Beblia

Bible in one year April 8

18. Wonde nyalnde Yeesu e waɗa do'aare, kanum tan, tokkuɓemo e haade maako. O ƴamiɓe, o wi'i, “Moye yimɓe mbi'atayam?”

19. Ɓe nootii ɓe mbi'i, “Woɓɓe e mbi'a a Yahaya Gaɗoowo Baptisma. Woɓɓe boo e mbi'a a Annabi Iliya. Nden woɓɓe kadimaa e mbi'a go'oto nder annabo'en ndenno ummii.”

20. O wi'iɓe, “Ammaa onon, moye mbi'otonyam?” Sey Biiturus nootii, wi'i, “An woni Almasiihu mo Allah!”

21. Ammaa Yeesu haɗiɓe to' ɓe mbi'aka koo moye.

22. Nden o wi'i, “Doole Ɓii Neɗɗo yara bone ɗuɗɗum. Mawɓe yimɓe e mawɓe ardiiɓe diina e moodiɓɓe Attawra nganyamo, nden o waree. Nder nyalnde tatawre boo ɗum umminaymo.”

23. Sey o wi'iɓe ɓe fuu, “Fuu giɗɗo warta tokkuɗoyam, to' waɗa ko hoore muuɗum yiɗi waɗuki tan, ammaa doole hocca gaafaangal muuɗum koo ndeye tokkayam.

24. Ngam fuu giɗɗo hisnuki yonki muuɗum o dullayki. Ammaa fuu dullayɗo yonki muuɗum ngam am o hisnayki.

25. Ko ɗum nafanta neɗɗo, to o heɓii duuniyaaru fuu, ammaa o majjinii hoore maako koo o halki?

26. Koo moye ganyuɗoyam, min Ɓii Neɗɗo e boliiɗe am, mi wanyaymo to mi wartoyii nder teddungal am, e nder teddungal Nyaako am Mo Dow, e malaa'ika'en maako ceniiɓe.

27. E mi wi'a'on goonga, e woodi woɓɓe dariiɓe ɗo'o ɓe maayataa naa ɓe ngi'ii Laamu Allah.”

28. Balɗe joweetati gaɗa Yeesu wi'iɓe boliiɗe ɗen, o ƴeeŋi dow hocceere ngam o waɗa do'aare. Biiturus, e Yahaya, e Yaakubu e wondi e maako.

29. E mo nder do'aare sey yeeso maako e kolte maako ngarti daneeje tar.

30. Ɗon e ɗon sey raa, annabo'en ɗiɗo, Muusa e Iliya, wangi

31. nder teddungal, e ɓe medda e maako. Ɓe meddi dow mayde maako nde tabbitay naa' ko neeɓi nder Urucaliima.

32. Biiturus e gonduɓe e muuɗum ɗaanake, carel ko ɓe kuylii, ɓe ngi'i teddungal maako e yimɓe ɗiɗo darodiiɓe e maako.

33. Carel ko annabo'en ɓen alata Yeesu, Biiturus wi'imo, “Moodibbo, wonki amin ɗo'o e wooɗi. Al min nyiɓa cuuɗi tati, wo'oyru ndu maaɗa, wo'oyru ndu Muusa, nden wo'oyru ndu Iliya.” Ammaa Biiturus andaa ko wi'ata.

34. E mo nder metuki, sey nduula wangi, suddiɓe, ɓe kultori.

35. Ɓe nani hononde Allah daga nder nduula ngan wi'i, “O'o woni Ɓiɗɗo am mo cuɓumi. Nanee ko o wi'ata'on.”

36. Nde hononde nden de''iti, ɓe ngi'i Yeesu kanum tan. Tokkuɓemo aliɗum hakkunde maɓɓe, nder nyalɗe ɗen ɓe mbi'aayi goɗɗo ko ɓe ngi'i.

Fulfulde Caka Nigeria 2010