Beblia

Bible in one year February 23

1. Ruoth Nyasaye nowacho ni Musa gi Harun

2. ni mondo onyis jo-Israel ni: Ka nyot ng’ato owuok, kata koyudo tuo nyach machuer, to gima chuerno bedo mogak.

3. Kata ka nyajno chuer kata kodinore, to ng’atno ogak kendo chik mar gakne kuom chuer kamano chalo kama:

4. Kitanda ma ng’at ma dende chuer kamano onindoe, kata gimoro amora mobetie bedo mogak,

5. ng’ato ang’ata momulo kitandano nyaka lwok lepe, kendo lwokre, to nosik kogak nyaka odhiambo.

6. Bende ng’ato ang’ata mobet kama ng’at ma dende chuer osebetie, nyaka lwok lepe, kendo lwokre, to nosik kogak nyaka odhiambo.

7. Ng’ato ang’ata momulo ng’at ma dende chuer nyaka lwok lepe, kendo lwokre, to nosik kogak nyaka odhiambo.

8. Ka ng’at ma dende chuer ong’ulo olawo kuom ng’ato, to ng’at mong’ul kuome olawno nyaka lwok lepe, kendo lwokre, to nosik kogak nyaka odhiambo.

9. Gimoro amora ma ng’at ma dende chuerno obetie ka en e wuoth bedo mogak.

10. Ng’ato ang’ata momulo gima ng’atno osebetie nobed mogak nyaka odhiambo kendo ng’ato moting’o gik ma kamago nyaka lwok lepe, kendo lwokre, to nosik kogak nyaka odhiambo.

11. Ng’ato ang’ata ma ng’at ma dende chuer omulo ka pok ologo nyaka lwok lepe kendo lwokre, to nosik kogak nyaka odhiambo.

12. Gimoro amora mochue gi lowo ma ng’at ma dende chuer omulo nyaka negi, to ka en gima olos gi bawo, to nyaka lawe gi pi.

13. Ka ng’at ma dende chuerno ochango, to nyaka owe ndalo abiriyo kadhi kopwodhore. Nolwok lepe, kendo nolwokre gi pi maler, eka nopwodhre.

14. Chieng’ mar aboro nokaw akuch odugla ariyo kata nyithi akuru ariyo, mi nobigo e dho Hemb Romo e nyim Ruoth Nyasaye, kendo nomigi jadolo.

15. Jadolo nokaw akuru achiel, mi notimgo misango mar golo richo, to machielo notimgo misango miwang’o pep. Kamano nopwodh ng’atno e nyim Ruoth Nyasaye, kaka chik dwaro kuom gak mar chuer.

16. Ka nyot ng’ato owuok, to nyaka olwok dende duto gi pi, kendo nosik kogak nyaka odhiambo.

17. Nanga moro amora kata pien moro amora ma nyodo otonie nyaka lwoki, kendo nobed mogak nyaka odhiambo.

18. Chikno bende omako dhako ma ng’ato oriworego. Giduto ji ariyogo nyaka gilwokre, to ginisik ka gigak nyaka odhiambo.

19. Ka dhako odhi e due, to nobed mogak kuom ndalo abiriyo, kendo ng’ato ang’ata momule nobed mogak nyaka odhiambo.

20. Gimoro amora monindoe kata mobetie e kindego nobed mogak.

21. Ng’ato ang’ata momulo kitanda dhakono,

22. kata momulo gimoro mosebetie nyaka lwok lepe, kendo lwokre, to nosik kogak nyaka odhiambo.

23. Kata ka omulo gima nie kitanda dhakono, kata man kama obetie, to nobed mogak nyaka odhiambo.

24. Ka ng’ato oriwore gi dhakono mi rembe omiene, to nobed mogak.

25. Ka dhako moro chuer kuom ndalo mogwarore e kinde ma ok odhi e due, kata ka ochuer aming’a mokadho kaka ojadhi e due, to nobed mogak e kinde mochwerieno duto, mana kaka ndalo modhi e due.

