Bible nder hitaande woore
Marse 2

14. Sey Yeesu fuɗɗiti noddi yimɓe hawrutuɓe, o wi'i, “Kettindee, on fuu, paamon.
15. Walaa goɗɗum yaasi ɓandu neɗɗo nattayɗum nder maako wartiramo mo laaɓaa yeeso Allah. Ammaa ko wurtoytoo daga nder ɓernde neɗɗo kalluɗum kanjum wartirtamo mo laaɓaa yeeso Allah.”
16.
17. Nde o sendiri e yimɓe fuu, o natti wuro, tokkuɓemo ƴamimo ma'ana ekkitinol ngo'ol.
18. O nootii o wi'i, “Onon maa on paamaayi ma'ana ɗu'um? On andaa walaa ko nattata neɗɗo daga yaasi wartiramo mo laaɓaa?
19. Ngam naa' nder ɓernde ɗum nattata, ammaa nder reedu, nden ɗum wurto ɓandu.” (Nde Yeesu wi'i ɗu'um, o hollii koo nduye nyamndu ndu lamndu.)
20. O ɓeydi wi'uki, “Ko wurtotoo daga nder ɓernde neɗɗo, kanjum waɗata neɗɗo warta mo laaɓaa yeeso Allah.
21. Ngam daga nder ɓernde neɗɗo nyumo kallungo wurtoytoo, e waɗuki njeenu hakkunde yimɓe ɓe ngalaa teegal, e nguyka, e warhoore, e njeenu,
22. e suuno fii duuniyaaru, e halleende, e ƴoyre kallunde, e fuu kuuɗe kalluɗe ɗe ɓerɗe maɓɓe ngiɗi, e lawliiru, e wonnuki inde neɗɗo, e mawninki hoore, e wanyuki waɗuki ko wooɗi.
23. Fuu ɗe'e kuuɗe kalluɗe daga nder ɓernde ɗe mburtoytoo ɗe ngartira neɗɗo mo laaɓaa yeeso Allah.”
24. Daga ɗon Yeesu dilli yahi wigeere haade gariije Taaya e Sidon. O natti wongo wuro, o yiɗaa koo moye anda e mo ɗon ɗum. Ammaa fuu e non o waawaayi suuɗaaki yimɓe.
25. Ɗon e ɗon goɗɗo debbo gooduɗo ɓiɗɗo surbaajo pamaro gooduɗo ginnol nani habaru Yeesu. Sey o wari o diccii yeeso Yeesu.
26. Debbo on boo o Helenankeejo to Finiikiya nder leydi Siiriya o danyaa. O torii Yeesu wurtinana ɓiɗɗo maako ginnol ngol.
27. Sey Yeesu wi'imo, “Arande al ɗum nyamna ɓikkoy, ngam ɗum haanaayi ɗum hocca nyamndu ɓikkoy ɗum hubanoondu kutihoy.”
28. Ammaa debbo on wi'imo, “Ee, Moodibbo, ammaa haa kutihoy ngonkoy ley teebur e nyaama horaano sukaaɓe ɓen.”
29. Sey Yeesu wi'imo, “Ngam a wi'ii non, hootu, ginnol ngol wurtake ɓiɗɗo maaɗa.”
30. Sey debbo on so''ii wuro tawi ɓiɗɗo muuɗum e fukkii dow leeso, ginnol ngol boo wurtake daga nder maako.
31. Sey Yeesu ali wigeere gonde haade gariiri Taaya, o tokkiri gariiri Sidon, o regoyii Mbeela Galiili, o natti leydi Dikapolis.
32. Ton woɓɓe yimɓe ngaddanimo goɗɗo paho mo meto muuɗum wurtataako boɗɗum. Ɓe torii Yeesu yowa juuɗe muuɗum dow maako yamɗitinamo.
33. E woodi yimɓe ɗuɗɓe ɗon, sey Yeesu hakkitii kanko e paho on, o waɗi kooli maako nder noppi paho on. O tutti joode o meemi ɗemngal paho on.
34. Nden Yeesu raari dow foofi foofaango juutungo wi'imo, “Ifata,” waato, “Maɓɓita!”
35. Ɗon e ɗon noppi neɗɗo on maɓɓitii, ɗemngal maako yoofii, o fuɗɗi metuki boɗɗum.
36. Sey Yeesu wi'iɓe to' ɓe mbi'aka goɗɗo. Ammaa fuu carel ngel o haɗiɓe wi'ukika, sey ɓe ɓeyda wi'ukika koo toye.
37. Yimɓe kayɗini naa' seɗɗa mbi'i, “O waɗii koo ɗume boɗɗum, haa maa e mo waɗa pahuɓe nana, e mo waɗa ɓe mbaawataa metuki meta.”
Fulfulde Caka Nigeria 2010
2010, Bible League