Beblia

Bible in one year February 8

1. “Los kendo-mar-misango gi yiend shita. Borne gi lachne mondo obed mita ariyo gi nus.

2. Nyaka ilosne tunge ang’wen e kondene mondo gibed gimoro achiel kode, kendo ibawe gi mula.

3. Bende losne agulni mag golo buru kod mo, kaachiel gi rajow gi tewni gi rachwow kod tep mach. Giduto nyaka ilosgi gi mula.

4. Losne gimoro mar mula machalo gi sing’enge, kendo ikelne ratege achiel achiel mag mula e kondene ang’wen.

5. Kete e bwo ndiri molworo kendo-mar-misango gi yo ka piny, mondo ochop mana e kor kendo-mar-misango.

6. Los ni kendono ludhe mag shita, kendo ibawgi gi mula.

7. Norwakgi e ratege man e bath kendo koni gi koni, mondo oting’ego.

8. Nyaka ilos kendo-mar-misango gi bao, to iye mondo obed thuolo, ka i sanduk. Lose mana kaka ne onyisi ewi got.

9. “Los laru ni Hema Maler. Koma odok yo milambo nyaka bed gi pasia mar law katana maber ma borne romo mita piero abich,

10. mong’aw e sirni piero ariyo, morwak e rachungi piero ariyo mag mula. To rang’aw kod ratege miriwogo sirnigo nyaka bed mag fedha.

11. Kamano koma odok yo nyandwat bende nyaka bed gi pasia ma borne romo mita piero abich, mong’aw e sirni piero ariyo, morwak e rachungi piero ariyo mag mula. Rang’epi kod ratege miriwogo sirni bende nyaka bed mag fedha.

12. To lach laru modok yo podho chieng’ nyaka bed gi pasia ma borne romo mita piero ariyo gabich, mong’aw e sirni apar, morwak e rachungi apar.

13. To lachne koma omanyo yo wuok chieng’, bende borne nyaka rom mita piero ariyo gabich.

14. E dir rangach koni gi koni nyaka bedie pasia ma borne romo mita abiriyo gi nus.

15. Pasia ka pasia nyaka ng’aw e sirni adek, morwak e rachungi adek.

16. To e dhoranga laru iketie pasia mar law katana maber, mogorie maradadi gi usi mambulu gi maralik kod makwar. Pasiano nong’aw e sirni ang’wen morwak e rachungi ang’wen.

17. Sirni duto molworo laru nyaka bed gi ratege mag fedha, kod rachungi mag mula.

18. Kamano bor laru biro bedo mita piero abich, to lachne mita piero ariyo gabich, kendo borne modhi malo mita ariyo gi nus. Pasiano nyaka los gi law katana maber, kendo rachungi duto nyaka bed mag mula.

19. Gik moko duto mibiro tiyogo e Hema Maler, kaachiel gi loyene duto, kod mago mag laru, nyaka los gi mula.

20. “In iwuon nyaka ichik jo-Israel mondo okelni mor zeituni maliw mondo oliel e taya pile.

21. Tayano nyaka bed ei Hemb Romo ma Nyasaye romoe gi joge, gi yoka oko mar pasia mogeng’o Sandug Rapar. Harun gi yawuote nyaka rite pile mondo oliel e nyim Ruoth Nyasaye, chakre odhiambo nyaka piny ru. Chikni omako jo-Israel kod nyikwagi nyaka chieng’.

Wuok 28:1-43

1. “In iwuon nyaka iluong Harun owadu gi yawuote, ma Nadab gi Abihu gi Eleazar kod Ithamar, kuom jo-Israel mondo iket obed jodolona.

2. Twang’ni Harun owadu lep dolo, mondo omedu duong’ gi chia.

3. Nyis jotich molony ma asemiyo rieko olos ni Harun lewni morwako kokete jadolona.

4. Lewni monego gilos e magi: Law agoko gi law dolo miluongo ni efod, gi aroya, gi law akor mogorie maridadi, kaachiel gi kilemba kod okanda. Ginibed lewni maler ma Harun owadu gi yawuote rwako ka tiyona tich dolo.

5. Nyaka losgi gi dhahabu kod usi mambulu gi maralik kod makwar, kod law katana maber.

6. “Bende gilos law dolo miluongo ni efod gi dhahabu kod usi mambulu gi maralik kod makwar, kod law katana maber ma jatueng’o molony oloso.