26. Kitanda moro amora monindoe kata gimoro amora mobetie e kindeno nobed mogak mana ka kitanda monindoe kodhi e due.

27. Ng’ato ang’ata momulo gigo nobed mogak, omiyo nyaka olwok lepe, kendo olwokre, to nosik kogak nyaka odhiambo.

28. Ka dhakono ochango, to nyaka owe ndalo abiriyo kadhi, bang’e nobed maler.

29. To chieng’ mar aboro nyaka okaw akuch odugla ariyo kata nyithi akuru abiriyo, mi oter ni jodolo e dho Hemb Romo.

30. Jadolo nokaw akuru achiel, mi notimgo misango mar golo richo, to machielo notimgo misango miwang’o pep, kopwodho dhakono e nyim Ruoth Nyasaye kaka chik dwaro kuom gak mar chuer.

31. Kamano e kaka unusiem jo-Israel kuom bet mogak, nimar dipo ka gidwanyo Kar Dakna Maler manie kindgi, mi githo nikech gakgino.

32. Mano en chik momako ng’at moyudo nyach machuer kata ma nyote owuok mi odoko mogak.

33. Bende en chik mamako dhako modhi e due, kaachiel gi ng’ato ang’ata bed ni en dichuo kata dhako, ma dende chuer, kod ng’at moriwore gi dhako mogak.

Tim jo-Lawi 16:1-34

1. Kane yawuot Harun ariyo kande osetho kuom chiwo mach ma ok ni kare e nyim Ruoth Nyasaye,

2. Ruoth Nyasaye nowacho ni Musa niya, “Nyis Harun owadu ni kik okadh pasia, mi odonj e Kama Ler e nyim raum Sandug Muma miluongo ni kar ng’wono, mak mana e kinde moketi, nono to otho, nikech afwenyora gi e bor polo man ewi raum.

3. E kinde ka kinde ma Harun donjoe Kama Ler, to nyaka okel nyarwath mondo otimgo misango mar golo richo, kod im mondo otimgo misango miwang’o pep.”

4. Enorwak law dolo mabor gi sirwari mondo ogeng’go duge, kendo notue misip e nungone, kendo nosidh kilemba e wiye, mago duto nobed mag katana maber. Gin lep dolo, omiyo Harun nyaka lwokre ka pok orwakogi.

5. Enokaw nyuogi ariyo kuom oganda jo-Israel mondo otimgo misango mar golo richo, kendo im achiel mondo otimgo misango miwang’o pep.

6. Nyaka otim misango mar golo richo gi rwath mondo opwodhrego kaachiel gi joode.

7. Bang’ mano, nokaw nyuogi ariyo kande, kendo nokelgi e nyim Ruoth Nyasaye e dho Hemb Romo.

8. Nyaka ogo ombulu kuomgi mondo diel achiel obed mar Ruoth Nyasaye, to machielo obed mar Azazel.

9. Eka nokaw diel ma ombuch Ruoth Nyasaye olwar kuome mi notimgo misango mar golo richo.

10. Diel ma ombuch Azazel olwar kuome to nokel ka ngima e nyim Ruoth Nyasaye, mi nopwodhe. Eka noriembe odhi e thim ir Azazel.

11. Harun nyaka chiw rwath mondo otimgo misango mar golo richo, kopwodhorego kaachiel gi joode.

12. Enokaw tap mach moketie mach mogol e kendo-mar-misango manie nyim Ruoth Nyasaye kaachiel gi ubani mang’ue ng’ar moromo lwedo ariyo, mi nokel ei kama nogeng’ gi pasia.

13. Eka nool ubani e majno e nyim Ruoth Nyasaye mondo ich ubani oim Sandug Rapar, mondo kik otho.

14. Enokaw remb rwath, mi nokir gi lith lwete e bath raum koma ochomo yo wuokchieng’ kendo nokir remono nyadibiriyo gi lith lwete e nyim raum.

