Beblia

Bible in one year December 4

1. En ema ochung’ kaka jakonyna kendo jaritna.

2. “To koro adwaro nyisi gima biro timore adier. “Ruodhi adek moko biro bet e piny Persia, to bang’gi ruoth mar ang’wen nowuogi, ma nobed gi mwandu mang’eny moloyogi. Bang’e ka mwandune osemiyo oguro lochne motegno, to nothuw ogendini duto gi ruodhi Gris.

3. Eka bang’ mano ruoth moro ma jalweny nowuogi. Enobed ruodh piny maduong’ kendo notim gimoro amora mohero.

4. To ka lochne osegurore, pinye nopogre tieng’ ang’wen, kendo yawuote gi nyikwaye ok nobed ruodhi bang’e. Jomoko nono ema nokaw lochne gi thwon, to ok ginibed gi teko marom gi mane en go.

5. Ruodh Misri nobed gi teko, to achiel kuom jotend jolwenje nobed gi teko moloye, kendo nobed ruodh piny maduong’.

6. Bang’ higni moko achien, ruodh Misri nomi ruodh Siria nyare okendi, mondo gitim kode winjruok. To winjruokgino ok nodag aming’a, kendo nyakono gi jotich mane odhi kode, kaachiel gi nyathine kod chwore nonegi,

7. Bang’e watne moro nomonj jolweny ruodh Siria, kendo nodonj e dalagi mochiel motegno, mi logi.

8. Enokaw kido mag nyiseche kaachiel gi gik ma nengogi tek mag fedha gi mag dhahabu, mi oter Misri. Bang’ bedo gi kue kuom higni mogwarore,

9. ruodh Siria nomonj Misri, to nochune mondo odog e pinye.

10. “Bang’e yawuote noikre ni lweny, mi chok jolweny mang’eny. Achiel kuomgi nomwom ka ohula, mi monj kendo kwak kama lach nyaka chopi dala wasigu mochiel motegno.

11. Eka mirima nomak ruodh Misri, mi noked gi ruodh Siria, kendo omak ogandane maduong’ mar lweny.

12. Bang’e sunga nomake nikech lochneno, kendo nikech jolweny mang’eny mosenego, to lochne ok nodhi nyime.

13. Ruodh Siria nochak ochok oganda lweny maduong’ moloyo mane en go chon, kendo ka kinde ochopo maber, to noduog gi oganda mar lwenyno, kod gilweny mathoth.

14. E ndalogo, ji mang’eny nodagi loch ruodh Misri, kendo in Daniel, jou moko mohero lweny nong’any nikech fweny moro ma giseneno, to kata kamano nologi.

15. Bang’e ruodh Siria nolwor dala mochiel motegno, mi kaw. Jolweny mag Misri ok nodhi nyime gi kedo, kendo kata mana joma rateke moloyoe kuomgi ok nobed gi teko mar kedo.

16. Kuom mano, jasikgi notimnigi mana gima ohero, maonge ng’ama tame. Enokaw piny Israel ma jaber, mi bed e bwo lochne chuth.

17. Enobed gi paro mar kawo pinje duto mae bwo loch ruodh Misri. Omiyo enomiye nyare okendi, eka oyud kaka dohinye, to kata kamano ok nonyal.

18. Bang’ mano nomonj ogendini modak e dho nam, mi olo pinjegi mang’eny. To jatelo moro moa e piny machielo noloye, mi tiek sungane chuth.

19. Enoring mi odog e mier mochiel motegno e pinye owuon, to noloye kuno, mi mano nobed rumbe chuth.

20. “Eka ruoth moro nowuog bang’e ma noor ng’ato osolne osuru mondo pinye obed gi mwandu mang’eny. To bang’ kinde matin ruodhno nonegi, to ok e lweny.

21. Jal ma nobed ruodh Siria bang’ mano nobed ng’at ma timbene richo, ma ok owinjore bed ruoth. Enobi apoya e ndalo kue, mi okaw loch gi rieko mar miriambo.

