Beblia

Bible in one year January 17

1. Kane Jakobo oting’o wang’e moneno Esau kabiro gi ji mia ang’wen, nopogo nyithinde ni Lea gi Rahel kod monde ariyo ma jotich.

2. Noketo monde ma jotichgo gi nyithindgi mondo otel, eka Lea gi nyithinde noluwogi, to Rahel gi Josef ema noketo chien.

3. Eka Jakobo notelo nyimgi, mogoyo chonge piny kokulore nyaka e lowo dibiriyo, kodhi nyime nyaka noromo gi owadgi.

4. Esau noringo kadhi romone, kendo nokwake monyodhe, mi ne giywak giduto.

5. Kane Esau oting’o wang’e, moneno mond Jakobo gi nyithindgi nopenjo niya, “Magi ng’a gini man kodigi?” Jakobo nodwoke ni, “Jaduong’, gin nyithindo ma Nyasaye osemiya kuom ng’wonone.”

6. Eka monde ma jotich nosudo machiegni, moro ka moro gi nyithinde, mi gikulore piny.

7. Lea gi nyithinde be nosudo machiegni, mokulore. Eka Josef gi Rahel bende ne josudo, mokulore.

8. Esau nopenjo Jakobo niya, “Oganda maduong’ mane aromogo cha to?” Jakobo nodwoke niya, “Jaduong’, naorogi mondo gibi gikwana ng’wono kuomi.”

9. To Esau nowachone niya, “An gi giga moroma, owadwa. Omiyo bed abeda gi magi.”

10. Jakobo nowachone niya, “Ooyo; ka iseng’wonona, to yie ikaw mich ma achiwogo. Kaka iserwaka gi ng’wono, biro e nyimi chalna mana gi biro e nyim Nyasaye.

11. Omiyo yie ikaw chiwo ma asekeloni, nimar Nyasaye oseguedha mi ayudo gik moko duto madwaro.” Kamano nochune nyaka nokawo michgo.

12. Bang’ mano Esau nowacho ni Jakobo niya, “Waikreuru mondo waa, kendo an ema abiro telo.”

13. To Jakobo nodwoke ni, “Jaduong’, ing’eyo ni nyithindogi pod tindo, to bende nyaka apar jamni madhodho. Kapo ni osemb gi matek kata mana kuom ndalo achiel, to giduto ginyalo tho.

14. Kuom mano, jaduong’, akwayi mondo itel atela nyima, to abiro luwi mosmos gi nyithindo kod jamni, nyaka achop iri Seir.”

15. Esau nowachone ni, “Kara awe joga moko mondo akonyi wuoth.” To Jakobo nodwoko ni, “Erokamano jaduong’; ok onego ithagri kamano.”

16. Omiyo Esau nomako yo, modok Seir.

17. Jakobo to nolokore mochomo Sukoth, mi nogero ot kuno, kendo nolosoe abilni ni jambe. Mano emomiyo nochak nying kanyo ni Sukoth (tiende ni, abilni).

18. Kane Jakobo osea Mesopotamia, nochopo maber e dala Shekem e piny Kanaan. Noguro hembe yo wuok chieng’, machiegni gi dalano.

19. Lowo mane ogedoe kanyo nong’iewo kuom nyikwa Hamor ma wuon Shekem gi fedha mia achiel.

20. Nogero kendo-mar-misango kanyo, mochako ni Elelohe-Israel, (tiende ni, El, ma Nyasach Israel.)

Chakruok 34:1-31

1. Chieng’ moro Dina nyar Jakobo mane Lea onywolo, nodhi limo nyi pinyno.

2. Shekem wuod Hamor ma ja-Hivi mane ruodh pinyno nonene, mokawe kendo noriwore kode, mokethe.

3. To nohero Dina ahinya, omiyo notemo hoyo chunye,

4. mi nowacho ni wuon mare niya, “Nywomna nyakoni.”

5. Kane Jakobo owinjo ni Shekem oseketho Dina nyare, ne ok otimo gimoro nikech noyudo ka yawuote odhi kwath.

6. Gikanyono mane yawuot Jakobo odwogoe koa kwath, ema Hamor wuon Shekem bende nobiroe ir Jakobo mondo olos kode. Yawuot Jakobo nobwok kendo ne gikecho ahinya ka ne giwinjo ni Shekem oseketho nyamin-gi, nikech jo-Israel kwano gima kamano ka gima rach ahinya.

