Beblia

Bible in one year March 19

1. Ruoth Nyasaye nowuoyo gi Musa e piny Moab mamwalo but aora Jordan kama omanyore gi Jeriko, mowacho niya,

2. “Nyis jo-Israel mondo oyier miechgi moko, kaachiel gi lowo molworogi, mondo omi jo-Lawi odagie.

3. Ginidag e miergo, kendo jambgi nokwa e legegi.

4. Lach mar lowo mumiyo jo-Lawi, chakre e ohinga mar dala ka dala, kadhi nyime noromo mita mia abich kuonde duto koni gi koni.

5. Kamano bor tong’ man yo wuok chieng’ nobed mita alufu achiel, gi man yo milambo gi man yo podho chieng’ kod man yo nyandwat, duto mita alufu achiel achiel maromre. To dala nobed e dier lowono tir. Lowo molworo dala ka dala nobed lek ma joma odak e dalano kwayoe jambgi.

6. “Ka umiyo jo-Lawi miechgi, to auchiel kuomgi nobed miech tony, ma joma oneko nyalo pondoe. To bende unumigi mier piero ang’wen gariyo mamoko.

7. Kamano kar romb mier monego umi jo-Lawi, kaachiel gi legegi, gin piero ang’wen gaboro.

8. Ka uyiero miergo e piny jo-Israel duto, to ukaw mier mang’eny kuom dhoudi matindo. Dhoot ka dhoot nomi jo-Lawi mier maromre gi lowo mane opogne.”

9. Ruoth Nyasaye nowacho ni Musa

10. mondo onyis jo-Israel niya, “Kuseng’ado aora Jordan, mudonjo e piny Kanaan,

11. to yieruru mier moko mondo obed kuonde ma ng’at moneko kobothne nyalo tonyie.

12. Miergo nobed miech tony, ma ng’at moneko nyalo tonyie koringo ng’at madwaro chulone kuor, mondo kik nege kapok oyale e nyim oganda.

13. Ginibed mier auchiel moyier kaka miech tony,

14. ka adek ni yo wuok chieng’ mar aora Jordan, to adek nie piny Kanaan.

15. Mier auchielgo nobed kuonde tony, ma ka ng’ato oboth monego nyawadgi, to onyalo tonyie, bed ni en ja-Israel kata wendo kata japiny moro modak kuomu.

16. “Ka ng’ato ogoyo wadgi gi gima olos gi nyinyo, mi otho, to ng’at mogoyeno doko janek, omiyo nyaka nege.

17. Ka ng’ato nigi kidi e lwete ma nyalo nego ng’ato, mi ogoyogo wadgi, motho, to en janek, kendo nyaka nege.

18. Kata ka ng’ato nigi gimoro molos gi yien e lwete manyalo neko, mi ogoyogo wadgi motho, to en janek, omiyo nyaka nege.

19. Owadgi ng’at monegno nyaka neg janekno koyudo mondo ochulne kuor.

20. Ka ng’ato odhiro wadgi goyiem, kata ka odiro gimoro mogoye,

21. kata kogoye adhong’, motho, to nyaka nege, nikech en janek. Owadgi ng’at monegno nyaka neg janekno, koyude.

22. “Kapo ni odhiro wadgi ma ok gimonrego, kata ka ochiele gi gimoro ka ok en gi paro mar goye,

23. kata ka oboth, mobolo kuome kidi manyalo neko ka ok onene, mi otho, kendo ka en adier ni ok gimonre, kendo ne ok odwar hinye,

24. to oganda nyaka yal wachno e kind janek gi owadgi ng’at monegi, kaluwore gi chikegi eki.

25. Oganda nyaka kony janekno kuom kuor ma owadgi ng’at monegi dochulone, mi gidwoke e dala tony, kuma ne otonyie mokwongo. Enobed kuno nyaka jadolo maduong’ tho.

26. To kapo ni chieng’ moro janekno okadho tong’ mar dala tony,

27. mi owadgi ng’at mane onego cha oyude monege, to owadgi ng’at mane onegono onge gi ketho.

28. Janek nyaka sik mana e dala tony nyaka jadolo maduong’ tho. Ka jadolo maduong’ osetho, to eka onyalo dok thurgi.

29. Mago nobednu chik mochwere, kamoro amora mudakie.

30. “Ng’at moneko nyaka ng’adne buch tho mana kuom dho joneno. To wach janeno achiel kende ok oromo ng’ado ni ng’ato buch tho.

