ULANGENG 31:1-30 1. Mabbicarasi Musa lao ri bangsa Israélié, 2. adanna, “Makkekkuwangngé umuru'ku seratuni duwappulo taung nadé'na uwulléi mancaji pamimpimmu. Ri lainnaéro Puwangnge pura powadai makkedaé dé' naweddikka malléttoiwi Salo Yordan. 3. Aléna Puwang Allataalamu joppa matu ri yolomu sibawa paccappui bangsa-bangsa iya monroé kuwaro, angkanna muwulléi tudangiwi wanuwanna mennang. Yosua matu mancaji pamimpimmu, pada-pada napowadaé Puwangnge. 4. Puwangnge maélo paccappui iyaro bangsa-bangsaé, pada-pada Nacauna Sihon sibawa Og, arunna tau Amorié, nenniya mancuru'i wanuwanna mennang. 5. Puwangnge mpérékko matu apakalang lao ri mennang, naharusu'ko gaukengngi pada-pada iya upowadangngékko. 6. Sitinajako pakkasse'i atimmu sibawa barani! Aja' mumétau lao ri mennang, saba' Aléna Puwang Allataalamu maélo tulukko. Dé' Namaélo pakacéléko iyaré'ga salaiko.” 7. Nainappa Musa mobbii Yosua, na ri yolona sininna bangsa Israélié makkedani ri Yosua, “Sitinajako pakkasse'i atimmu sibawa barani, Yosua! Iko ritu pimpingngi matu iyaé bangsaé untu' tudangiwi wanuwa iya najjanciyangngé Puwangnge lao ri néné-nénéna mennang. 8. Aléna Puwangnge pimpikko sibawa tulukko. Dé' napakacéléko iyaré'ga nasalaiko. Rimakkuwannanaro aja' mumétau iyaré'ga manenneng.” 9. Nanaokirenni Musa hukkunna Puwang Allataala nanawéréngngi imang-ngimang Léwié iya risuroé murusu'i Petti Assijancingngé, sibawa lao risining pamimpinna Israélié. 10. Naparéntanni mennang, “Ri cappa'na tungke' pitu taung, ri laleng taung pappaledda inrengngé ri pésta Kalampang Daud-daungngé, 11. harusu'ko bacai iyaé sining hukkungngé sibawa sadda macenno untu' sining tau Israél iya polé sompai Puwang Allataalamu ri onrong iya Napilé. 12. Suroi sininna tau worowané, makkunraié sibawa ana'-ana'é nenniya tau laing iya monroé ri kota-kotamu maddeppungeng untu' méngkalingai iyaro abbacangengngé, kuwammengngi nagguru untu' pakalebbii Puwang Allataalamu sibawa matinulu turusiwi sining parénta-Na. 13. Nasibawang caraéro ana'-ana'mu iya dé'éppa naengka naéngkalingai passalenna hukkunna Puwang Allataalamu weddingngi naéngkalinga sibawa magguru pakalebbii Puwangnge ri wettu tuwona mennang ri wanuwa iya dé'énna namaitta mutudangiwi ri liwenna Salo Yordan.” 14. Nainappa makkeda Puwangnge lao ri Musa, “Dé'na namaittana atuwommu. Jaji, obbini Yosua namutiwii ri Kéma-Ku, kuwammengngi weddik-Ka mpéréngngi panunju-panunju.” Nanalaona Musa sibawa Yosua ri Kémana Puwangnge, 15. nanappaitanni Aléna Puwangnge lao ri mennang ri laleng alliri ellungngé seddéna sumpanna Kémaé. 