Ekimar 15:1-41 1. MWATHANI nî aarîîrie Musa aramwîra 2. aarîîrie antû ba Israeli abeere mantû jarîa bakaathithagia baakinya nthîgûrû îrîa akabaa nîkenda batûûraga ku: 3. Rîrîa bakaritagîra MWATHANI igongwana biathoone biaao bîëthîrwa bîrî igongwana bia gwakîîria, kana baritage igongwana bia kûûjûria mîciîtio yaao, kana igongwana bia gûciendera kuuma ndîîthieene ciaao. Nabio igongwana biu bikethagîrwa birî na yeera rîrîega kîrî MWATHANI. 4. Muntû wonthe ûrîa ûkaritagîra MWATHANI kîgongwana nî amûritagîre kinya mûtu jûmwinyu kilo îmwe juungeenue na maguta ja lita îmwe, birî kîgongwana kîa irio. 5. Ningî nî amûritagîre lita îmwe ya ndibei îrî kîgongwana gîa gwîtûûrîria. O lita îmwe ya ndibei îritanagîrue amwe na gatûrûme kamwe ga kîgongwana gîa gwakîîria. 6. Bwarita ntûrûme ya kîgongwana gîa gwakîîria, bûritanagîrie na kilo ijîîrî cia mûtu jûmwinyu juungeenue na nusu lita ya maguta ja nzeituuni, birî kîgongwana kîa irio. 7. Bwarita kîgongwana gîa gwîtûûrîria bûritage nusu lita ya ndibei îrîa yeeraga bûbwega kîrî MWATHANI. 8. Ningî rîrîa bûkaritaga ndeegwa îrî kîgongwana gîa gwakîîria, kana îrî kîgongwana gîa kûûjûria mûciîtio, kana îrî kîgongwana kîa gûcwaa thîîrî, 9. bûkîritanagîrie amwe na ndeegwa na kilo ithatû cia mûtu jûmwinyu juungeenue na lita ijîîrî cia maguta ja nzeituni birî kîgongwana kîa irio. 10. Ningî bûritage lita ijîîrî cia ndibei îrîa yeeraga bûbwega kîrî MWATHANI. 11. Biu nîbio bikaritanagîrua na kîgongwana kîa ndeegwa, kana kîa ntûrûme, kana kîa gatûrûme, kana gîa kathenge. 12. O ûrîa bûkaaritaga igongwana bia nyomoo iu bing'ana nîu bûkaaritaga igongwana bia irio bing'ana. 13. Ûu nîu Aisraeli bonthe babuîrîte kûritaga igongwana birîa bieeraga bûbwega kîrî MWATHANI. 14. Ningî gûkëethîrwa kûrî na ageni batwîre amwe naabuî, kinya bo nî babuîrîte kûthingataga Waatho rîrîa bakûrita igongwana birîa bieeraga bûbwega kîrî MWATHANI. 15. Buî amwe na ageni barîa batwîre amwe naabuî bûkathingata Waatho bûbwe nthukîîne cionthe. Buî amwe na ageni bau bûkari o ûmwe mbere ya MWATHANI. 16. Baabuî na ageni barîa batwîre amwe naabuî bûkaathingataga Waatho bûmwe bwa kûrita igongwana. 17. Ningî MWATHANI nî aarîîrie Musa aramwîra, 18. arîrie antû ba Israeli abeere atî rîrîa bagatonya nthîgûrûûne îrîa akabaikia, 19. nî bathithagie ûjû, “Rîrîa bûkaarîjaga irio bia gûntû kûu, nî baritagîre MWATHANI bimwe biaabio birî kîgongwana. 20. Bamûritagîre kîgongwana kîa mîgaate îkaandi kuumania na mûnyaki jûrîa jûûragwa îtîîriine jûrî jwa mbere. 21. Ritagîreeni MWATHANI kîgongwana kîa mîgaate îkaandi kuumania na mûnyaki jûrîa jûûragwa îtîîriine jûrî jwa mbere nthukîîne cieenu cionthe. 