Beblia

Bible in one year December 24

1. Ma e wach Ruoth Nyasaye mane obiro ni Zefania wuod Kushi ma wuod Gedalia, ma wuod Amaria ma wuod Hezekia, e ndalo Josia wuod Amon, ruodh Juda.

2. Ruoth Nyasaye wacho niya, “Abiro yweyo gik moko duto manie piny, mi lal nono.

3. Abiro tieko dhano kaachiel gi le, bende abiro tieko winy ma e kor polo, kod rech ma e nam. Abiro goyo joma timbegi mono piny, mi atiek koth dhano chuth. An Ruoth Nyasaye ema awacho kamano.

4. “Abiro kumo jo-Juda kod jo-Jerusalem duto, mondo atiek tich lamo Baal duto mitimo ka, mi kata mana nying jodolo manono ok nowinji.

5. Bende abiro tieko ji maidho ewi udi, kendo kulore piny kalamo gik manie kor polo, Kod joma lama an Ruoth Nyasaye, to kendo kuong’ore gi nying Milkom, nyasaye manono,

6. kaachiel gi joma oselokona ng’egi, kendo ok manya kata kwaya mondo akony.”

7. Ling’uru thi e nyim Ruoth Nyasaye, nimar odiechienge chiegni. Ruoth Nyasaye oseloso misango, kendo osepwodho wende.

8. Owacho niya, “Ka chieng’ ma atimoe misango ochopo, to anakum joka ruoth kod jotendgi madongo, kaachiel gi joma luwo timbe jopinje mamoko.

9. Chieng’no abiro kumo jogo duto mamiel e laru mar Hekalu, kendo mapong’o od ruodhgi gi timbe mahundu kod timbe mag wuond.

10. “Chieng’no, ywak nowinjre e dharangach miluongo ni Dhoranga Rech, kendo e bath dala koma nyien, bende koko maduong’ nogore e gode,

11. kendo ji modak e dala mamwalo noywagi, nimar joohala duto orumo, kendo joma loko ohand fedha otiek pep.

12. “Chieng’no anamany Jerusalem, kamenye gi taya, mi akum joma osiko katimo atima richo, kendo wacho ni Ruoth Nyasaye ok bi timo gimoro kata matin.

13. Mwandugi noyaki, kendo miechgi nokethi. Giniger udi, to ok ginidagie, kendo ginipidh mzabibu, to ok ginimadh divachgi.”

14. Odiechieng’ mang’ongo mar Ruoth Nyasaye chiegni. En odiechieng’ marach, kendo obiro koringo piyopiyo, moloyo jalweny ma jang’wech.

15. Chieng’no en chieng’ bura, kendo en chieng’ ywagruok gi rem, bende en chieng’ kethruok gi lal, kod mudho gi kuyo, kaachiel gi rumbi molil kod ong’ueng’o malich. En chieng’ ma tung’ ywakie,

16. kendo sigich lweny winjoree e mier mochiel motegno, kendo kuonde moger maboyo mag ng’icho.

17. Ruoth Nyasaye owacho niya, “Abiro kelo ni ji thagruok malich, kendo ginituomre atuoma ka muofni, nikech richo ma gisetimo e nyima. Rembgi nochuer ka pi, kendo ringregi noriere, ka tow e lowo.

18. Fethgi kata dhahapgi ok noresgi.” Chieng’ ma Ruoth Nyasaye ng’adoe bura, nyiego mager ma en-go nowang’ piny duto, mi tiek pep. Kamano enotiek gik moko duto modak e piny mana ka diemo wang’.

Zefania 2:1-15

1. Chokreuru kanyakla, un oganda ma onge gi wichkuotni,

2. ka pok oteru kuma bor, mi ulal nono ka mihudhi! Ee, chokreuru, kapok Ruoth Nyasaye okelo mirimbe mager kuomu, kata kapok chieng’ mirimbe ochopo.

3. Dwaruru Ruoth Nyasaye un jogo duto modak e piny, kobolore kendo korito chikene. Bende dwaruru tim makare, bende beduru gi chuny mamuol nimar dipo ka uyudo kar konyruok, chieng’ mirimb Ruoth Nyasaye.

