Biblia en un año - Ñandejara Ñe’ẽ ✟

Biblia en un año Jasyporundy 5

1. Umi mba'e Isaías Amós ra'y ohecha vaekue, Judá ha Jerusalén guigua, Judá ruvicha guasu kuéra Ozías, Jotam, Ahaz ha Ezequías oisãmbyhy ramo guare.

2. Yvága ha yvy, pehendu ko he'íva Ñandejára: “Amongakuaa mitã nguéra tuichapa peve, ha'e kuéra katu opu'ã che rehe.

3. Guéi oikuaa ijárape ha vúrro ijára róga. Israel katu ndoikuaái, che retãgua ndohecha kuaái.”

4. Há, tekove ahẽ, vai memetégui pene renyhẽva. Mba'e vai apoha ñemoñare, itujupáva ra'yre! Pejei vaekue Ñandejáragui, peapo'i Imarangatúva Israel guápe, peñemomombyry chugui.

5. Peẽ pejetu'u ivaívare, pende retépe nahemby véima peñenupã haguã, kandu ha jekakuégui pene akã henyhẽte, pende kuepa ha pene kangypáma.

6. Pene pysã apỹigui pene akã mbyte peve, ndaipóri hesãiha pende rete; ñehunga, ñenupãngue ha ai huguypáva memete, avave oipohano'ỹ ha ojokua'ỹva, mba'eveichagua pohãme oipichy'ỹva.

7. Pene retãgui oiko yvy ojeiko'ỹha, pende táva kuéra tata mante ohapy. Pende resa renondetépe, pende rayhu'ỹva oñemomba'e pende yvýre. Opa mba'e opyta mba'eve'ỹre, Sodoma oñehundi ramo guaréicha.

8. Ha pe táva guasu Sión opyta oga'i parraltýpe, ogaguy rei kokuerépe ha táva ñorãirõme oñemongorávape guáicha.

9. Tupã ipu'akapáva ndohejái rire mbovymi ore apytégui, ropyta vaerã mo'ã Sodoma ha Gomórraicha.

10. Sodoma ruvicha kuéra, pehendu Ñandejára ñe'ẽ, Tupã remimbo'ére pejapysaka, peẽ Gomorragua.

11. Ñandejára he'i: “Mba'e piko chéve pene mymbajuka.*f** Che mbyajúma pende mymbahapy*f** peikuave'ẽháme ovecha mácho ha pende tóro kyrakue, che mongueráima tóro ra'y ha kavara mácho ruguykue,

12. peju ramo peñemboja che rendápe. Máva piko ojerure peẽme pepyrũmba haguã che korapýre?

13. Anivéke peru kuave'ẽmby výro reíva, pene insiénso ryakuãngue nahetũséi. Jasy pyahu, pytu'u ára ha ñembyaty. Vy'a guasu oĩháme japu che mbopochy.

14. Che py'aite guive ndacha'éi pende jasy pyahu ha arete kuérare. Umívagui oiko mba'e pohýi, ha che mokane'õma.

15. Pende po pehupívo ñembo'épe, amboty che resa, ha peñembo'eve ramo jepe, nahendúi. Pende po tuguy omongy'apa.

16. Pejepohéi, peñemopotĩ! Peipe'a che renondégui pene rembiapo ahẽ! Anive pejapo ivaíva!

17. Pejeheko mbo'e pejapo haguã iporãva, peñeha'ã pejapo pe heko jojáva, peipytyvõ ojejopy vaívape, pembojovake hekópe tyre'ỹme, pesẽ kuña iména manóva rehehápe, oñeme'ẽ haguã chupe imba'éva.”

18. Upéi, he'i Ñandejára: “Peju ñañemongeta ko'ã mba'ére, ha pene angaipa pytãve ramo jepe, ahejáta morotĩ asy, ojogua ramo jepe poyvi oñembyape pytãitévape, morotĩ, mandyjúicha ahejáta.

