Biblia en un año

1. Sedequías chaúa año, payandepo yasɨa ma oiko mburuvicha guasurä Judá pe yave, Nabucodonosor mburuvicha guasu Babilonia pegua, yogüeru opaete isundaro reta ndive Jerusalén kotɨ, jare opa oñova reta.
2. Jare onsea año, irundɨ yasɨa, ara chaúa pe, Sedequías oiko mburuvicha guasurä yave, tovaicho reta omombu tëta guasu ikësea,
3. jare opaete Babilonia pegua mburuvicha guasu iyɨvɨrigua mburuvicha reta oike, jare oyembojeyupa reta öke mbɨte pegua pe. Jae ko Nergal-sarezer jare Samgar-nebo; jare tenondegua ete mburuvicha guasu jo pe vae reta, jae ko Sarsequim jare ïru Nergal-sarezer; jare opaete ïru mburuvicha reta, Babilonia pegua mburuvicha guasu iyɨvɨrigua reta.
4. Jare mburuvicha guasu Sedequías jare isundaro reta oecha yave kuae oasa oï vae, otekuarai reta tëta guasu güi. Ñogüɨnoe reta pɨ̈tu yave, tape mburuvicha guasu iko raɨ rupi oasa vae rupi, öke tëta guasu ikësea mókoi oyóvai ñogüɨnoi vae ipäu pe oï vae rupi, jare yogüɨraja tape Arabá kotɨ ojo vae rupi.
5. Ërei ngatu sundaro Caldeaɨgua reta oaɨkuemoña, jare oupitɨ reta Sedequías ɨvɨpe kavi Jericó pegua pe. Oipɨɨ reta jare güɨraja mburuvicha guasu Nabucodonosor jóvai, Ribla pe jae oïa pe, ɨvɨ Hamat pe. Joko pe mburuvicha guasu Nabucodonosor jei mbae oyapo vaerä chupe reta: Javoi Sedequías jovakei opa taɨ reta oñaseokɨ̈ti, jare opaete Judá pegua mburuvicha reta.
6.
7. Sedequías güi opa güɨnoe jesäɨ jare oipokua reta karena pe güɨraja vaerä Babilonia pe.
8. Javoi Caldeaɨgua reta oapɨ mburuvicha guasu jo jare o reta tëta guasu pegua, jare opa ombosururu reta tëta guasu Jerusalén ikësea.
9. Jare Nabuzaradán, sundaro omaeäro vae reta juvicha opa güɨraja Babilonia kotɨ, opaete tëta guasu pe opɨtagüe reta, oñemoïru jae reta ndive vae reta, jare opaetei.
10. Jaeño oeya ɨvɨ Judá pe paravete yae vae reta, mbaetɨ etei mbae güɨnoi vae, omee chupe reta uvarupa jare ɨvɨ.
11. Nabucodonosor, mburuvicha guasu Babilonia pegua oyókuai yepe Nabuzaradán, sundaro omaeäro vae reta juvicha, Jeremías regua, körai:
12. “Ndepo pe toï, eyangareko jese, agüɨye eyuvanga jese, jaeño emee chupe opaete jae oiporu ndeve vae.”
13. Jayave Nabuzaradán, jare tenondegua ete mburuvicha guasu jo pe vae reta, jae ko, Nabusazbán jare Nergal-sarezer, jare opaete ïru mburuvicha reta Babilonia pegua mburuvicha guasu iyɨvɨrigua reta,
14. omondo güɨnoeuka Jeremías tembipɨɨrɨru joka güi, jare omee Gedalías, Ahicam taɨ, Safán jɨmɨmino pe, güɨraja vaerä jëta pe oyangareko jese. Jökorai, Jeremías opɨta oiko opaete vae reta ipɨte pe.