22. Ogend lweny duto nopiem kode, to enoywegi oko motiekgi pep, koda ka jadolo maduong’ mar Nyasaye.

23. Enotim winjruok gi ogendini mamoko kowuondogi. Kamano nogurre motegno, kata obedo ni nobed mana ruodh oganda matin.

24. Enomonj piny momew ma yande obet gi kue, mi okaw, kotimo timbe mane kwerene ok nyal timo. Enopog ni joge mwandu gi gik moyako e lweny, bende enochan monjo kuonde mochiel motegno mag siro lweny, to mano notim mana kuom kinde matin kende.

25. “Enowuog gi chir ka en gi oganda maduong’ mondo omonj Ruodh Misri, ma bende enobed koikore kedo kode gi oganda lweny maduong, kendo maratego. To ruodh Misri ok nosir nikech joge moko nondhoge.

26. Jong’adne rieko mohero moloyo ema notieke. Joge mag lweny mathoth nonegi kendo notiek ogandane mar lweny.

27. Bang’e ruodhi ariyogo nobed piny mondo ochiem kaachiel, to ginibed ka gin gi paro maricho. Omiyo giniwuondre, kendo ok giniyud gima gidwaro, nimar kinde ma Nyasaye oketo pok ochopo.

28. Ruodh Siria nochak wuoth ka dok thurgi, gi mwandu mang’eny moseyako, koketo chunye mondo singruok manie kind Nyasaye gi jo-Israel okethre. Enotim gima en ema ohero, eka nodhi adhiya thurgi.

29. “Achien enochak omonj Misri e kinde ma Nyasaye oketo, to ok nolo pinyno kaka noloye mokwongo.

30. Joma oa yo podho chieng’ nobi gi mendegi mondo oked kode, mi nobed maluor. Bang’e nodog ka en gi mirima mager mondo otiek joma otimo singruok maler gi Nyasaye, tiende ni jo-Israel, kendo enoluw rieko mag joma oseweyo singruokno.

31. Ogendini mage moko mag lweny nodwany Hekalu kod kuondene mochiel motegno, mi ginimi ji we timo misengni mitimo pile, kendo ginichung gima kuero makelo kethruok.

32. Ruoth nong’ad rieko mondo oywago joma oseweyo singruokgi malerno, to kata kamano, joma ong’eyo Nyasachgi nobed motegno kendo nolochi.

33. Ji mariek nong’ad rieko ni ji mamoko mathoth. To kuom kinde matin jomoko kuomgi notho e lweny kendo nowang’ e mach. Moko bende noywag mwandugi, kendo noter e tuech.

34. To e kinde ma inegogieno giniyud kony matin, kata obedo ni ji mang’eny kuom joma odoknigi nobed gi paro maricho.

35. Jomoko kuom joma riek bende nonegi mana ni mondo joma odong’ kuom ogandagi obed joma beyo mopwodh kendo maler, nyaka kinde mar giko ma Nyasaye oseketo chopi.

36. “Ruodh Siria notim gima en ema ohero, kendo enosungre ni oloyo nyasaye moro amora, bende enopakre ni oduong’ moloyo kata mana Nyasaye maduong’ moloyo nyiseche moko. Enodhi nyime kotimo kamano nyaka chop Nyasaye kume, nikech Nyasaye nyaka tim gima osechano.

37. Ruodhno ok nodew nyasaye mane kwerene lamo, kod nyasaye mane mon ohero. Chutho ok nodew nyasaye moro amora, nimar enobed koparo ni oduong’ duto.

38. Kar lamo nyisechego, to enolam mana nyasaye marito kuonde mochiel motegno mag siro lweny. Enochiw dhahabu gi fedha gi kite ma nengogi tek kod chiwo mamoko mabeyo ni nyasaye ma kwerene ne ok lamno.

39. Enoket ji malamo nyasach jopiny moro nono mondo orit mier mochiel motegno mag siro lweny. Joma oyie lochne noyud duong’ mang’ongo, kendo noketgi e tije madongo, mi omigi lowo kaka gir erokamano.

40. “E kinde ma loch ruodh Siria chiegni rumo, ruodh Misri biro monje, mi ked kode gi tekone duto, kokonyore gi geche lweny gi joidh farese kod mende mang’eny, mi omwom mana ka aora ma mwomo genge.

41. Bende enomonj piny Israel ma jaber, mi oneg ji gana gi gana. Piny Edom gi piny Moab kod piny Amon mane odong’, to notony.