19. Peñembopy'a peteĩ ramo pene ñe'ẽ rendu haguã, pe'úta iporãnguete yvy ome'ẽvagui.

20. Ha akóinte pejetu'u ramo ivaívare, katuete pemanóta ñorãirõme.” Ñandejára voi he'íma péicha.

21. Mba'éicha rupípa nde, táva jeroviaha, reju reiko kuña reko vai ramo! Yma nde rogagua heko joja ha oikóva hekópe, ko'ágã katu porojukahára meme umi oĩva.

22. Nde plátagui oiko hevorakue, ne kaguýgui oikóma y rei.

23. Nde ruvicha kuéra heko pu'ã, ha tekove moñái rehe oñemoirũ. Opavave virúnte oipota ha oheka ñembopopegua. Tyre'ỹ ndive nda heko jojái, mba'evete chupe kuéra kuña iména manóvape noñeme'ẽi ramo imba'éva.

24. Upévare Ñandejára ipu'akapáva, Upe Ipokatúva Israélpe, he'i kóicha: “Cháke! Añeñandukáta che rehe ija'e'ỹvape, che amyengoviáta chupe kuéra hembiapokuére.

25. Che po nde rehe amopu'ãta, ahapypáta nde revorakue, romopotĩta opa nde ky'a kuégui.

26. Amoĩ jeýta nde pype mbojovakehára yma guaréicha, mbo'ehára iñepyrũrã oĩ haguéicha. Ajapo rire upéicha reñembohéra jeýta ‘Táva heko jojáva! Táva jeroviaha!’

27. Heko peguáva rupi Sión ojejoráta, teko joja rupi, hetãme ou jeýta;

28. amyangu'íta heko pu'ã ha iñangaipávape, ha umi che hegui ojeíva opáta.

29. Petĩta yvyra guasu perohoryetéva ha yvotyty pene mbovy'aitéva, pemomba'e guasu haguére.

30. Peẽtagui yvyra máta guasúicha hogue cha'ĩmbáva, ha yvotytýicha ndahi'iva.

31. Kuimba'e mbaretégui oikóta kapi'i, ha hembiapo kuégui tata rendy, mokõive okáita peteĩcha, ha ndaipóri chéne omboguéva.”

2:1-22

1. Isaías Amós ra'y ohecha vaekue, Judá ha Jerusalén guigua.

2. Ojehúta ára ko'ẽ ramo guápe: Yvyty oĩháme Ñandejára Róga, yvyty kuéra ru'ãme opyta hatãta ha opaite yvytýgui ijyvatevéta. Opa tetã hese oñembyatýta.

3. Heta tetã he'íta oúvo: “Jaha jajupi Ñandejára yvytýpe, Israelgua Tupã Rógape, ohechaukáta ñandéve hape, ha hape rupi jaguatáta.” Sióngui osẽta Ñandejára rembiporavopy Jerusaléngui katu iñe'ẽ.

4. Tupã ombojovakéta tetã nguérape, joavy oĩva tetã nguéra rupi ha'e omoĩ porãta, umi tetã mombyryve oĩvape jepe. Kyse pukúgui ojejapóta yvy mbovoha, ha kyse yvukúgui machéte. Ndaipóri mo'ã véima ñorãirõ, avavépe noñembo'e mo'ãi mba'éichapa oñorãirõ vaerã

5. Néike, Jacob rogagua! Jaguata katu Ñandejára ohesapeha rupi!

6. Ndereikuaasevéi mba'eve ne retãgua Jacob ñemoñarégui, henyhẽ rupi filistéo kuéraicha mba'e ñemi kuaahágui ha omanóva ãngue renoihágui, ha ojopopyhýgui tetã mombyrygua ndive.