22. Antû boomba kûrega kûthingata mawaatho jau jonthe MWATHANI eerîre Musa. 23. Ningî boomba kûremwa kûjaathîkîra jonthe o ta ûrîa MWATHANI eerîte Musa. Mawaatho jau jabuîrîte kwathîkîrwa nthukîîne cionthe, kuuma rîrîa MWATHANI eerîre Musa jo. 24. Mantû jau jakëeja kûthithua jatîkûmenyeka, kîûthûrano kîa antû ba Israeli gîkarita kareegwa karî kîgongwana gîa gwakîîria, karitanîrue amwe na kîgongwana kîa irio na gîa gwîtûûrîria na bacoke barite nthenge îrî kîgongwana gîa kûthiria meeyia. Kigongwana kîu gîkeethîrwa kîrî na yeera rîrîega kîrî MWATHANI. 25. Mûthînjîri-Mûrungu akaarita kîgongwana gîa kûthirîria kîûthûrano kionthe kîa antû ba Israeli meeyia. Nabo bakaarekerwa nîûntû batîthîrwa bathithîtie meeyia bakîmenyaga. Ningî barekerwe nîûntû bwa kûritîra MWATHANI igongwana bia gwakîîria bia kûthiria meeyia. 26. Kîûthûrano kionthe kîa antû ba Israeli amwe na ageni barîa batûûranagîra amwe nabo bakaarekerwa meeyia jaao nîûntû beeîîtie batîkûmenya. 27. Muntû akëeja kwîyia atîkûmenya akaaritaga mparîka ya mwaka jûmwe îrî ya kîgongwana gîa kûthiria meeyia. 28. Mûthînjîri-Mûrungu akaaritagîra MWATHANI kîgongwana gîa kûthiria meeyia ja muntû ûu wîîtie atîkûmenya. Nawe muntû ûu wîîtie akarekerwa. 29. Nabu waatho bwa muntû wîîtie atîkwenda nî bûmwe; kîrî muntû Mûisraeli kana mûgeni ûrîa ûtûûraga nthîgûrû ya Israeli. 30. Îndî muntû kinya ûrîkû arî Mûisraeli kana mûgeni, akëeja kwîyia meeyia ja ntabarako, muntû ûu nî akûmenithia MWATHANI na abuîrîte kwîngwa buru akauma kîrî antû ba MWATHANI. 31. Nîkwîthîrwa muntû ûu nî ameneeretie ûrîa MWATHANI augîîte na nî aregeete kwathîkîra maathana ja MWATHANI. Muntû ûu abuîrîte gûkanûkîrua meeyia jau bwaawe, akeengwa buru kuuma kîrî antû ba MWATHANI.” 32. Nabo antû ba Israeli barî o kûu rwanda nî boonere muntû akiunaga nkû ntukû ya sabatû. 33. Antû barîa baamwonere akiunaga nkû nî baamûreetere kîrî Musa na Aaroni na kîûthûrano kionthe. 34. Nî aakarîrue aingîri nîûntû gûteerani ûrîa muntû ta ûu abuîrîte kûthithîrua. 35. MWATHANI areera Musa atîrî, “No mwanka muntû ûu ooragwe. Akaumagarua oome ya kambî nakîo kîûthûrano kionthe kîmûûrage na maiga.” 36. Nakîo kîûthûrano kionthe kîramuumagaria oome ya kambî na kîramûûraga na maiga o ta ûrîa MWATHANI eerîte Musa. 37. MWATHANI nî aarîîrie Musa aramwîra atîrî, 38. “Arîria antû ba Israeli ûbeere baogage ikuundwa mîthieene ya nguû ciaao na mîrigi ya rangi ya wiirû bwa îgûrû. Bathithagie ûntû bûu nthukîîne ciaao cionthe. 39. Naabuî rîrîa bûkaaraithagîîria ikuundwa biu bûkaririkanaga maathana jaakwa jonthe bûtîkeeje kûthingata mairîrîîria jeenu jamathûûku jakabûgarûra kuuma kîrî ni. 40. Nabio ikuundwa biu bikaabûririkanagia kwathîkîra maathana jaakwa jonthe nîkenda bwîthagîrwa bûrî babatheru kîrî ni Mûrungu weenu. 41. Ni nî ni MWATHANI Mûrungu weenu ûrîa waabûritîre nthîgûrû ya Misri nîkenda mpaa Mûrungu weenu. Ni nî ni MWATHANI Mûrungu weenu.”