42. Enomonj pinje mang’eny ma kata mana Misri bende ok notony.

43. Enoyak dhahabu gi fedha mopandi mag Misri, kaachiel gi mwandu mamoko ma nengogi tek, kendo enolo piny Libya gi piny Ethiopia.

44. Bang’e weche moko moa yo wuokchieng’ gi yo nyandwat nomiye luoro, mi noked gi gero malich, kendo noneg ji mang’eny.

45. Bende enogur hembene madongo dongo e kind nam gi got maberie moloyo ma ogerie Hekalu. To enotho kuno, ka onge ng’ama konye.

Daniel 12:1-13

1. “E kindeno, malaika maduong’ miluongo ni Mikael marito jou, biro thinyore. Enobed kinde mar chandruok marachie moloyo kendo ma pok oneye nyaka ne ogendini chak bet e piny. Ka kindeno ochopo, to ibiro res jou duto ma nyinggi ondiki e kitap Nyasaye.

2. Ji mang’eny kuom joma osetho biro chier. Moko kuomgi nochier mi yud ngima mochwere, to moko noyud wichkuot kod achaye mosiko.

3. To joma riek norieny ka ler mar polo, kendo jogo mane opuonjo ji mang’eny mondo otim gik makare norieny ka sulue nyaka chieng’.

4. “To in Daniel, koro um kitabu, kendo idine gi odok nyaka kinde mar giko chopi. To kindegi ji mang’eny biro ringo koni gi koni mondo onge tiend gik matimore.”

5. To an Daniel, naneno ji ariyo moko ka moro ochung’ e bath aora koni, to moro ochung’ komachielo.

6. Achiel kuom jogo nowacho ni ng’at mane orwako law maber mane ochung’ gi chien yo ka wi aora cha, niya “Odong’ kinde marom nadi mondo honnigi orum?”

7. Ng’at mane orwako law maberno noting’o bedene malo kochomo polo, mi osingore e nying Nyasaye mochwere, kowacho niya, “Odong’ kinde moromo higni adek gi nus, kendo ka sand misandogo jo-Nyasaye oserumo, to noyud ka gigi duto osetimore.”

8. Ne awinjo gima owacho, to ne ok ang’eyo tiendgi, omiyo napenje niya, “Jaduong’, giko mar gigi nobed nadi?”

9. Nodwoka niya, “Daniel, koro dhi adhiya, nikech wechegi odin kendo okan nyaka kinde mar giko chopi.

10. Ji mang’eny ibiro pwodhi mondo gibed joma beyo kendo maler. Joma richo to wechegi ok nodonjnigi, kendo ginisik asika ka gitimo richo. Joma riek to wechegi nodonjnigi.

11. “Chakre chieng’ ma ji nowee timo misengni mitimo pile, tiende ni chakre kinde ma ochungie gima kuero makelo kethruok, ndalo alufu achiel gi mia ariyo gi piero ochiko nokadhi.

12. Joma osiko kuom Nyasaye nyaka ndalo alufu achiel gi mia adek gi piero adek gi abich kadhi gin johawi.

13. “In Daniel, sik kuom Nyasaye nyaka giko. Eka initho, to achien inichier mi iyud pokni chieng’ giko piny.”

Zaburi 138:1-3

1. A Ruoth Nyasaye, agoyoni erokamano gi chunya duto. Apaki gi wer e nyim nyiseche.

2. Akulora piny kachomo Hekalu mari maler, kapako nyingi nikech herani mosiko kod adierani, kendo nikech iseyaro singruokni, modoko malach ka polo.

3. Kane aluongi, to ne idwoka, kendo ne itega gi tekoni.

Ngeche 29:16-16

16. Ka joricho ema nigi loch to timbe manono medore ameda. Joma kare to nogonigi agoya siboi ka gipodho.

1 Johana 2:1-29

1. Nyithinda, andikonu wechegi mondo kik utim richo, to ka ng’ato otimo richo, to wan gi Jakony masayonwa Wuoro. En Yesu Kristo, Jal makare.

