1 SAMUEL 10:1-27 1. Nainappa nala Samuél kendi mallise'é minnya zaitun, nanatiri'i iyaro minnya'é ri tompo ulunna Saul, sibawa bauwi Saul nakkedato, “ Puwangnge pura lanti'ko mancaji arunna Israélié umma'-Na. Muparéntai matu umma'-Na sibawa linrungiwi mennang polé risining balinna. Iyanaé tanranna lao ri iko makkedaé Puwangnge pura piléko mancaji arunna umma'-Na: 2. Musalaikku essoéwé, siruntu'ko matu sibawa duwa tau worowané ri seddéna kuburu'na Rahél ri Zélzah ri daérana Bényamin. Makkedai matu mennang ri iko, makkuwaé, Riruntu'ni sining kaleddé iya musappaéro. Makkekkuwangngé dé'na namanenneng ambo'mu passalenna iyaro olokoloé, iyakiya matteru-terui makkutana aga harusu napogau' untu' lolongekko.” 3. Makkedasi Samuél, “Polé kuwaro joppako matteru lettu ri aju onrong assompangngé ri Tabor. Kuwaro siruntu'ko matu tellu tau worowané iya mattengngangngé mattuju ri Bétel untu' makkasuwiyangeng akkarobangeng ri Allataala. Séddi tau rénréng tellu kajunna ana' bémbé, séddiéssi tiwii tellubbatu roti, na séddiéssi tiwii popang bingkulang mallise anggoro. 4. Mabbéré sellengngi matu ri iko sibawa nawérékko matu duwabbatu roti iya harusu'é mutarima. 5. Purairo harusu'ko lao ri bulu-buluna Allataala ri Gibéa, onrong akkémanna tau Filistingngé. Ri sumpang muttama'é ri kotaé, siduppako matu sibawa sirombongang nabi iya nonnoé polé ri bulu-bulu akkarobangengngé. Séré-séréi mennang sibawa gora-gora, maggambusu, marrebana, massuling sibawa makkacapi. 6. Iyatoro wettué nakuwasaiko matu Rohna Puwangnge namuwaccowériwi matu séré-séréna sibawa gora-gorana mennanro, nainappa riwéréng sipa baru angkanna mancaji tau laing. 7. Rékko kajajiyang manenniro, pogau'ni agi-agi iya mupérasaé makessing, nasaba Allataala sibawakko. 8. Purairo harusu'ko lao ri Gilgal sibawa mattajeng kuwaro pitungngesso. Polépa matti untu' makkasuwiyangeng akkarobangeng ritunu sibawa akkarobangeng pappasidamé, enrengngé powadakko aga harusu mupogau'.” 9. Nasalainna muwa Saul Samuél, tarimani Saul sipa baru polé ri Allataala. Sibawa sininna passalengngé iya ripaissengengngéngngi ri Samuél kajajiyanni iyatoro essoé. 10. Wettunna Saul sibawa pattumaninna lettu ri Gibéa, siruntu'ni sibawa sirombongang nabi. Iyatoro wettué narikuwasai Saul ri Rohna Allataala, nanaccowériwi séré-séréna sibawa gora-gorana nabi-nabiéro. 11. Sining tau iya missengngéngngi riyolopa, mitai kédo-kédonaro, namakkutana séddié lao ri laingngé, “Agana pura kennai ana'na Kishro? Mancaji nabi towiga Saul?” 12. Nanakkutana séddi tau iya monroé kuwaro, “Pékkugi sibawa nabi-nabi iya laingngéro – manuru iko niga ambo'na mennang?” Iyanaro assalenna warékkadaéwé, “Aga Saul mancaji nabi towi?” 13. Puranana Saul séré-séré sibawa gora-gora, laoni ri mézbaé ri tompo'na bulu-bulué. 14. Riitani Saul sibawa pattumaninna ri amuréna, namakkutana ri mennang, “Polé kégiko?” namappébali Saul, “Sappai kaleddé iya teddéngngéro, na wettunna dé' taruntu'i, laoki méwai sita Samuél.” 15. Nakkutana amuréna, “Na aga napowadakko?” 16. Nappébali Saul, “Napaissengiki makkedaé riruntu'ni iyaro olokolo'é.” Iyakiya dé' nacuritai Saul lao ri amuréna makkedaé purani rilanti mancaji arung ri Samuél. 