15. Jeremías oimeño vɨteri tembipɨɨ oiko tembipɨɨrɨru joka pe yave, yandeYa jei chupe körai:
16. “Ekua jare ere Ebed-melec Etiopíaɨgua pe: YandeYa Imbaepuere yae ete vae Israel iTumpa, jei: ‘Ambopota cheñee oñemoërakua kuae tëta guasu oyemboaita vae, mbaetɨ ikavi vae. Kuae oyeapo yave, nde oimeta reï.
17. Ërei che jókuae ara rogüɨroasayepeta, ngaraa rea jókuae rekɨɨye chugüi vae reta ipo pe. Che ndeYa ko jae kuae.
18. Che rogüɨroasayepeta, ngaraa ndeyuka reta. Reasayepeta tekove ndive, echa rerovia cheré. Che ndeYa ko jae kuae.’ ”
1. YandeYa jei Jeremías pe, Nabuzaradán, sundaro omaeäro vae reta juvicha oyora güire Ramá pe. Nabuzaradán oväe chupe tembipɨɨ reta Jerusalén pegua reta jare Judá pegua reta ipɨte pe, oyepokua karena pe oï; oyereraja ñogüɨnoi iɨvɨ güi Babilonia kotɨ vae reta ipɨte pe.
2. Sundaro omaeäro vae reta juvicha oenɨi Jeremías ïkotɨa jare jei chupe: “NdeYa Tumpa omoërakua kuae ikavimbae ombou vaerä kuae ɨvɨ re,
3. jare añave oyembopo jókuae omoërakua vae. Kuae oasa pe reta ndive, echa peyoa Tumpa kotɨ jare mbaetɨ peyapo jae jeigüe.
4. Mase, añave voi aekɨ ndegüi karena reyepokua pɨpe vae. Nekɨ̈reɨ reo cherupíe Babilonia pe yave, yaja; che ayangarekota nderé. Ërei mbaetɨ nekɨ̈reɨ reo yave, epɨtaño. Eiparavo ɨvɨ nde reipota reiko pɨpe vae, jaekavita ndeve vae.
5. Nekɨ̈reɨ repɨtaño yave, ekua ye Gedalías, Ahicam taɨ, Safán jɨmɨmino pɨri, mburuvicha guasu Babilonia pegua oñono tëta reta Judá pegua juvicharä oeya vae pɨri, eiko jae ndive jare nerëta pegua reta ndive. Ekua, jaekavita ndevea pe.” Javoi sundaro omaeäro vae reta juvicha omee Jeremías pe mbota jare jembiurä, javoi omboyupavo.
6. Jeremías ojo Gedalías, Ahicam taɨ pɨri Mizpa pe, oiko jae ndive jare jókuae ɨvɨ pe opɨtagüe reta ndive.
7. Sundaro ruvicha reta jare sundaro reta Judá pegua, oimeño ñogüɨnoi kaa rupi vae reta oikuaa yave mburuvicha guasu Babilonia pegua oñono oeya Gedalías, Ahicam taɨ tëta juvicharä, kuimbae jare kuña reta oï vaerä ipo pe, michia reta jare paravete vae reta mbaetɨ oyereraja Babilonia pe vae.
8. Yogüeru isundaro reta ndive Mizpa pe Gedalías pɨri. Jae ko: Ismael, Netanías taɨ; Johanán jare Jonatán, Carea taɨ reta; Seraías, Tanhumet taɨ; Efai Netofaɨgua taɨ reta; jare Jezanías, metei kuimbae Maaca pegua taɨ. Opaete kuae reta yogüeru isundaro reta ndive.
9. Jare Gedalías, Ahicam taɨ, Safán jɨmɨmino, Tumpa jee re jei chupe reta: “Agüɨye pekɨɨye peyeokuai Caldeaɨgua reta pe. Pepɨta peiko kuae ɨvɨ pe, peiko mburuvicha guasu Babilonia pegua jeia re, jare ikavita peiko.
