Beblia

Bible in one year November 12

1. Ruoth Nyasaye nowachona niya,

2. “Wuod dhano, Ere kaka yadh mzabibu ber moloyo yien mamoko? Koso ere kaka bade ber moloyo bad yath moro amora?

3. Bende dilos kode gimoro maber? Koso ding’ad bade mi igur e kor ot mondo ong’awie gik moko?

4. Ooyo, ibole mana e mach mondo ochwake. To kosebole e majno kamanoo, mi bathe koni gi koni owang’, kendo kore odong’ korewore, bende pod dilos kode gimoro malong’o?

5. Kane pok owang’, to onge gima ne inyalo timo kode, to koro kosewang’, mi kore orewore, to dobed maonge tich machal nadi?”

6. Kuom mano, an Ruoth Nyasaye awacho niya, “Kaka yadh mzabibu itong’oe bungu, kendo ichwako, e kaka abiro kawo jo-Jerusalem mi akum.

7. Kata obedo ni gisetony e mach, to koro mach biro wang’ogi pep. Ka asekumogi kamano, to eka unung’e ni an e Ruoth Nyasaye.

8. Giseweya, omiyo abiro loko pinygi thim. An Ruoth Nyasaye ema awacho kamano.”

Ezekiel 16:1-63

1. Ruoth Nyasaye nochako owuoyo koda, mowachona niya,

2. “Wuod dhano, nyis Jerusalem gik makuero mosetimo,

3. bende nyise ni an Ruoth Nyasaye awacho kama: Ne onywoli e piny Kanaan. Wuoru ne ja-Amor, to meru ne nyar jo-Hiti.

4. Kane onywoli, to onge ng’ama ne ong’ado pendi, kata mane olwoki, kata mane owiri gi chumbi, kata mane oboyi gi nanga.

5. Ooyo, onge ng’ama ne okechi, mi otimoni gigo, to ne owiti mana oko e pap, nikech onge ng’ama ne dwari.

6. “Ne oyudo akadho machiegni gi kama ne intie, mi aneni, kichadhori gi rembi iwuon. Kata obedo ni ne itimo remo kamano, to ne awachoni ni mondo ibed mangima,

7. mi ne amiyo idongo mana ka yath madongo maber. Ne idongo motegno, kendo marabora, mi idoko nyako mopong’. Thundi ne ochung’ maber, kendo yie dendi noseti, to kata kamano ne in duk.

8. “Kane achako akadho machiegni kodi, ne ayudo ka iseromo mako osiep, omiyo ne ayaro lawa, mi aumogo dugi, kendo ne ayie ni abiro kendi. Adier, ne atimo kodi singruok, mi idoko mara. An Ruoth Nyasaye ema awacho kamano.

9. “Ne akawo pi, mi alwokogo remo oko kuomi, kendo ne awiro dendi gi mo.

10. Ne arwaki gi lewni mogorie gik mabeyo, mi amiyi wuoche ma nengogi tek, kaachiel gi kitamba wich maber, kod law arwaka mar las.

11. Bende ne amiyi tigo ma nengone tek, gi ronge mag lwedo, kod thiwni miketo e ng’uti.

12. Ne arwakoni tere e umi, kod stadi e iti, kendo ne amiyi osimbo maber mondo isidh e wiyi.

13. Kamano ne in gi gik mabeyo mag fedha kod mag dhahabu, bende pile ne irwako lewni mabeyo. Ne ichamo kuon molos gi mogo mayomie moloyo, kaachiel gi mor kich kod mor zeituni. Ne ijaber malich, kendo ne ibedo ruoth madhako.

14. Humb berni nolak e pinje dutu, kendo onge nyako moro amora mane oloyi gi ber, nikech an ema ne achueyi kamano. Mano e gima an Ruoth Nyasaye awacho.

15. “To ka ineno ni ijaber ahinya, ne iyie mondo ng’ato ang’ata madwari oterre kodi.