17. Nanaobbini Samuél ra'ya' Israélié kuwammengngi naddeppungeng ri Mizpa, 18. namakkeda lao ri mennang, “Iyanaé napowada Puwangnge, Allataalana Israélié, ‘Purano utiwi massu polé ri Maséré sibawa paleppe'ko polé ri akuwasanna tau Maséré'é sibawa sininna bangsa laing iya tenre'ékko. 19. Purano upaleppe polé ri sininna anrasa-rasangngé sibawa peddié, iyakiya makkekkuwangngé musampéyak-Ka, Allataalamu, nasaba muwéllauwi kuwammengngi Ujellokekko séddi tau arung. Nah, makessinni, addeppungenno ri yolo-Ku, Puwam -mu, situru suku sibawa appammu.’ ” 20. Nanasuroni Samuél sininna sukué malluru liyolo na suku Bényamin nakenna appiléng. 21. Wettunna kaluwarga-kaluwargaé ri laleng suku Bényaminro risuro malluru liyolo, na kaluwargana Matri nakenna appiléng. Paccappurenna malluruni sining worowané ri laleng kaluwargana Matri, na Saul ana' Kish nakenna appiléng. Nanasappani mennang Saul, iyakiya dé'i gaga. 22. Rimakkuwannanaro makkutanani sining tauwé ri Puwangnge, “Oh Puwang, engkaniga iyaro tauwé kuwaé?” Nappébali Puwangnge, “Massubbui Saul ri munrinna barab-barang perlengkapangngé.” 23. Namasitta'na mennang lao duppaiwi Saul polé kuwaro, nanatiwié ri tengnga-tengngana ra'ya'é. Natettonna Saul ri yelle'na mennang na aléna ritu kaminang matanré; tau laingngé banna gangka ri salangkanna. 24. Nainappa makkeda Samuél lao ri ra'ya'é, “Iyanaé tau iya napilé Puwangnge, dé' gaga pada-padanna ri yelle'ta maneng.” Gorani sininna bangsaéro, “Tuwoni arungngé!” 25. Nainappa napakatajang Samuél lao ri bangsaéro passalenna ha'na sibawa kewajibanna arungngé, nainappa naoki ri laleng kitta iya nataroé ri onrong iya mapaccingngé. Purairo nasuroni Samuél sininna bangsaéro lisu ri bolana tungke'-tungke'. 26. Lisu toni Saul ri bolana ri Gibéa, risilaongeng risiyagangngaré tau iya baranié sibawa iya ripakédoé atinna ri Puwangnge. 27. Iyakiya siyagangngaré tomaja makkeda, “Pékkugi wedding iyaé tauwé makkéguna matu ri idi?” Napakariyawai Saul sibawa dé' nawéréngngi hadiya. Iyakiya najjaiwi temmissengngi.
1 SAMUEL 11:1-15 1. Nainappa Nahas, arung Amon, pangarai tentarana nanakeppungngi kota Yabésh ri daérana Giléad. Iyaro pabbanuwana Yabésh pangoloni tangnga lao ri Nahas makkuwaé, “Ebbuno assijancing sibawa idi, natatunru lao ri iko.” 2. Nappébali Nahas, “Nasibawang sara'éwé bawang maéloka mébbu assijancing, ‘Ucukkéi matu mata ataummu tungke'-tungke' selaku pappakatuna lao ri sininna Israélié!’ ” 3. Namappélai sining pamimpinna kota Yabésh, “Méllauki wettu pitungngesso ittana kuwammengngi weddikki kiring suro lao risininna tanana Israélié. Rékko dé'gaga iya maéloé tulukki, manyaraki matu lao ri iko.” 4. Makkuwaniro iyaro sining suroé lettu ri Gibéa, onrong naonroiyé Saul. Wettunna mennang napalettu iyaro karébaé, terini ra'ya'é nasaba pettu paddennuwangngi. 5. Iyaro wettué silalona Saul polé ri dare'na sibawa tiwii sapinna. Makkutanani, “Engka aga? Magi nateri maneng tauwé?” Naripaissengina karéba iya natiwié suro polé ri Yabéshro. 6. Naéngkalinganaro, rikuwasaini Saul ri Rohna Allataala. 