Bible in one year

1. Sininna arunna Amori ri seddé yajanna Salo Yordan, sibawa sininna arunna Kanaan ri wiring Tasi Tengngaé naéngkalingani makkedaé purani narakkoi Puwangnge Salo Yordan ri wettu nalléttoinna umma Israélié iyaro saloé. Namétauna mennang sibawa takkini-kini nasaba tau Israélié.
2. Iyaro wettué makkedani Puwangnge lao ri Yosua, “Ebbuno piso polé ri batué, nainappa pakangkasiko upacara assunnakeng untu' sining tau Israélié.”
3. Napogau'ni Yosua paréntana Puwangnge, nanasunna'i sining tau Israélié ri onrong iya riyasengngé Bulu-bulu Assunnakeng.
4. Wettunna sining tau Israélié massu polé ri Maséré, sininna tau worowanéna purani risunna. Iyakiya wettunna mennang sollé ri padang kessi'é patappulo taung ittana, ana'-ana'na mennang iya worowané muwi séddi dé'to gaga risunna. Na ri paccappurenna wettu patappuloé taunro, tau worowané iya wettuéro massu polé ri Maséré narapini umuru'na iya sipato'é untu' muttama tentara, maté manenni, nasaba dé' naturusiwi paréntana Puwangnge. Nasituru sibawa tanrona Puwangnge, dé' napalaloi mennang mitai wanuwa décéng sibawa macommo'éro iya Najjanciyangngé lao ri néné-nénéna mennang.
5.
6.
7. Iyanaro saba'na nasininna ana' worowanéna mennang dé'pa narisunna. Assossoreng baruénnaé nasunna Yosua.
8. Pura manennana risunna mennang, monroni ri akkémangngé narapi sau lona mennang.
9. Makkedai Puwangnge lao ri Yosua, “Iyaé essoé atunammu selaku ata-ata ri Maséré Ripallennye'ni.” Iyanaro saba'na nariyaseng Gilgal iyaro onrongngé lettu wettuéwé.
10. Ri wettu makkémana ri Gilgal ri tanété seddéna Yérikho, naramé-raméini umma Israélié Paskaé ri arawénna tanggala seppulo eppa ulengngéro.
11. Pappa bajana, untu' pammulanna mennang manré inanré wassélé'na wanuwa Kanaan, iyanaritu: roti temmarragi sibawa gandong ripanggang.
12. Iyatoro essoé nadé'na nasempé mannaé polé ri langié, sibawa mappésauni tau Israélié manré manna. Mappammulai wettuéro manréni mennang wassélé tanana Kanaan.
13. Riséuwaé wettu engkai Yosua ri seddéna Yérikho. Tennasenna-sennana naitai séddi tau worowané tettong ri yolona sibawa peddang pura rampu. Naddeppérini Yosua iyaro tauwé, namakkeda, “Rangekkoga, iyaré'ga bali?”
14. Nappébali iyaro tauwé, “Tenniya rangeng, sibawa tenniyato bali. Laoka kuwaé selaku pallima tentarana Puwangnge.” Naéngkalinganaro masitta'ni Yosua suju' sompai iyaro tauwé. Makkedani Yosua, “Iyya'é atanna Puwang. Aga iya weddingngé upogau' untu' Puwang?”
15. Nappébali iyaro pallima tentarana Puwangnge, “Luudungngi sapatummu; tana muwonroiyéro tettong iyanaritu tana mapaccing.” Nanaludunni Yosua sapatunna.
1. Ri kota Yérikho rijagai senna'ni pintu-pintu gerbanna sibawa ritongko rape-rape kuwammengngi dé' naulléi muttama tau Israélié. Dé' muwi séddi ripalalo muttama iyaré'ga massu ri kotaéro.
2. Makkedai Puwangnge lao ri Yosua, “Makkekkuwangngé Uwérékko Yérikho sibawa arunna nenniya sininna tentarana iya barani-baraniéro.
