Beblia

Bible in one year February 15

1. Ruoth Nyasaye noluongo Musa mowuoyo kode gi e Hemb Romo ma Nyasaye romoe gi joge, kowachone niya:

2. Nyis jo-Israel ni ka ng’ato kuomgi chiwo chiayo mondo otimna misango, to chiayono nyalo bet dhiang’ kata diel kata rombo.

3. Ka ng’ato chiwo dhiang’ mondo otimgo misango miwang’o pep, to nyaka obed rwath maonge songa. Enochiwe e dhoranga Hemb Romo e nyim Ruoth Nyasaye mondo Ruoth Nyasaye oyie kode.

4. Nyaka oket lwete ewi chiayono, mi Ruoth Nyasaye noyie gi misangono mondo obed gima opwodhnego richone.

5. Eka noneg rwadhno e nyim Ruoth Nyasaye, kendo jodolo ma joka Harun nokaw remo, kendo nokir e bethe duto mag kendo-mar-misango manie dho Hemb Romo.

6. Bang’ mano noyang’ chiayono, kendo nopoge lemo lemo.

7. Joka Harun jadolo nomok mach e kendo-mar-misango, kotimogo misango, mi giniketie yien.

8. Ginichan lemogo kod wich gi bor e yien moket e majno.

9. Jambich gi tielo to nyaka lwok gi pi, eka jadolo nowang’gi kaachiel gi lemo duto e kendo-mar-misango, kotimogo misango miwang’o pep, mondo odum mamit ni Ruoth Nyasaye.

10. Ka ng’ato ochiwo rombo kata diel mondo otimgo misango miwang’o pep, to nyaka obed im kata nyuok maonge songa.

11. Nyaka onege e nyim Ruoth Nyasaye e bath kendo-mar-misango koma ochomo yo nyandwat, kendo jodolo ma joka Harun nyaka kir remo e bethe duto mag kendo-mar-misango.

12. Eka ng’atno nopog ring’o lemo lemo, mi jadolo nocham lemogo kaachiel gi wich kod bor kuom yien moketi e mach manie kendo-mar-misango.

13. Jambich gi tielo to nyaka lwok gi pi, eka jadolo nochiwgi kaachiel gi lemo duto e kendo-mar-misango mondo otimgo misango miwang’o pep ma tikne dum mamit ni Ruoth Nyasaye.

14. Ka ng’ato chiwo winyo mondo otimgo ni Ruoth Nyasaye misango miwang’o pep, to nyaka ochiw mana akuch odugla kata nyathi akuru.

15. Jadolo nokel chiwono e kendo-mar-misango kendo nochod wiye, eka owang’e e kendo mar-misango, to rembe nyaka bi mi chuer e kor kendo-mar-misango.

16. Nyaka ogol oswakone kaachiel gi gik manie iye, mi owit e bath kendo-mar-misango koma ochomo yo wuok chieng’, kama ipukoe buru.

17. Nyaka obambe ma ok ogolo buombene oko, eka owang’e ewi yien moket e mach manie kendo-mar-misango. En misango miwang’o pep, madum mamit ni Ruoth Nyasaye.

Tim jo-Lawi 2:1-16

1. Ka ng’ato timo ni Ruoth Nyasaye misango mar cham, to nyaka ochiw mogo mayom, kendo ool mo kuome, mi omedie ubani.

2. Eka nokele ni jodolo ma joka Harun, kendo jadolo achiel nojuk mogo sanja moruw gi mo, mi nowang’ kaachiel gi ubani duto ka rapar e kendo-mar-misango. Mano en misango miwang’o mondo tikne odum mang’ue ng’ar ni Ruoth Nyasaye.

3. To mogo gi mo modong’ kuom chiwono nobed mar Harun gi yawuote. En gima ler moloyo, nimar ogole kuom misango miwang’o ni Ruoth Nyasaye.