16. Ne ikawo lepi moko ma ilicho kuondeni mag lemo, kendo ne idwanyori gi ji duto kuondego, mana ka dhako ma jachode.

17. Ne ikawo gik mabeyo mag fedha gi dhahabu mane amiyi, mi ilosogo nyiseche manono machwo, kendo idwanyorigo.

18. Bende ne ikawo lewni mogorie gik mabeyo mane amiyi, mirwako ni nyiseche manonogo, kendo ichiwonigi mor zeituni kod ubani mane asemiyi.

19. Ne ikawo mogo mayomie moloyo, kaachiel gi mor zeituni kod mor kich mane asemiyi, mi ichiwo ka misango ni nyiseche manonogo, mondo gibed mamor kodi. An Ruoth Nyasaye ema awacho kamano.

20. “Bang’e ne ikawo yawuowi kod nyiri mane isenywolona, mi ichiwo ka misango ni nyiseche manono. Iparo ni wech mane iweyago ne gima tin,

21. ma pod ne ikawoe mana nyithinda, ichiwo ka misango ni nyiseche manono?

22. E kinde duto mane itimo timbe maricho mag chode, ne ok iparoe ngang’ ndalo mane in nyathi, ka in duk, kendo ichadhori gi remo.”

23. To Ruoth Nyasaye ne omedo wacho ni Jerusalem niya, “Inine malit nikech kane isetimo timbe mamonogo duto,

24. to ne igero kuonde milamoe nyiseche manono, kendo mitimoe timbe mag chode.

25. Ne ikawo berni, irucho e buru, mi ichiwo ringri ni ng’ato ang’ata ma dwari, kimedo bedo jachode odiechieng’ kodiechieng’.

26. Bende ne iweyo jo-Misri ma jogombo mokiewo kodi oterre kodi, mi imiya mirima gi timbeni mang’eny mag chodego.

27. “Koro aserieyo bada mondo akumi, kendo amayi gueth mane aguedhigo. Asechiwi e lwet jo-Filistia ma mon kodi, kendo mojok gi timbeni mag dwanyruok.

28. Joma ne isebedo ka idwanyorigo ok oromi, omiyo ne idwanyori gi jo-Asuria, to gin bende ne ok giromi.

29. Ne ichako idhi ir jo-Babulon, ma johala, to gin bende ne ok giromi!

30. “Koro in dhako ma jachode, an Ruoth Nyasaye awacho kama: Mago duto isetimo mana ka dhako ma jachode ma onge wichkuot, kimiyago mirima.

31. Ne igero kuonde ma ilamoe nyiseche manono e wang’yore duto to kendo itimoe timbe chode. To in ok ikaw pesa, ka mon mamoko ma jochode!

32. Ichalo dhako ma weyo chwore to terore gi chwo mamoko nono.

33. Dhako ma jachode ichulo pesa. In to, in ema ne ichiwo gik moko ni osiepeni, kendo ne imiyogi asoya mondo giduto gibi giterre kodi.

34. Omiyo in ipogori gi mon moko ma jochode. Onge joma ne dwari mondo ochodi, omiyo kar yudo pesa kuomgi, to in ema ne ichulogi! Kamano ipogori gi mon mamoko ma jochode adier!

35. “Koro in dhako ma jachode, winji gima an Ruoth Nyasaye awacho.

36. Awacho kama: Ne ilonyori duk, mi ichiwo ringri ka jachode ni osiepeni, kendo ni nyiseche manono makuero. Bende ne inego nyithindi ka misango ni nyiseche manonogo.

37. Mano omiyo abiro choko osiepeni duto, mane ihero kod mane ok ihero, kanyakla. Abiro kelogi duto iri mondo gilwori ka giketi diere, mi olony lepi mondo gine dugi.

38. Anang’adni buch tho ka an gi mirima mager, nikech terruok kod nek mane itimo.

39. Anaketi e teko osiepenigo, mi gimuk kuonde ma itimoe timbe chode, kendo ilamoe nyiseche manono. Ginikaw lepi, kaachiel gi gigi mabeyo mag fedha gi dhahabu, mi giweyi duk sikit.

