Beblia

Bible in one year January 10

1. Nde Yeesu jippoyii daga dow hocceere nden, yimɓe ɗuɗɓe tokkimo.

2. Sey goɗɗo gooduɗo nyawu nyaamoojum laral wari diccii yeeso maako, wi'i, “Moodibbo, taa jaɓii, a waaway njamɗitinaayam.”

3. Sey Yeesu forti jungo muuɗum, meemimo, wi'i, “Mi jaɓii. Yamɗutu!” Ɗon e ɗon nyawu ɗum alimo, o yamɗiti.

4. Sey Yeesu wi'imo, “Faamu, taa' wi'uka koo moye, ammaa yahu kollaa hoore maaɗa to ardiiɗo diina, nden kokkaa cakkiri no Muusa wi'i ɗum waɗa ngam laaɓol maaɗa. Waɗu non ngam tabbitinanki yimɓe a yamɗitii.”

5. Nde Yeesu natti gariiri Kafarnahum, sey goɗɗo mawɗo sooji'en Rooma wari to maako, e toroomo, wi'i,

6. “Moodibbo, maccuɗo am e fukkii e wuro o jaraaɗo, e mo fiida e nawɗum kalluɗum.”

7. Yeesu wi'imo, “Mi yahay mi yamɗitinamo.”

8. Sey mawɗo sooji'en on nootii wi'i, “Moodibbo, mi fotaayi nattaa wuro am, ammaa metu tan, maccuɗo am yamɗitay.

9. Ngam min e hoore am ley laamu woɓɓe sooji'en ngonmi, min maa, e mi laamoo sooji'en. To mi wi'ii o'o, ‘Dillu!’ o dillay. To mi wi'ii on ton, ‘Woroy!’ o waray. To boo mi wi'ii maccuɗo am, ‘Waɗu ɗu'um!’ o waɗayɗum.”

10. Nde Yeesu nani non, hayɗini, wi'i kawrutuɓe e tokkimo, “E mi wi'a'on goonga, koo nder Israa'iila mi heɓaayi kooliiɗoyam ɓernde go'o bo o'o.

11. E mi wi'a'on, yimɓe naa' Yahuudanko'en ɗuɗɓe ngaray daga fuuna e hirna ɓe njooɗoo ɓe nyaama nyamndu humto e Annabi Ibraahim, e Iciyaaku, e Yaakubu nder Laamu Allah.

12. Haanuɓe ngarta yimɓe Allah ammaa ɓe nganyi, ɗum faɗɗayɓe nder nyiwre ɓaleere. Ɗon ɓe mboyata ɓe nyerƴindira nyiiƴe.”

13. Sey Yeesu wi'i mawɗo sooji'en Rooma on, “Yahu! Ngam a hoolake Allah, maccuɗo maaɗa yamɗitay.” Ɗon e ɗon maccuɗo soojiijo on yamɗiti.

14. Nde Yeesu yahi wuro Biiturus yi'i esiraawo Biiturus debbo e fukkii, jonte kalluɗe e torramo,

15. o meemi jungo maako. Jonte ɗen njoofi debbo on, o ummii, o fuɗɗi waddankimo nyamndu.

16. Nde futuro waɗi, yimɓe ngaddani Yeesu gooduɓe ginni ɗuɗɓe. O metaniɗi wolde go'o ɗi mburtii. O yamɗitini fuu ɓe njamɗaa.

17. Non waɗii ngam ɗum hebbina ko Allah wi'i daga honduko Annabi Icaaya, wiiki, “O ittii nyawuuji meeɗen, o yamɗitinii'en.”

Fulfulde Caka Nigeria 2010