Beblia

Biblia en un año Jasyapy 14

1. Israel ñemoñare oiko ramo guare Sitímpe oñepyrũ oipyhy kuña Moab pegua.

2. Umi kuña ogueraha Israel guápe ha'e kuéra oikuave'ẽháme Moab pegua tupã gua'úpe ha ojapouka chupe kuéra opa mba'e ha'e kuéra ojapóva. Israel ñemoñare ho'u tembi'u oñekuave'ẽva tupã gua'u,

3. Baal-Peórpe ha omomba'e guasu chupe. Upévare Ñandejára ipochy hendive kuéra,

4. ha he'i Moiséspe: —Embyaty mburuvicha kuéra Israel guápe ha ere chupe kuéra che aipotaha ára sakãme ojuka umívape, opavave rovake, che renondépe. Upéicha ramo mante opáta che pochy Israel ñemoñare ndive.

5. Moisés he'i mburuvicha kuérape: —Pejuka opa umi pene ñemoñare omomba'e guasu vaekue Baal-Peórpe.

6. Peteĩ kuimba'e Israel ñemoñare ogueraha hógape peteĩ kuña Madiangua. Kóva ojapo maymáva hasẽmba jave hína Jotopa Róga renondépe, Moisés ha opa Israel ñemoñare rovake.

7. Ohechávo upéva Finees, pa'i Eleazar ra'y ha Aarón remineno, osẽ Israel ñemoñare atýgui,

8. oike pe kuimba'e kotýpe, oikutu ha ombyasuru yvyra hakua puku pe kuimba'e ha kuña rye rehe ha ojuka chupe kuéra. Upépe opa pe mba'asy asãi ojukáva hetaite Israel guápe.

9. Pe mba'asy ojuka jepe 24.000 Israel guápe.

10. Tupã he'i Moiséspe:

11. —Pe ojapo vaekue rehe Finees, opáma che pochy Israel ñemoñare ndive. Ha'e ndohejái oñemomba'e guasu mba'eveichagua tupã gua'u ha upéva rehe nahundíri opa Israel guápe.

12. Ere chupe upéicha ramo ame'ẽha chupe che ñe'ẽ opa árape guarã.

13. Ha'e ha iñemoñare opytáma pa'i ramo opa ararã. Ha'e ndohejái che mohendague avaveichagua ha hesehápe aheja rei Israel guápe iñangaipa.

14. Pe kuimba'e Israel ñemoñare ojejuka vaekue kuña Madiangua ndive héra Zimrí, Salú ra'y, upéva Simeón ñemoñare ruvicha.

15. Pe kuña katu héra Cozbí, Sur rajy, upéva peteĩ Madiangua ruvicha.

16. Tupã he'i Moiséspe:

17. —Pesẽ pendyry Madián peguáre ha pehundi chupe kuéra,

18. ojapo haguére pende rehe ivaíva pene mbotavývo Peórpe; ha pe kuña Cozbí rehe ojejuka vaekue hetaite Israel ñemoñare omano ramo guare mba'asy asãigui.

26:1-65

1. Opa rire pe mba'asy asãi, hetaitépe ojuka vaekue, Ñandejára he'i Moisés ha pa'i Aarón ra'y Eleazárpe:

2. Peipapa opa kuimba'e Israel ñemoñare, 20 áño oguerekóva guive, oĩva oho haguãicha ñorãirõháme.

3. Moisés ha pa'i Eleazar ojapo péicha ha ombyaty opa kuimba'e Israel ñemoñare Moab ñúme, ysyry Jordán ypýpe, Jericó rovái, Ñandejára he'i haguéicha Moiséspe. Israel ñemoñare osẽ vaekue Egíptogui, oguerekóva 20 áño guive, ko'ãva hína:

5. Rubén, Jacob ra'y ypykuégui osẽ vaekue, Henoc, Falú, Hesrón ha Carmí rogagua:

7. Rubén ñemoñare ojepapa 43.730 kuimba'e.

8. Falú ra'yre Eliab ha Eliab ra'yre Nemuel, Datán ha Abiram, myakãhára opu'ã vaekue Moisés ha Aarón rehe, ha moĩ vaekue Coré ndive, kóva opu'ãvo Ñandejára rehe.

10. Yvy ojeka ha omokõ vaekue Corépe, ha 250 hesegua tatápe okaipa. Upéicha ojehu Israel ñemoñare oikuaa haguã mba'épa he'ise ñepu'ã Ñandejára rehe.

