1. Bokila na kuzaba kana muntu ke ndima nge. Nani na balongo nge ke bokila?
2. Samu ti nkele ke kufwaka muntu yina kele ve na mayela, kimbanda ke kufwaka muntu ya kizoba.
3. Mu me talaka muntu ya kizoba kubongisa luzingu ya yandi, kasi kaka na ntangu yina, mu siingaka yinzo ya yandi mutindu yayi:
4. «Bika ti ata muntu kusadisa bana ya yandi! Bika ti ba dyata bawu na mwelo ya mbanza, mpe ti ata muntu kukuula bawu!
5. Bika ti bayina ke na nsatu, manisa na kudya bambuma yina yandi yonzikaka, ba kwiza baka ata yina kele na kati ya bansende! Bika ti bayina ke na ata kima kubaka bimvwama ya yandi!»
6. Yimbi katukaka ve na ntoto, bampasi mpe ke katukaka ve na ntoto.
7. Mutindu muntu ke butukaka samu na kutala mpasi, ni mutindu yina mpe milaka ya tiya ke nangukaka na mupepe. *
8. Na dyambu yayi, kana ya vwandaka ni munu, mu zolaka sosa Nzambi, mpe ni na sika ya yandi, mu zolaka zabisa ndyamu ya munu.
9. Yandi ke salaka mambu ya nene yina ba lenda kubakula ve. Yandi ke salaka mambu mingi ya ngitukulu.
10. Yandi ke nokisaka mvula na kizizi ya ntoto, yandi ke fidisaka maza na bilanga.
11. Yandi ke zangulaka bayina kele ya kukuluka, mpe yandi ke kuulaka bayina ke na bufwidi.
12. Yandi ke kabikisaka mabanza ya bantu yina ke na mayela ya kuvuna, na kulungisa mambu yina bawu zola kusala, kasi bawu ke lendaka ve.
13. Yandi ke kuzwaka bantu ya ndwenga na mitambu ya bawu mosi, na mambu ya luvunu yina bawu ke tubaka. Malongi ya bawu ya kutengama, ke vwandaka ve na ndandu.
14. Na kati-kati ya ntangu bawu ke bwabanaka kitombe, mpe bawu ke sosaka nzila na kati-kati ya ntangu mutindu na mpimpa.
15. Kasi Nzambi ke vuukisaka mputu na mambu ya luvunu yina ke basikaka na bayinwa ya bawu, yandi ke vuukisaka mputu na maboko ya muntu ya ngolo.
16. Na yina, samu na mputu kivuvu kele, mpe yandi ke kangisa yinwa ya muntu ya yimbi.
17. Kyese mingi na muntu yina Nzambi ke na kusungika! Kumanga ve ndongosolo ya Nzambi-Mpungu. *
18. Samu ti ni yandi ke lwalisaka, ni yandi mpe ke tulaka manganga na bamputa. Ni yandi ke bulaka, mpe ni maboko ya yandi ke belusaka.
19. Bambala sambanu yandi ke kuula nge na mpasi, bambala nsambwadi bampasi ke kukumina nge ata fyoti ve.
20. Na ntangu ya nsatu ya kulutila, yandi ke bika ve ti nge kufwa, na kati ya bamvita, yandi ke vuukisa nge.
21. Mpasi lenda bwidila nge ve na mambu ya luvunu ya bantu, ntangu mpasi ya mwangusulu ke kwiza, kutala boma ve!
22. Ya vwanda mwangusulu, ya vwanda nsatu ya kulutila, nge ke seka yawu. Nge ke vwanda ve na boma ya bibulu ya mfinda,
23. nge ke sala ngwisani na matadi ya bilanga, mpe nge ke vwanda na kizunu na bibulu ya mfinda.
24. Kizunu ke vwanda na yinzo ya nge ya lele, ntangu yina nge ke kwenda tala bibulu ya nge, ata mosi ve ke kondwa.
25. Lutangu ya bana ya nge ke kuma mingi, mpe mitekolo ya nge ke butana mingi mutindu matiti yina ke menaka na ntoto.
26. Nge ke kota na ndyamu na ngolo ya nge nyonso, mutindu ke vwandaka kikunku ya matiti ya bambuma ya faline na ntangu ya kuyonzika bambuma.