16. Adanna Puwangnge lao ri Musa, “Macawé'ni ajjalemmu. Matémuna, bangsa Israélié dé' namatinuluna ri Iyya sibawa massakkarengngi assijancing iya Uwébbué sibawa mennang. Nasalaika matu untu' massompa ri déwata-déwataé iya risompaé ri wanuwa iya dé'énna namaitta nauttamakiwi mennang. 17. Rékko kajajiyangngi iyaro, ménré'i matu cai-Ku lao ri mennang. Usalaiwi matu mennang sibawa Upaccappui. Maéga abala masero kennai matu, nainappa mainge matu mennang makkedaé iya manennaro kajajiyangngi nasaba Iyya, Allataalana mennang, dé'na sibawangngi mennang. 18. Iyaro wettué dé'na Umaélo tulungngi, nasaba purani mennang nasompa déwata-déwata laingngé sibawa pogau'i majaé. 19. Makkekkuwangngé okini iyaé élongngé na mupagguruwangngi bangsa Israélié selaku asabbiyang lao ri mennang. 20. Maéloka tiwii mennang ri wanuwa iya sugié namacommo, pada-pada iya Uwajjanciyangngé ri néné-nénéna. Kuwaro tuwoi matu sibawa masennang nenniya lolongengngi sininna inanré iya napparelluwangngé. Iyakiya ri munri balé'i matu sibawa massompa déwata-déwata laing. Nasampéyakka matu mennang sibawa massakkarengngi assijancik-Ku, 21. sibawa maéga abala masero kennai matu mennang. Iyakiya iyaé élongngé tette'i ripuwélong nenniya ripaké selaku asabbiyang lao ri mennang. Mala makkekkuwangngé, ri wettu dé'napa Utiwii mennang ri wanuwa iya Uwajjanciyangngé, Uwisseng pikkiranna mennang.” 22. Iyatoro essoé naokii Musa iyaro élongngé, nainappa nappagguruwang lao ri bangsa Israélié. 23. Nanabbicara Puwangnge lao ri Yosua, ana' Nun, adan-Na, “Sitinajako pakkasse'i atimmu sibawa barani, Yosua! Mupimpingngi matu bangsa Israélié muttamakiwi wanuwa iya Uwajjanciyangngé lao ri mennang, na maélo-Ka tulukko.” 24. Nanaokini Musa hukkunna Allataala ri laleng séddié kitta. Naokii sibawa matutu polé ri pammulanna lettu ri paccappurenna. 25. Wettunna tépuni, makkedani lao risining imang Léwié iya risuroé murusu'i Petti Assijancingngé, 26. “Allani iyaé kitta Hukkunna Allataala, namutaroi ri seddéna Petti Assijancinna Puwang Allataalamu, kuwammengngi tette'i engka kuwaro selaku asabbiyang lao ri bangsaéro. 27. Uwisseng mennang matedde ati senna sibawa napoji maronta. Ri wettu tuwoku mupa maronta'i mennang lao ri Puwangnge; apalagi matti, rékko maténa! 28. Makkekkuwangngé suroi sininna pamimping bangsaé sibawa sining parawiraé maddeppungeng ri yoloku, kuwammengngi weddikka palettukengngi gau'-gau'éwé lao ri mennang. Langié sibawa tanaé uwobbi selaku sabbi lao ri mennang. 29. Uwisseng makkedaé matékuna, iyaro sining tauwé mancaji majai sibawa sampéyangngi aga iya puraé uwappagguruwang lao ri mennang. Nanakennai matti abala, nasaba naébbui Puwangnge macai ri laleng napogau'na aga iya Nattéyangngé.” 30. Nanapowadani Musa iyaé élongngé gangka cappu na sininna bangsa Israélié méngkalingai.