3. Iko sibawa tentaramu harusu'ko mabbarisi mattulilingiwi kotaéro siseng siesso ri laleng enneng esso ittana.
4. Pitu tau imang, tungke-tungke tiwi tarompé, harusu joppa ri yolona Petti Assijancingngé. Ri esso mapitué, iko sibawa tentaramu harusu mattulilingiwi kotaéro wékkapitu nasining imangngé seppungngi tarompé'na.
5. Nainappa iyaro imang-ngimangngé harusu'i seppungngi tarompé'na sibawa oni iya malampéé. Muwéngkalingana oni iya malampééro, sininna tentaraé harusu'i marukka sibawa gora, namaruttung matu iyaro témbo'na kotaé. Nainappa iko maneng harusu matteru muttamakiwi kotaéro.”
6. Nanaobbini Yosua sining imangngé, sibawa makkeda, “Akkani iyaro Petti Assijancingngé; pitu tau polé ri yelle'mu harusu joppa ri yolona natiwito tarompé.”
7. Nainappa nasuro Yosua tentarana mabbarisi mattulilingiwi kotaéro, ripoddiyoloi ri barisi pengawal ri yoloé iya joppaé poddiyoloi Petti Assijancinna Puwangnge.
8. Situru sibawa paréntana Yosua, joppani barisi pengawal riyoloé poddiyoloi imang-ngimang passeppung tarompé'é, riyaccowéri ri imang-ngimang mpulééngngi Petti Assijancingngé, nainappa ri paccappurenna barisi pengawal ri monrié. Ri wettunna mennang joppa napaoni towi matteru-teru tarompé'é.
9.
10. Sininna tentaraé pura riparéntanni dé' nagora sibawa dé' namakkeda-ada muwi silappa rékko dé'pa nabbéré Yosua tanra-tanrang.
11. Makkuwaniro Yosua suroi tentarana tiwii Petti Assijancingngé mattulilingiwi kotaéro wékkasiseng, nainappa lisu ri akkémangngé, sibawa mabbenni kuwaro.
12. Bajana, maélé senna'ni moto Yosua nainappa untu' mabbékkaduwana sining imangngé sibawa tentaraé mabbarisi mattulilingiwi kotaéro ri laleng atturu-turuseng barisi pada-pada esso ri yolona: bunge-bunge'na barisi pengawal ri yoloé, nainappa iya pitu imang iya seppungngéngngi tarompé'é, riyaccinrolai ri imang-ngimang iya mpulééngngi Petti Assijancingngé, na paccappurenna barisi pengawal ri monrié. Na tarompé'é matteru-terui ripaoni.
13.
14. Ri esso maduwaéro nattulilingini mennang kotaé wékkasiseng nainappa lisu ri akkémangngé. Makkuwaniro mennang napogau' esso-esso ittana enneng essona.
15. Ri esso mapitué maélé senna'ni mennang moto ri wettu nappa mompona essoé, nainappa mabbarisi wékkapitu mattulilingiwi iyaro kota Yérikho sibawa cara iya padaé. Banna ri esso iya mapituéro bawang, nattulilingiwi mennang iyaro kotaé wékkapitu.
16. Mabbékkapitunnana, naseppunna muwa sining imangngé tarompé'na, mabbéréni Yosua tanra-tanrang lao ri sininna pasukangngé untu' gora. Makkedai Yosua, “ Puwangnge pura mabbéréyangngi iyaé lao ri iko!
17. Sininna kotaé sibawa sininna lise'na harusu'i ripaccappu siseng selaku pakkasuwiyang untu' Puwangnge. Banna Rahab, makkunrai cakkuribangngéro sibawa kaluwargana wedding rileppessang tuwo, nasaba purai natulung mata-matata.
18. Dé' nawedding mala muwi aga polé ri sininna iya harusu'é ripaccappu. Rékko muwalai, nakennai matu abala akkémanna Israélié.
19. Sininna barang péra'é, ulawengngé, tembagaé sibawa bessié harusu'i ripallaing untu' Puwangnge, sibawa ritaroi ri laleng onrong attarong waramparang appunnangenna Puwangnge.”