2. En e misango magolo richowa, to ok richowa kende ema ogolo, to ogolo koda ka richo mar piny duto bende.

3. Ka warito chik Nyasaye, eka wan gi ratiro ni wang’eye.

4. To ka ng’ato wacho ni ong’eyo Nyasaye, to ok orito chikene, to en jamriambo, kendo adiera onge e chunye.

5. To ng’ama orito wach Nyasaye ema hera moherogo Nyasaye oselosi mobedo malong’o chuth. Mano e kaka wanyalo bedo gi ratiro ni wan jo-Nyasaye.

6. Ka ng’ato wacho ni en ng’at Nyasaye, to nyaka ngimane bed machal gi ngima Yesu.

7. Osiepena, chik ma andikonuni ok en chik manyien, to en chik machon ma usebedogo nyaka a chakruok.

8. To kata kamano, chik ma andikonu en chik manyien, kendo adiera mare ineno kuom Kristo, kendo ineno kuomu, nikech mudho rumo, kendo ler maradier koro osechako rieny.

9. Ng’at mawacho ni nie ler to mon gi wadgi, pod nie mudho.

10. Ng’at mohero wadgi osiko e ler, kendo onge gimoro kuome madimi ochwanyre.

11. To ng’at mamon gi wadgi nie mudho, kendo wuotho e mudho. Ok ong’eyo kuma odhiye, nikech mudho oimo wang’e.

12. Nyithinda, andikonu nimar richou owenu e nying Yesu.

13. Wuone, andikonu nikech ung’eyo Jal ma osebetie nyaka a chakruok. Yawuowi, andikonu nikech useloyo Ng’ama Rach.

14. Un nyithinda, asendikonu nikech ung’eyo Wuoro. Un wuone, asendikonu nikech ung’eyo Jal ma osebetie nyaka a chakruok. To un yawuowi asendikonu nikech utegno, kendo Wach Nyasaye odak e iu, kendo useloyo Ng’ama Rach.

15. Kik uher piny kata gik manie piny, ka ng’ato ohero piny to hera mar Wuoro ok nie iye,

16. nikech gik moko duto manie piny, kaka gombo mag ringruok gi gombo mar wang’, kod sunga ma ji sungorego kuom gik ma gin-go, ok a kuom Wuoro, to gin mana mag pinyni.

17. Piny kadho kaachiel gi gombone, to ng’ama timo gima Nyasaye dwaro to osiko nyaka chieng’.

18. Nyithinda, giko koro chiegni! Ne onyisu ni Jasik Kristo nobi, to koro wasik Kristo mang’eny osetucho, omiyo wang’eyo ni giko chiegni.

19. Ne giweyowa nikech ne ok gin jowa, to ka dine gibed jowa, to dine gisiko kodwa. To ne giweyowa mondo ong’ere malong’o ni giduto ok gin jowa.

20. Un ema Ng’ama Ler osewirou, omiyo un duto ung’eyo adiera.

21. Andikonu, nikech ung’eye, bende ung’eyo ni onge miriambo mawuok kuom adiera kata matin.

22. Jamriambo en ng’a? Donge en mana ng’at makwer ni Yesu ok en Kristo? En e Jasik Kristo, nikech odagi Wuoro kaachiel gi Wuowi.

23. Ng’at modagi Wuowi ok nigi Wuoro bende, to ng’at moyie Wuowi ema nigi Wuoro bende.

24. Un to neuru ni wach musewinjo nyaka a chakruok osiko e chunyu. Ka gima nuwinjo nyaka a chakruokno osiko e chunyu, to pile unusik ka unie achiel gi Wuowi kod Wuoro.

25. Ma e singruok mar ngima ma nyaka chieng’ mane osingore ni nomiwa.

26. Asendikonu wechegi kuom jogo madwaro wuondou.

27. Un to, Roho mane Kristo omiyou osiko kuomu, omiyo ok uchando ng’at mapuonjou gik moko duto, kendo puonj mare en adier, ma ok miriambo. Kuom mano, sikuru kuom Kristo mana kaka Roho osepuonjou.

28. Adier nyithinda, sikuru kuome mondo ka chieng’ moro ofwenyore, to wabed gi chir, ka waonge gi gima dimi wiwa kuodi e nyime.

29. Ka ung’eyo ni en ng’at makare, to nyaka ung’e bende ni ng’ato ka ng’ato matimo gik makare en nyathi Nyasaye.

Luo Bible 2015