ULANGENG 32:1-52 1. “Engkalingai éh langi, macinnaka mabbicara; éh lino, pasangngi daucculimmu! 2. Tennapodo pappagguruwakku nonnoi pada-pada bosié, sibawa ada-adakku tetti pada-pada cinoddoé, samanna bosi canecci ri tompo'na wella-wellaé, pada-pada bosi rajaé ri yasé'na tanet-tanengngé. 3. Maélo-Ka pojiwi asenna Puwangnge. Abbirittangngi arajanna Allataalata! 4. Puwangnge Pangéwangemmu iya baranié, sukku winru-Na, sibawa adélé sininna lalen-Na. Matinulu Allataalaku, dé'gaga acéko-cékong ri Aléna, Napogau'i iya makessingngé sibawa tongengngé. 5. Iyakiya iko iyanaritu bangsa iya dé'é namatinulu, sibawa dé' nasitinajana mancaji umma'-Na, bangsa iya pennoé acéko-cékong sibawa dosa. 6. Makkuwakoga wale'i akessingenna Puwangnge, éh sining tau madonggoé sibawa dé'é akkalenna? Tenniyaga Ambo'mu, Pappancajimmu, iya pancajiyékko séddi bangsa? 7. Engngerangngi wettu riyolo, pénessaiwi wettunna sippangka-sippangka iya labe'é. Akkutanangngi ri tomatowammu, kuwammengngi napaissengiko mennang. 8. Wettunna Iya Pommatanré mattawangngi tanaé, tungke' bangsa ripattentuwangngi daérana sibawa séuwa déwata selaku panguwasana. 9. Iyakiya wija-wijanna Yakub ripiléi ri Puwangnge untu' Aléna muto. 10. Nalolongengngi mennang mattengngang sollé ri onrong iya masino-sinoé ri padang makabuttué. Nainappa nalinrungi sibawa napiyara sibawa jagaiwi mennang pada-pada appunnangen-Na. 11. Pada-pada bokangngé iya pagguruéngngi ana'na luttu tikkengngi ri pannina iya mallebba'é sibawa soppoi ri yasé'na panni-pannina, 12. makkuwaniro aléna Puwangnge pimpingngi umma'-Na, dé'gaga déwata laing sibawangngi Aléna. 13. Naébbui mennang makuwasaiwi sining bulué; nanréi mennang wassélé'na sining dare'é sibawa ménung cani liya polé ri bulu-bulu batué. Lolongengngi mennang minnya polé ri pong zaitungngé iya tuwoé ri tana mabbatué. 14. Saping sibawa bémbé bimbala'na mennang powassélé maéga susu; olokolo'na mennang kaminang makessing, gandong sibawa uwai anggoro'na mennang kaminang magello. 15. Mancaji sugii umma'na Puwangnge, iyakiya napoji maronta, macommo-commo mennang, messo inanré. Nainappa mennang nasalai Allataala, Pappancajinna sibawa nasampéyang Pappassalama'na iya poré. 16. Massompai mennang barahala, angkanna mangémpuru Puwangnge, ménré'i cai-Na nasaba jaéro. 17. Makkasuwiyangngi mennang akkarobangeng lao ri roh-roh majaé iya tenniyaé Allataala, lao ri déwata-déwata iya dé'é mennang naissengngi, déwata-déwata baru iya dé'é naétauriwi toriyolona mennang. 18. Dé' najampangiwi mennang Pappassalama'na iya poré, nallupaiwi mennang Allataalana iya mabbéré atuwong. 19. Naitana gau'éro, macaini Puwangnge, sibawa sampéyangngi ana'-ana'-Na. 20. Adan-Na, ‘Dé'na Umaélo tulunni mennang; muwi Uwita pékkugi accappurenna mennang. Saba' iyaro bangsaé matedde ati sibawa dé' sises-siseng namatinulu. 