ABBILANGENG 5:1-31 1. Makkedai Puwangnge lao ri Musa, 2. “Abbéréngngi iyaé paréntaé lao ri tau Israélié: Sininna tau iya nakennaé lasa oli iya mabbahayaé, iyaré'ga malasa katawangngé, iyaré'ga iya puraé géssa uju, harusu'i ripassu polé ri akkémanna tau Israélié. 3. Harusu'i mennang risuro lao, kuwammengngi dé' napanajisi'i akkémangngé, iya Uwonroiyé silaong umma'-Ku.” 4. Napogau'i tau Israélié iyaro paréntaé sibawa passui sininna tau iya pada-padaéro polé ri akkémangngé. 5. Nabbéréyangngi Puwangnge lao ri Musa 6. iyaé sining peraturangngé untu' tau Israélié: Rékko séddié tau dé' namatinulu lao ri Puwangnge sibawa mébbui asalang lao ri tau laingngé, 7. iyaro tauwé harusu'i nangakui dosana enrengngé mpajai paccéra'na sibawa sukku, ritambai duwappulo paresséng, lao ri tau iya naparogiyé. 8. Iyakiya rékko tau iya naparogiyéro maténi nadé' nappunnai sumpulolo macawé'é, iyaro paccéra'é harusu'i riwéréng Puwangnge, sibawa mancajiwi bagiyanna imangngé. Iyaro paccéra'é dé' nauttama bimbala laié untu' upacara palledda dosaé lao ri tau iya pasalaéro. 9. Polé ri agi-agi iya nakkasuwiyangengngé tau Israélié lao ri Puwangnge, pakkasuwiyang ripallaingngé mancajiwi bagiyanna imangngé iya tarimaéngngi iyaro pakkasuwiyangngé. 10. Aga iya nakkasuwiyangengngé séddié tau lao ri Puwangnge, mancaji mutowi bagiyanna iyaro tauwé. Banna aga iya nabbéréyangngé lao riséddié imang, mancajiwi bagiyanna iyaro imangngé. 11. Puwangnge suroi Musa 12. mabbéréyangngi iyaé sining peraturangngé lao ri tau Israélié. Wedding jaji séddié worowané bata-bataiwi bainéna. Nasengngi iyaro bainéna dé' namatinulu ri aléna sibawa rotakiwi aléna nasaba kédosalai sibawa worowané laingngé. Iyakiya iyaro lakkaié dé' nappunnai attentung, nasaba iyaro gau'é napogau'i bainéna sibawa massubbu-subbu; dé' gaga sabbinna, sibawa dé' naripoléiwi maggau'. Iyaré'ga, wedding jaji séddié lakkai bata-bataiwi bainéna, padahal iyaro bainéna dé' nakédosala. 13. 14. 15. Ri laleng iya duwa gau'éro, iyaro lakkaié harusu'i natiwi bainéna lao ri imangngé. Harusu towi tiwi pakkasuwiyang iya riyapparelluwangngé, iyanaritu séddi kilo labbu gandong. Iyaro labbu'é dé' nawedding ribolo minnya zaitun iyaré'ga riguguri dupa, nasaba maddupai pakkasuwiyang abbaratang sibawa akkattana untu' tanrangiwi engkanna abata-abatanna lakkainna lao ri bainéna. 16. Harusu'i imangngé suroi iyaro makkunraié lao ri yolona mézbaé sibawa tettong mangolo ri Puwangnge. 17. Nainappa imangngé harusu mala séddi mangko' tana sibawa tirikiwi céddé uwai mapaccing ri lalenna. Purairo harusu'i mala céddé awu polé ri témbo'na Kémana Puwangnge sibawa naputtama'i ri laleng uwaiéro. 18. Nainappa harusu'i nalara gemme'na iyaro makkunraié, sibawa nataroi labbu pakkasuwiyang abata-batangngé ri laleng limanna, na aléna imangngé makkatenning uwai mapai iya mappapolé abusungeng. 19. Purairo harusu'i imangngé mattanro sibawa méllauwi iyaro makkunraié situjuiwi. Harusu'i imangngé makkeda, “Rékko dé' mumalaweng, dé' nakennako abusungeng iya napapolé iyaé uwaiéwé. 20. Iyakiya rékko purako malaweng, 21. tennapodo Puwangnge mébbui asemmu mancaji tanro abusungeng ri yelle'na bangsamu. Tennapodo naébbui katawammu cakkikki sibawa babuwamu maggempung. 