11. Coré ra'y kuéra oikove, umíva nomanombái.

12. Simeón ñemoñarégui osẽ vaekue Nemuel, Jamín, Jakín, Zérah ha Saúl.

13.

14. Umíva ojepapa 22.200 kuimba'e.

15. Gad ñemoñarégui osẽ: Sefón, Haguí, Suní, Ozní, Erí, Arod ha Arelí.

16.

17.

18. Gad ñemoñare ojepapa 40.500 kuimba'e.

19. Judágui Canaánpe omano mokõi ita'ýra: Er ha Onán,

20. ha opyta chupe Selá, Fares ha Zérah.

21. Fares ra'y Hesrón ha Hamul.

22. Judá ñemoñarégui ojepapa 76.500 kuimba'e.

23. Isacar ñemoñare, Tolá, Puvá, Jasub ha Simrón,

24.

25. umíva ojepapa 64.300 kuimba'e.

26. Zabulón ñemoñare Séred, Elón ha Jahleel.

27. Umíva ojepapa 60.500 kuimba'e.

28. José ra'y Manasés ha Efraín. Manasés ra'y Maquir, ha Maquírgui osẽ Galaad.

29.

30. Galaádgui osẽva hína ãva: Jezer, Hélec, Asriel, Siquem, Semidá ha Héfer. Héfer ra'y Sutélah; kóva ndaita'ýrai, itajýra katu ãva: Mahlá, Noá, Hoglá, Milcá ha Tirsá.

31.

32.

33.

34. Manasés ñemoñare ojepapa 52.700 kuimba'e.

35. Efraín ñemoñare Sutélah, Béquer ha Tahán.

36. Sutélah ra'y vaekue Erán.

37. Efraín ñemoñare ojepapa 32.500 kuimba'e. Opa umíva, José ñemoñare.

38. Benjamíngui osẽ vaekue ko'ãva: Bela, Asbel, Ahiram, Sufam ha Hufam.

39.

40. Bélagui osẽ Ard ha Naamán.

41. Benjamín ñemoñare ojepapa 45.600 kuimba'e.

42. Dan ñemoñare, Suham.

43. Dángui osẽ vaekue ojepapa 64.400 kuimba'e.

44. Aser ñemoñare Imná, Isví ha Beriá.

45. Beriá ra'y kuéra Éber ha Malquiel.

46. Aser itajýra avei; héra Sérah.

47. Aser ñemoñare ojepapa 53.400 kuimba'e.

48. Neftalígui osẽva, ko'ãva: Jahseel, Guní, Jezer ha Silem.

49.

50. Neftalí ñemoñare ojepapa 45.400 kuimba'e.

51. Israel ñemoñare ojepapáva ohupyty 601.730 kuimba'e.”

52. Ñandejára he'i Moiséspe:

53. Emboja'o pe yvy Israel guápe, reitývo po'a, ojepapa haguéicha umi ñemoñare. Umi hetavévape eme'ẽ tuichave ha mbovyvévape, michĩve.

54.

55. Peteĩ-teĩme toñeme'ẽ ijyvy teerã pe yvýgui itúva ñemoñare guápe guarãva, ojeitývo po'a.

56.

57. Leví ñemoñare hína Guersón, Quehat ha Merarí.

58. Ko'ãvagui osẽ vaekue libníta, hebroníta, mahlíta, musíta ha coreíta kuéra. Ko'ãva levíta meme hína. Quehat vaekue Amram ru.

59. Amram omenda vaekue peteĩ Leví rajýre, hérava Jocabed. Jocabed oikove ypy vaekue Leví oĩ ramo guare Egíptope. Omenda rire Amram rehe, Jocabed imemby chugui ko'ãva: Aarón, Moisés ha María.

60. Aarón ra'y kuéra ko'ãva: Nadab, Abihú, Eleazar ha Itamar.

61. Nadab ha Abihú omano ohapy haguére Tupãme guarã tata imba'erã'ỹva.

62. Kuimba'e levíta kuéra oguerekóva peteĩ mes guive, ojepapa 23.000. Ha'e kuéra ndojepapái umi ambue Israel ñemoñare ndive, noñeme'ẽigui chupe kuéra ijyvy teerã.

63. Péicha vaekue pe Israel ñemoñare jepapa ojapo vaekue Moisés ha pa'i Eleazar, Moab ñúme, Jordán rembe'ýre, Jericó rovái.