40. “Ginikelni oganda maduong’, mi chieli gi kite, kendo chadhi matindotindo gi ligangla.

41. Giniwang’ uti, mi gikumi, mana ka mon mang’eny neno. Kamano anatiek timbeni mag chode, mi iwe chiwo gik moko ni osiepeni.

42. Bang’e mirimba noto, kendo nabed gi kue, mi ok nachak akech kodi kendo.

43. Wiyi ne owil gi rit mane aritigo kapod itin, mi iwang’o iya gi gik moko duto mane itimo. Mano emomiyo anakumi moromo gi timbeni duto, nimar ne imedo timbe mag dwanyruok kuom timbe duto makuero ma isetimo! An Ruoth Nyasaye ema awacho kamano.”

44. Ruoth Nyasaye ne ochako owacho niya, “Yaye Jerusalem, ji biro goyi ngero kama: ‘Awendo ok we yiere.’

45. In nyar meru adier adier! Meru ne mon gi chwore kod nyithinde mana kaka isetimo. Bende ichalo gi nyimineni mane mon gi chwogi kod nyithindgi. In, kaachiel gi mier mamoko ma nyimineni, un nyi nyar jo-Hiti to wuoru ne en ja-Amor!

46. “Nyameru maduong’ en Samaria mane ni yo nyandwat kaachiel gi mier matindo mokiewo kode. To nyameru matin en Sodom, mane ni yo milambo kaachiel gi mier matindo mokiewo kode.

47. Niluwo yoregi, mitimo timbe makuero mane gitimo, to mano ne ok oromi ngang’. Omiyo bang’ kinde matin kende, ne ibedo kitimo gik maricho moloyogi e yore duto.

48. “An Ruoth Nyasaye awacho kama: Kaka an Nyasaye mangima, nyameru Sodom, gi mier matindo mokiewo kode ne ok otimo timbe mamono moromore gi mago ma in kaachiel gi mier matindo mokiewo kodi isetimo!

49. Sodom kaachiel gi mier matindogo, ne josunga, nikech ne gin gi chiemo mang’eny, kendo ne gidak maber gi kue. To ne ok gikony jochan kaachiel gi joma ok nyal konyore kendgi.

50. Ne gin josunga ma wigi tek, kendo ne gitimo gik ma amon-go, omiyo ne atiekogi, kaka inenono.

51. “Richo mane Samaria otimo ok gimoro, kipimo gi richoni! Ne itimo timbe modwanyore maricho moloye. Timbenigo miyo nyimineni nenore ka joma onge ketho.

52. Kuom mano, koro wichkuot nie wiyi. Richoni dongo ahinya moloyo mag nyimineni, omiyo nyiminenigo nenore ka joma beyo. Emomiyo ting’ ating’a wichkuotni, nimar isemiyo nyimineni nenore ka joma ler!”

53. Ruoth Nyasaye nochako owacho ni Jerusalem niya, “Abiro miyo Sodom gi Samaria kaachiel gi mier matindo mokiewo kodgi, chak dhi nyime maber. In bende abiro chako amiyo idhi maber.

54. Wiyi biro kuot, kendo wichkuot mabiro makino noduog chuny nyimineni, mi gipar ni gin johawi.

55. Ginichak gidhi maber, kendo in, kaachiel gi mier matindo mokiewo kodi nochak ogeru kendo.

56. Donge ne inyiero Sodom kisungori,

57. e kinde mane timbeni mamono pok oel e lela? Koro ichalo mana kode, kendo joma mon kodi duto mokiewo kodi, kaka jo-Edom kod jo-Filistia, nyieri.

58. Koro nyaka iyud kum ma dhogruokni gi timbeni makuero okelo. An Ruoth Nyasaye ema awacho kamano.”

59. Ruoth Nyasaye nomedo wacho niya, “Abiro timoni mana kaka oromore gi timbeni, nimar ne ichayo winjruok mane wan go, mi ok irito singruok mane itimo koda.