22. Uwai iya mappapolé abusungengngé muttama'i matu ri laleng babuwamu sibawa mébbui maggempung nenniya pacakkikkii katawammu.” Iyaro makkunraiyé harusu'i mappébali, “Usitujui; tennapodo Puwangnge mébbui makkuwaro.” 23. Nainappa iyaro imangngé harusu mokii iyaro tanroé ri karettasa lulungngé nainappa naledda sibawa uwai mapaiéro. 24. Nasuroni imangngé iyaro makkunraié ménungngi uwai mapai iya mappapolé abusungeng. Rékko riyénungngi, iyaro uwai mappapoléi pappénedding mapeddi. 25. Harusu'i imangngé malai iyaro pakkasuwiyang labbu'é, nanappaitangngi ri yolona Puwangnge, nainappa natiwi ri yasé'na mézbaé. 26. Nainappa harusu'i mala sikemmo labbu selaku tanrang makkedaé sininna iyaro labbu'é purani riyakkasuwiyangeng, nainappa natunu ri yasé'na mézbaé. Paccappurenna iyaro uwai ripainungengngi iyaro makkunraié. 27. Akkalarapanna iyaro makkunraié purai malaweng, iyaro uwai nassabariwi namapeddi senna; maggempungngi babuwana sibawa cakkikki katawanna. Mancaji tanro abusungengngi matu asenna ri yelle'na bangsana. 28. Iyakiya akkalarapanna dé' napasala, dé' nakennai abusungeng sibawa naullé mupa mémmana. 29. Makkuwaniro peraturanna rékko séddié lakkai mangémpuru sibawa bata-bata makkedaé kédosalai bainéna sibawa carépaiwi aléna. Iyaro worowané harusu'i pangoloi iyaro bainéna ri Puwangnge sibawa imangngé harusu pogau'i iyaro peraturangngé ri aléna. 30. 31. Iyaro worowané leppe'i polé ri asalangngé, iyakiya bainéna, rékko manessai pasala, harusu'i natanggung addimonrinna.
ABBILANGENG 6:1-27 1. Puwangnge suroi Musa 2. mabbéréyangngi iyaé sining peraturangngé lao ri tau Israélié. Tungke' tau worowané iyaré'ga makkunrai iya mattinja'é untu' tuwo mallaing untu' Puwangnge selaku tau nazir, 3. dé' nawedding ménung anggoro sibawa énungeng maseri. Dé' nawedding ménung énungeng maseri iya riyébbué polé ri buwa anggoro'é iyaré'ga buwa-buwa laingngé. Dé' nawedding manré buwa anggoro iya matakkaé mupa iyaré'ga iya marakkoé, iyaré'ga agi-agi iya assalennaé polé ri pong anggoro'é; batunna iyaré'ga muwi colli'na dé'to nawedding nanré. 4. 5. Ri laleng wettu attinjakenna dé' nawedding narette gemme'na iyaré'ga maccukkuru. Ri lalenna wettuéro gemme sibawa janggo'na harusu'i naleppessang tuwo malampé. Tassiyoi ri tinja'na narapi cappu wettu appallaingenna aléna untu' Puwangnge. 6. Iyaro gemme'na mancaji tanrangngi makkedaé ripallaingngi untu' Allataala. Ri wettu takkennana mupa tinja'na dé' nawedding napanajisi' aléna; dé' nawedding maddeppéri uju, namuni iyaro ujuna ambo'na, indo'na iyaré'ga silessurenna. 7. 8. Ri wettu tau nazirna mupa, iyanaritu tau ripallaingngi untu' Puwangnge. 9. Rékko gemme'na séddié tau nazir iya puraé ripallaing mancaji najisi'i nasaba engkai ri seddéna tau iya maté sibawa tennasenna-senna, harusu'i mattajeng pitungngesso ittana; purairo harusu'i nacukkuru gemme'na sibawa janggo'na, nappai mancaji mapaccing. 10. Ri esso iya maaruwaé harusu'i tiwi duwakkaju jangang-jangang iyaré'ga bekku lao ri imangngé ri sumpang Kémana Puwangnge. 11. Manu'-manu' iya sikajué harusu'i nakkasuwiyangeng imangngé untu' akkarobang paddampengeng dosa, na iya sikaju éssi untu' akkarobang ritunu untu' pateddéngngi anajisikenna. Iyatoro essoé harusu'i napallaing paimeng gemme'na lao ri Puwangnge 12. sibawa pakabaruiwi abbéréyang aléna selaku tau nazir. Wettu labe'énna dé' naribilanna nasaba mancaji najisi'ni. Selaku akkarobangeng passullé aroging harusu'i makkasuwiyangeng sikaju ana' bimbala iya makkéumuru' sitaungngé. 