15. Bang’ mano noyang’ diel mitimogo misango mar golo richo ni oganda jo-Israel, mi noter rembe ei kama ogeng’ gi pasia, kendo nokir remono ewi raum, kendo e nyim raum, mana kaka nokiro remb rwath.

16. Mano e kaka enopwodh Kama Ler kuom timbe mogak ma jo-Israel osedwanyego, kendo kuom timbe mane giweyogo Ruoth Nyasaye, tiende ni richogo duto. Kamano bende e kaka nopwodh Hemb Romo manie diergi, kama timbegi ogakie.

17. Ong’e ng’at moro machielo manobed ei Hemb Romo chakre sa ma Harun donjo ei Kama Ler mondo opwodhre owuon, kendo opwodh joode kod oganda duto mar jo-Israel nyaka sa ma owuokie, kosetieko tich pwodhruok duto.

18. Bang’e nowuog oko e kendo-mar-misango manie nyim Ruoth Nyasaye, mi nopwodh kendono. Nokaw remb rwath moko kod remb diel moko mi nomien-go tunge duto mag kendo-mar-misango,

19. kendo nokir remo moko nyadibirioyo gi lith lwete e kendo-mar-misango. Kamano nopuodhe kuom timbe mogak mag jo-Israel mi nomi obed maler.

20. Ka Harun osetieko pwodho Kama Ler gi Hemb Romo kendo-mar-misango, to nokel diel mangima e nyim oganda.

21. Enoket lwetene duto ewi diendno, kendo nohul richo duto mag jo-Israel gi timbe mane giweyogo Ruoth Nyasaye, tiende ni richogi duto. Enowe richogo duto ewi diendno, eka nomiye ng’at ma noyud obet ka rito mondo otere e thim.

22. Kamano diendno noting’ richo duto mag jo-Israel e thim kuma bor. Ng’atno noweye kuno mondo odhi adhiya.

23. Bang’ mano, Harun nodonj e Hemb Romo, mi nolony lep katana mane orwako kodonjo e Kama Ler kendo nowegi kanyo.

24. Eka nolwokre gi pi, kamoro moyang ni Nyasaye, kendo norwak lepe mag dolo, mi nowuog oko mondo otim misangone owuon miwang’o pep, kod mar oganda jo-Israel. Kamano nopwodhre, kendo nopwodh ji bende.

25. Enowang’ boche chiayo motimogo misango mar golo richo e kendo-mar-misango.

26. To ng’at mane oriembo diel, ka tero ir Azazel kik donj e kambi nyaka chop olwok lepe kendo olwokre.

27. Rwath gi diel motimgo misengni mag golo richo, kendo ma rembgi oseter ei Kama Ler mondo opwodhgo richo, nogol ringgi gi piendegi kod owuochgi oko e tok kambi, kama nyaka wang’gie pep.

28. Ng’at ma owang’ogi nyaka lwok lepe kendo lwokre, eka bang’e onyalo duogo e kambi.

29. Koro chik momakou nyaka chieng’ e ma: Due apar mar due mar abiriyo, un jo-Israel kaachiel gi jopinje mamoko modak kuomu, nyaka utue chiemo, kendo kik uti tich moro,

30. nikech chieng’no ema nogolnue richou mondo upwodhru. Kamano unupwodhru kuom richou duto e nyim Ruoth Nyasaye.

31. Chieng’no en chieng’ Sabato moyiedhi ma nyaka uyueye, kendo nyaka utueye chiemo. En chik momakou nyaka chieng’.

32. Jadolo mowir kendo moketi kar wuon mare e tij dolo ema notimnu pwodhruok. Enorwak lep dolo mag katana maber.

33. Kendo enopwodh Kama Ler gi Hemb Romo kod kendo-mar-misango. Eka nopwodh jodolo kod oganda jo-Israel duto.

34. Mano nobed chik momakou nyaka chieng’ mondo upwodh jo-Israel dichiel e higa kuom richogi. Kamano Musa nochopo chike mag Ruoth Nyasaye.