20. Nainappa naseppung tarompé'na sining imangngé. Na naéngkalingana muwa sining tau Israélié oni tarompé'éro, gorani mennang siullé-ulléna, namaruttung témbo'na kota Yérikho. Matteruni ménré sininna tentaraé, nauttamakiwi kotaéro nanasittaiwi.
21. Sininna ri laleng kotaéro, macuwa malolo, worowané makkunrai, riyunoi sibawa peddang. Sininna olokolo sapingngé, bimbala'é sibawa kaleddé'é riyunoto.
22. Lao ri iya duwa tau iya puraé mancaji mata-mata, makkedani Yosua, “Laono ri bolana makkunrai cakkuribangngéro, namutiwii massu silaong kaluwargana pada-pada iya puraé mujancingngi.”
23. Nanalaona iya duwa mata-mataéro, nanatiwii massu Rahab silaong ambo' indo'na, silessu-silessurenna, sibawa kaluwargana iya laingngé. Sininna kaluwargana Rahab sibawa ata-atanna ritiwini massu ri onrong iya amangngé ri seddéna akkémanna Israélié.
24. Nainappa natunu gangka cappu tentara Israélié sininna kotaéro sibawa sininna iya engkaé ri lalenna, sangadinna barab-barang ulawengngé, péra'é, tembagaé sibawa bessié. Iyaro barab-barangngé nalai mennang nanatiwii ri onrong attaronna waramparang appunnangenna Puwangnge.
25. Iyakiya Rahab makkunrai cakkuribangngéro sibawa sininna kaluwargana rileppessangngi tuwo ri Yosua, nasaba purai natulung iya duwa mata-mata iya nasuroé Yosua lao ri Yérikho. (Lettu essoéwé wija-wijanna Rahab engka mupa ri Israélié.)
26. Iyaro wettué napassui Yosua iyaé pappésangkaé, “Nigi-nigi makkuraga patettongngi paimeng iyaé kota Yérikho, nakennai matu tanrona Puwangnge. Nigi-nigi pasangngi pandamenna teddéngngi matu ana' macowana; sibawa nigi-nigi pasangngi pintu-pintu gerbanna ateddéngengngi matu ana' malolona.”
27. Puwangnge sibawangngi Yosua, natarompona asenna Yosua ri sininna wanuwaéro.
6. Magi namessé atikku sibawa mausé? Mamménasaka lao ri Allataala. Nausukkuru matu paimeng lao ri Aléna, lao ri Allataalaku sibawa pappassalama'ku.
7. Ri tana appalirengngéwé ancuru atikku, rimakkuwannanaro uwéngngerangngi Puwangnge. Malii nyawaku ri laleng solo'na amesséngngé, nappo'ka lémpe akacaungeng; pada-pada merunna uwai jompina Salo Yordan polé ri Bulu Hérmon sibawa Bulu Mizar.
8.
9. Tennapodo najjellokengngi Puwangnge pammasé-Na ri lakessoé, kuwammengngi ri wennié weddikka makkélong, sibawa massempajang lao ri Allataala assalenna atuwokku.
10. Makkedaka lao ri Allataala, pangéwaingekku, “Magi Muwallupaika? Magi naharusu'ka matteru manrasa-rasa, nasaba ritenre risining balikku?”
11. Ancuru atikku nasaba pangéllé'na balié. Matterui mennang makkutana, “Kégai Allataalamu?”
19. Temmakka kessinna lolongengngi aga iya riyacinnaiyé! Tau madonggoé dé' namaélo salaiwi jaé.
20. Tau iya siwollompollongngé sibawa tau mapanré, mancaji mapanréi matu; tau iya siwollompollongngé sibawa tau madonggoé, macilakai matu.
21. Tau madosaé tuli rilellungngi ri abalaé tau makessingngé tuli tarimai asennangeng.
18. Riséuwaé esso, wettunna Yésus massempajang alé-aléna, poléni ana'-ana' gurun-Na. Makkutanani Yésus lao ri mennang, “Manuru' adanna tauwé, niga Iyya'é?”