Ekimar 16:1-35 1. Kora mûtaana wa Izihari, aarî Mûlawi wa mwîrîga jwa Kohathi, amwe na Dathani, na Abiramu, tabo ataana ba Eliabu; na Oni mûtaana wa Pelethi, ûrîa wa mwîrîga jwa Rubeni, 2. nî baagwatanîîre antû ba Israeli magana jaîrî ja mîrongo îtaano barîa baarî atongeeria barî îgweta ba kîûthûrano kîa antû ba Israeli, bararega kwathîkîra Musa. 3. Baroothûrana baranung'unîra Musa na Aaroni barabeera atîrî, “Nîka bûkûthûgaania nî buî akî bwijî MWATHANI! Kîûthûrano kionthe kîa antû ba Israeli nî gîkîtheru na MWATHANI arî amwe nabo. Nîmbi îndî ûntû bûgûciona burî ba gîtûmi nkûrûki ya antû bangî ba MWATHANI?” 4. Rîrîa Musa aaigîrue nteto iu araturia maru areenamîîria mwanka nthî. 5. Rîu araarîria Kora na gîkundi kîaawe arabeera atîrî, “Rûûjû rûkîîrî MWATHANI akoonania nî ûrîkû ûrî waawe na nî ûrîkû ûrî ûmûtheru. Ningî agatûma muntû ûu athuurîte aumîre eeta akuî na MWATHANI. 6. Ûûgwe Kora na gîkundi gîaaku jûkieni tûraî twa gûkamata mwanki. 7. Rûûjû rûkîîrî bwîkîre mwanki tûraîîne tûu, na bwîkîre ubaani ku, bûbiîke kîritîroone kîa igongwana. Nawe muntû ûrîa MWATHANI akaathuura nîwe ûkeethîrwa arî ûmûtheru. Buî nchiarwa cia Lawi bûgûtabarîkia.” 8. Ningî Musa areera Kora atîrî, “Alawi! Nandî thikîîreeni. 9. Nîka bûkwona bûrî ûntû bûbûûthû kwîthîrwa bûthuuri nî Mûrungu wa Israeli, bwîthagîrwa bûrî akuî nawe bûtua gûtumîkagîra antû baawe îemeene rîa gûtirimanîra? 10. Mûrungu nî abûrekeeretie buî Alawi bwinthe nîkenda bûkaraga akuî nawe. Nandî nîka bûkwenda kinya ûthînjîri Mûrungu kinya bu? 11. Gwe amwe na gîkundi kîrîa kîrî amwe naagwe, menyeni atî nî MWATHANI bûreganîte nawe. Nîka Aaroni arî ûû tontû bûkûmûnung'unîra?” 12. Ningî Musa nî aatûmanîîre ataana ba Eliabu tabo Dathani na Abiramu. Îndî baracokia barauga, “Tûtîîja. 13. Nîka ûkwona bûrî ûntû bûbûûthû gûtûrita nthîgûrû îrîa nthongi na îrî mûthetu jûmûnoru na ûtonga bûbwingî wîîja gûtûûragîra rwanda, na nandî ûcoke ûcieethie mûnene weetû? 14. Mwanka nandî ûtîratwikia nthîgûrû îrîa nthongi na îrî mûthetu jûmûnoru na ûtonga bûbwingî, kana ûtwaa ithaka, kana miuunda ya mîzabibû. Nîka ûkûthûgaania atî woomba kwaîria antû baba? Tuî tûtîîja.” 15. Musa nawe nî aathûûrîre mono na areera MWATHANI atîrî, “Ûgéetîkîîria igongwana bia antû baba. Gûtî ûthûûku ndaabathithîria; njûkia ntigiri kuuma kîrî bo.” 16. Musa areera Kora atîrî, “Ûûgwe, na gîkundi kîrîa kîrî amwe naagwe, na Aaroni njûûni rûûjû mbere ya MWATHANI îemeene rîa gûtirimanîra. 17. O muntû nî ajûkie karaî karîa gatumagîrwa gûkamata mwanki, eeje eekîrîte ubaani ku. Tûraî tûu tunthe tûkeethîrwa tûrî magana jaîrî ja mîrongo îtaano. Natu tûreetwe îmeene rîa gûtirimanîra. Naagwe amwe na Aaroni, kinya buî bûreete tweenu.” 18. Nabo o muntû arajûkia karaî areekîra mwanki ku na ubaani. Rîu bararûngama mwariine jwa îema rîa gûtirimanîra barî amwe na Musa na Aaroni. 