Beblia

Bible in one year October 2

1. Winjuru! Un duto, ma riyo oloyo! Biuru mondo umodhi. Un joma onge gi chiemo, biuru ung’iew chiemo ucham. Ee, biuru ukaw akawa divai gi chak nono, ma ok uchulo gimoro.

2. Ere gima omiyo ung’iewo chiemo ma ok konyu, kuketho mwandu kuom gima ok nyal yieng’ou? Ka uchiko itu, mi uwinjo gima awacho, to ubiro chamo chiemo mabeyo, mi uwinj ndhath gima uchamo.

3. Biuru ira mondo uchik itu ni gima awacho. Adier, winjuru wachna mondo ubed mangima. Eka abiro timo kodu singruok mochwere, ka asingora ni abiro herou gi chunya duto, kaka ne ahero Daudi.

4. Ne akete mondo obed jaote ni ogendini duto. Ee, nakete jatelo kendo japuonj ji.

5. Kamano un bende unuluong ogendini ma ok ung’eyo mondo obi, mi ogendini ma ok ong’eyou noring ka biro iru, nikech Ruoth Nyasaye ma Ng’ama Ler mar Israel, osemiyou duong’.

6. Dwaruru Ruoth Nyasaye kapod kinde nitie minyalo yudego. Adier, ywagneuru ka pod en machiegni.

7. Joma timbegi mono mondo owe timbegi maricho kod paro mochido. Onego giduog ir Ruoth Nyasaye mondo okechgi. Adier, onego giduogi ir Nyasachwa, nimar nong’wonnigi richogi duto.

8. Ruoth Nyasaye wacho niya, “Parou ok e parona, bende yoreu ok e yorena,

9. nimar kaka polo bor moyombo piny, e kaka yorena bende boyo moyombo mau, kendo e kaka parona bende boyo moyombo parou.

10. Bende kaka koth chue, kendo pe lwar, koa e polo, mi ok chak dog malo kendo, to miyo mana piny ng’ich, mondo cham otwi, mi thiew kendo nyagi, mi kodhi ma ichwoyo kod cham, bedie,

11. e kaka wach mawuok e dhoga nochal, ok noduog ira ka pok otiyo tije, to enotim gima ne ochano, mi ochop ote mane aoree.

12. Adier, unuwuog Babulon gi mor kod kue, kendo kuonde mukadhoe, gode madongo gi matindo nogo mahu gi mor. Yien duto mae thim bende nopam lwetgi.

13. Kuonde ma koro pedo gi kudho nitie, yien mabeyo ema biro dongoe. Mano nomi Ruoth Nyasaye bedo gi huma ma ok nyal lal, kendo nobed rapar mosiko nyaka chieng’.”

Isaya 56:1-12

1. Ruoth Nyasaye wacho niya, “Rituru chik, kendo beduru gi timbe makare, nimar piyopiyo nono resruok ma akelo biro, mi timna makare nonere ratiro kolocho.

2. Jal matimo kamano mak oweyo, kendo momako wechego ndalo duto, en jahawi. Adier, ng’at morito Sabato mondo kik kethie, bende ma ok tim gimoro marach, en jahawi.

3. “Ng’at ma japiny moro moseyie kuom Ruoth Nyasaye kik luor, kawacho e chunye niya, ‘Adier, Ruoth Nyasaye biro poga kuom joge nyaka chieng’.’ Ng’ama buoch bende kik wachi ni, ‘An ok an gimoro, to an mana yath ma ok nyagi,’

4. nikech an Ruoth Nyasaye awacho kama: Joma buoch marito Sabato maga, kendo mayiero mondo otim gik ma adwaro, bende morito singruok ma asetimo kodgi,

5. noyud gima ber moloyo yudo nyithindo. Giniyud rapar e oda kendo e ohingana. Adier, abiro miyogi nying’ mosiko, ma ok rum nyaka chieng’.

6. “Kamano bende e kaka an Ruoth Nyasaye, awacho ni jopinje mamoko ma oyie kuoma ka lama, kendo ohero nyinga, bende mobedo jotichna morito Sabato mondo kik kethie, kendo morito singruok ma atimo kodgi.

7. Awachonigi ni anakelgi e goda maler, mi ami gibed mamor e oda mar lemo, kendo nayie gi gik ma giwacho e kendona-mar-misango, kaachiel gi misengni ma gitimona, nikech noluong oda ni, Od Lemo mar ogendini duto.”

8. An Ruoth Nyasaye machoko jo-Israel moke, awacho kama: “Ji duto mane odong’ mak ochoki, pod abiro dwoko dala.”

9. Biuru mondo uchiem un le mae pap kod mae thim,

10. nikech jotend Israel duto chalo gi jorito ma muofni, ma ok ne gimoro. Giduto gichalo gi guogi ma momni ma ok nyal gueyo. Gihero nindo ka giriere piny, ka gileko

11. Adier, gichalo guogi mowuor ma ok yieng’! Gin jokwath ma ok ong’eyo gimoro. Moro ka moro dhi e yore owuon, kadwaro ohande kamoro amora monyalo yudee.

12. Ng’ato ka ng’ato kuomgi wacho niya, “Biuru wamany divai kod kong’o makech, mondo wamadh, wamer. Kiny bende nobed maber mana kama, kata moloyo ma.”

Zaburi 113:5-9

5. Onge ng’ama chal gi Ruoth Nyasaye ma Nyasachwa. Odak malo kuma bor,

6. to kata kamano okulore mondo orang polo gi piny.