7. Namacai senna'na mala duwakkaju saping nainappa nalétta-létta mancaji maéga létta'na. Nainappa iyaro létta-létta'é nakiringngi lao risininna tanana Israélié sibawa paréntaéwé, “Nigi-nigi iya dé'é namaélo malluru mammusu maccowériwi Saul sibawa Samuél, rilétta-létta makkuwa towiyé matu sapinna!” Métauni bangsa Israélié lao ri aga iya naullé napogau' Puwangnge, na sininna tauwé, tenripassangadi, sadiyani maju mammusu massibawa. 8. Ripaddeppungenni mennang sibawa ribilang ri Bézék: Engka 300.000 tau Israél, sibawa 30.000 tau Yéhuda. 9. Purairo ripaissengini suro polé ri Yabésh makkuwaé, “Powadanni pabbanuwana Yabésh, makkedaé baja éléé ri wettu dé'napa natangasso, lolongengngi matu mennang pattulung.” Wettunna natarima pabbanuwana Yabésh iyaro pasengngé, masennang senna'ni mennang. 10. Nakkeda mennang lao ri Nahas, “Baja tamaélo manyara, sibawa weddinni mugaukeng siélo atimmu.” 11. Bajanana, éléé, nabagéni Saul sining taunna ri laleng tellu pasukang. Na wettunna mompo essoé maggasani mennang ri tengnga-tengngana akkémanna iyaro tau Amongngé sibawa luruiwi mennang. Ri wettu dé'napa natangasso, nacauni tentarana Saul balié. Sining tau Amon iya naullé leppe, tassiya-siyani angkanna dé'gaga duwa tau iya mullééngngi lari massibawa. 12. Nainappa makkutana bangsa Israélié ri Samuél, “Kégani sining tau iya baranié onna makkeda makkedaé dé' nasitinaja Saul mancaji arutta? Sitinajai Bapa' mabbéréyangngi lao ri idi, kuwammengngi taunoi.” 13. Iyakiya makkedai Saul, “Dé' muwi séddi tau wedding riyuno iyaé essoé, nasaba iyaé essoé purani napassalama Puwangnge Israélié.” 14. Namakkedana Samuél lao ri mennang, “Lao manenno mai talao ri Gilgal sibawa résmikangngi Saul selaku arutta.” 15. Makkuwaniro mennang lao maneng ri Gilgal, na ri onrong assompangngéro rirésmikang Saul selaku arung. Makkasuwiyangenni mennang akkarobangeng pappasidamé, na Saul sibawa sininna bangsa Israélié ramé-raméiwi iyaro kajajiyangngé.
AMSAL 55:16-23 16. Leppessanni balikku maté tennasenna-senna sibawa nonno ri linona tau maté tuwo-tuwo, saba' jaé engkai ri bolana mennang, ri tengnga-tengngana mennang. 17. Iyakiya mangobbika lao ri Allataala, Puwangnge passalama'ka matu. 18. Esso wenni maddarékéka sibawa teri, Nanaéngkalingai saddakku. 19. Napassalama'ka polé ri paggasana balié, iya mallompéngengngé méwaka. 20. Allataala iya mapparéntaé polé ri mannennungeng méngkalingaka matu sibawa caui mennang. Saba' dé' namaélo mennang toba, sibawa dé'to namétau lao ri Allataala. 21. Silaokku riyolo gasai sellao-sellaona, nassakkarengngi jancinna. 22. Ada-adanna alusu mappalécé, iyakiya ri laleng atinna engka paccéccé. Bicaranna malemma, iyakiya mattoddo pada-pada peddang iya macéru'é. 23. Abbéréyanni abata-batammu lao ri Puwangnge, nanatumpe'ko matu; saba' dé' Naleppessangngi ricau tau malempué.
PAKKATOBBA 15:18-20 18. Tau iya masitta'é macai paompoi assasang, tau iya sabbara'é tiwii adaméngeng. 19. Tau makuttué tuli péneddingiwi asukkarakeng; tau malempué dé' nalolongeng asukkarakeng. 20. Ana' iya mapanré, nasennangiwi atinna ambo'na; ana' iya madonggoé dé' napakalebbii indo'na.