13. Rékko leppe'ni tinja'na séddié tau nazir, harusu'i napogau' iyaé upacaraé. Iyaro tauwé harusu'i naantara lao ri sumpang Kémana Puwangnge 14. sibawa tiwi lao ri Puwangnge tellukkaju olokolo iya dé'é gaga sala-salanna: sikaju ana' bimbala lai makkéumuru' sitaung untu' akkarobangeng ritunu, sikaju ana' bimbala komba makkéumuru' sitaung untu' akkarobangeng paddampengeng dosa, sibawa sikaju bimbala lai untu' akkarobangeng pappasidamé. 15. Harusu towi makkasuwiyangeng sibaku roti iya riyébbué dé' napaké ragi, iyanaritu roti mallébu iya riyébbué polé ri labbu'é ricampuru sibawa minnya zaitun, sibawa béppa nipi iya risapuiyé minnya zaitun. Rilainnaéro harusu towi makkasuwiyangeng akkarobangeng ripatala sibawa akkarobangeng énungeng. 16. Harusu'i natiwi maneng imangngé iyaro lao ri yolona Puwangnge, nainappa makkasuwiyangeng akkarobangeng paddampengeng dosa sibawa akkarobangeng ritunu. 17. Nasibawang roti sibakuéro, harusu'i nakkasuwiyangeng iyaro bimbala laié lao ri Puwangnge selaku akkarobangeng pappasidamé. Kuwaéttopa akkarobang ripatalaé sibawa akkarobang énungengngéro harusu'i nakkasuwiyangeng lao ri Puwangnge. 18. Iyaro tau nazir-é harusu'i nacukkuru gemme'na ri sumpang Kémana Puwangnge, sibawa maggenrungengngi ri laleng api onrong akkarobangeng pappasidaméro iya mattengngangngé ritunu. 19. Purairo, rékko purani rinasu poppang yolona bimbala laiéro, harusu'i nala imangngé sibawa palénne'i silaong séddi roti lébu sibawa séddi béppa manipi polé ri bakuéro, ri laleng limanna tau nazir-éro. 20. Nainappa imangngé harusu majjellokengngi iyaro inanré selaku pabbéré ripallaing lao ri Puwangnge; iyanaro bagiyang mapaccing iya mancajiyé bagiyanna imangngé, rilainnaé dadana sibawa poppang bimbala lai iya manuru peraturangngé mancajiwi bagiyanna imangngé. Purapiro nappa tau nazir-é wedding ménung uwai anggoro. 21. Iyanaro peraturanna untu' tau nazir-é; iyakiya rékko séddié tau nazir majjanciyangngi akkarobangeng iya pakacauriyéngngi sara'-sara' tinja'na, harusu'i narupai sibawa sicoco aga iya najjanciyangngéro. 22. Puwangnge suroi Musa 23. palettu'i lao ri Harun sibawa ana'-ana'na makkedaé harusu'i mennang powadai iyaé ada-adaé wettunna mennang barakkakiwi bangsa Israélié: 24. Tennapodo Puwangnge barakkakiko sibawa piyarako. 25. Tennapodo Puwangnge makessing atiwi sibawa makacuwai lao ri iko. 26. Tennapodo Puwangnge mamaséiko sibawa mpérékko adaméngeng. 27. Nanakkeda Puwangnge, “Rékko nateppui mennang asekku selaku barakka lao ri bangsa Israélié, maélo-Ka barakkakiwi mennang.”
AMSAL 30:8-12 8. Saba' mekessing ati-Ko lao ri iyya, oh Puwang, Mupancajika pada-pada bulu masse'é. Iyakiya rimunri massubbu-Ko polé ri iyya, naumancaji métau. 9. Ri Iko, oh Puwang, mangobbika, lao ri Puwangnge maréllauka, 10. “Aga akkégunana ri alé-Mu rékko matéka sibawa nonno ri kalebbong kuburu'é? Weddigga tau maté poji-Ko sibawa mabbirittangngi atinulurem-Mu? 11. Engkalingai, oh Puwang, sibawa amaséika. Puwang tulukka!” 12. Purani upinra mpatikku mancai séré-séré marennu, Muwalai amessékku na-Mupennoika sibawa ariyo-riyong.
