Beblia

Bible in one year October 17

1. Ruoth Nyasaye nonyisa mondo adhi ang’iew agulu. Bende nonyisa mondo akaw jodongo moko kod jodolo madongo,

2. adhigo e holo mar Ben-hinom, mokiewo gi dhorangach miluongo ni Ranga Tegni. Kuno ema ne adhi huloe wach mane obiro miya.

3. Ruoth Nyasaye nokona mondo awach niya, “Winjuru un ruodhi mag Juda kod jo-Jerusalem. An Ruoth Nyasaye Manyalo Gik Moko Duto kendo ma Nyasach Israel, awacho kama: Abiro kelo masira malich kuom dalani, ma ng’ato ka ng’ato mowinjo, to ite nopopni.

4. Abiro timo kamano nikech useweya, mudwanyo dalani, kutimoe lisweche ni nyiseche mamoko ma ok ung’eyo, to kata mana kwereu gi ruodhi mag Juda bende ne ok ong’eyo. Usemiyo remb ji maonge ketho opong’o ka,

5. kendo usegero kende-mag-liswa mondo uwang’ie nyithindu ka liswa ni Baal. To ne ok achikou mondo utim kamano, bende wach ma kamano ne ok aparo kata matin.

6. Emomiyo an Ruoth Nyasaye, awacho ni ndalo biro ma ok noluongie holoni ni Tofeth, kata ni holo Ben-hinom, to noluonge ni holo Nek.

7. Ka eri ema nakethie gik moko duto ma jo-Juda gi jo-Jerusalem chano timo. Anawe wasikgi logi, mi neggi e lweny, kendo anami winy gi ondiegi cham ringregi.

8. Anaketh dalani gi keth malich, mi ng’ato ang’ata makadho machiegni nobwogi, kawuoro gima osetimore ni dalani.

9. Anami ji modak ka cham ringre nyithindgi giwegi. Bende ginicham ringre jowadgi e kinde marach ma wasigu nobed ka lworo dalagi, ka dwaro negogi.”

10. Bang’ wacho wechego, Ruoth Nyasaye nonyisa mondo ato agulu cha e nyim joma ne asedhigogo,

11. kendo awachnigi ni Ruoth Nyasaye Manyalo Gik Moko Duto nosewacho kama: “Abiro toyo jogi gi dalani mana kaka itoyo agulu ma ok nyal chak chom. Joma otho noyik kata mana e Tofeth, nikech ok noyud kamoro nono ma diyikgie.

12. Mano e kaka abiro timo ni dalani, kaachiel gi joma odakie, kendo analoke mana ka Tofeth. An Ruoth Nyasaye ema awacho kamano.

13. Naketh udi mag Jerusalem gi ut ruodhi Juda, to moloyo udi duto ma osewang’ ubani ewi tetgi ni sulue, kendo ma osepukie lisweche miolo piny ni nyiseche mamoko, mi ginibed mogak mana ka Tofeth.”

14. Bang’ wechego, ne awuok aa Tofeth, kuma ne Ruoth Nyasaye oorae, mondo adhi ahulie wachne. Ne adhi mi achung’ e laru mar Hekalu, eka anyiso ji duto niya,

15. “Ruoth Nyasaye Manyalo Gik Moko Duto ma Nyasach Israel owacho ni obiro kelo masiche duto mane osiemogo dalani kaachiel gi mier duto mokiewo kode, nikech un joma tokgi tek, motamore winjo wachne.”

Jeremia 20:1-18

1. Kane Pashur wuod Imer jadolo, kendo jatelo maduong’ e Hekalu owinjo gik mane Jeremia okoro,

2. nogolo chik mochwad Jeremia, kendo otueye e lodi e dhoranga Hekalu miluongo ni Ranga Benjamin mamalo.

3. Kinyne gokinyi, Pashur ne ogonyo Jeremia, mi Jeremia nowachone niya, “Ruoth Nyasaye ok luongi ni Pashur, to oluongi ni Magor-misabib, tiende ni, masira ni kuonde duto.

4. Ruoth Nyasaye osewacho ni obiro miyo ilokri masira ni in iwuon, kendo ni osiepeni, kendo wasigu noneg osiepenigo duto e lweny mana kineno. Abiro keto jo-Juda duto e teko mar ruodh Babulon, kendo enoter moko e tuech Babulon, to moko nogol chik mondo onegi.

5. Bende anawe wasikgi yak mwandu duto manie Jerusalem kaachiel gi gik moko duto mantie, koda ka gik mabeyo duto mag ruodhi Juda, mi gikaw gidhigo Babulon

6. To in Pashur, nomaki kaachiel gi joodi, mi teri Babulon kuma inithoe kendo yikie but osiepeni ma isebedo ka ihulonigi weche mag miriambo!”

7. “A Ruoth Nyasaye, ne iwuonda, mi iwuonda adier. In itek moloya, omiyo ne ihewa. Ji duto tugo koda kendo ginyiera odiechieng’ duto.

8. E kinde duto ma awuoyoe, to aywak kendo akok niya, ‘Mahundu gi masira nitie!’ A Ruoth Nyasaye, gichara kendo giyanya kinde duto nikech ahulo wachni.

9. To ka awacho ni abiro weyi mondo kik achak awuo e nyingi, to wachni wang’o chunya, mana ka mach. Opong’o chokena, kendo ohewa ting’o ma ok anyal siro.