7. Hetã henyhẽ óro, pláta ha mba'eta ijapyra'ỹvagui, henyhẽ kavajúgui ha hetaite kárro ñarõgui.

8. Hetã henyhẽ tupã gua'úgui! Ipógui osẽva renondépe ojayvy, ha ikuãme ojapóvape oñesũ pehẽ.

9. Yvypóra oñemokarapã, kuimba'e oñembokarape. Aníke reheja rei chupe kuéra!

10. Eike umi ita kuápe, ejasuru yvy kuápe, Ñandejára ipochy etéva ha heko mimbipávagui ekañy, ha'e opu'ã ramo yvy omboryrýivo!

11. Umi ojejapóva itĩndýta; ha itĩ pu'ãva oñembokarapéta.

12. Ñandejára ñoite upe árape ohechaukáta tuichaha, Ñandejára ipu'akapáva árata hína upéva. Ha'e oñemoĩta umi itĩ pu'ãva rehe ha umi ojejapóvare, opa ojererovúva ha oñemboyvatévare,

13. opa Líbano pegua kuri'y yvatére, opa Basán pegua yvyra máta guasúre,

14. opa yvyty yvatére, opa yvy pu'ã ijyvatevévare,

15. opa óga yvatére, opa táva korarapy jere mbaretére,

16. opa Tarsis pegua várko kuérare, opa várko mba'etágui henyhẽvare.

17. Umi ojejapóva itĩndýta, itĩ pu'ãva oñembokarapéta, Ñandejára ñoite upe árape ohechaukáta tuichaha,

18. ha tupã gua'u kuéra ohundipáta.

19. Oikéta hikuái ita kuápe, ojasurúta yvy kuápe, Ñandejára ipochy etéva ha heko mimbipávagui okañýta, ha'e opu'ã ramo yvy omboryrýivo.

20. Upe árape yvypóra omombóta itupã gua'u kuéra, anguja ha mbopi kuérape, umi tupã gua'u óro ha pláta, ha'e ojapo vaekue oñesũ haguã henondépe.

21. Ita pyko'ẽ rupi ojasurúta ha ita kua rupi oikéta, Ñandejára ipochy etéva ha heko mimbipávagui okañývo, ha'e opu'ã ramo yvy omboryrýivo.

22. Pejeheja yvypóragui, mba'eve guasu ikatu'ỹva ojapo. Yvypóra rekove niko tata peju rei.

105:1-6

1. Pemomba'e guasu Ñandejárape, héra pemomba'e. Opa tetã rupi pemoherakuã umi mba'e hechapyrãva ha'e ojapo vaekue.

2. Chupe peropurahéi ha pemoherakuã imombe'upyrãva ha'e ojapo vaekue.

3. Héra marangatu pembotuicha. Ñandejára rehe ojeroviáva tovy'a.

4. Peguahẽ Ñandejára rendápe pytyvõ rekávo. Opa ára peñemboja hendápe.

5. Pene mandu'áke umi mba'e hechapyrãva ojapo vaekuére, ha hembiapoukapy ijurúgui osẽ vaekuére.

6. Peẽ hembiguái kuéra Abraham ñemoñaréva, peẽ hembiporavo Jacob ra'y kuérava,

24:23-25

23. Ko'ãva ha'e avei umi iñarandúva ñe'ẽngue: Naiporãi ñombojovakehápe oñemboyke avavépe.

24. Heko vaívare he'íva, “Upéva heko potĩ”, maymáva ipochy hendive ha ojahéi hese.

25. Umívape oinupãukáva ojererohory ha oñakã rapu'ãne

1 Corintios 14:21-40

21. Ñandejára Ñe'ẽme he'i: “Añe'ẽta ko tetãme ñe'ẽ ojekuaa'ỹvape ha mombyrygua juru rupi, ha upéicharõ jepe na che rendu mo'ãi, he'i Ñandejára.”

22. Aipórõ, pe ñe'ẽ ojekuaa'ỹva, mba'e rechaukarã umi heko jeroviaha'ỹvape guarã, ndaha'éi heko jeroviahávape guarã. Ha pe Tupã marandu ñemombe'u katu, mba'e rechaukarã umi heko jeroviahávape guarã, ndaha'éi umi heko jeroviaha'ỹvape guarã.

