Bible in one year February 3Matta 22:1-221. Sey Yeesu fuɗɗiti metiraniɓe misaalu, wi'i,2. “Ɗum nandinay Laamu Allah e goɗɗo laamiiɗo ciryaniiɗo ɓiɗɗo muuɗum humto teegal.3. O lili maccuɓe maako noddoya kumpitaaɓe humto ngon, ammaa kumpitaaɓe ɓen nganyi ngara.4. Sey o fuɗɗiti o lili woɓɓe maccuɓe maako, o wi'i, ‘Njahee mbi'on kumpitaaɓe ɓen, “Raɗɗum mi siryake nyamndu, ɗum hirsii ga'i e nyalbi payɗi, koo ɗume siryaama. Ngaree humto teegal ngal!” ’5. Ammaa kumpitaaɓe ɓen ngannaayi. Go'oto yahi ngesa muuɗum, go'oto yahi luumo muuɗum.6. Horiiɓe ɓen nangi maccuɓe ɓen torriɓe, mbariɓe.7. Sey laamiiɗo on ɓerni naa' seɗɗa, lili sooji'en muuɗum ɓe kalki ɓen ɗon gaɗuɓe warhoore ɓe nguli gariiri maɓɓe.8. Sey o wi'i maccuɓe maako, ‘Humto teegal ngon siryaama, ammaa kumpitaaɓe ɓen ɓe potaayi warki.9. Ngam non njahee dow ɗate mawɗe, kumpiton fuu mo ngiiɗon wara humto ngon.’10. Sey maccuɓe ɓen njahi dow ɗate ɗen ɓe ɓoptoyi koo moye mo ɓe tawi, fuu kalluɓe e ɓe ngikku boɗɗum, haa wuro humto ngon heewi hoɓɓe.11. “Ammaa nde laamiiɗo on nattoyi ngam yi'a hoɓɓe ɓen, o yi'i goɗɗo nder maɓɓe mo ɓornaaki limce humto teegal.12. Sey o wi'imo, ‘Higo, no ɗum waɗi nattoyɗaa ɗo'o a ɓornaaki limce humto?’ Ammaa neɗɗo on dulli ko wi'ata.13. Sey laamiiɗo on wi'i kuwanooɓemo, ‘Kaɓɓee neɗɗo o'o juuɗe e koyɗe, paɗɗonmo nder nyiwre kallunde, to ɗum woyata ɗum nyerƴindira nyiiƴe.’ ”14. Yeesu ɓeydi wiiki, “Yimɓe ɗuɗɓe kumpitaa, ammaa seɗɗa cuɓaa.”15. Sey Faarisanko'en njahi kawti ko'e, kaɓɓi dabare no ɓe nangirta Yeesu dow ko o wi'i.16. Sey ɓe liloyi tokkuɓeɓe e yimɓe Hirudus, ɓe mbi'i, “Moodibbo, e min andi ko mbi'ataa e ko ngaɗataa ɗum goonga, a ekkitina dow laawol Allah e goonga, a hulataa ko yimɓe mbi'ata dow maaɗa, a hollataa feerootirol hakkunde yimɓe.17. Too, wi'umin, e yiiki maaɗa e haani min njoɓa Kaysar ceede leydi koo ɗum haanaayi?”18. Ammaa Yeesu heɓti halleende maɓɓe, o wi'iɓe, “Ngam ɗume poondotonyam, onon munaafuki'en?19. Kolleeyam yamnde nde ɗum yoɓirta ceede leydi.” Sey ɓe ngaddanimo yamnde go'o.20. Yeesu wi'iɓe, “Ɗowdi moye e inde moye woni dow mayre?”21. Ɓe nootii, ɓe mbi'i, “Ɗum Kaysar.” Sey Yeesu wi'iɓe, “Too, ngam non kokkee Kaysar ko woni ɗum Kaysar, nden kokkon Allah ko woni ɗum Allah.”22. Nde ɓe nani non, ɓe kayɗini, ɓe alimo, ɓe ndilli. Fulfulde Caka Nigeria 2010 © 2010, Bible League. All rights reserved