21. Naébbu-Ka mennang mangémpuru lao ri tenniyaé Allataala, sibawa macai ri dato'-dato' barahalana mennang. Na-Uwébbui umma'-Ku mangémpuru lao ri iya tenniyaé bangsa, sibawa macai lao ri bangsa iya madongo'é. 22. Malluwa-luwa'i matu cai-Ku pada-pada apié iya makkanré lettu ri linona tau maté. Iyaro apié nanréi linoé sibawa sininna wassélé'na, sibawa sining bulué lettu ri ure-ure'na. 23. Matteru-teru Upapolé abalaé, Uwattémbakeng sininna pana-Ku lao ri mennang. 24. Matéi matu mennang nasaba semmeng sibawa alupureng, sibawa nasaba lasa iya mappakatau-taué. Uleppessangngi mennang rilurui ri olokolo masekkangngé, sibawa ripitto ri ula mamosoé. 25. Musué tiwi amaténg ri laleng-lalengngé; nakennai sining tauwé ri bolaé appakatau-taurengngé. Kalloloé sibawa ana' daraé ripaccappui matu, makkuwatoro ana' loloé sibawa tomacuwaé. 26. Macinnaka pallennye sisengngi mennang, kuwammengngi dé'na Nariyéngngeranna mennang. 27. Iyakiya dé' Umaélo matempo balinna Israélié; ajakké mennang kacéléi sibawa makkeda makkedaé nacaui mennang umma'-Ku,’ padahal iyya ritu pogau'i. 28. Israélié séddiwi bangsa iya dé'é nappunnai attimbangeng; pappéjeppu dé'gaga ri mennang. 29. Ebara'na mennang mapanréi, najeppuiwi matu mennang, sibawa pikkiri'i accappurenna mennang. 30. Pékkugi séddi tau naullé lellungngi sisebbu tau, sibawa duwa tau palariwi seppulo sebbu tau? Puwangnge, Allataalana mennang, pura balu'i mennang; risalaini mennang ri Allataala iya poré. 31. Naisseng balinna Israélié makkedaé pallinrunna mennang dé' napada-pada Allataala pallinrunna Israélié. 32. Saba' majai mennang pada-pada Sodom sibawa Gomora, pada-pada pong anggoro iya mapaié sibawa paracung buwana. 33. Uwai anggoro'na mennang iyanaritu racung ula mamosoé. 34. Naéngngerang Puwangnge pangkaukenna balinna umma'-Na sibawa hukkungngi matu mennang ri wettunna. 35. Puwangnge mpale'i matu sibawa hukkungngi mennang, dé'na namaitta nabinasa mennang; wettu ancurukenna mennang dé'na namaitta napolé. 36. Puwangnge passalama'i matu umma'-Na sibawa mamaséiwi ata-atan-Na, rékko naitai teppaullé sibawa acappureng awatangeng. 37. Namakkutana matu Puwangnge ri umma'-Na, ‘Kégani déwata-déwata mawatang iya muwattuwangngé?’ 38. Nanréi mennang lunra iya muwakkasuwiyangengngé, sibawa ménung uwai anggoro iya muwakkarobangengngé. Suroi mennang polé tulukko, leppessangngi mennang mancaji pallinrummu. 39. Itani, Iyya Allataala Iya Séuwaé, dé'gaga Allataala sangadinna Iyya. Paunoka sibawa mappatuwo, loi sibawa mappajjappa. Rékko tinda'ka, dé' muwi séddi tau mulléi méwa. 40. Nasaba alé-Ku, Allataala iya tuwoé, Uwakkai limak-Ku sibawa mattanro: 41. Maéloka masai peddak-Ku iya lala-lala'é, sibawa pajoppai pahukkungengngé. Uwale'i sininna balik-Ku sibawa Uhukkungngi sininna iya benciyékka. 