64. Umíva apytépe ndaiporivéi peteĩ kuimba'énte jepe, opa umi ojepapa vaekuégui Moisés ha Aarón ojapo ramo guare Israel ñemoñare jepapa yvy ojeiko'ỹha Sinaí guápe.

65. Tupã he'i vaekue ha'e kuéra omanombataha yvy ojeiko'ỹháme. Caleb Jefuné ra'y ha Josué Nun ra'y añoite opyta. Hembyre katu omanombaite.

34:1-7

1. David oñembotarova ramo guare Abimélec renondépe, ha upéi osẽ oho.

2. Amomba'e guasúta opa ára Ñandejárape, chupe aropurahéita tapiaite.

3. Ñandejára ombovy'a che rekove. Imboriahúva tohendu ha tovy'a!

4. Oñondive ñamomba'e guasu Ñandejárape, héra jaropurahéi oñondivepa.

5. Ñandejárape añembo'e, ha'e che rendu, ha oipe'apa che hegui umi mba'e che mongyhyjéva.

6. Umi Ñandejára rehe ojeroviáva vy'águi ojajaipáne, ha hova noñomi chéne ñemotĩgui.

7. Che, tekove poriahu, Ñandejárape añembo'e. Ha'e, che rendu ha che pe'a jejopy vaígui.

11:28-28

28. Ojeroviáva imba'e retáre yvyráicha hogue manóne, umi heko jojáva katu hoky porã asy vaerã.

Marcos 13:21-37

21. Ha umíva umi árape oĩ ramo he'íva peẽme: “Péina ápe pe Mesías” térã “Péina upépe”, ani perovia.

22. Cháke oúta hína heta mesías gua'u ha maranduhára*f** gua'u peẽme. Ha heta mba'e hechapyrãva ojapóta, ombotavy haguã Tupã rembiporavópe jepe, ikatúrõ.

23. Peñeñangarekóke! Amombe'u hína peẽme ko'ã mba'e, ojehu mboyve.

24. “Umi jehasa asyha ára ohasa rire, kuarahy iñipytũmbáta, jasy ndohesape mo'ãvéi,

25. mbyja kuéra ho'apáta yvágagui, ha opa mba'e yvágape oĩva okuchupáta.

26. Ha upépe, ojehecháta yvágare pe ohechaukáva Tupã ra'y, yvypóraicha ou vaekue, ouha arai apytépe, tuicha pokatu ha mimbipápe.

27. Ha amondóta che remimbou kuérape ombyatypa haguã che rembiporavópe opa guio, yvy apýra guive yvága rugua pahaite peve, yvy jerekuévo.

28. Pema'ẽ umi ígo mátare peikuaa haguã. Umi hakã kyrỹi hogue roky ñepyrũ vove, peikuaa oguahẽmaha ára haku.

29. Péicha avei, pehecha vove ojehu ko'ã mba'e peikuaáta hi'aguĩmaha che, yvypóraicha aju vaekue, aju jey haguã.

30. Añetehápe ha'e peẽme: Ko'ã mba'e ojehupáta omano mboyve umi ko'ágã oikovéva.

31. Yvága ha yvy opáta, che ha'éva katu ojehu vaerã katuete.

32. Mba'e árapepa térã araka'etépa avave ndoikuaái. Tupã remimbou kuéra jepe térã che, Tupã Ra'y, jepe ndaikuaái. Che Ru añoite mante oikuaa.

33. Upévare peikóke pe payhápe porã, ha peñangarekóke pende jehe. Ndapeikuaái hína araka'épa oguahẽta upe ára.

34. Pejapóke peteĩ kuimba'e mombyry ohótava ojapo haguéicha, he'i vaekue hembiguái kuérape oñangareko haguã hógare. Peteĩ-teĩme oheja hembiaporã, ha okẽ rerekuápe he'i oñangareko haguã óga rokẽre.

35. Pejesarekóke aipo ramo, ndapeikuaái hína araka'etépa oúta pe óga jára, ka'aru pytũvo, térã pyharepytévo, térã gállo osapukáivo, térã ko'ẽmbávo.

36. Ani ou mba'e peimo'ã'ỹ jave, ha pende juhu peke peína.

37. Ko ha'éva peẽme, ha'e opavavépe: Peikóke pe payhápe porã!”

Guarani Bible 1996