7. Ochungo joma odhier a e buru. Adier, ogolo jochan e pidh yugi,

8. kendo oketogi gibet gi ruodhi mag joge.

9. Oguedho dhako ma onge nyathi, mi oloke dhako mamor ma min nyithindo. Ruoth Nyasaye mondo opaki!

Ngeche 26:20-21

20. Ka yien onge, to mach tho. Kamano bende, ka jakuoth onge, to miero orumo.

21. Kaka mirni miyo mach ng’ang’ni, kendo kaka yien miyo mach liel, e kaka kwinyo bende ero miero.

Efeso 4:1-32

1. Emomiyo, an ng’at motue nikech Ruoth, akwayou ni mondo uwuoth mowinjore gi luong mane Nyasaye oluongougo.

2. Pile kik ubed joma sungore, to beduru mamuol, kendo horeuru mos, bende nyisuru hera ma uherorugo kuom weyo ni joweteu kethogi.

3. Temuru kaka unyalo mondo urit winjruok ma Roho osemiyou, kuom kue moriwou kaachiel.

4. Nitie ringruok achiel gi Roho achiel, mana kaka nitie geno achiel ma Nyasaye oseluongoue.

5. Nitie Ruoth achiel, gi yie achiel, kod batiso achiel.

6. Nyasaye bende en achiel, ma Wuon ji duto. En ema oloyo gik moko duto, kendo otiyo kuom gik moko duto, bende en ei gik moko duto.

7. To kata kamano, ng’ato ka ng’ato kuomwa osemi mich mar ng’wono mowinjorego, kaka Kristo nosechano.

8. Mano emomiyo Muma wacho niya, “Kane oidho malo, nodhi kotelo ni joma omako e lweny, kendo nopogo ni ji mich.”

9. Koro ere tiend wach ma wacho ni, “noidho malo”? Tiende en mana ni, kapok oidho, to noselor bende kuonde man mwalo e bwo piny.

10. Kuom mano, Jal mane olor mwalo ema bende noidho malo kuma bor moyombo polo duto, mondo opong’ kuonde duto e piny kendo e polo.

11. En ema nopogo mich ni ji, koyiero ji moko mondo obed joote, to moko johul wach moa kuom Nyasaye, kendo moko joland Wach Maber, to moko jotend jo-Kristo, to moko jopuonj.

12. Ne otimo kamano mondo omi jo-Nyasaye duto obed joma ong’eyo tich konyo ji, kendo tich gero ringre Kristo,

13. nyaka chop wan duto wabed e achiel ma wayudo nikech wayie kuom Wuod Nyasaye, kendo wang’eye. Eka wanabed joma otegno chutho, kendo wanachop e rang’iny mogik mar Kristo.

14. Koro ok wanachak wabed ka nyithindo mayomyom, ma yamo mar puonj moro amora uko, kendo tago, ka ji maricho wuondowa gi riekogi ma gidwaro witowago.

15. Ooyo, wanabed joadiera, kwawuotho e hera, mondo wadogi e weche duto kuom Kristo. En e wich,

16. kendo ringruok duto ochomore kuome, komakore gi leche duto ma en-go. En ema omiyo fuoni ka fuoni tiyo tichne. Kuom mano ringruok dongo kendo gerore kuom hera.

17. Awachonu ka aramo e nying Ruoth, ni kik uwuoth kaka joma ok ong’eyo Nyasaye, ma parogi ni nono.

18. Chunygi nie mudho, kendo gionge gi ngima ma Nyasaye chiwo, nikech gin joma kia, kendo tokgi tek ta.

19. Parogi mar pogo ber gi rach osetho, omiyo giwere mana ni anjawo, ka gitimo timbe duto ma ok ler gi chunygi duto.

20. To mano ok e kaka ne opuonju Wach Kristo!

21. Chutho ne uwinjo jo-puonjre mage, ne opuonju adiera man kuome.

22. Omiyo nyaka uwe kit ngimau machon, kendo ulony dhano machon mochomo tho nikech gombo ma ok ni kare.

23. Nyaka ulos chunyu gi parou odok manyien,

24. bende nyaka urwakru gi dhano manyien, ma olos e kido machal gi mar Nyasaye, kendo maler chutho mowinjore gi adiera.

25. Emomiyo koro weuru miriambo! Ng’ato ka ng’ato mondo owach ni wadgi mana adiera, nikech wan duto wan fuond ringruok achiel.

26. Ka mirima omako ng’ato kuomu, to kik owe mirima tere e richo, kendo kik owe chieng’ podhi ka pod en gi mirima.

27. Kik umi Satan thuolo ma kamano.

28. Ng’ama yande kwalo nyaka we kuelo, mondo ochak tich matek kendo modimbore gi lwete owuon, oyud gima dokonygo wadgi moro modhier.

29. Ka uwuoyo to wach moro marach kik wuog e dhou, to wachuru mana weche mabeyo kendo makonyo ji, kendo mowinjore, mondo joma winjo wecheu oyud konyruok.

30. Kik umi Roho Maler mar Nyasaye chuny lit, nikech Roho e kido ma Nyasaye oketonu, kaka ranyisi ni noresu chieng’ resruok.

31. Kuom mano, weuru kecho, gi mirima, gi ichwang’, gi dhaw, gi ayany, kod himruok duto.

32. To beduru mang’won, ka ng’ato ka ng’ato kecho wadgi, kendo weyone richone, mana kaka Nyasaye oseweyonu kuom Kristo.

Luo Bible 2015