4. Ka ichiwo gima otedi mondo otimgo misango mar cham, to nyaka obed makati matindotindo ma ok ketie thowi, molos gi mogo mayom modwal gi mo, kata chapat ma ok ketie thowi, mowir gi mo.

5. To ka en gima ochiel e tawo, to nyaka obed mar mogo mayom moruw gi mo, to ok oketie thowi.

6. Nyaka ging’inge madundedunde, kendo olie mo. Mano en misango mar cham.

7. Ka ichiwo gima otedi e sufuria mondo otimgo misango mar cham, to nyaka obed mar mogo mayom modwal gi mo.

8. Kel ni Ruoth Nyasaye misango molos kamano, kendo imiye jadolo, mi jadolo notere e kendo-mar-misango.

9. Enopog moko mondo owang’ e kendo-mar-misango ka rapar. En misango miwang’o mondo tikne odum mang’ue ng’ar ni Ruoth Nyasaye.

10. To gima odong’ kuom chiwono nobed mar Harun gi yawuote. En gima ler moloyo, nikech ogole kuom misango miwang’o ni Ruoth Nyasaye.

11. Misengni duto mag cham muchiwo ni Ruoth Nyasaye nyaka bed ma ok oketie thowi. Bende kutimo ni Ruoth Nyasaye misango miwang’o, to kik thowi kata mor kich bedie.

12. To gigo unyalo chiwo ni Ruoth Nyasaye ka misango mar chamb agwela, to kik wang’gi e kendo-mar-misango kaka iwang’o misango madum tik mang’ue ng’ar.

13. Misengni duto mag cham mutimo nyaka ketie chumbi majiwo singruok mane utimo gi Nyasaye. Kamano chumbi nyaka keti e misengni duto mutimo.

14. Ka utimo ni Nyasaye misango mar cham gi cham mokwongo nyak, to nyaka uchiw cham manyien molodi kendo moyoki.

15. Nyaka uolie mo, kendo uketie ubani. Mano en misango mar cham.

16. Jadolo nokaw cham moko moruw gi mo, mi nowang’ kaachiel gi ubani duto ka rapar. En misango miwang’o ni Ruoth Nyasaye.

Zaburi 22:22-31

22. Anahul nyingi ni owetena. Anapaki gi wer a dier chokruokgi.

23. Un jotich Ruoth Nyasaye, pakeuru! Miyeuru duong’, un nyikwa Jakobo. Ee, un jo-Isarel duto, lameuru,

24. nimar ok ojwang’ jochan, bende ok opand wang’e ni chandruokgi. Ok obolrenigi gi chien, to okonyogi ka gikwaye.

25. Abiro paki e chokruok maduong’ kuom gima isetimo, kendo abiro timo misengni e nyim joma oluori ka achopogo singruok mane atimo.

26. Joma odhier nochiem achiema mi yieng’, kendo jogo madwaro Ruoth Nyasaye biro pake. Mad gidhi nyime maber nyaka chieng’!

27. Ogendini duto nopar Ruoth Nyasaye. Ginidhi ire ka gia e tung’ piny gi tung’ piny. Adier, ogendini duto nolame.

28. Ruoth Nyasaye e ruodh piny, kendo ogendini duto ni e bwo lochne.

29. Josunga duto nokulrene. Chutho, ji duto matho nokulre e nyime.

30. Tienge mabiro noti ni Ruoth Nyasaye, kendo nonyis ogendini mabiro wachne.

31. Ji ma pok minegi onywolo bende nowachnigi niya, “Ruoth Nyasaye osewaro joge.”

Ngeche 8:32-36

32. Koro un yawuota, winjuru gima awacho, nikech joma timo kaka anyisogi gin johawi.

33. Chikuru itu ni gik ma apuonjou, mondo ubed gi rieko, kendo kik uwe olalnu.

34. Ng’at ma owinjo wachna, kendo ma osiko e dhoranga dalana, ka oketo wang’e e dhooda, en jahawi,

35. nimar ng’at ma oyuda, to oyudo ngima, kendo Ruoth Nyasaye nobed mamor kode.

