Beblia

Bible in one year October 31

1. Kane pok Farao omonjo Gaza, Ruoth Nyasaye nowuoyo gi Jeremia kuom jo-Filistia niya,

2. “Neye kaka pi gingore koa yo nyandwat! Obiro bubni ka aora ma mwomo genge, kendo obiro imo piny duto kod gimoro amora mantie, kaka mier kod joma odakie. Ji biro goyo nduru mondo okonygi, kendo ng’ato ka ng’ato manie piny noywag malit.

3. Giniwinj tiend farese ka diko, gi geche maringo, kod tiend geche ka mutni. Wuone nyithindo ok nodog chien mondo oom nyithindgi, to ginibed maluor maonge gi teko,

4. nikech kinde osechopo mikethoe piny Filistia. Kamano konyruok ma jo-Turo gi jo-Sidon geno yudo kuom Filistia norum pep, nimar an Ruoth Nyasaye abiro ketho jo-Filistia duto mane oa e dho nembe mag Kaftor.

5. Jo-Gaza oseliel wigi, ka nyiso ni gin gi kuyo maduong’, kendo jo-Ashkelon oling’ thi. Jo-Filistia modong’ noywag nyaka karang’o?

6. Giywak niya, ‘Yaye! Ligangla mar Ruoth Nyasaye biro chadho ji nyaka karang’o? Onego odog e olalo mondo oyue kanyo!’

7. To doyue nadi, to asemiye tich mondo oti? Asechike mondo omonj Ashkelon kaachiel gi joma odak e dhonam.”

Jeremia 48:1-47

1. Ruoth Nyasaye Manyalo Gik Moko Duto kendo ma Nyasach Israel nowuoyo kuom jo-Moab kama: “Ywaguru jo-Nebo, nimar dalagi okethi! Kiriathaim osekaw, mi omuk kama ochiel motegno manie dalano. Joma odak kuno wigi okuot,

2. kendo duong’ mar piny Moab oselal. Wasigu ikore Heshbon mondo otiek oganda jo-Moab. Dala mar Dibon biro ling’ thi ka oganda mar lweny omonje.

3. Jo-Horanaim goyo koko ka wacho niya, ‘Masira! Warumo!’

4. Piny Moab osekethi! Winjuru nyithindo ka ywak.

5. Winjuru ywak joma oruwo e yo nyaka chop Luhith. Ywak bende winjore e yo malor Horanaim.

6. Un jo-Moab, ringuru piyo ures ngimau! Ringuru mana ka ayuer ma seso e bungu.

7. Ne ugeno kuom tekou gi mwanduu, to koro ibiro mako koda ka un, kendo Kemosh nyasachu ibiro ter e tuech, kaachiel gi jodonge kod jodolo mage.

8. Onge dala kata achiel ma notony mak okethi, kendo holo gi pap duto noyaki, mi kethi. An Ruoth Nyasaye ema awacho kamano.

9. Chunguru kidi mar liel, upargo piny Moab, nimar ibiro kethe piyopiyo, kendo mier mage biro dong’ gundni ma onge ng’ama odakie.”

10. (Okuong’ ng’at ma ok otiyo tich Ruoth Nyasaye gi chunye duto! Bende okuong’ ng’at ma ok oneko gi liganglane.)

11. Ruoth Nyasaye wacho niya, “Pile jo-Moab osebet kodak gi kue, kendo ok osedargi, kiterogi e tuech, gichalo gi divai mowe mondo okue e agulu achiel, ma ok olok e agulini mamoko. Ndhath divai mowe kamano ok kethre, to osiko asika ka omit.

12. Kuom mano ndalo biro ma naorie ji mondo ool jo-Moab oko, kendo okethgi, ka ng’ama puko divai oko, kendo toyo aguch divaino matindo tindo.

13. Bang’e jo-Moab noyud ni Kemosh nyasachgi ok nyal konyogi, mana kaka jo-Israel noyudo ni Bethel ma nyasachgi mane gigeno kuome ne ok nyal konyogi.

14. “Un jo-Moab, ere gimomiyo uketoru ni un thuondi mosekedo e lwenje mager?

15. To piny Moab gi mier mage osekethi, kendo thuondi mage osenegi! An Ruoth Nyasaye Manyalo Gik Moko Duto ema awacho kamano.

16. Piny Moab chiegni rumo, kendo ibiro kethe mapiyopiyo.

17. Un joma odak machiegni kode, kendo un ji duto mong’eyo humbe, ywageuru kuwacho niya, ‘Lochne maratego osekethi, kendo humbe gi duong’ne oserumo.’

