ri Israél makkasuwiyang akkarobangeng ritunu untu' paleppe'i tinja'na, iyaré'ga untu' akkarobangeng cenning ati, iyaro olokolo'é harusu'i lai sibawa dé' nawedding engka sala-salanna kuwammengngi weddingngi ritarima. 19. 20. Aja' muwakkasuwiyangeng olokolo iya engkaé sala-salanna, saba' dé' namaélo Puwangnge tarimai. 21. Rékko séddié tau makkasuwiyang lao ri Puwangnge akkarobangeng pappasidamé untu' paleppe'i tinja'na iyaré'ga akkarobangeng cenning ati, iyaro olokolo'é dé' nawedding engka sala-salanna, kuwammengngi weddingngi ritarima. 22. Aja' muwakkasuwiyangengngi lao ri Puwangnge olokolo iya butaé, iya poloé bukunna iyaré'ga maloé, iya mappunnaiyé lettang mannana, iya malasa olié iyaré'ga cola'é. Olokolo makkuwaéro aja' nariyakkasuwiyangeng untu' akkarobangeng inanré ri yasé'na mézbaé. 23. Untu' akkarobangeng cenning atié weddikko makkasuwiyangeng olokolo iya dé'é nasakke lingé, iyakiya untu' mappaleppe tinja, olokolo makkuwaéro dé' nawedding ritarima. 24. Aja' muwakkasuwiyangeng lao ri Puwangnge olokolo iya masolangngé batu lase'na tassipi, rirette, malo iyaré'ga ribuwang. Iyaro gau'é dé' nawedding kajajiyang ri wanuwammu. 25. Olokolo iya rilolongengngé polé ri tau laingngé dé' nawedding riyakkasuwiyangeng untu' akkarobangeng inanré. Iyaro olokolo'é riyangga sala-salangngi sibawa dé' nawedding ritarima. 26. Ana' sapingngé, ana' bimbala'é iyaré'ga ana' bémbé iya nappa jajiyé harusu'i silollong indo'na pitungngesso ittana. Purapiro nappa iyaro olokolo'é wedding utarima untu' akkarobangeng inanré. 27. 28. Aja' muwakkarobangeng indo saping iyaré'ga bimbala iyaré'ga bémbé silaong ana'na massamang esso. 29. Rékko makkarobangekko akkarobangeng sukkuru lao ri Puwangnge, pogau'i iyaro situru peraturangngé, kuwammengngi naritarima akkarobangemmu. 30. Anréi iyaro akkarobangngé iyatoro essoé, sibawa aja' mutaroi muwi céddé untu' pappa bajana. 31. Makkedai Puwangnge, “Turusiwi sining parénta-Ku; Iyya'na Puwang. 32. Aja' mutuna-tunaiwi asek-Ku iya mapaccingngé. Sininna bangsa Israélié, harusu'i sompa-Ka selaku Iya Pommapaccingngé. Iyya'na Puwang sibawa Iyya pancajiko mapaccing. 33. Utiwiko massu polé ri Maséré, kuwammengngi Umancaji Allataalamu. Iyya'na Puwang.”
AMSAL 27:11-14 11. Jellokekka élo-Mu, oh Puwang, pimpikka ri laleng iya malempué, saba' maéga senna balikku. 12. Aja' tabbéréyakka lao ri napessunna balikku, iya gasaékka sibawa bellé nenniya pangancang. 13. Mateppe'ka upéneddingiwi matu akessingenna Puwangnge ri laleng atuwokku ri linoéwé. 14. Amménasano lao ri Puwangnge, péwatangini sibawa pakkasse'ni atimmu; ya, amménasano lao ri Puwangnge!
PAKKATOBBA 10:13-16 13. Tau iya matarengngé pikkiranna napowadai ada-ada mapanré; tau madonggoé parellui riyunru. 14. Tau mapanré paddeppungengngi pangissengeng; rékko mabbicarai tau madonggoé, naméngngi acilakangngé. 15. Asugirengngé nalinrungiwi tosugié, akasiyasingngé naancuru'i tau kasiyasié. 16. Rékko pogau'i makessingngé, sarona iyanaritu tuwo masennang; rékko pogau'i dosa, addimonrinna lebbi maéga dosa.