27. Tala ti beto me fyongonina mbote dyambu yayi. Kuwa mambu yayi mpe sadila yawu samu na mbote ya nge!
1. Yobi vutulaka mutindu yayi:
2. Mu zola ti ba teza mpasi ya munu. Mu zola ti ba tula kyadi ya munu na kipezolo.
3. Na ntangu yayi, mpasi ya munu me lutila dema na munyenge ya mubu, ni yawu yina, mu ke na kuzonza mambu ya kidi-kidi.
4. Samu ti madyonga ya Nzambi Mpungu me tobola nzutu ya munu, mpe misa ya madyonga yango me mwangana na mpeve ya munu. Nsisi ya Nzambi me kubama samu na kunwanisa munu.
5. Mbuluku ya mfinda ke lookaka kana tangu yandi me kuzwa matiti ya maza? Ngombe ke dilaka kana yandi me kuzwa madya ya yandi?
6. Madya yina kele ve na mungwa, ba lenda kudya yawu kondwa mungwa? Maza ya mpembe ya meki ya nkunzu ke vwandaka mbote na kudya?
7. Bima yina mu vwandaka zola ve na kusimba, ni yawu me kuma madya ya munu, ata ti yawu me beba. *
8. Aa! Kana mu kuzwaka mvutu na ndombolo ya munu. Aa! Bika ti Nzambi kupesa munu yina mu ke na kuvingila!
9. Bika ti Nzambi ndima na kunika kwandi munu. Bika ti yandi lambula diboko ya yandi samu na kufwa munu!
10. Mu ke kuzwa dyaka mbombolo, mu ke yangalala na kati ya bampasi ya munu, samu ti, mu me vweza ve bampova ya Nzambi ya Longo.
11. Mu kele dyaka ve na ngolo, samu na yinki mu fwana kuvwanda na kivuvu? Luzingu ya munu me suka yimeni, yinki mu ke na kuvingila dyaka?
12. Ngolo ya munu kele mutindu ditadi? Nzutu ya munu ke mutindu kisengo ya mbwaki?
13. Mu kele dyaka na lusalusu? Ata lusalusu ya fyoti, yawu me kwenda ntama na munu. *
14. Muntu yina ke na mpasi fwana kuzwa lusalusu ya ndiku ya yandi, ata ti yandi ke na kuzitisa dyaka ve Nzambi Mpungu.
15. Bandiku ya munu me vuna munu, mutindu muzumba. Bawu me vuna munu mutindu muzumba yina ke zingilaka ve.
16. Na nsuka ya ntangu ya madidi yina maza ke kangamaka, ntangu maza ya neze ke sulumukaka, yawu ke fulusaka muzumba.
17. Kasi na bantangu ya tiya, maza ya bamwila yango ke yumaka. Yawu ke yumaka na tiya ya ntangu, yawu ke yumaka kaka na bisika yina.
18. Bantu ya mumbungu yina ke zyetaka na basamo ke lutilaka dyaka ve kuna, bawu ke kwendaka kangama na ntoto ya yinsi ya kuyuma mpe ke kufwaka.
19. Bantu ya mumbungu ya Tema ke sosaka na kutala mizumba yango, bantu ya saba na nzyetolo ya bawu, ke sosaka maza ya mizumba yango na kivuvu nyonso.
20. Kasi bawu me kuma na nsoni samu ti, ba tulaka kivuvu ya bawu na mizumba yina, na ntangu yina bawu kumaka na kisika yina, bawu salaka kivuvu na kutala maza, bawu lembaka.
21. Na ntangu yayi, mu ke na kutala beno mutindu bantu yina, beno ke na kutala mpasi ya munu, beno me kuma na boma.
22. Mu lombaka na beno ti, beno pesa munu mwa kima? To na bimvwama ya beno, beno pesa madeso ya bana samu na munu?
23. Samu na kukuula munu na maboko ya mbeni, to samu na kukatula munu na yisi ya lutumu ya mfumu ya ntima ya yimbi?
24. Beno longa munu mpe mu ke dingama. Beno zabisa munu, wapi yimbi yina mu me sala.
25. Mambu ya tsyelika ke salaka ve ntima mpasi, kasi mambu yina beno ke na kufunda munu, yinki yawu ke natina munu?
26. Beno zola kusungika munu na mambu yina mu me tuba? Ya kele mambu ya muntu yina kele dyaka ve na kivuvu.
27. Beno ke bula dzeke samu na nsaana, mpe beno zola kutekisa ndiku ya beno?
28. Na ntangu yayi, beno baka lukanu ya kutala munu na kizizi, mu ke na kuvuna beno?
29. Mulemvo ya beno, beno soba mayindu ya beno, beno vwanda ve bantu ya yimbi. Beno soba dyaka mayindu ya beno samu ti, mu me sala ve dyambu ya yimbi.