42. Pana-pana-Ku ripennoiwi matu ri darana mennang; sininna iya méwaékka Uwunoi sibawa peddak-Ku. Dé' Uleppessangngi muwi niga méwa-Ka; tau ritahangngé sibawa iya maloé harusu'i matéto. 43. Eh bangsa-bangsa, pojiwi umma'na Puwangnge, saba' Puwangnge hukkungngi sininna iya mpunoéngngi mennang. Makkabale'i lao ri balin-Na iyakiya maddampengengngi dosana umma'-Na.” 44. Musa sibawa Yosua ana' Nun powadai iyaro élongngé, angkanna sininna bangsa Israélié naulléi méngkalingai. 45. Puranana napalettu sining pappagguruwanna Puwangnge lao ri bangsa Israélié, 46. makkedani Musa, “Puriyatini sininna parénta iya uwéréngngékko essoéwé. Pagguruwangngi ana'-ana'mu, kuwammengngi namatinulu pogau'i sininna hukkunna Puwangnge. 47. Iyaro pappagguruwangngé tenniya ada-ada kosong, sangadinna atuwommu. Turusiwi sininna paréntaéro, kuwammengngi mumalampé sunge ri wanuwa iya dé'énna namaitta mutudangiwi ri liwenna Salo Yordan.” 48. Iyatoro essoé nakkeda Puwangnge lao ri Musa, 49. “Laono ri Buluna Abarim ri wanuwa Moab ri liwenna kota Yérikho. Nainappa ménré ri Bulu Nébo namutiroi tana Kanaan iya dé'énna namaitta Uwabbéréyangngi lao ri bangsa Israélié. 50. Matéko matu ri tompo'na buluéro, pada-pada Harun silessuremmu maté ri Bulu Hor. 51. Iko sipadduwa dé' mumatinulu ri Iyya sibawa dé' mupakalebbika ri yolona bangsa Israélié wettummu engka ri mata uwai Mériba, seddéna kota Kadés, ri padang kessi Zin. 52. Rimakkuwannanaro dé' naweddikko muttama ri wanuwa iya Uwabbéréyangngé lao ri bangsa Israélié; banna weddikko mitai polé mabéla.”
AMSAL 40:6-12 6. Puwang, pékkugi égana winru-Mu untu' aléta, oh Puwang, Allataalaku, dé'gaga padam-Mu! Maéga rancana-Mu iya mappabengngaé untu' idi, dé' namakkullé ricurita maneng. 7. Pakkasuwiyang sibawa akkarobangeng ripatala dé' Mupojiwi, akkarobangeng ritunu sibawa akkarobangeng pappaledda dosa dé' Mutuntu'i. Iyakiya puraka Muwéréng daucculing iya mullééngngi méngkalingai saddam-Mu. 8. Naumakkeda, “Iyya'naé, ri laleng kitta lulungngé tarokii untu' aléku: 9. Masennakka pogau'i élo-Mu, oh Allataala, utaroi hukkum-Mu ri laleng ati.” 10. Ri laleng addeppungenna umma'-Mu uwabbirittangngi karéba marennué makkedaé pura-Ko passalama'ki. Na dé'gaga appésaunna uwappallebbangeng iyaro gau'é, Muwisseng maneng iyaro, oh Puwang. 11. Iyaro karéba asalamakengngé dé' utaroi ri laleng ati, pattulung sibawa atinulurem-Mu tuli uwabbirittangngi. Ri yolona addeppu-deppungenna umma'-Mu dé' uwammekko, iyakiya uwappallebbangengngi pammasé sibawa atinulurem-Mu. 12. Puwang, aja' Muwappésau mamaséika; tuli linrungika sibawa pammasému nenniya atinulurem-Mu.
PAKKATOBBA 13:11-12 11. Asugireng iya rilolongengngé sibawa magampang masitta towi matu akurangeng; iyakiya waramparang iya ripaddeppungengngé taccéddé-céddé pédé tattambai. 12. Rékko paddennuwangngé dé' naripennoi, maddéké-rékéi baténgngé; rékko ritarimai cinnaé, masennangngi atié.