7. To obed gi misibe ariyo mitueyego gok, gi yo ka nyime kod yo ka chien.

8. Okanda man kuome nyaka chue machal kode, kendo en bende nyaka lose gi dhahabu kod usi mambulu gi maralik kod makwar, kod law katana maber.

9. Kaw kite ariyo mag berul mondo indikie nying yawuot Israel.

10. E kidi mokwongo ndikie nying’ auchiel, to nying’ auchiel modong’ ndik e kidi mar ariyo, kaluwore gi nywolgi.

11. Ng’at molony e goro kidi ema nyaka ndik nying’ yawuot Israel e kite ariyogo, eka ichomgi e otunge mag dhahabu.

12. Tuegi e misib efod, obed rapar mar yawuot Israel. Harun noting’ nyinggi e goke ka rapar e nyim Ruoth Nyasaye.

13. “Los otunge mag dhahabu

14. kod thiwni ariyo mag dhahabu maler, molos ka tol mokadi, kendo ituegi kuom otungego.

15. Jatueng’o molony ema nyaka los law agoko mar ng’ado bura gi dhahabu kod usi mambulu gi maralik kod makwar, kod law katana maber, mana kaka olos efod.

16. Borne obed lwedo achiel, to lachne bende lwedo achiel, kendo mondo obane diriyo.

17. Nyaka ichan laini ang’wen mag kite ma nengogi tek. Laini mokwongo nobedie sardius gi topaz kod karbunkel,

18. to laini mar ariyo ketie emerald gi safir kod diamond.

19. Laini mar adek to ketie jasinth gi agat kod amethust,

20. kendo laini mar ang’wen ketie berul gi oniks kod jasper. Kidi ka kidi mondo orwak e otunge achiel achiel molos gi dhahabu.

21. Kitego nyaka ndikie nying mag dhoudi apar gariyo, kaka igoro tere migoyogo sei. Kidi ka kidi mondo ondikie nying’ mag dhoudi apar gariyogo.

22. “Los ni law agoko thiwni mag dhahabu maler, mokadi ka tol.

23. Bende los ratege ariyo mag dhahabu, kendo iketgi e riak law agoko gi malo koni gi koni.

24. Tue tonde ariyo mag dhahabugo e ratege manie riak law agoko koni gi koni,

25. to dho tondego komachielo tue e otunge ariyo kande. Kamano e kaka itud law agoko gi misibe miriwogo ka nyim efod gi ka toke.

26. Los ratege ariyo mag dhahabu, kendo iketgi e riak law agoko gi yo ka malo gi ka iye koni gi koni. Nyaka gibed momanyore gi efod.

27. Bende ilos ratege ariyo moko mag dhahabu, mi iketgi yo ka mwalo e dho misibe ariyo mag gok efod kama otwang’gigo e okanda.

28. Eka iriw ratege mag law agoko gi ratege mag efod gi tol mambulu, mondo law agoko obed ewi okanda gi malo, mondo kik ogonyre.

29. Kamano ka Harun donjo Kama Ler, nobed koting’o nying yawuot Israel e law agoko mar ng’ado bura e kore ka rapar e nyim Ruoth Nyasaye kinde duto.

30. “To koro mogik, nyaka iket ombulu miluongo ni Urim gi Thumim ei law agoko mar ng’ado bura, mondo gibed e kor Harun kodonjo e nyim Ruoth Nyasaye, ka Harun donjo e nyim Ruoth Nyasaye, nobed koting’o gik ng’ado bura ni jo-Israel e kore.

31. “Los aroya mar umo efod gi law mambulu.

32. Nyaka obed gi otuch e diere ma wich wuokie. Aluora mar otuchno duto nyaka twang’ gi pien, mondo kik yiech.

33. Twang’ gik mong’inore ka machunga molos gi usi mambulu gi maralik kod makwar e riak lawno alwora, kendo iketie gara mag dhahabu e kindgi e kindgi.

34. Kamano gik mong’inorego nobed mokikore gi garago e laini achiel alwora mar riake mogik piny.

35. Harun nyaka rwak aroyano kotiyo tich dolo, mondo garago owinj ka odonjo Kama Ler e nyim Ruoth Nyasaye, kendo kowuok. Kamano ok notho.

