22. Sey ɗum jangini Muusa on andal Masaranko'en fuu, o warti bawɗo haala e kuuɗe.
23. “Nde Muusa waɗi duuɓi 40, o yahi to lenyol maako, ɓiɓɓe Israa'iila ngam o yi'a no ɓe ngontindiri.
24. Nde o yi'i goɗɗo Masarankeejo e torra goɗɗo Israa'iilankeejo, o walli Israa'iilankeejo torreteeɗo on, o fiyi Masarankeejo on, o warimo.
25. O nyumi bandiraaɓe maako anditay Allah huutiraymo ngam hisnaɓe daga jungo Masaranko'en, ammaa ɓe anditaayi.
26. Nde fini o tawi Israa'iilanko'en ɗiɗo e kaɓa. O yiɗii o siryootiraɓe, o wi'iɓe, ‘Higooɓe am, onon on bandiraaɓe! Ngam ɗume kallanton ko'e mooɗon?’
27. Ammaa torrayɗo go'oto on turtii Muusa wuttudu, wi'imo, ‘Moye wartirmaa ardiiɗo e kiitotooɗo dow amin?
28. Min maa, a yiɗi mbaraayam no mbarduɗaa Masarankeejo keenya?’
29. Nde Muusa nani non doggi yahi leydi Midiyan. Ton o danyanaa ɓiɓɓe worɓe ɗiɗo.
30. “Gaɗa o waɗii duuɓi 40 ton, malaa'ikaajo wanganimo nder ɗemngal hiite dow leggel nder ladde, haade Hocceere Sinay.
31. Nde Muusa yi'i non ɗum hayɗiniimo, e mo ɓattoo ngam o raara, sey o nani hononde Joomiraawo wi'ii,
32. ‘Min woni Allah maama'en maaɗa, Allah Ibraahim e Iciyaaku e Yaakubu.’ Muusa darii e diwna, huli raaruki.
33. Joomiraawo wi'imo, ‘Ittu paɗe maaɗa, ngam wigeere to ndariɗaa nde ceniinde.
34. Mi yi'ii torra yimɓe am wonɓe leydi Masar, mi nanii bojji maɓɓe. Jooni mi jippoyake ngam hisnukiɓe. War mi lilmaa leydi Masar.’
35. “Muusa mo ɓiɓɓe Israa'iila nganyunoo mbi'i, ‘Moye wartirmaa ardiiɗo e kiitotooɗo dow amin?’ Kanko woni mo Allah liloyi, wartirimo ardiiɗo e joofayɗoɓe daga maccungaaku e ballal malaa'ikaajo wangannooɗomo nder leggel ngel hiite.
36. Kanko ardiiɓe, ɓe mburtii leydi Masar. O waɗii kuuɗe kayɗiniiɗe e alaamaaji nder leydi Masar e nder Maayo Woɗewo e nder ladde jornde duuɓi 40.
37. Muusa on kanko woni biiɗo ɓiɓɓe Israa'iila, ‘Allah lildoyay'on annabiijo bo am, daga nder bandiraaɓe mooɗon.’
38. Muusa on e mo nder kawtal maama'en meeɗen nder ladde, e mo wondi e malaa'ikaajo metanɗomo dow Hocceere Sinay. Kanko Allah hokki habaru wolde kokkaynde yonki ngam o waddana'en.
39. “Ammaa maama'en meeɗen njaɓaayi tokkuki ko o wi'i. Ɓe calaniimo, ɓerɗe maɓɓe co''ii Masar.
40. Ɓe mbi'i Haruuna, ‘Waɗan'en allaaji ardotooɗi'en, ngam en andaa ko heɓi Muusa burtinoyɗo'en leydi Masar.’
41. Nder balɗe ɗen ɓe ngaɗi gagel jiinaari, ɓe ngartiringel allah maɓɓe, ɓe kirsaningel cakkiri, ɓe ngaɗi humto ngam mawninki ko ɓe ngaɗi e juuɗe maɓɓe.
42. Ngam non Allah waylitaniɓe ɓaawo, aliɓe ɓe mawnina koode, non no ɗum windiraa nder Deftere Annabo'en wi'uki: ‘Onon yimɓe Israa'iila, duuɓi 40 ɗi ngaɗɗon nder ladde, min kirsanɗon marle cakkanɗon?
43. Aa'a, naa' ɗum min. On ndoondake lukuru allah mooɗon Molek, kanga e allah hoodere mooɗon bi'eteende Rifan, allaaji ɗi ngaɗɗon ngam mawninki! Ngam maajum mi riiway'on, mi yaara'on ton leydi Baabiila.’ ”