MARKUS 5:21-43 21. Lisuni Yésus ri liweng tappareng. Ri liwenna tapparengngéro, maéga tau polé makkatulung mattulilingiwi Yésus. 22. Poléni séddi tau iya riyasengngé Yairus. Séddiwi pamimpinna bola assompangngé ri kotaéro. Wettunna naita Yésus, suju'ni ri yolo-Na, 23. namasero paréllaunna, “Pa', malasa seroi ana' makkunraikku. Tulukka talao karawai, kuwammengngi najjappa nadé' namaté!” 24. Nalaona Yésus silaong Yairus. Maéga tau maccowériwi sibawa redde'i Aléna polé tulili. 25. Ri yelle'na engkato séddi makkunrai iya seppuloénna duwa taung malasa maddara iya maladde'é. 26. Sininna asugirenna cappuni napaké untu' mpajai sining dottoro'é, iyakiya dé'gaga mulléi pajjappai, mala pédé' maseroi lasana. 27. Iyaro makkunraié maégani pura naéngkalinga passalenna Yésus. Na ri tengnga-tengngana tau maégaéro, naddeppérini Yésus polé ri monri, 28. nasaba mappikkiri'i, “Assaleng ugéssai bawang jumba-Na, majjappaka' matu!” 29. Nagéssani jumbana Yésus, na iyatoro wettué nappésau maddara. Napérasani makkedaé majjappani. 30. Iyatoro wettué napérasai Yésus makkedaé engka awatangeng massu polé ri Aléna. Nagilinna lao ri tau maégaéro sibawa makkutana, “Niga géssai jumba-Ku?” 31. Nakkeda ana'-ana' gurun-Na, “Aléta Pa' mitai égana tau siredde-redde. Natakkutana mupa Pa', niga géssai Bapa'?” 32. Iyakiya matteru-terui Yésus makkita mattulili untu' sappai tau iya puraé géssai. 33. Iyaro makkunraié iya missengngéngngi aga pura kajajiyang sibawa aléna, ténréni sibawa métau suju' ri yolona Yésus nangakui manengngi. 34. Nainappa makkeda Yésus lao ri makkunraiéro, “Ana'-Ku, nasaba mateppe'ko ri Iyya, majjappako! Laono sibawa salama'. Madising sisenno!” 35. Ri wettu mabbicarana mupa Yésus, engka siyagangngaré tau risuro polé ri bolana Yairus. Nakkeda mennang ri Yairus, “Maténi ana' makkunraitta Puwang. Aja'na tasussaiwi Bapa' Guru.” 36. Tennapaduliwi aga napowada sining tauwéro, nakkeda Yésus lao ri Yairus, “Aja'mumétau, ateppe'ko bawang!” 37. Najoppana Yésus matteru, iyakiya dé' séddi tau Napalalo maccowériwi, sangadinna Pétrus sibawa Yakobus enrengngé Yohanés massilessureng. 38. Wettunna mennang lettu ri bolana Yairus, naitani Yésus keadaangngé sipalu-palu, sibawa méngkalinga teri enrengngé mpating maloppo. 39. Nauttama'na Yésus sibawa makkeda lao ri mennang, “Magi mumarukka sibawa teri? Iyaro ana'é dé' namaté, matinromi bawang!” 40. Nacawa-cawaini mennang Yésus. Nasuroni Yésus massu maneng mennang. Nainappa natiwi indo' ambo'na iyaro ana'é sibawa iya tellu ana' gurun-Na muttama' ri kamara'na iyaro ana'é. 41. Nakkatenninni Yésus limanna iyaro ana'é nainappa makkeda, “Talita kum,” bettuwanna, “Ana' makkunrai, makkeda-Ka lao ri iko: oto'no!” 42. Masitta'ni moto' iyaro ana'daraé najoppa. (Seppulo duwa taung umuru'na.) Sininna iya mitaéngngi iyaro kajajiyangngé hérang senna'ni! 43. Iyakiya nattéyang senna'i Yésus mennang mappaissengengngi iyaro gau'é lao ri nigi-nigi. Nanakkeda-Na, “Panréi iyaro ana'é!”
Bugis Bible 1997
LAI 1997