31. Kik uyie janek mong’adne buch tho warre, to nyaka nege.

32. Bende kik uyie ng’at mopondo e dala tony warre mi dog dag e dala, kapok jadolo maduong’ otho.

33. Kik uketh pinyu gi remo kamano, nikech remo ketho piny, kendo pinyu ok nyal pwodhore kuom gak mar remo mochuer, mak mana ka opwodhe gi remb ng’at mane ochuero remono.

34. Kik uchid pinyu mudakie, kendo ma an bende adakie, nimar an Ruoth Nyasaye adak e kind jo-Israel.”

Kwan 36:1-13

1. Jodong dhout Gilead wuod Makir ma wuod Manase ma achiel kuom dhout Josef, nodhi ir Musa gi jotend oganda kod jodong dhout Israel,

2. mowacho niya, “Jaduong’, Ruoth Nyasaye nochiki mondo ipog ni jo-Israel lowo gi ombulu, to bende nochiki mondo ipog lowo ma dine owadwa Zelofehad oyudo ni nyige.

3. To kapo ni moro kuom nyirigo okendi e dhood ja-Israel moro, to lowo mopogne biro lal kuom lop kwerewa, mi nomiye dhoot ma okendie nyakono. Kamano lopwano dilal.

4. Ka higa mar mor ochopo e piny Israel, to lowono nomi dhoot mokendie nyakono, mi nolal chuth kuom lop kwerewa.”

5. Kane Musa oseng’eyo gima Ruoth Nyasaye dwaro, nonyiso jo-Israel niya,

6. “Joka Josef ni kare, kendo kama e kaka Ruoth Nyasaye osechiko kuom wach nyi Zelofehad. Ginyalo tedo ni ng’ato ang’ata ma gihero, mak mana ni nyaka bed ni okendgi e dhoodgi.

7. Onge lop ja-Israel moro amora ma nowuog e dhoodgi, kimiyo dhoot machielo, to ng’ato ka ng’ato e Israel nyaka sik mana gi lop wuon mare.

8. Nyar Israel moro amora ma opogne lop wuon mare nyaka kendi mana e dhoodgi. Kamano ng’ato ka ng’ato e Israel nosik e lop kwerene.

9. Onge lowo ma noa e dhoot moro kimiyo dhoot machielo, to dhoot ka dhoot nosik gi lope.”

10. Kuom mano, Mala gi Tirza gi Hogla gi Milka kod Noa, ma nyi Zelofehad, notimo kaka Ruoth Nyasaye nochiko Musa, mi gitedo mana ni yawuot omine wuon-gi.

11.

12. Nokendgi e dhood Manase ma wuod Josef, kendo lopgi nosiko mana e dhood kweregi.

13. Mago e chike mane Ruoth Nyasaye omiyo Musa onyiso jo-Israel e piny Moab mamwalo e bath aora Jordan kama omanyore gi Jeriko.

Zaburi 35:17-28

17. A Ruoth Nyasaye, pod ibiro ranga aranga nyaka karang’o? Konya e lwet wasikago mondo kik hinya. Adier, resa kuom sibuochegi!

18. Bang’e anagoni erokamano e chokruok maduong’. Ee, anapaki e nyim oganda mang’ongo.

19. Kik iwe loya, mi wasika ma jomiriambogo gona siboi, bende kik iwe joma mon koda kayiem bed mamor nikech chandruok ma an go.

20. Wechegi ok gin weche makelo kue, to gihango weche ma yoreyore kuom ji duto mohero kue.

21. Gidonjona ka gikok niya, “Ne waneno gik mane itimo!”

22. To in Ruoth Nyasaye, isewinjo gima giwachono. Emomiyo kik iling’, kendo kik ibed mabor koda.

23. A Ruoth Nyasaye, a malo mondo ikonya. Bi mondo ichwaka, yaye Nyasacha.

24. In jaadiera, a Ruoth Nyasaye, omiyo ng’ad bura manyiso ni aonge gi ketho. A Nyasacha, kik iwe wasika gona siboi,

25. Kendo kik iwe giwach kendgi niya, “Mano ber! Otimore mana kaka ne wadwaro!” Bende kik iwe giwach niya, “Waseloye.”

26. Mad lo joma goyona siboi ka an e chandruok, mi ng’eng nono. Onego wichkuot maduong’ mak jogo ma paro ni beyo moloya.

27. To joma mor ni aloyo bura, onego kog gi ilo ka giwacho ding’eny niya, “Ruoth Nyasaye duong’ miwuoro, kendo omor ka jatichne dhi nyime maber.”