Zaburi 26:6-12

6. A Ruoth Nyasaye, alwoko lweta kanyisogo ni aonge gi ketho, kendo alworo kendoni mar misango,

7. ka awero wend erokamano, kendo ka ahulo gik malich ma itimo. A Ruoth Nyasaye, ahero ot ma idakie ma en kama duong’ mari maler nitie.

9. Kik itieka kaachiel gi joricho, kata gi joma chuero remo,

10. nimar pile gitimo richo, kendo giikore mar chiwo asoya.

11. An to atimo mana gik makare, omiyo yie ikecha kendo iwara.

12. Asenyono kama otegno, omiyo apako Ruoth Nyasaye e chokruok madongo.

Ngeche 10:8-8

8. Joma riek luwo puonj makare, to joma wechegi ofuwo biro rumo.

Mariko 4:1-20

1. Yesu nochako puonjo ji kendo e dho nam Galili. Oganda mane ochokore molwore ne duong’ ahinya, omiyo nodonjo e yie mobetie. Yieno ne nie pi, ka ji to ochung’ gi oko e dho pi.

2. Nopuonjogi weche mang’eny gi ngeche, kendo kane opuonjogi kamano, nowacho niya,

3. “Winjuru! Ng’at moro ne odhi chuoyo,

4. kendo kane oyudo ochuoyo, kodhi moko nolwar e wang’yo, mi winy obiro mochamo.

5. To kodhi moko nolwar kama otimo lwanda ma lowo operoree, mi ne gitwi piyo, nikech lowo ne ok tut.

6. Bang’e chieng’ nowuok, mowang’o cham mapod tindogo, kendo kaka tiendegi ne ok nyal donjo matut, ne gitwo piyopiyo.

7. Kodhi moko to ne olwar e kind kudho, kendo kudhogo nodongo mothung’ogi, mi ok ginyak.

8. To kodhi moko nolwar e lowo maber, omiyo ne gitwi, mi gidongo, kendo ginyak. Moko nonyago kodhi piero adek, to moko piero auchiel, kendo moko mia achiel.”

9. Eka Yesu notieko, ka wacho niya, “Ng’at man gi it mar winjo, to mondo owinji!”

10. Kane Yesu odong’ kende, jopuonjrene apar gariyo kod jomoko mane oyudo ochokore kanyo, nopenje mondo onyisgi tiend ngechego.

11. Nodwokogi niya, “Un osemiu wach mopondo mar Loch Nyasaye, to joma moko ipuonjo weche duto mana gi ngeche, kaka muma wacho niya,

12. ‘Kata da ging’ichi manadi, to ok ginyal ng’eyo, kendo kata da giwinji manadi, to wach ok nyal donjonigi, nimar dipo ka giloko chunygi, mi owenigi richogi’.”

13. Eka Yesu nopenjogi niya, “Ok uwinj tiend ngeroni adier? Ka kamano, to koro ere kaka duwinj tiend ngero moro amora?

14. Gima jachuoyo chuoyo en Wach Nyasaye.

15. To kodhi molwar e wang’yo e joma ochwo wachno e chunygi, kendo ka gisewinje to Satan biro, kendo gole oko kuomgi.

16. To kodhi mochwo e lowo motimo lwanda e joma winjo wachno, mi yie kode piyopiyo gi mor,

17. to ok omok e chunygi. Omiyo ok gidag aming’a, kendo ka chandruok kata sand moro obiro nikech wachno, to gipodho piyopiyo nono.

18. To jomoko bende chalo gi kodhi mochwo e kind kudho. Gin joma winjo wachno,

19. to paro mag piny kod ber mag mwandu, gi gombo mar gik moko, donjo e chunygi, kendo thung’o wachno, mi wachno ok nyag gimoro.

20. Jomoko to chalo gi kodhi mochwo e lowo maber. Giwinjo wach, mi giyiego, kendo ginyak maber, mana ka kodhi, ma moko nyak piero adek, to moko piero auchiel, kendo moko mia achiel.”

Luo Bible 2015