8. Hamor nowachonigi niya, “Shekem wuoda ohero nyani ahinya, omiyo yieuru mondo okende.

9. Wanywom nyiu, to un bende ukend mawa, mondo wabed wede.

10. Daguru kodwa, mondo uwuoth e pinywa duto kaka udwaro, kendo uyud lopu uwegi.”

11. Bang’e Shekem nowacho ni wuon Dina kod owete Dina niya, “Yie utimna gima akwayou, mondo anywomnu gimoro amora mudwaro.

12. Nyisauru kar gik monego anywomnu kod chiwo monego amiu. Ayie chiwo gimoro amora mudwaro, kuyie ni mondo akend nyani.”

13. To yawuot Jakobo nowuondo Shekem gi Hamor wuon mare nikech Shekem nosekuodo wi Dina nyamin-gi.

14. Ne giwachonigi niya, “Ok wanyal yie mondo ng’ama ok oter nyangu mondo okend nyaminwa, nikech mano dibed wichkuot kuomwa.

15. To mak mana ka uyie chalo kodwa, mi utero jou machwo duto nyangu,

16. eka wanyalo yie mondo ukend nyiwa, kendo wan bende wanyalo kendo mau, mondo wadag kaachiel kodu, kendo wabed oganda achiel.

17. To ka ok uyie mondo oteru nyangu, to wabiro kawo nyarwa, wadhigo.”

18. Wechego ne beyo ne Hamor kod Shekem wuode,

19. omiyo Shekem, mane omi duong’ ahinya moloyo jomoko duto e dalagi, notimo kaka osewachne piyopiyo, nikech nohero nyar Jakobono ahinya.

20. Kamano Hamor gi Shekem nodok kar bura e dhoranga dalagi, mi ne giwuoyo gi jo thurgi,

21. ka giwachonigi niya, “Jogi gin osiepewa. Wawegiuru mondo gidag e pinywa ka, kendo giwuothie kaka gidwaro. Piny lach moromowa duto kodgi. Weuru wakend nyigi, kendo wamigi nyiwa gikendi.

22. To ok ginyal yie dak kodwa mondo wabed oganda achiel kodgi mak mana ka jowa machwo duto oter nyangu kaka gin.

23. To kwayie timo kamano, eka ginidag kodwa, kendo jambgi gi mwandugi kod dhogi biro bedo mawa.”

24. Jo dalano duto noyie gi gima Hamor gi Shekem nowachonigi, mi joma chwo duto noter nyangu.

25. To bang’ ndalo ariyo, kane pod jo-Shekem nigi rem malit, yawuot Jakobo ma Simeon kod Lawi, owete Dina mahie, nokawo gigi mag lweny, mi gidonjo e dala jogo apoya, kendo ne ginego joma chwo duto.

26. Ne ginego Hamor gi Shekem wuode, eka ne gigolo Dina e od Shekem, mi giago.

27. Yawuot Jakobo mamoko nomonjo joma ne owetegi osehinyogo, mi giyako dalano nikech jogo nosekuodo wi nyamin-gi.

28. Ne gipeyo jambgi gi kenjegi kod gik moko duto mane giyudo e dala kod oko e lek.

29. Bende ne giyako mwandugi duto, kendo ne gikawo mon gi nyithindo kod gik moko duto mane giyudo e udi.

30. Jakobo nowacho ni Simeon gi Lawi niya, “Usekelona chandruok, kendo usemiyo jo-Kanaan gi jo-Perizi ma weg pinyni mon koda. An mana gi ji manok kende, omiyo ka jo-pinyni oriwona, to ginyalo tieka kaachiel gi jooda duto.”