19. Nappébali mennang, “Engka makkeda Yohanés Paccemmé. Engkato makkeda Elia, iya laingngé makkedai sala séddinna nabié riyolo iya tuwoénna paimeng.”
20. Nakkeda Yésus, “Iyakiya manuru' alému, niga Iyya'é?” Nappébali Pétrus, “Bapa' iyanaritu Arung Pappassalama' iya najjanciyangngé Allataala.”
21. Nanakkeda Yésus lao ri ana'-ana' gurun-Na, “Aja' sises-siseng muwappaddissengengngi iyaro gau'é lao ri nigi-nigi.”
22. Makkeda towi Yésus, “Mémeng Ana'na Tolinoé harusu'i manrasa-rasa sibawa riyéwa risining pamimpingngé sibawa kapala-kapala imangngé, enrengngé guru-guru agamaé. Riyunoi matu, iyakiya ri esso matellué ripatuwoi matu paimeng.”
23. Nainappa makkeda Yésus lao ri iya maneng engkaé kuwaro, “Tau iya maéloé maccowéri-Ka harusu'i nallupai apentingeng aléna, naéssangngi sallina esso-esso sibawa matteruna maccowéri-Ka.
24. Saba' tau iya maéloé méwaiwi atuwonna, ateddéngengngi matu atuwong. Iyakiya tau iya makkarobangengngéngngi atuwonna untu' Iyya, napassalama'i matu.
25. Aga sarona lao riséddié tau rékko sininna linoéwé mancajiwi appunnangenna, iyakiya nasolangiwi sibawa ateddéngengngi atuwonna?
26. Rékko masirii tauwé mangakui-Ka sibawa pappagguruk-Ku, Ana'na Tolinoé masiri towi matu mangakuiwi iyaro tauwé ri wettu poléna matti sibawa akuwasan-Na, kuwaéttopa akuwasanna Ambo'é, enrengngé akuwasanna sining malaéka' mapaccingngé!
27. Issenni: polé ri yelle'mu kuwaé engka matu dé' namaté riwettu dé'napa naitai matu Allataala mapparénta.”
28. Kira-kira siminggu purana nappagguruwang Yésus gau'-gau'éro, natiwini Pétrus, Yohanés sibawa Yakobus ri yasé'na séddié bulu untu' massempajang.
29. Ri wettu massempajanna Yésus kuwaro, tappinrani tappa-Na sibawa pakéyan-Na mancaji maputé millakkillang.
30. Tappa engka duwa tau, iyanaritu Musa sibawa Elia mappaitangngi aléna sibawa cahaya polé ri surugaé. Mabbicarani mennang sibawa Yésus passalenna amatén-Na iya dé'énna namaitta napéneddingiwi ri Yérusalém.
31.
32. Iyaro wettué Pétrus sibawa sellao-sellaona matinroni, iyakiya tennasenna-sennani moto, nanaitai Yésus maccahaya sibawa iya duwa tauwéro tettong silaong Yésus.
33. Wettunna iya duwa tauwéro maélo salaiwi Yésus, makkedani Pétrus ri Yésus, “Bapa' Guru, manyameng senna'ki kuwaé. Madécéngenni patettokki tellu kéma: séddi untu' Bapa', séddi untu' Musa, sibawa séddito untu' Elia.” (Makkeda makkuwairo Pétrus, dé' napahangngi aga napowada.)
34. Ri wettu mabbicarana mupa Pétrus, poléni séuwa ellung, nanasalipuriwi mennang.
35. Na polé ri ellungngéro, naéngkalingai saddaé makkeda, “Iyanaé Ana'-Ku iya Upilé. Engkalingai Aléna!”
36. Pajanana saddaéro, naitani Yésus alé-aléna mani kuwaro. Mammekko bawammi ana'-ana' gurunna Yésus passalenna iya manennaro, sibawa dé' nappaissengengngi lao ri niga-niga aga pura naita mennang.
Bugis Bible 1997
LAI 1997