23. Umi Tupã reroviaha oñembyatypa jave, maymáva oñe'ẽ ramo ñe'ẽ ojekuaa'ỹvape, ha oike peteĩ oimeraẽva rei térã peteĩ tapicha heko jeroviaha'ỹva, he'íta pende rehe pende tarovapaha.

24. Upéicha rangue, opavave omyasãi ramo Tupã marandu ha oike peteĩ tapicha heko jeroviaha'ỹva térã peteĩ oimeraẽva rei, upéva ogueroviáta ha ojepy'a mongetáta pene rendúvo.

25. Ha upéicha hesakã porãta chupe ipy'apy ha omomba'e guasúta Tupãme ñesũháme, ha ohecha kuaáta Tupã añetehápe oĩha pende apytépe.

26. Mbykyhápe, che pehẽngue kuéra, ku peñembyatývo, ikatu oime opurahéiva, ambue oporombo'éva térã omombe'úva umi mba'e Tupã ohechauka vaekue chupe, térã oñe'ẽva ñe'ẽ ojekuaa'ỹvape ha oime omyesakãva pe he'iséva. Opa mba'e tojejapo oñeñomombarete haguã.

27. Ha ku oñeñe'ẽ ramo ñe'ẽ ojekuaa'ỹvape, toĩ ojoapykuéri oñe'ẽva, mokõi térã hetavérõ mbohapy peve. Ha toime avei peteĩ omyesakãva mba'épa oje'e.

28. Ha ndaipóri ramo avave omyesakãva vaerã umi oje'éva, toñe'ẽ'ỹ avave umi ñe'ẽ ojekuaa'ỹvape opavave renondépe. Te'ínte ipy'apýpe umi Tupãme he'iséva.

29. Upéicha avei, oimérõ maranduhára, toñe'ẽ mokõi térã mbohapy, umi ambue katu tomyesakã opa he'i vaekue.

30. Ha oimérõ peteĩ upépe oguapývape Tupã ome'ẽ peteĩ marandu, pe tenondegua tokirirĩ.

31. Upéicharõ, peteĩ-teĩ ojoapykuéri ikatu oikuaauka imarandu, opavave oikuaa ha ikyre'ỹ haguã.

32. Pe maranduhára oiporu kuaa vaerã pe imba'e kuaaha oguerekóva omomarandu haguã.

33. Tupã niko py'a guapy Tupã hína, ndaha'éi apañuãi Tupã. Ojejapo tapiaháicha Cristo reroviaha apytépe,

34. kuña kuéra okirirĩ vaerã umi Tupã reroviaha ñembyatyhápe, ha'e kuéra ndaikatúi oñe'ẽvo. Oĩ vaerã hikuái iména kuéra poguýpe, he'iháicha tembiapoukapy.

35. Oime ramo oikuaaséva, toporandu iména kuérape hógape. Naiporãigui peteĩ kuña oñe'ẽ umíva umi atyhápe.

36. Pene mandu'áke Ñandejára Ñe'ẽ noñepyrũi hague pene ndive, ha napeẽme añói oñeme'ẽ hague.

37. Oime ramo he'íva ijehe maranduharaha, térã Espíritu omoingeha iñakãme he'i vaerã, ohecha kuaáne, ko'ã ha'éva peẽme Tupã rembiapoukapyha.

38. Ha ndohecha kuaáirõ, tohecha kuaa'ỹ.

39. Ha upéicha, che pehẽngue kuéra, peñeha'ã pehupyty maranduhára mba'e kuaaha, ha ani ndapehejái oñeñe'ẽ ñe'ẽ ojekuaa'ỹvape.

40. Ha opa ko'ã mba'e pejapo hekópe ha hendaguãme.

Guarani Bible 1996