10. Che, apɨtata Mizpa pe, añemoë vaerä peré Caldeaɨgua reta jóvai, yogüeru yave kuae pe. Peparavɨkɨ, pemboɨru vino, temitɨ ia oñemotinigüe jare olivo iasaite, jökorai peiko tëta guasu reta peikota pɨpe vae pe.”
11. Jökorai vi opaete Judáɨgua reta ñogüɨnoi Moab pe vae, jare Amón iñemuña reta ipɨte pe vae, jare Edom pe, jare ïru ɨvɨ pe ñogüɨnoi vae reta oikuaa mburuvicha guasu Babilonia pegua omaeño amogüe Judáɨgua opɨta iɨvɨ pe, jare oñono oeya Gedalías tëta ruvicharä chupe reta vae.
12. Jayave yogüeru ye Judáɨgua reta ɨvɨ Judá pe, opaete ketɨ ketɨ rupi ñogüɨnoia güi, Gedalías pɨri Mizpa pe. Jare omboɨru reta vino jare temitɨ ia oñemotinigüe jeta yeyé.
13. Johanán, Carea taɨ, jare opaete ïru sundaro ruvicha reta opɨta kaa rupi vae yogüɨraja Mizpa pe, Gedalías pɨri,
14. jare jei reta chupe: —¿Mbaetɨ pa reikuaa Baalis, Amón pegua reta juvicha guasu ombou Ismael, Netanías taɨ, ndeyukauka vaerä? Ërei Gedalías mbaetɨ güɨrovia reta.
15. Jayave Johanán, Carea taɨ jei vɨari Gedalías pe Mizpa pe: —Emaeño che taja tayuka Ismael, Netanías taɨ, mbaetɨ eteita kia oikuaa. ¿Maera pa ñamaeñota kia ndeyuka? Echa jökorai yave opata oñemoai kuae Judáɨgua reta yogüeru ndekotɨ vae, jare opata okañɨtei.
16. Ërei Gedalías jei Johanán pe: —¡Agüɨye eyapo! Ismael regua nemiari vae mbaetɨ ko añete.
81. Chekangɨ yae ma aäro ndeporogüɨroasayepe, ¡ërei aäro neñee reño!
82. Cheresa kangɨ yae ma aäro neñee, jae: ¿Kërai yave ra chembopɨakatuta?
83. Echa ɨrɨru mɨmbapire pegua tätati pe vae rami ko che, ërei mbaetɨ cheakañɨ ndeporookuai reta güi.
84. ¿Kërai yave regua pa aärota? ¿Kërai yave pa rejäata chepïaro vae reta?
85. Ipɨapochɨ vae reta oyoo ɨvɨkua cheraperä pe, mbaetɨ yogüɨreko reta ndeporookuai rupi.
86. ¡Opaete ndeporookuai reta añete ko! Chepïaro reta cherekombae reve, ¡chemborɨ!
87. Chemokañɨtei seri reta, ërei mbaetɨ aeya ndeporookuai reta.
88. Emee tekove cheve, ndeporoparareko oï rupi, ayapota ndeporookuai reta remee vae.
1. Iyoa vae otekuarai mbaetɨ tëi reve kia oaɨkuemoña, ërei jupi vae oiko okɨɨyembae reve yaguapope rami.
1. Opaete oime iya vae reta tomboete, agüɨye vaerä ïru vae reta jei ikavimbae vae Tumpa kotɨ jare yandeporomboe kotɨ.
2. Jare iya reta oporogüɨrovia vae ko yave, agüɨye togüɨröɨro reta Tumpa güɨrovia jeko pegua. Ërei toyeokuai kavi chupe, echa iparavɨkɨagüe re oyekou vae reta oporogüɨrovia vae reta ko jare yandeYa oaɨu ko. Kuae eporomboe jare eporomboarakuaa.
3. Kia oporomboe ambuae mboromboe re, jare mbaetɨ güɨrovia mboromboe añete vae yandeYa Jesucristo regua jare mboromboe añete vae kërai yamboete vaerä Tumpa vae,
4. jókuae nunga oyembotuicha ko, jare mbaetɨ etei ko oikuaa mbae ave, oyoaka apoño. Joko güi oë pɨakatúä, ñeapose, ñee ikavimbae Tumpa kotɨ, jare mborogüɨrovia katúä.
