Biblia nun ano - Ghomala New Testament 2002

Biblia nun ano Agosto 10

1. Mfɑ̌mfɑ́, ywə yə tʉm tsɑ̌ shəŋ a, ba yɑ nə cwyɛ'nyə Si nə pú bɑ gɑ́ wap kəm nə ywə vɔk.

2. Nə pa' gɑ̌ wə bɑ ŋkwinthɛ̌ gɑ wap ŋkhaktʉɔ te' nə Si: Da' gɑ́ a pɑ́ kaktʉɔ tə zhyə̌nwə!

3. Wap lə pɑwə jyə dəŋdəŋ yə á fɑ bi Si a pɑ, biŋ bɑwə shəŋ pɑ́ nə yáp yap nthi, wap lə pɑwə ju'nyə bi nwə dəŋdəŋ yə a bɑ yə́ Si a.

4. Nə pa' Kristo bɑ nə myə̀ŋ mco', po'o gɑ dəŋdəŋ pɑ́ bi bǎ ya mo lə yə e piŋ a.

5. Pɑ̀ kwa' Mosɛ bvə nə dəŋdəŋ yə a fɑ m nə mco' a gɑ: Mo yə e gə pa' a gɔm a gɔ sɔ' vɔk pɑ nə́.

6. Tə nwə dəŋdəŋ yə a fɑ m nə piŋnthʉm a gɔm gɑ: Kɑ ghɔm nthʉm tʉm o gɑ: Wɑ gɔ sɔ' kwɔ' kɛbəŋ? O ghɔm po'o bɑ o nə shəŋ gɑ Kristo fi'.

7. Kɑ nəŋ gɔm gɑ: Wɑ gɔ tsəŋ ko tsʉ̀m? O ghɔm po'o bɑ o nə shəŋ gɑ Kristo pʉɔ fɑ wə mpfə pɔ.

8. Tə e gɔm gɑ́ kɑ̀? E gɔm gɑ́: Ghɔm bɑ pɑ́ bəŋ o, ǎ shwə o, nthʉm tʉm o. Ghɔm bɔ bɑ ghɔm piŋnthʉm tsyə pyə siŋ a.

9. O lɑ shwə ó gɔm gɑ́ Yeso bɑ Cyəpɔ nəŋ biŋ bíŋ nthʉm tʉm o gɑ Si lě jam e nə vʉ̌, bɑ o gɔ sɔ' vɔk.

10. Nə pa' nə piŋ nthʉm tʉm o dɑ o gɔ nə dəŋdəŋ, nə pǐŋ dɑ shwə ó gɔm pɑ́ dɑ o gɔ nə ywə vɔk.

11. Nə pa' ywə yə pu lə və a gɔm gɑ: Mo yə e piŋ e a, bɑ sǒ tə́ gɔ sɔ' kú e pɑ́.

12. A po'o tə yə Yudea pu yə Grikia bɑ pɑ́ ta' ywə: Guŋ yap awɛ bɑ wap ghə pɑ́ ta' Cyəpɔ, fʉ' bi pɔ pyə wap ŋkhe é a.

13. Nə pa' bǎ ya mo lə́ yə ě ke tso Cyəpɔ a bɑ e gɔ sɔ' vɔk.

14. A po'o bi a pɑ́ wap ké é m gɑ kɑ tə́ piŋ é? Wap pɑ gɔ piŋ é m gɑ kɑ tə̀ yu' gi é? Wap pɑ gɔ yu' gi e m gɑ kɑ tə mo siŋ?

15. Mo pɑ gɔ siŋ m gɑ́ kɑ tə́ pu nthəm é? Nə pa' a bɑ pu və gɑ: Mkwə pɔ pyə wap siŋ Cuŋ pɑpúŋ a bɑ ǎ pùŋ.

16. Tə́ guŋ pɔ awɛ bɑ wap ka yu'nyə nə Cùŋ pɑpuŋ. Nə pa' Esaya gɔm gɑ: Cyəpɔ, wɑ̌ bɑ ě piŋ ghɔm tsyə pyə̌ siŋ a?

17. Nə pa' piŋnthʉm fɑ nə ghɔm ju'yǔ', ghɔm bɔ pɑ nə siŋ ghɔm Kristo.

18. Po'o tə gɑ̌ həŋtə́ gɑ: jyə gɑ a bɑ wap lě tə́ yu' lə? Tə əŋ! Nə guŋ mtsʉ' awɛ dəmcǎ', gi yap lě gi, ba mghɔm map, tə gɔ ŋkhəm nə dhə̀ dzʉ́.

19. Gɑ̌ bɑwə həŋtə gɑ: Jyə gɑ a bɑ Israɛl lě tə́ yu' lə́? Tə Mosɛ bɑ e lə ghɔm gɑ: Gɑ̌ gɔ sɔ' ghə o khiŋ ywə yə a tə bɑ guŋ a pɑ; gɑ gɔ sɔ' ghə o ghi'nyə guŋ yə a ka ghə zhyənwə a.

20. Esaya gɔ tə gɔm ba m gɑ: Pɑ tə cəŋ a lě jɔ a; ŋ dě gə pɔ pyə wap la tə́ həŋtə a zhyə a.

21. Tə sɔ' m nə pɑ Israɛl e gɔm gɑ: Guŋ mtyɛ'dzʉ awɛ ŋ də nyǎ pu a bi pɔ, pɑ tə yu'nyə, mtʉɔthə́.

Galacian Bible 2002