60. An to abiro rito singruok mane atimo kodi kapod itin, kendo abiro timo kodi singruok machielo, mosiko nyaka chieng’.

61. Inipar gik ma isetimo, mi wiyi kuodi, kineno ka nyameru maduong’ gi matin joduogo. Anami gichal nyigi, kata obedo ni ne ok asingora kodi kamano.

62. Abiro chako atimo kodi singruok, mi ining’e ni kara an e Ruoth Nyasaye.

63. Chieng’ ma anapuodh gik maricho duto ma isetimo, eka inipargi, mi wiyi kuodi, ma kata mana loso ok nilosi. An Ruoth Nyasaye ema awacho kamano.”

Zaburi 123:1-4

1. A Ruoth Nyasaye in ema arangi, kating’o wang’a e polo kuma kom duong’ni nitie.

2. Kaka jatich rango ruodhe, kendo kaka jatich ot manyako rango wuon ot motiyone, e kaka wan bende wasiko kwarangi, nyaka chop ikechwa, A Ruoth Nyasachwa.

3. Kechwa, A Ruoth Nyasaye, yie ikechwa nikech waseyudo ayany marach,

4. Ka jomwandu ma josunga jarowa kuom kinde malach!

Ngeche 28:20-20

20. Ng’at makare dak malong’o e ngima maber, to ng’at ma rikni mondo oyud mwandu nyaka yud kum.

Hibrania 8:1-13

1. To wach maduong’ kuom weche ma wasewacho e ma: Chutho wan gi jadolo maduong’ ma kamano. Obet e bat korachwich mar Kom Duong’ manie polo.

2. Obet kanyo ka otiyo Kama Ler maradier, ma en hema ma Nyasaye ema oguro, to ok dhano.

3. Jodolo madongo duto oketi mondo ochiw mich, kendo otim misengni, omiyo jadolowa maduong’ni bende nyaka bed gi gimoro mochiwo.

4. Ka da en e pinyka, to da ok obedo jadolo kata matin, nikech nitie jodolo machiwo mich kaka Chik Musa dwaro.

5. Tich ma jodologo chiwo en kido gi tipo mar tich manie polo, mana kaka tich Musa bende nobet, nikech kane Musa chako tich gero Hema mar Romo gi Nyasaye, to Nyasaye nowachone niya, “Neni iloso gik moko duto machal gi kido mane onyisi e got.”

6. To tich ma Yesu oseyudo ber moloyo tich jodologo, mana kaka winjruok ma okelo ber moloyo winjruok machon, nikech en winjruok ma singruok mabeyo moloyo ema guro.

7. Ka dine winjruok mokwongo bed ma onge wach moro moremie, to Nyasaye ok dodwaro winjruok mar ariyo.

8. To Nyasaye noneno wach moro morem kuom joge, mana kaka Muma wacho ni, “Ruoth Nyasaye owacho niya, ‘Ndalo biro ma anatimie singruok manyien gi dhood Israel kod dhood Juda.

9. Ok nochal gi singruok mane atimo gi kweregi, kane atayogi, kagologi e piny Misri, nimar ne ok girito singruok mane atimo kodgino, mi an bende ne ajwang’ogi’

10. To Ruoth medo wacho niya, ‘Singruok ma anatim gi dhood Israel bang’ ndalogo e ma: Anaket chikena e parogi, kendo anandikgi e chunygi. Anabed Nyasachgi, mi ginibed joga.

11. Onge ng’ama nopuonj wadgi, kata ma nopuonj omin mare, kawachone ni, “Ng’e Ruoth,” nikech giduto gining’eya, chakre ng’at matinie moloyo nyaka ng’ama duong’ie moloyo.

12. Anang’wonnigi giduto kuom timbegi maricho, kendo ok nachak apar richogi ngang’.’ ”

13. To ka Nyasaye wuoyo kuom singruok manyien kamano, to mano nyiso ni osemiyo singruok mokwongo odoko machon, kendo ong’ere ni gima odoko machon, kendo oti, chiegni rumo.

Luo Bible 2015