5. Jókuae reta oyoakaiño yarakuaambae reta ndive, mbaetɨ oikuaa añete vae. Oyemongeta Tumpa iparavɨkɨ rupi omongana yae vaerä. Agüɨye eñemoïru jókuae nunga reta ndive.
6. Ërei yamboete Tumpa jare yandepɨakatu vae ko, ngana tuichagüe;
7. echa yaa yandesɨ güi yave, mbaetɨ etei mbae yaru, jare ñamano yave, ngaraa etei vi mbae yaraja.
8. Jáeramo, ñanoi yave añave yanderembiurä jare yanderemimonderä, yaiko yandepɨakatu reve.
9. Ërei oipota oikokatu vae reta mbaetɨ ipɨaguasu, oa mbaeyoa pe, jare jeta mbaepotarai ikavimbae vae pe. Jare oñeäka pɨpɨ mbaesusere jare kañɨtei pe.
10. Echa korepoti yaipota yae vae ko güeru opaete mbaembae ikavimbae vae. Jare amogüe vae oipota yae oikokatu ramo, opia iporogüɨrovia güi, jare täta oiporara.
11. Ërei nde kuimbae Tumpa jembiokuai, etekuarai kuaekuae güi jare omomoe jupi vae, Tumpa imboete, mborogüɨrovia, mboroaɨu, mbɨaguasu jare ñemomichi.
12. Eñeraro kavi ndeporogüɨrovia re, egüɨ̈rakua tekove opambae vae re, echa kuaerä Tumpa ndeparavo. Jáeramo remombeu ndeporogüɨrovia jeta vae jóvai.
13. Royókuai Tumpa omee tekove opaete mbaembae pe vae jóvai, jare Jesucristo omombeu kavi añete vae regua Poncio Pilato jóvai vae jee re,
14. eyapo che royókuai jese vae reipoepɨmbae reve, agüɨye vaerä kia ipuere ndemboeko mbae re, yandeYa Jesucristo ou ye regua.
15. Echa jókuae ara oväe yave, Tumpa oechaukata ko yandeYa Jesucristo. Jaeño ko mbaepuere iYa, mburuvicha guasu reta Juvicha guasu, Imbaepuere yae ete mbaepuere güɨnoi vae reta güi vae,
16. jaeño ete ko omanombae vae, oiko tembipe yaya rapembae jese vae pe, mbaetɨ kia ave oecha vae, jare ngaraai oecha vae. Chupe toñemee mbaemboete jare mbaepuere. ¡Amén!
17. Añave rupi oikokatu vae reta eyókuai, agüɨye toyembotuicha, agüɨye toyeko imbaeyekou reta re, jókuae ɨmambae opata vae re. Ërei toyeko Tumpa oikove vae re, jae omee yandeve opaete mbaembae yayerovia vaerä vae.
18. Jare eyókuai vi toyapo ikavi vae, toikokatu mbaembae ikavi oyapo vae pe, tikɨ̈reɨ ngatu omee vaerä güɨnoigüe jare tipɨakavi reta,
19. güɨnoi vaerä mbae ikavi vae opambae vae ara outa vae reta peguarä, jare güɨnoita tekove opambae vae.
20. Timoteo, eyangareko kavi jókuae oñemee ndeve reyangareko vaerä jese vae re. Agüɨye eyeapɨsaka ndaye reta re, echa mbaeä ko, jare arakuaa katu raanga re.
21. Echa amogüe reta güɨrovia jókuae re vae oyemombia mborogüɨrovia güi. Tumpa ipɨakavi toï nde ndive. ¡Amén!
Guarani Bible 2001
Biblia DC Guaraní Bolivia Bolivian Bible Society, 2001