4. Dala mar Gaza ibiro we nono. Ashkelon bende biro dong’ gunda, kendo jo-Ashdod ibiro riembo mana odiechieng’ tir. Ekron to ibiro dhuolo gi lop tiende.

5. Mano kaka unune malit, un jo Kereth modak e dhonam! Ruoth Nyasaye wuoyo kuomu niya, “Un jo-Filistia, abiro dwoko pinyu piny. Abiro kethe mi aweye ka onge ng’ama odakie,

6. kendo obiro dong’ mana kama jokwath kende ema kwayoe, kendo kama rombe ema nindoe.

7. Jo-Juda modong’ ema nobed weg piny man e dhonam. Ginikwa jambgi e dhonam kuno, kendo giniyue e ut jo-Askelon gotieno, nimar an Ruoth Nyasaye ma Nyasachgi, abiro konyogi, mi adwoknigi gueth mane gin-go chon.

8. “Asewinjo ayany ma jo-Moab yanyogo joga gi ajara ma jo-Amon jarogigo, bende aseneno kaka gidonjo e lop joga manie tong’gi.

9. “Kuom mano, an Ruoth Nyasaye ma Nyasach Israel, akuong’ora gi nyinga awuon, ni Moab biro chalo gi Sodom, to Amon nochal gi Gomora, mi gibed kuonde ma aila gi bugni mag pundo ema opong’o, kendo mokethore nyaka chieng’. Joga modong’ noyakgi mi kaw pinygi.”

10. Mano ema nobed pok ma giniyud kuom sunga ma gin go, nikech ne giyanyo jo-Ruoth Nyasaye Manyalo Gik Moko Duto, ka gikawore malich.

11. To Ruoth Nyasaye biro thinyore mondo okumgi marach! Obiro nego nyiseche duto mag piny gi kech, mi ji duto modak e pinje mae dhonembe kod chulni nokulre ka lame, ng’ato ka ng’ato e dalane.

12. Un jo-Ethiopia bende ligangla mar Ruoth Nyasaye nonegu,

13. kendo norie bade kuom piny man yo nyandwat, motiek Asuria, kendo olok Nineve piny motwo mana ka piny ongoro.

14. Kueth mag jamni nogudre kuno, kaachiel gi le duto mag thim. Achuth gi otenga bende nobed kayueyo ewi sirni modong’ kochung’ kuno, kendo tula kod agak noywagi e dirise kod dhoudi, bende yien mabeyo mane obawgo kor udi nodong’ kong’iengore.

15. Ji nopenjre niya, “Koro ma e dala mane mor, kendo ogeno kuom lochne cha adier? Koso en e dala mane sungore e chunye kawacho niya, ‘Anie kende, kendo onge moro maromo koda’? To koro okethore chuth, mi olokore mana kama le mae thim ema odakie, kendo ng’ato ang’ata ma kadho kanyo wuoro, ka tang’o lwete.”

Zefania 3:1-19

1. Mano wach malit manade kuom dala Jerusalem, ma jasand ji, kendo monyorore ma japiem!

2. Ne ok onyal yie kwer mane ikwerego, kendo ne odagi winjo puonj. Bende ne ok oyie kuom Ruoth Nyasaye, kata mana sudo machiegni kode ne ok osudo.

3. Jotende ne chalo gi sibuoche ma ruto e iye, kendo ruodhi mage ne chalo gi ondiegi mawuotho gotieno, ma ok we piny ru ni gimoro ka pok gitieko,

4. Jonabi mage ne joyiem, kendo ne ok gin jonabi madiera, bende jodolo mage ne ok dew gik mowal ni Nyasaye, kendo ne giketho chik.

5. To Ruoth Nyasaye man Jerusalem timo mana gik makare. Ok otim gimoro marach to ong’ado bura gi adiera okinyi kokinyi mak olewo ngang’. Jaricho to wiye ok kuodi.

6. Ruoth Nyasaye wacho kama: “Aseyweyo ogendini ka yuech, kendo ohingni ma gigeng’orego okethore chuth. Asemiyo wang’yoregi olokore thim ma onge ng’ama luwo. Miechgi bende okethore, kendo odong’ nono ma onge joma odakie.