PAKKATOBBA 11:1-3 1. Nacéccé Puwangnge tau iya paké timbangeng iya macéko-cékoé iyakiya masennangngi sibawa tau iya paké timbangeng iya teppa'é. 2. Tau matempoé ripakatunai matu; tau iya pakariyawaéngngi atinna iyanaritu mapanréi. 3. Tau makessingngé rirénréngngi ri alempurenna; tau iya pojiyéngngi mabbellé riancuru'i ri belléna.
MARKUS 8:22-38 22. Lettu'ni mennang ri Bétsaida. Engka kuwaro natiwi tauwé séddi tau buta lao ri Yésus, sibawa naéllauwi kuwammengngi nakarawai iyaro tau butaé untu' pajjappai. 23. Nanakkatenninni Yésus limanna iyaro tau butaé nainappa narénréng massu ri saliweng kota. Nainappa namméccui Yésus matanna iyaro tauwé. Napalénne'i liman-Na ri matanna tauwéro, nainappa makkutana ri tau butaéro, “Engka mullé mita makkekkuwangngé?” 24. Makkitani iyaro tauwé liyolo, nainappa makkeda, “Iyyé, engka uwita joppa-joppa iyakiya pada-padai pong aju-kajungngé.” 25. Napalénne'si paimeng limanna Yésus ri tauwéro. Iyaé sisengngé makkuragani iyaro tauwé makkita gangka ulléna. Majjappani matanna, naita manenni sibawa manessa. 26. Nainappa Yésus makkeda, “Lisuno. Aja'na mulisu ri kotaéro!” 27. Laoni Yésus sibawa ana'-ana' gurun-Na ri désa-désaé ri seddéna Kaisaréa Filipi. Na ri tengnga laleng, makkutanani Yésus lao ri mennang, “Manuru' adanna tauwé, niga Iyya?” 28. Nappébali mennang, “Engka makkeda: Yohanés Paccemmé; engkato makkeda Elia, na laingngé makkeda: sala séddinna nabié.” 29. Nakkutana Yésus, “Iyakiya manuru' iko, niga Iyya'é?” Nappébali Pétrus, “Bapa' iyanaritu Arung Pappassalama'é!” 30. Nainappa napparéngngerangenni Yésus lao ri mennang, kuwammengngi aja' nappaddissengengngi lao ri nigi-nigi passalenna Aléna. 31. Purairo mappammulani Yésus paggurui ana'-ana' gurun-Na makkedaé Ana'na Tolinoé pasti napéneddingi maéga anrasa-rasang, sibawa riyéwai risining pamimpingngé, kapala-kapala imangngé, sibawa guru-guru agamaé. Riyunoi matu, iyakiya ri esso matellué, ripaoto'i paimeng. 32. Manessa senna'i nabbirittang Yésus gau'éro lao ri ana'-ana' gurun-Na. Nanagettenni Pétrus Yésus libenréng, nanamparengngi. 33. Iyakiya gilingngi Yésus nanaitai ana'-ana' gurun-Na, nainappa nampareng Pétrus, “Addésu'ko polé kuwaé, Paggoda! Iyaro pikkirammu, pikkirang tolino; tenniya pikkiranna Allataala!” 34. Nainappa naobbi Yésus tau maégaé iya engkaé kuwaro silaong ana'-ana' gurun-Na. Nanakkeda lao ri mennang, “Tau iya maéloé maccowéri-Ka, harusu'i nallupai apentingeng aléna, nainappa naéssang sallina, natteru maccoweri-Ka. 35. Saba' tau iya maéloé méwaiwi atuwonna, ateddéngengngi matu atuwong. Iyakiya tau iya makkarobangengngéngngi atuwonna untu' Iyya sibawa untu' Karéba Madécéng polé ri Allataala, napassalama'i matu. 36. Aga sarona lao riséddié tau, rékko sininna linoéwé mancajiwi appunnangenna, iyakiya ateddéngengngi atuwonna? 37. Weddigga atuwongngé risélé sibawa anu laingngé? 38. Rékko séddié tau masiri mangakui-Ka sibawa pappagguruwak-Ku ri wettu madorakaé sibawa majaéwé, Ana'na Tolinoé masiri towi mangakuiwi iyaro tauwé, ri wettu poléna matu sibawa akuwasanna Ambo'-Na, nasibawang malaéka'-malaéka' mapaccingngé.”
Bugis Bible 1997
LAI 1997