28. Kamano, anahul timni makare, A Nyasaye, kendo anapaki pile odiechieng’ duto.

Ngeche 12:3-3

3. Richo ok nyal miyo ng’ato chuny motegno. Ng’at makare to ogurore motegno.

Mariko 15:25-47

25. Ne en sa adek onyango ka ne gigure,

26. kendo weche modonjnego ondiki ewi msalaba niya, “RUODH JO-YAHUDI.”

27. Jomecho ariyo bende ne giguro kode, achiel e bathe korachwich, to machielo e bathe koracham. [

28. Kamano wach mondiki e Muma ni, “Nokwane ka achiel kuom joma richo,” nochopo kare.]

29. Joma ne kadho kanyo nojaro Yesu katwenyone umgi, kendo wachone niya, “Oo! In mane iwacho ni ibiro muko Hekalu, mi ichak iger bang’ ndalo adek,

30. koro resri ane, ilor ia e msalaba!”

31. Kamano bende e kaka jodolo madongo kod jopuonj Chik nojaro Yesu, ka giwacho e kindgi giwegi niya, “Ne oreso jomoko, to koro en owuon dak oresre!

32. Ara koro Kristo ruodh Israel olor oa e msalaba ane, mondo wayie kuome!” Ji ariyo mane ogurego bende noyanye.

33. Kane sa auchiel ochopo, piny duto notimo mudho nyaka sa ochiko,

34. kendo kar sa ochiko nogono, Yesu nokok matek niya, “Eloi, Eloi lama sabakthani?” tiende ni, “Nyasacha, Nyasacha, iweya nang’o?”

35. Jomoko mane ochung’ kanyo nowinjo wechego, mi owacho ni, “Winjuru! Oluongo Elija.”

36. To ng’at achiel kuomgi noringo mokawo sipanj, onyumo e kong andwayo, mochwowo e dho odundu. Eka notere e dho Yesu gi odunduno mondo onyodhi, kowacho niya, “Weuru, wane ane ka Elija biro biro, mi lore e msalaba!”

37. Bang’ mano, Yesu nokok matek, eka chunye ochot;

38. kendo nanga mane ogeng’o Kama Ler mar Hekalu noriedore diere ariyo, chakre malo nyaka piny.

39. Kane jaduong’ lweny mane oyudo ochung’ e nyim msalaba kanyo oneno kaka Yesu okok ka chunye chot, nowacho niya, “Adier ng’atni ne en Wuod Nyasaye!”

40. Mon moko bende ne ni kanyo kang’icho gi chien. Kuomgi ne nitie Maria nyar Magdala, gi Salome, kod Maria min Jakobo matin gi Jose.

41. Gin mon mane luwo Yesu, kendo tiyone ka gin Galili. Mon moko mang’eny mane osebiro kode Jerusalem bende ne ni kanyo.

42. Kane koro piny ochopo odhiambo, kendo kaka ne en chieng’ Ikruok, tiende ni chieng’ motelo ni Sabato,

43. Josef ja-Arimathaya, ma jabura mogen, kendo ma bende nogeno ni none Loch Nyasaye, nodhi ir Pilato gi chir, mokwaye mondo omiye ringre Yesu.

44. To Pilato nowuoro kane owinjo ni Yesu osetho mana piyo kamano, omiyo noluongo jaduong’ lweny cha, mopenjo ka Yesu osetho adier.

45. Kane oseyudo wach kuom jaduong’ lweny, noyie ni Josef mondo okaw ringre Yesu.

46. Josef nong’iewo nanga, kendo kane osegolo ringre Yesu e msalaba, noboye gi nangano, mokete e bur mane osekuny ariwa e kor lwanda. Eka nong’ielo kidi maduong’, molorogo dho bur.

47. Maria nyar Magdala kod Maria min Jose ne jo ni kanyo, mi oneno kama oketie ringre Yesu.

Luo Bible 2015