7. Ne aparo ni jo-Jerusalem diwinj chikna, omiyo ne awachonigi niya, ‘Luorauru, kendo winjuru puonjna.’ To kata kamano ne giketo chunygi mana kuom timo timbegi mamono.

8. “Kuom mano an Ruoth Nyasaye, awachonu niya, ‘Ritauru! Adier, rituru chieng’ ma abiro chung’ie ka ayalou, nimar asechano choko ogendini kod dhoudi kanyakla, mondo aol kuomgi mirimba duto maliet ka mach, kendo mabiro wang’o piny duto ma tiek pep.

9. Bang’e anapwodh dho ji mondo an Ruoth Nyasaye ema gilama, ka gitiyona gi chuny achiel.

10. Joga malama kendo moke loka aora mag Ethiopia, nobi kakelona mich.

11. Chieng’no, in Jerusalem ok niyud wichkuot kuom timbeni mamono mane ipiemgo koda, nimar e kindeno anagol jogi ma josunga kendo ma jong’ayi, mi ok nichak isungri kendo e goda maler.

12. To joma nawe nobed joma odhier kendo mathagore.

13. Jo-Israel modong’ noyud kar resruok e nying Ruoth Nyasaye. Ok ginichak gitim timbe mamono, kendo weche mag miriambo miwuondogo ji ok nowuog e dhogi, nimar ginichal gi rombe machiemo kendo nindo piny, ma onge ng’ama bwogo.’ ”

14. Un jo-Sayun, koguru gi mor! A jo-Israel, gouru mahu matek! Ee, beduru mamor gi chunyu duto, yaye, jo-Jerusalem,

15. nimar Ruoth Nyasaye oseriembo wasiku, motero kuma bor. Ruoth Nyasaye ma Ruodh Israel nie kindu, omiyo ok unuchak uluor masira.

16. Wach ma nobi ni Jerusalem chieng’no e ma: A jo-Sayun, kik ubed maluor, kendo kik uwe lwetu nyosre.

17. Ruoth Nyasaye ma Nyasachu nie kindu, mondo oritu maber mana ka jalweny. Obiro bedo mamor nikech un, mi ochak onyisu herane, kower gi mor nikech un, mana kaka ne otimo chon.

18. Ruoth Nyasaye wacho niya, “Abiro golo masiche oko kuomu, mi ok ginimiu wichkuot kendo.

19. Winjuru! Ka kindeno ochopo, to anakum joma thirou. Anakony rang’onde, kendo anachok joma oke, mi alok wichkuot mane joga nigo obed pak gi huma e piny ngima.

Zaburi 147:1-6

1. Pakuru Ruoth Nyasaye! En gima ber, wero ni Nyasachwa wende pak. Adier, goyone erokamano long’o kendo owinjore.

2. Ruoth Nyasaye chako gero Jerusalem kendo. Oduogo jo-Israel mane oter e tuech,

3. bende oduogo chuny joma genogi oserumo, kendo othiedho adhondegi.

4. Osekwano sulue, mi ong’eyo kar rombgi, kendo oluongo moro ka moro gi nyinge.

5. Ruoth Nyasaye duong’ miwuoro, bende riekone lach mokadho apima.

6. Oting’o joma obolore malo, joricho to ochwado piny e lowo.

Ngeche 30:18-19

18. Nitie gik moko adek motama winjo. Chutho, gin gik moko ang’wen ma tiendgi odhiera ng’eyo.

19. Mokwongo en kaka ongo huyo e kor polo, mar ariyo en kaka thuol mol e lwanda, mar adek en kaka yie kwang’ e dier nam, to mar ang’wen en kaka wuowi sero nyako.

Fweny 14:1-20

1. Eka ne ang’icho, mi aneno Nyarombo kochung’ e got Sayun. Ne en gi ji alufu mia achiel gi piero ang’wen gang’wen, (144,000) kendo nyinge owuon gi nying Wuon mare nondiki e lela wang’ jogo.