31. To ne gidwoke niya, “Ok wanyal yie mondo otimni nyaminwa ka nyako ma jachode kamano!”

Zaburi 9:1-5

1. A Ruoth Nyasaye, abiro paki gi chunya duto, ka ahulo gik madongo duto ma isetimo.

2. Abiro wer gi ilo nikech in. A Nyasaye Maduong’ Moloyo, abiro pako nyingi gi wer!

3. Wasika dok chien ka gineni. Gipodho piny kendo githo.

4. In jang’ad bura kare. Iseng’adona bura maber, ka ibet e kom duong’ni.

5. Isekwero ogendini ma ok ong’eyi, kendo itieko joricho, mi irucho nyinggi oko nyaka chieng’.

Ngeche 3:21-26

21. Wuoda, rit riekoni kod paroni matut. Kik iwe gilalni.

22. Gibiro miyi ngima maber man gi mor.

23. Bende gibiro teloni gi kue kiwuotho e yo, kendo tiendi ok nochwanyre ngang’!

24. Ok nibed maluor ka idhi nindo, kendo ininind maber nyaka piny ru.

25. Kik ibed maluor kineno ka joma ofuwo kihondko nego, kata ka masira omako joma timbegi mono,

26. nimar Ruoth Nyasaye noriti maber, kendo ok nowe obadho maki.

Mathayo 12:1-21

1. Chieng’ Sabato moro e kindego, kane Yesu wuotho e puothe mag ngano, jopuonjrene nodenyo, omiyo ne gichako jako wi ngano mondo gicham.

2. To kane jo-Farisai oneno kamano, ne giwacho ni Yesu niya, “Neye kaka jopuonjreni timo gima Chik okwero ni kik tim chieng’ Sabato!”

3. To Yesu nodwokogi kapenjogi niya, “Pok usomo gima ne Daudi otimo chieng’ mane kech kaye, kaachiel gi joge?

4. Donge ne odhi e Od Nyasaye mi ochamo makati miketo e nyim Nyasaye, ma Chikwa okwero ni en kata joge kik cham, to mak mana jodolo kende?

5. Koso pok usomo e Chik Musa ni chieng’ Sabato jodolo tiyo e Hekalu, ka ketho chik Sabato, to kata kamano gionge bura?

6. Koro anyisou ni nitie gimoro kaeri man gi duong’ moloyo Hekalu.

7. Muma wacho ni, ‘Ok adwar mondo ji otimna misango, to adwaro mana ni mondo gibed mang’won.’ Dine bed ni uwinjo tiend wachno, to da ok ung’ado bura ni joma ok oketho,

8. nikech Wuod Dhano en ruodh Sabato bende.”

9. Kane Yesu oa kanyo, nodhi e od lemo moro,

10. moyudoe ng’at ma lwete otal. To jomoko ne ni kanyo mane dwaro donjo ni Yesu kuom ketho Chik, omiyo ne gipenje niya, “Bende Chikwa oyie mondo ochang ng’ato chieng’ Sabato?”

11. Yesu to nodwokogi kapenjogi niya, “Ka ng’ato kuomu ni gi rombo achiel, mi onyumore e bur chieng’ Sabato, donge doywaye mogole oko?

12. Koro dhano to oloyo rombo nyadidi! Mano nyiso ni Chikwa oyienwa timo gima ber chieng’ Sabato.”

13. Eka nowacho ni ng’at ma lwete otalno niya, “Rie lweti!” Ng’atno norieyo lwete, mi lwete odoko mangima mana kaka komachielo.

14. To jo-Farisai nowuok, modhi ochano kaka digineg Yesu.

15. Yesu nong’eyo gima ne gidwaro timo, omiyo noa e gweng’no. Ji ma thoth noluwe, kendo nochangogi duto,

16. to nokwerogi matek ni kik ginyis ng’ato wachne.

17. Nokwerogi kamano mondo gima ne Isaya janabi okoro otimre. Nyasaye nosemiyo Isaya owacho niya,

18. “Neuru, ma e jatichna ma aseyiero. En ng’at ma ahero, kendo ma chunya morgo. Anaket Roho mara kuome, kendo enonyis ogendini duto adierana.

19. Ok nokogi, kata nduru ok nogo, dwonde bende ok nowinji e wang’yore.

20. Kata mana odundu motore ok enotur, mi owit ka gima nono, kendo ok nosim kata mana taya maliel marachrach, nyaka chop okel bura makare kuonde duto.

21. Kuom mano, ogendini duto noket geno margi kuome.”

Luo Bible 2015