LUKAS 7:31-50 31. Nainappa mabbicarasi Yésus, adan-Na, “Agana harusu' Upasibandingengngi sining tauwé makkekkuwangngéwé? Pada-padai aga mennang? 32. Pada-padai mennang ana'-ana' iya tudangngé ri pasaé; sikonrong gora lao ri laingngé, ‘Riyakkélongekko élong mariyo-riyo, iyakiya dé' mumaélo séré! Riyélongekko élong mabbarata, na iko dé' mumaélo teri!’ 33. Poléi Yohanés Paccemmé – mappuwasai sibawa dé' nainung anggoro – namumakkeda, ‘Nauttamakiwi sétang!’ 34. Poléi Ana'na Tolinoé – manréi sibawa ménung – mumakkeda, ‘Itai iyaro tauwé! Mabuwaja, pammabokeng, sellaona passinge' simaé sibawa sellaona tau madosaé.’ 35. Namuni makkuwaro, amaccanna Allataala pabuttiwi polé ri sininna tau iya tarimaéngngi.” 36. Engka séddi tau Farisi riyaseng Simon, naundangngi Yésus manré. Laoni Yésus ri bolana sibawa tudang manré. 37. Engkato ri kotaéro séddi makkunrai iya tuwoé ri laleng dosaé. Wettunna naéngkalinga makkedaé Yésus manréi ri bolana tau Farisiéro, laoni sibawa tiwi séddi botolo' mallise' minnya' wangi. 38. Tettongngi ri munrinna Yésus ri seddéna ajé-Na sibawa teri nanarica'i ajéna Yésus sibawa uwai matanna. Nainappa narakkoi ajéna Yésus sibawa gemme'na nappa nabau sibawa natirikinna minnya' wangi. 39. Wettunna tau Farisié iya mundangngengngi Yésus naita iyaro gau'é, makkedani ri laleng atinna, “Akkalarapanna iyaé tauwé nabi, tentu Naisseng niga iyaro makkunrai géssaéngngi, sibawa iyaro makkunraié tuwoi ri laleng dosaé!” 40. Nakkeda Yésus lao ri Simon, “Simon, engka maélo Upowadakko.” Nappébali Simon, “Iyyé, Pa' Guru, tapowadani.” 41. Nakkeda Yésus, “Engka duwa tau makkinreng lao ri séddié tau iya mappainreng dowié. Iya séddié makkinreng lima ratu dowi péra', naiya séddié limappulo dowi péra'. 42. Iya duwaro dé' naulléi paleppe'i inrenna, narileddana iyaro inrenna. Nah, niga ri yelle'na iya duwa tauwéro kaminang mamaséiwi matu tau iya mappainrengngéro dowi?” 43. Nappébali Simon, “Ukira-kirai tau iya kaminang maégaé inrenna riledda!” Nappébali Yésus, “Tongeng pallolongemmu.” 44. Nainappa makkita Yésus lao ri makkunraiéro sibawa makkeda lao ri Simon, “Muwitaga iyaro makkunraié? Lao-Ka ri bolamu, nadé' mupassadiya uwai untu' pépaccingiwi ajé-Ku, iyakiya iyaé makkunraié purani napépaccingi ajé-Ku sibawa uwai matanna, enrengngé rakkoiwi sibawa gemme'na. 45. Iko dé' muduppai-Ka sibawa pabbau, iyakiya iyaé makkunraié dé' nappésau bauwi ajé-Ku sipongek-Ku engka kuwaé. 46. Iko dé' mutirikiwi minnya' uluk-Ku, iyakiya iyaé makkunraié purani natiriki minnya' wangi ajé-Ku. 47. Tongeng: pammasé iya battowaéro mappaitangngi makkedaé dosana iya maégaéro riyaddampengenni! Rékko céddé'mi tauwé riyaddampengeng, céddé' tommi mamasé matu.” 48. Nakkeda Yésus lao ri makkunraiéro, “Riyaddampengenni dosa-dosamu.” 49. Sining tau laingngé iya tudangngé manré sibawa Yésus mammulani makkeda séddié lao ri laingngé, “Niga iyaé tauwé naweddingngi maddampengengngi dosaé?” 50. Iyakiya makkedai Yésus lao ri makkunraiéro, “Nasaba mateppe'ko lao ri Iyya, ripassalama'ko. Laono sibawa damé!”
Bugis Bible 1997
LAI 1997