2. Ne awinjo dwol moro moa e polo kawuo ka pi mang’eny, kendo machalo gi polo mamor matek. Chutho, dwol mane awinjono ne chalo mana gi dwond joma goyo thum.

3. Ne giwero wer manyien e nyim kom duong’ kendo e nyim gik mangima ang’wen kod jodongo kande. To onge ng’ama ne nyalo puonjore wendno mak mana ji alufu mia achiel gi mia ang’wen gang’wen, (144,000) ma gin kende e joma ne owar oa e piny.

4. Magi e joma ne ok odwanyore gi mon, to ne giritore maler. Giluwo Nyarombo kamoro amora modhiye. Osewargi kuom ji mana kaka olemo mokwongo nyak, michiwo ni Nyasaye kendo ni Nyarombo.

5. Miriambo ne ok owuok e dhogi, kendo gionge gi ketho moro kata achiel.

6. Eka ne aneno malaika moro ka huyo e kor polo. Ne en gi Wach Maber mochwere mondo oland ni joma odak e piny. Nolando wachno ni pinje duto, kod ogendini duto.

7. Nokok matek niya, “Luoruru Nyasaye, kendo miyeuru duong’, nikech sa mong’adoe bura osechopo! Lamuru Jal mane ochueyo polo gi piny kaachiel gi nam kod sokni.”

8. Eka malaika mar ariyo noluwe kawacho niya, “Yaye! Babulon, dala maduong’, osepodho! Osepodho! En e dhako mane omiyo ogendini duto omadho divai mar terruokne. En divai makelo mirimb Nyasaye.”

9. Bang’ mano, malaika mar adek nobiro bang’gi kawacho matek niya, “Ng’ato ang’ata malamo ondiek kod gima ket kode, mi oyudo alama e lela wang’e kata e lwete,

10. nyaka madh divai mar mirimb Nyasaye moruw makech e kikombe mar mirimbe. Noyud sand mar mach makakni e nyim malaika maler, kendo e nyim Nyarombo.

11. To iro mar mach masandogi nodum malo nyaka chieng’. Bende jogo malamo Ondiek kod gima ket kode, kata moyudo alama mar nyinge, ok noyud yueyo odiechieng’ gotieno.”

12. Ka eri ema idwaroe kinda mar jo-Nyasaye, kendo ma ok we yie ma gin-go kuom Yesu!

13. Eka ne awinjo dwol moa e polo kawacho niya, “Ndik ni, ‘Chakre kawuono, jogo matho kogeno kuom Ruoth, gin johawi!’ ” Roho bende wacho ni, “Ee, gin johawi adier, nikech giniyue kuom tichgi matek, nimar gik ma gisetimo dhi kodgi.”

14. Eka ne ang’icho mi aneno bor polo marachar, to ewi bor polono ne nitie gima obetie machalo gi dhano. Ne osidho osimbo mar dhahabu e wiye, kendo ne oting’o pala mar keyo mabith e lwete.

15. Eka malaika machielo nowuok e Hekalu kakok matek ni jal mane obet e bor polono niya, “Kaw pandi mar keyo mondo ike nikech kinde mar keyo osechopo, kendo piny ochiek mokadho!”

16. Omiyo jal mane obet e bor polo notiyo gi pande mar keyo e piny mi okayo piny.

17. Bang’ mano, malaika moro nowuok e Hekalu manie polo. En bende ne en gi pand keyo mabith.

18. Eka malaika machielo man gi teko kuom mach noa e kendo-mar-misango. Ne okok matek ni malaika mane nigi pand keyo mabithno niya, “Kaw pandi mar keyo mabithno mondo ichok olemb mzabibu mag piny nikech olembene ochiek ahinya!”

19. Omiyo, malaikano notiyo gi pande mar keyo e piny, mi ochoko olemb mzabibu mag piny, mobologi kar biyo mzabibu maduong’ mar mirimb Nyasaye.

20. Olembe ne obi kinyono kar bichono e alap mar dala, kendo remo mamol kawuok kar bichono, mochopo kilomita adek koa e dala, to tut remono ne dirom mita ariyo.

Luo Bible 2015