Beblia

Bible in one year June 3

1. Too, ɗum nyalnde go'o ko ɗum waɗa Humto Sakkinki. Yeesu e andi carel waɗii ngel o alata duuniyaaru ndu'u o so''oo to Nyaako Mo Dow. Yeesu e yiɗi yimɓe muuɗum gonɓe nder duuniyaaru, jooni boo o hollayɓe mangu yidde maako.

2. Yeesu e tokkuɓemo e ɓe kirtoo. Ceyɗan yaadake waɗii nyumo hokkitirki Yeesu nder ɓernde Yahuuda Iskariyooti ɓiɗɗo Siiman.

3. Yeesu e andi Nyaako Mo Dow waɗii koo ɗume nder juuɗe muuɗum, kadin e mo andi daga to Allah o ƴiwoyi, to Allah kadin o so''otoo.

4. Ngam non, o ummii daga to ɓe nyaamata nyamndu, o ɓortii toggoore maako, o taadii gudel.

5. Sey o nyeɗi ndiyam nder tummude, o fuɗɗi lootuki koyɗe tokkuɓemo, e mo moytiraɗe gudel ngel o taadii.

6. O wari to Siiman Biiturus, Siiman Biiturus wi'imo, “Moodibbo, an lootantayam koyɗe?”

7. Yeesu wi'imo, “Jooni a faamataa ko ngaɗaymi, ammaa yeeso ɗo'o a faamay.”

8. Sey Biiturus wi'i, “Aa'a! Goonga a lootantaayam koyɗe.” Yeesu wi'imo, “To mi lootanaayima koyɗe, an naa' a tokkuɗoyam.”

9. Siiman Biiturus wi'imo, “Moodibbo, taa' lootu koyɗe am tan, hawtu fuu e juuɗe am e hoore am!”

10. Sey Yeesu wi'i, “Koo moye lootiiɗo, fuu ɓandu maako wartii lamndu. Naa' naa o fuɗɗitii o lootii hoore maako, sey ni o loota koyɗe maako. Onon boo on laaɓuɓe, ammaa naa' on fuu mooɗon.”

11. Yeesu e andi kokkitirayɗomo, kanjum waɗi o wi'i, “Naa' on fuu ngoni laaɓuɓe.”

12. Gaɗa Yeesu lootii koyɗe maɓɓe, o ɓornii toggoore maako, o so''ii o jooɗii to o wonnoo. O wi'iɓe, “On paamii ko ngaɗanmi'on jooni?

13. On noddayam moodibbo e mawɗo, e ɗum haani nde ngaɗɗon non, ngam non ngonumi.

14. Jooni, nde min, mawɗo mooɗon e moodibbo mooɗon, mi lootii koyɗe mooɗon, onon maa e haani lootindiron koyɗe.

15. Mi waɗanii'on ko ekkitotooɗon, ngam onon maa ngaɗanon woɓɓe non no ngaɗanmi'on.

16. E mi wi'a'on goonga, walaa maccuɗo ɓurɗo jeyɗomo, nden walaa lilaaɗo ɓurɗo lilɗomo.

17. Jooni nde on andi fuu fii ɗu'um, on barkiɗinaaɓe to on ngaɗiiɗum.

18. “Naa' dow mooɗon on fuu metaymi. E mi andi ɓe cuɓumi. Ammaa aayaare nde'e doole nde heewa biinde, ‘Neɗɗo mo nyamdaymi nyamndu am wartii ganyo am.’

19. E mi wi'a'on ɗu'um jooni ko ɗum waɗa, ngam to ɗum waɗii koolooɗon, ‘Min Woni Mo Ngonumi.’

20. E mi wi'a'on goonga, fuu jaɓuɗo koo moye mo lilumi jaɓiiyam, kadin fuu jaɓuɗoyam jaɓii on ɗon liloyɗoyam.”

Fulfulde Caka Nigeria 2010