18. To un joma odak Dibon, weuru duong ma un-go, mondo ubed piny e buru, nikech jaketh Moab osebiro kuomu, kendo oketho kuondeu mochiel motegno.

19. Un joma odak Aroer, chung’uru e dir yo kung’icho mondo upenj joma ringo gima osetimore.

20. Ginidwoku niya, “Piny Moab oserumo! Ywageuru, nikech oseyudo wichkuot. Gouru milome e bath aora Arnon ni Moab osekethi.

21. “Oseng’ad bura ni mier mae pap kaka Holon gi Jaza gi Mefath

22. gi Dibona gi Nebo gi Beth-diblathaim

23. gi Kiriathaim gi Bethgamul gi Bethmeon

24. gi Kerioth kod Bozra. Ee, bura oseloyo miech Moab duto, man mabor koda man machiegni.

25. Duong’ mar Moab oseng’iny matinditindo, kendo tekone osekethi. An Ruoth Nyasaye ema awacho kamano.

26. “Miuru jo-Moab kong’o mondo omer, nikech gisedagi winjo chikna, an Ruoth Nyasaye. Gibiro ng’ielore e ng’okgi giwegi, kendo ji biro nyierogi.

27. Un jo-Moab, parieuru kaka ne unyiero jo-Israel! Ne ucharogi mana ka gima gin joma osemaki kaachiel gi jomecho.

28. Koro un jo-Moab, ayeuru e miechu udhi udag e gode maboyo, mondo uchal gi akuru mogero ode e bath lwanda marabora morokore.

29. Jo-Moab gin josunga! Asewinjo kaka gisungore kendo gipakore ka gijaro ji, kendo giparo ni gin kende ema giloyo ji moko duto.

30. An Ruoth Nyasaye ang’eyo kaka gisungore, to sungagino onge tiende, kendo gik moko duto ma gitimo biro rumo.

31. Mano emomiyo abiro ywago jo-Moab duto kod jo-Kirheres.

32. Abiro ywago jo-Sibma moloyo kaka ne aywago jo-Jazer. A yaye, dala mar Sibma, ichalo gi yiend mzabibu ma bedene oyarore nyaka Nam Kado, mi ochweyo nyaka Jazer. To koro olembeni gi divai mari osekethi!

33. Mor gi ilo osegol e piny Moab momewni. Divai tinde ok mol kuonde bicho, kendo onge joma odong’ ma dikog gi mor ka loso divai.

34. “Jo-Heshbon gi jo-Eleale ywak, kendo ywakgi winjore nyaka Jahaz, jo-Zoar bende winje, kendo owinjore nyaka Horonaim gi Elgath-shelishya, nikech pige mag Nimrim oseduono.

35. Abiro tamo jo-Moab mondo kik tim ni nyisechegi misengni miwang’o pep kod misengni mamoko kuonde moting’ore. An Ruoth Nyasaye ema awacho.

36. “Kamano chunya ywago jo-Moab kod jo-Kirheres mana ka ng’ama goyo tung’ e liel, nikech mwandugi duto oselal.

37. Ng’ato ka ng’ato osepwodho wiye, kendo olielo tike. Giduto gisaro luetegi, kendo girwako piende gugru.

38. Ji ywak ewi udi duto kendo e wang’ yore mag Moab nimar aseketho piny Moab, mana ka ng’ama nego agulu ma onge tich. An Ruoth Nyasaye ema awacho.

39. Oseketh Moab. Yaye, ywaguru, nimar Moab oseyudo wichkuot. Osekethore chuth, molokore gima bwogo ji, kendo ogendini modak machiegni nyierogo.

40. “An Ruoth Nyasaye asesingora ni oganda moro biro podho kuom jo-Moab mana kaka achuth podho kuom gima otho, koyaro buombene.

41. Miechgi gi kuondegi mochiel motegno ibiro kawo. Chieng’no jolweny mag Moab nobed gi kihondko mana ka dhako ma muoch kayo.

42. Jo-Moab ibiro tieko chuth, mi ok ginichak gibed oganda kendo, nikech ne gitamore winjo chikna.

43. Masiche gi bugni kod obadho ema ochomogi. An Ruoth Nyasaye ema awacho kamano.

44. Ng’ato ang’ata ma temo tony e masira biro nyumore e bugo, to ng’ama owuok e bugo, obadho biro mako, Mago duto biro timore ni jo-Moab chieng’ ma akumogie.

45. Joma ringo, ma ok nyal yudo konyruok, temo mondo opondi e dala mar Heshbon ma chon ruoth Sihon nodakie, to gibiro yudo ni dalano osemokie mach. Mach osewang’o tong’ piny kod wi gode mag jo-Moab mohero lwenygi.