19. Kora araremia kîûthûrano kionthe, nîkenda kîrega kwathîkîra Musa na Aaroni. Aroothûrania kîrîndî au îemeene rîa gûtirimanîra. MWATHANI aracionania kîrî kîûthûrano kionthe arî na ûkumio bûbûnene. 20. MWATHANI nî aarîîrie Musa na Aaroni arabeera atîrî, 21. “Ciathûraneni na kîûthûrano gîkî naani nkîthirie o rîu.” 22. Îndî Musa na Aaroni baraturia maru, barenamîîria, baratiirithia moothiû jaao nthîgûrû, barauga atîrî, “Itû Mûrungu, gwe nîgwe woombîre antû bonthe. Muntû ûmwe akëeyia rî, nîka ûthûûra nî kîûthûrano kionthe?” 23. MWATHANI araarîria Musa aramwîra atîrî, 24. “Arîria kîrîndî ûkîîre ûjû: ‘Antû nî baumaume akuî na îema rîa Kora, na rîa Dathani, na rîa Abiramu.’” 25. Musa arookîîra areeta kîrî Dathani, na Abiramu, nabo atongeeria ba antû ba Israeli baramûthingata. 26. Musa araarîria kîrîndî arauga atîrî, “Itû ndabwerenca umaumeeni akuî na maema ja antû baba bathûûku na bûkaaringithia gîntû kîaao kinya kîrîku, bûtîkeeje kûthiranîrua nabo bakîthirua nîûntû bwa meeyia jaao.” 27. Tontû bûû, kîrîndî kîraumauma akuî na maema ja Kora, na ja Dathani na ja Abiramu. Dathani na Abiramu barî na aka baao na aana baao nî baarî bakuumagara baarûngama mîariine ya maema jaao. 28. Nîrîo Musa aaugîre atîrî, “Nandî bûkaamenya atî nî MWATHANI ûntûmîte nthithia mantû jarîa nthithagia jonthe, na tî ûûni ningwa nthithagia jarîa nkwenda. 29. Antû baba bakëeja gûkua gîkuû ta kîrîa antû bangî bakuujaga kana bagakua nî ûkûrû ja antû bangî, bûkamenya atî tî MWATHANI ûntûmîte. 30. Îndî MWATHANI agatûma gûkarîka ûntû bûtakarîka kaîrî nayo nthîgûrû îkagaûkana îkameria antû baba amwe na into biaao bionthe bakeenama bageeta kwa barîa akuû, rîu bûmenye atî antû baba nî kûmena bamenete MWATHANI.” 31. Naku kûrakara atîrî, Musa akîthiria kwaria nteto iu akî, nthîgûrû îraatûka rungu rwa maema ja Dathani na ja Abiramu, 32. nayo nthîgûrû îrabameria amwe antû ba nja ciaao; na antû ba nja ya Kora bonthe na into biaao bionthe. 33. Tontû bûû, antû bau amwe na into biaao bionthe baramerua barî mwoyo nayo nthîgûrû îracokanîîra îrabathikîra ku. Antû bau barathirua buru kuuma kîrî kîrîndî kîa Israeli. 34. Nabo antû ba Israeli bonthe barîa baathiûrûkîrîte maema jau baramatûka bakwigua kîrîro kîaao, bakiugaga atîrî, “Kinya tuî menya twîja kûmerua nî nthî.” 35. MWATHANI aratûma mwanki, naju jûraîîthia antû magana jaîrî ja mîrongo îtaano barîa baaritaga ubaani.
Ngieosio 32:1-5 1. Kaaba muntû ûrekeri maatia jaawe, ûrîa meeyia jaawe jarîkîtie kwangûrwa. 2. Kaaba muntû ûrîa ûtî îgi mbere ya MWATHANI, na ûrîa ûtîîkaga mantû ja waayia nkoroone yaawe. 3. Rîrîa ntaarî ndînkuumbûra meeyia jaakwa, ndaarî ndînkwinya buru, nîûntû bwa gwikaîîra mûthenya junthe. 4. Nîkwîthîrwa, gwe wankanûkagia rîonthe, ûtukû na mûthenya; kainya gaakwa kaarî gakûthira buru; ndoomagara mwîrî ta ûrîa matî joomagaragua nî riûa rîa thaano. 5. Nîrîo ndaugîre, “Nkaaumbûrîra MWATHANI maatia jaakwa.” Naani ndîrairira meeyia jaakwa ntîgûkwitha kinya jarîa jarî nthoni; naagwe ûrandekera ndîrathira îgi.