LUKAS 22:24-46 24. Naompona appangéwangeng ri yelle'na ana'-ana' gurunna Yésus, passalenna niga polé ri yelle'na mennang harusu' riyangga' kaminang battowa. 25. Nakkeda Yésus lao ri mennang, “Sining arunna bangsaé iya dé'é naissengngi Allataala napanrasa-rasai ra'ya'na, sibawa sining tomakuwasaé riyasengngi ‘Pallinrunna Ra'ya'é.’ 26. Iyakiya iko dé' naweddikko makkuwaro. Sibalé'na, tau iya kaminang battowaé ri yelle'mu harusu'i mancaji pada-pada iya kaminang baiccu'é, sibawa pamimpingngé harusu'i mancaji pada-pada pattumanié. 27. Niga lebbi battowa: tau iya tudangngé manré ri méjangngé, iyaré'ga tau iya tumaningiyéngngi? Tentu tau iya tudangngé. Iyakiya Iyya engkaka ri yelle'mu selaku pattumani. 28. Ri laleng sininna asussak-Ku, tuli musibawak-Ka. 29. Pada-pada Ambo'é pura mpérék-Ka ha' untu' mapparénta, makkuwatoniro Uwérékko matu iyaro ha'é. 30. Narimakkuwannanaro weddikko maccowé massennas-sennang sibawa Iyya ri wettuk-Ku mancaji Arung. Natudakko matu ri yasé'na seppuloé duwa kadéra akkarungengngé untu' paréntai seppuloé duwa suku bangsana Israélié.” 31. “Simon, Simon, éngkalingai! Purani ripalalo Ibillisi'é untu' mojiko; pada-pada gandongngé ripallaing polé ri olina, makkuwatoniro iya madécéngngé ripallaing matu polé ri majaé. 32. Iyakiya purana massempajangekko, Simon, kuwammengngi aja' nalollo teppe'mu. Sibawa narékko lisuno ri Iyya, harusu'ko péwatangiwi silessu-silessuremmu.” 33. Nappébali Pétrus, “Puwang, sadiyaka muttama' tarungkué sibawa maté silaong Idi Puwang!” 34. Nakkeda Yésus, “Ateppe'no Pétrus, riwettu dé'napa naoni manu'é iyaé essoéwé, wékkatelluni muwassakkarek-Ka.” 35. Purairo makkedani Yésus lao ri mennang, “Riyolo wettunna Usuroko sibawa dé' Upalaloko tiwi tase'-tase', sépu iyaré'ga sapatu, engkaga akurangemmu?” Nappébali mennang, “Dé'!” 36. Nakkeda Yésus, “Iyakiya makkekkuwangngé niga mappunnai tase'-tase' iyaré'ga sépu, harusu'i natiwi; sibawa niga dé' nappunnai peddang, harusu'i nabalu' jumbana untu' melli peddang. 37. Saba', ateppe'no, aya'na Kitta'é iya makkedaé, ‘Riyangga'i matu selaku séddi tau maja,’ harusu'i kajajiyang ri alé-Ku. Saba' aga taroki ri lalenna Kitta'é passalenna Iyya, kajajiyanni makkekkuwangngéwé.” 38. Nakkeda ana'-ana' gurunna Yésus, “Puwang, itai, engka duwa peddang kuwaé.” Nappébali Yésus, “Sikuna!” 39. Nasalaini Yésus kotaé nalao pada-pada biyasaé ri Bulu-bulu Zaitun, nalaoto ana'-ana' gurun-Na silaongengngi. 40. Lettu'nana kuwaro, makkedani lao ri mennang, “Assempajakko kuwammengngi aja' mupéneddingiwi paccobangngé.” 41. Nalaona Yésus mabéla-béla céddé polé ri mennang, kira-kira sipaggenrungeng, nainappa makkaluttu massempajang, 42. adan-Na, “Ambo', rékko weddingngi, pabélaiwi polé ri Iyya anrasa-rasang iya harusu'é Upéneddingi. Iyakiya aja' nasituru élo-Ku, sangadinna situru élona Ambo' bawang.” [ 43. Engka séddi malaéka' lao ri Aléna péwatangiwi. 44. Manrasa-rasa senna'ni Yésus secara baténg, angkanna pédé' matonget-tongenni massempajang. Puse'-Na pada-padai daraé tetti ri tanaé.] 45. Puranana massempajang, lisuni Yésus ri ana'-ana' gurun-Na. Napoléini mennang matinro nasaba messé senna'i. 46. Nakkeda lao ri mennang, “Magi mumatinro? Oto'no namuwassempajang, kuwammengngi dé' nakennako paccobang.”
Bugis Bible 1997
LAI 1997