27. Nde deenoowo suudu cural on huylii, o yi'i dammuɗe ɗen fuu e maɓɓitii, o kammi maɓɓaaɓe fuu ndoggii. Ngam maajum o sorti kaafahi ngam o wara hoore maako.
28. Sey Bulus noddi e sembe, wi'i, “Taa' waru hoore maaɗa. Min fuu e min ɗon!”
29. Deenoowo on wi'i hokkee fitilaaru, o doggi o natti to Bulus e Siila ngoni, o diccii yeeso maɓɓe, e mo diwna ngam kulol.
30. Nden o wurtiniɓe, o wi'iɓe, “Moodiɓɓe, ko ngaɗaymi mi hisa?”
31. Ɓe nootii ɓe mbi'i, “Hoola Yeesu Joomiraawo, an e wuro maaɗa fuu, on kisay.”
32. Ɓe metanimo Wolde Joomiraawo, kanko e wuro maako fuu.
33. Nder jemmaare nden, o wurtiniɓe, o lootaniɓe nawnooɗe. E ngel ɗon carel o waɗanaa baptisma, kanko e wuro maako fuu.
34. Nden o yaari Bulus e Siila wuro maako, o hokkiɓe nyamndu. Kanko e wuro maako fuu ɓe nani belɗum ngam ɓe ngartii kooliiɓe Allah.
35. Nde weeti, mawɓe gariiri ndin liloyi taadiiɓe mbi'a deenoowo on o yoofa Bulus e Siila ndilla.
36. Sey deenoowo on wi'i Bulus, “Mawɓe liloyii mbi'i ɗum yoofa'on. Ngam non mburtee jooni, njahon jam.”
37. Ammaa Bulus wi'imo, “Ɓe ngaɗii ɗum fiyiimin yeeso yimɓe daga min ngaɗanaaka kiita, ɓe maɓɓiimin nder suudu cural. Minon boo, min Roomanko'en. Nden jooni ɓe mburtinamin e suuɗe? Ɗum waɗataako sam! Doole kamɓe e ko'e maɓɓe, ɓe ngara ɗo'o ɓe mburtinamin!”
38. Sey taadiiɓe ɓen njahi ɗiiwitani mawɓe gariiri haala kan. Nde ɓe nani Bulus e Siila ɓe Roomanko'en, ɓe kuli.