Ngakamatak 11:16-18 16. Mûka wa nkoro înjega, acionagîra gîtîîo, mûka mûmaramari akojûrwa nî nthaao. Mûntû ûrîa ûkîraga aeejaga nkîa îndî muntû nchamba aigwatagîra ûtonga. 17. Muntû wa kîaao aigunaga wengwa, îndî muntû ûtî kîaao nî thîîna aireetagîîra. 18. Into birîa biumanagia na ngûgî imbîî bitîgunaga muntû, îndî ûrîa ûritaga ngûgî ciagîrîte nî oonaga îtuui rîrîega.
Mariko 11:1-19 1. Jesû na aritwa baawe nî beetîte Jerusalemu. Bagûkinya ntûûreeene cia Bethifage na Bethania, irîa ciaarî akuî na kîrîma kîa Mîzeituni, Jesû nî aatûmîre aritwa baawe baîrî 2. arabeera atîrî, “Îteeni ntûûreene îrîa yerekeene naabuî. Bwakûrûka o rîo, bûkoona gatigiri gatakamata muntû katheeki. Kathaûreni na bûndetere ko. 3. Muntû akëeja kûbûûria, ‘Nîkî bûkûthaûra gatigiri, mwîreeni atî Mwathani arî na ûbatu bwaako na agagacokia aja kaîrî ntûti.’” 4. Nabo bareeta baroona gatigiri katheeki akuî na mpingîro ya ntûûra. Rîrîa baakathaûraga, 5. antû bamwe barîa barûngi au barabooria, “Nîkî bûkûthaûra gatigiri?” 6. Aritwa barabacokeria o ta ûrîa beeri nî Jesû; nabo barabarekeeria bareeta. 7. Baraikia gatigiri kau kîrî Jesû, barakaara nguû ciaao mûgongo na Jesû aragakarîra. 8. Antû babaingî nî baarîre nguû njîreene bangî baraara majau njîreene jarîa baatemete ithakeene. 9. Antû barîa baarî mbere yaawe na barîa baarî nyuma yaawe, nî baaugaga na kajû gakanene, “Mûrungu arokumagua! Nî atharimi ûrîa wîjîte riîtweene rîa Mwathani! 10. Ûnene bwa baaba weetû Daudi, ûrîa wîjîte, nî bûtharimwe! Mûrungu arokumagua îgûrû mono.” 11. Jesû agûkûrûka Jerusalemu areeta kîûrûûne na araraithîîria ûrîa mantû jeetaga na mbere. Îndî nîûntû nî kwaarî gûgûtuka, nî eetîre Bethania amwe na barîa îkûmi na baîrî kûrara ku. 12. Rûûneene, baumîte Bethania, Jesû nî aigîrue mpara. 13. Aroona mûkûû jwaarî na mabûûra jamaingî jûrî gataaria. Areeta akuî kwona këethîra jûrî na matuunda. Agûkinya araaga îtunda kinya rîmwe tiga mabûûra jonka, nîûntû gûtaarî îgiita rîa gûciara. 14. Jesû areera mûkûû, “Gûtî muntû ûkaroorûma nkûû ciaaku kaîrî.” Aritwa baawe nî baigîrue akiuga ûu. 15. Bagûkinya Jerusalemu, Jesû arakûrûka kîûrûûne na araambîrîria kwînga barîa beendagia na barîa bagûraga into ku. Araturûra meetha cia barîa baakûranagia mbeecha irîa ciatumagîrwa kîûrûûne na irîa itatumagîrwa kîûrûûne, na araturûra itî bia barîa beendagia ijea. 16. Gûtî muntû kinya ûmwe eetîkîîrîrie akamata gîntû kuuma kîûrûûne. 17. Rîu arabaritana akiugaga, “Nîkwaandîki atî, ‘Nyomba yaakwa îgeetagwa nyomba ya kûrombagîrwa nî antû ba mîgongo yonthe!’ Îndî buî bûmîethetie giiciitho kîa atûnyani!” 18. Athînjîri-Mûrungu barîa anene na aritani ba Waatho baigua ûu, baracwaa ûrîa boomba kûmûûragithia îndî nî bamûkîraga nîûntû antû bonthe nî baarigarîtue mono nî ûritani bwaawe. 19. Ûgoro bwakinya, Jesû na aritwa baawe baraumagara ntûûreene ya Jerusalemu.
Songe Bible 2018
KIMERU BIBLE WITH DC Bible Society of Kenya, 2009, 2018