36. To ng’at ma ok oyuda, hinyore owuon. Chutho, ng’at ma mon koda, ohero mana tho!”

Mathayo 27:27-54

27. Bang’e askeche ruoth nokawo Yesu, motero e laru mar od ruoth, mi gichoko askeche duto, molwore.

28. Ne gilonyo lepe, mi girwakone kandhu makwar.

29. Bende ne giloso osimbo mar kudho mi gisidhone e wiye. Eka ne giketo luth e lwete korachwich, ka gichare, kendo giwachone niya, “Ruodh jo-Yahudi mondo odag aming’a!”

30. Ne ging’udho kuome olawo, kendo ne gikawo ludh cha, mi gichwadogo wiye.

31. Kane gisetieko chare kamano, ne gilonyo kandhu oko kuome, mi girwakone lepe owuon. Eka ne gitere oko mondo gigure e msalaba.

32. Kane giwuok oko, ne ginwang’o ja-Kurene moro ma nyinge Simon, mi gichuno mondo oting’ni Yesu msalape.

33. Kane gisechopo kama iluongo ni Golgotha, tiende ni ‘Kar Hanga Wich’,

34. ne gimiyo Yesu divai moruw gi yath makueyo rem mondo omadhi to kane osebile, notamore madhe.

35. Eka ne gigure, mi gipogore lepe gi ombulu.

36. Bang’ mano ne gibet piny kanyo ka girite.

37. Wach modonjnego, mawacho ni, “JALI E YESU, RUODH JO-YAHUDI”, noket e wi msalaba malo.

38. Jomecho moko ariyo bende nogur kode, achiel e bathe korachwich, to machielo e bathe koracham.

39. Joma ne kadho kanyo nojaro Yesu, katwenyone umgi,

40. kendo wachone niya, “In mane iwacho ni ibiro muko Hekalu, mi ichak iger bang’ ndalo adek, koro resri ane, ilor ia e msalaba, ka in Wuod Nyasaye adier!”

41. Kamano bende e kaka jodolo madongo gi jopuonj Chik kod jodong oganda nochare, kawacho niya,

42. “Noreso jomoko, to en koro dak oresre? Donge en ruodh Israel? Koro mondo olor ane oa e msalaba, eka wayie kuome.

43. Osebedo ka ogeno kuom Nyasaye mondo orese ane kohero, nikech nowacho ni en Wuod Nyasaye!”

44. Jomecho mane ogur kode bende noyanye mana kamano.

45. Piny duto notimo mudho, chakre sa auchiel nyaka sa ochiko,

46. kendo kar sa ochikono Yesu nokok matek niya, “Eli, Eli, lama sabakthani?” tiende ni, “Nyasacha, Nyasacha, iweya nang’o?”

47. Jomoko mane ochung’ kanyo nowinjo wechego, mowacho niya, “Ng’atni luongo Elija.”

48. To ng’at achiel kuomgi noringo piyopiyo, mokawo sipanj, onyumo e kong andwayo. Eka nochwowo sipanjno e dho odundu motero e dho Yesu gi odunduno mondo onyodhi.

49. Jomoko to nowacho niya, “Weuru wane ane ka Elija biro biro rese.”

50. To Yesu nochako okok matek, eka noweyo chunye owuok, motho.

51. Gikanyono nanga mane ogeng’o Kama Ler mar Hekalu noriedore diere ariyo, chakre malo nyaka piny. Piny noyiengni, kendo lwendni nobarore.

52. Liete bende noyawore, kendo jo Nyasaye mang’eny mane osetho nochier.

53. Bang’ chier Yesu, jogo nowuok e lietegi, modhi Jerusalem, Dala Maler, mi ji mathoth onenogi kuno.

54. Kane jaduong’ lweny kod joma ne konye rito Yesu oneno kaka piny yiengni, kendo kaka gik moko timore, ne gibedo maluor ahinya, mi giwacho niya, “Adier, ng’atni ne en Wuod Nyasaye!”

Luo Bible 2015