46. Ywaguru jo-Moab! Joma ne lamo Kemosh koro osetieki, kendo yawuotgi gi nyigi osemak moter e tuech.

47. To e ndalo ma biro anami jo-Moab dhi nyime maber kendo.” Mano e bura ma Ruoth Nyasaye oseng’ado ni jo-Moab.

Zaburi 119:113-120

113. Amon gi joma nigi chuny ariyo, to ahero mana chikni.

114. In e okumbana kendo e kara ma apondoe. Singruok mari ema ageno.

115. Auru kuoma, un joricho, mondo arit chike Nyasacha.

116. Miya teko kaka ne isingori, mondo abed mangima, bende kik iwe gima ageno, kadhi mak otimore.

117. Sira mondo abed gi kue, eka arit chikeni pile.

118. A Ruoth Nyasaye, idagi joma otamore rito chikeni, nikech wechegi opong’ gi miriambo kod kwinyo.

119. Joricho duto ikwano ka yugi. Kuom mano ahero chikeni.

120. Luoro ma aluorigo miyo denda tetni. Buche ming’ado bende miyo kihondko maka.

Ngeche 28:5-5

5. Joma timbegi mono ok ong’eyo adiera, to jogo malamo Ruoth Nyasaye ong’eyo gik moko duto.

2 Timotheo 4:1-22

1. E nyim Nyasaye kendo e nyim Kristo Yesu, mabiro ng’ado bura ni joma ngima gi joma otho, aparo ni Kristo biro duogo mondo olochi. Omiyo amiyi chik ni,

2. land Wach Nyasaye, kendo ket chunyi kuom tijno kinde duto, kata ka piny ber kata rach. Kwer weche duto ma ok ni kare. Kendo rie weche maricho, kijiwo ji kendo ipuonjo gi kinda duto.

3. Ndalo biro ma ji ok noyie puonj maradier, to giniluw mana gombogi giwegi, kendo ginidwar bedo gi jopuonj mathoth mondo opuonjgi mana weche malombogi.

4. Ginidagi winjo adiera, to ginichik itgi mana ni sigendini manono.

5. In to, bed modhil kinde duto. Nyaka iyie yudo masira kitiyo tich mar lando Wach Maber, kendo chop tich duto ma omiyi.

6. An to, ngimana chalo gi misango miolo piny e kendo-mar-misango, kendo kinde ma aago e pinyni chiegni,

7. Asekedo lweny maber, kendo asetieko ng’weya, bende aserito yie marwa.

8. Koro gima okanna en mana osimbo mimiyo joma kare, ma Ruoth ma jang’ad bura makare biro miya chieng’ birone. To ok an kenda ema nomiya osimbo, to nomi koda ka ji duto morito birone gi chunygi duto.

9. Tem matek mondo ibi ira piyo,

10. nimar Dema oseringo oweya, nikech ohero pinyni, kendo osedhi Thesalonika. Kreske to osedhi e piny Galatia kendo Tito osedhi e piny Dalmatia.

11. Luka kende ema wadong’go ka. Ka ibiro, to kaw Mariko ubigo, nikech okonya maber.

12. Tukiko to aseoro Efeso.

13. E kinde akinda ma ibiroe to kelna law mane aweyo Karpo e dala mar Troa, kendo ikelna kitepena, to moloyo mago molos gi pien.

14. Aleksander ma jatheth mula notimona marach ahinya, Ruoth chieng’ nochule kuom gik mane otimona.

15. In bende tang’ne, nikech nokedo matek gi weche duto mane awacho.

16. E kinde mokwongo mane achung’ie e bura mondo awach wachna, onge ng’ato mane ochwaka, to ji duto noringo oweya. To Nyasaye mondo ong’wonnigi.

17. Ruoth ne ochung’ buta momiya teko mondo aland Wach Maber chuth, mondo ji duto ma ok jo-Yahudi owinj Wach Maber. Kamano ne oresa e dho sibuor.

18. Bende ang’eyo ni Ruoth pod biro resa kuom gimoro amora madwaro hinya, mi ochopa maber e polo kuma olochoe. Duong’ obedne nyaka chieng’. Amin.

19. Mosna Priska gi Akula, kod jood Onesiforo.

20. Erasto ne odong’ Korintho. Trofimo to naweyo ka tuo e dala mar Mileto.

21. Tem matek mondo ibi ira kapok ndalo koyo ochakore. Yubulo gi Pude gi Lino kod Klaudia, kaachiel gi owete mamoko duto, jomosi.

22. Ruoth obed gi chunyi. Ng’wono obed kodu.

Luo Bible 2015