10. Awinjo ka ji kuodha gi nying’ ma gichaka ni ‘Masira ni kuonde duto,’ kendo giwacho niya, ‘Kwedeuru! Ee, wakwede!’ Kata mana osiepena ma ageno bende gombona mana chwanyruok. Giwacho niya, ‘Dipo ka oyondhe, mi omoko, kendo wachulone kuor.’

11. To in Ruoth Nyasaye, in koda, itek, kendo iduong’, omiyo joma sanda biro chwanyore, kendo ok ginyal gimoro. Wigi biro kuot malich, nikech ok gibi loyo. Wichkuotgino nosik nyaka chieng’, kendo wich ok nowilgo.

12. In Ruoth Nyasaye Manyalo Gik Moko Duto imiyo ji tem makare, kendo inono chunygi gi parogi. Omiyo yie ichulna kuor kuom wasika, nimar aketo wechena duto e lweti.

13. “Weruru ni Ruoth Nyasaye, kendo pakeuru, nikech osereso joma ithiro e lwet joma timbegi richo.

14. “Okuong’ chieng’ mane mama onywolae!

15. Okuong’ ng’at mane omiyo wuora mor, kuom kelone wach ni onywolne nyathi ma wuowi!

16. Mad ng’atno chal gi mier mane Ruoth Nyasaye oketho mak okecho. Mad owinj ka ji ywagore malit gokinyi, kendo owinj tung’ lweny godiechieng’ tir,

17. nikech ne ok onega kapok onywola. Kamano dine oyika ei mama, mi ok dine onywola.

18. Ere gima omiyo ne onywola mana ni mondo ane lit gi masira, kendo atho mana gi wichkuot?”

Zaburi 119:1-8

1. Joma onge ketho, kendo matimo kaka chik Ruoth Nyasaye dwaro, gin johawi!

2. Joma oluwo chikene kendo moluore gi chunygi duto, bende gin johawi.

3. Adier, joma kamago ok tim gik maricho, to giwuotho mana e yore Nyasaye.

4. Isemiyowa chikeni, kendo iwachonwa ni onego waluwgi gi adiera.

5. Mano kaka ageno ni abiro luwo chikeni maber.

6. Ka arito chikeni duto adimba, eka wiya ok nokuodi.

7. Bende ka asepuonjora bucheni ming’ado kare, to anapaki gi chuny malong’o.

8. Anarit chikeni gi adiera, omiyo yie kik ijwang’a ngang’.

Ngeche 27:13-13

13. Ng’at mochung’ ni ng’ato nono e gowi onego omak mwandune kar gowino!

1 Thesalonika 4:1-18

1. To koro mogik, owetewa, wan kod gimoro achiel monego wakwau kaka jo-Kristo wetewa. Wakwayou ni mondo ngimau obed moluwore gi puonj mane wamiyou. Ne wanyisou kaka onego uwuothi mondo ubed malong’o ni Nyasaye, kendo adier mano e kaka uwuotho, to kata kamano wajiwou mondo umed timo kamano moloyo.

2. Ung’eyo chik mane wamiyou moa kuom Ruoth Yesu.

3. Nyasaye dwaro ni mondo ubed joma ler, omiyo nyaka uwe terruok.

4. Ng’ato ka ng’ato kuomu mondo ong’e rito ringre owuon e yo maler kendo mipako.

5. Kik umi gombou thuolo kaka joma ok oyie Nyasaye timo.

6. Kik ng’ato tim ni wadgi marach, kata wuond wadgi e wachni, nikech Ruoth nochul kuor kuom wechegi duto, mana kaka ne wawachonu chon ka wasiemou matek.

7. Nyasaye ok oseluongowa mondo wadag e dwanyruok, to oseluongowa mondo wabed joma ler.

8. Emomiyo ng’at modagi puonjni ok odagi winjo dhano, to odagi winjo mana Nyasaye, mamiyou Roho mare Maler.

9. Onge tiende ndikonu kanyisou kaka onego uher joweteu moyie, nikech un uwegi Nyasaye osepuonjou kaka onego uherru.

10. Adier, mano e kaka uhero owete duto man Makedonia, to wahombou owetewa, ni mondo umed timo kamano moloyo.

11. Dwaruru dak e ngima mokue, kendo tiju kende ema urangi, ka utiyo gi luetu mana kaka ne wapuonjou mokwongo.

12. Ka utimo kamano, to ubiro miyo joma ok jo-Kristo genou, kendo ok unuchand gimoro.

13. Owetewa, wadwaro ni mondo ung’e wach man kuom joma osetho, mondo kik ubed gi kuyo ka joma onge geno.

14. Wayie ni Yesu notho, kendo ochako ochier. Kamano bende e kaka wach joma otho koyie kuom Kristo nobedi. Nyasaye nokelgi kaachiel gi Yesu.

15. Koro wanyisou gimoro ma Ruoth owuon ema nowacho. Nowacho ni, wan joma pod odong’ kangima chieng’ ma Yesu biro, ok wanakwong dhi ni jogo mosetho.

16. Chieng’no dwol moro nogol chik, kendo dwond malaika maduong’ nowinji, kendo tung’ mar Nyasaye noywagi, kendo Ruoth owuon nolor koa e polo. Eka joma notho koyie kuom Kristo nochier mokwongo.

17. Bang’e, wan mapod wangima noyudhwa, mi terwa malo e boche polo kaachiel gi jogo, mondo warom ni Ruoth e kor polo. Mano e kaka Ruoth noterwa mondo wabed kode nyaka chieng’.

18. Emomiyo horeuru gi wechegi.

Luo Bible 2015