30. Yinwa ya munu ke basisaka mambu ya yimbi? Mu zaba ve na kuswasikisa mambu ya yimbi?
1. Muntu yina ke nyokola mputu ke sala ti mputu kukuma mvwama, muntu yina ke kabula kima na mvwama, yandi ke kuma mputu.
2. Ya tsyelika, beto zaba ti ntangu yayi, yinza nyonso yina Nzambi yidikaka ke na kukunga mpe ke na kutala mpasi mutindu kento yina ke na kubuta.
3. Kasi ya kele kaka yinza ve. Beto mpe yina me kuzwaka Mpeve ya Longo mutindu kikunku ya ntete ya makabu yina Nzambi pesaka nsilulu, ke na kukunga na kati ya bantima na kuvingilaka ti Nzambi kitula beto bana ya yandi, mpe pesa beto kimpwanza ya tsyelika.
4. Ya tsyelika, beto me kuzwaka mpulusu, kasi kaka na kivuvu. Kana muntu ke na kivuvu na bima yina yandi ke na kutala, ya ke dyaka ve kivuvu. Beto lenda kuvwanda na kivuvu na bima yina beto ke na kutala?
5. Kana beto kele na kivuvu na bima yina beto ke na kutala ve, beto ke vingila yawu na mvibudulu nyonso.
6. Mutindu mosi mpe, Mpeve ya Longo ke sadisaka beto, samu ti beto kele bantu ya kulemba. Ya tsyelika, beto zaba ve kusambila na mutindu me fwanana. Kasi yandi mosi Mpeve ya Longo ke sambidilaka beto na bampova yina muntu lenda kutuba ve.
7. Nzambi yina ke talaka na kati ya bantima, zaba mabanza ya Mpeve, samu ti Mpeve ke sambidilaka bantu ya longo* mutindu kele luzolo ya Nzambi.
16. Beto zaba ti Nzambi ke salaka na kati ya mambu nyonso samu na mbote ya bayina ke zolaka yandi, bayina yandi bokilaka mutindu kele lukanu ya yandi.
22. Na bantu yina Nzambi soolaka ntete, yandi bakaka katuka ntama lukanu ya kusala ti bawu fwanana na Mwana ya yandi, samu ti Mwana ya yandi vwanda yaya ya bampangi mingi.
23. Na bayina Nzambi soolaka ntete, yandi bokilaka mpe bawu. Na bayina yandi bokilaka, yandi kumisaka mpe bawu ya kudedama*, mpe na bayina yandi kumisaka ya kudedama, yandi pesaka bawu mpe nkembo ya yandi.
24. Yinki beto lenda kutuba dyaka? Kana Nzambi kele na ndambu ya beto, nani lenda kusala beto yimbi?
25. Yandi salaka ve ti Mwana ya yandi mosi tala mpasi ve. Kasi yandi yekulaka yandi samu na beto nyonso. Na yina, wapi mutindu yandi ke pesa beto ve bima nyonso kintwadi na Mwana ya yandi?
26. Nani lenda kufunda bayina Nzambi soolaka? Ata muntu samu ti ni Nzambi ke na kukumisa bawu ya kudedama*.
27. Nani lenda kupesa bawu kitumbu? Ata muntu samu ti Yesu-Klisto* yina kufwaka mpe vumbukaka na lufwa kele na lubakala ya Nzambi. Ni yandi ke na kusambidila beto.
28. Nani lenda kukabula beto na luzolo ya Klisto? Bampasi, mawa, mpasi yina bantu ke talisaka beto, nsatu, buwelo, mambu yina ke kufwaka bantu, to lufwa? Ve, ata kima mosi ve,
29. mutindu Dibuku ya Nzambi ke tubaka: «Samu na nge, beto ke na kuzinga konso kilumbu pene-pene na lufwa. Beto me kuma mutindu mameme yina ba ke na kunaka na kisika yina ba ke kufwaka bibulu.»
30. Kasi na mambu nyonso yina, beto ke lutilaka na kununga na luve ya Nzambi yina ke zolaka beto.
31. Ee, mu ke na kivuvu ti ata dyambu lenda kukabula beto na luzolo ya yandi: lufwa, luzingu, bambazi*, bampeve ya yimbi, mambu ya ntangu yayi to yina ke kwiza, bayina nyonso ke na lulendo,
32. balulendo ya mazulu mpe ya ntoto, to bima nyonso yina Nzambi yidikaka lenda kukabula beto ve na luzolo yina Nzambi lakisaka beto na Yesu-Klisto, Mfumu* ya beto.