36. “Los gima opamore ka san gi dhahabu maler, kendo indikie ni, ‘MOWAL NI RUOTH NYASAYE’. Wechego nyaka gor kaka igoro tere migoyogo sei.

37. Itueye gi tol mambulu, kendo ikete ka nyim kilemba.

38. Gima opamoreno nyaka bed e wi Harun, kendo kamano e kaka enopwodh ketho moro ma dipo kobetie kuom mich maler ma jo-Israel ochiwo ni Ruoth Nyasaye. Omiyo gino nyaka bed e wiye kinde duto, mondo Ruoth Nyasaye oyie chiwogo.

39. “Itwang’ law akor mar katana maber, kendo ilos kilemba bende gi law katana maber, kod okanda mogoye maradadi.

40. Los ni yawuot Harun kendhe gi okendni kod kilembni, mondo omedgi duong’ gi chia.

41. Gigi imi Harun owadu gi yawuote, eka iwirgi gi mo, kendo iwalgi mondo gibed jodolona.

42. Ilosnigi sirweche mag law katana machopo e thochgi, mondo oim duggi.

43. Harun gi yawuote nyaka rwakgi ka gidonjo e Hemb Romo, kata ka gidhi e kendo-mar-misango mondo giti tich dolo. Kamano ok ginikethi, kendo ok ginitho. Chikni omako Harun gi nyikwaye nyaka chieng’.

Zaburi 20:1-5

1. Ruoth Nyasaye mondo owinj ywakni e kinde ma inie chandruok. Nyasach Jakobo mondo oriti,

2. kendo ooroni kony gie Hekalu mare. Ee, omiyi kony gie got Sayun.

3. Onego oyie gi chiwo magi duto, kendo obed mamor gi misengni duto mitimo.

4. Onego omiyi gik moko duto ma chunyi dwaro, kendo omi yoreni duto dhi maber.

5. Eka wanago koko gi mor nikech iseloyo lweny, kendo wanabed moil kwapako Nyasaye. Onego Ruoth Nyasaye winj kwayoni duto!

Ngeche 7:1-5

1. Wuoda, par gik ma awachoni, kendo kan-gi e chunyi.

2. Tim kaka anyisi, eka inibed mangima. Rit chikena, mana kaka dirit tong wang’i.

3. Rwakgi ka tere e lith lweti, kendo ndikgi e chunyi mondo ipargi pile.

4. Kwan rieko ka gima en nyameru, kendo kwan ng’eyo tiend wach mana kaka ikwano osiepni mihero.

5. Ginimi itang’ ni mond jomoko nono. Adier, inibed mabor gi mon ma jomganga mawacho weche kisera.

Mathayo 24:29-51

29. “To gikanyono, ma masiche mag ndalogo orumoe, ‘Wang’chieng’ noimre, kendo due ok norieny. Sulue bende nopudhre, mi lwar koa e polo, nikech teko momakogi noyiengni.’

30. “Bang’ mano ranyisi ma nyiso ni Wuod Dhano chiegni duogo nonenre e kor polo, mi ogendini duto manie piny noywagre, kendo ginine Wuod Dhano kabiro e boche polo gi teko kod duong’ maler.

31. Enoor malaikane e tung’ piny gi tung’ piny, ka tung’ ywak matek, mondo ochok joge ma oseyiero, chakre e tung’ piny konchiel nyaka komachielo.

32. “Puonjreuru rieko kuom wach yadh ng’owo. Ka bedene loth, kendo ochako golo pote, to ung’eyo ni ndalo chwiri chiegni.

33. Kamano bende ka uneno ka gik moko duto ma asewachonugo timore, to ng’euru ni Wuod Dhano osekayo machiegni, kendo en mana e dhoot.

34. Awachonu adier ni gigo duto notimre kapok tieng’ ma kawuononi orumo.

35. Polo gi piny norum. Wechena to ok norum ngang’.

36. “To onge ng’ama ong’eyo chieng’ ma gigo notimre, kata sa ma ginitimree. Kata malaika mae polo, kata mana Wuowi ok ong’eyo to Wuoro kende ema ong’eyo.

37. Biro mar Wuod Dhano nobed mana kaka ndalo mag Nowa nobet,

38. nikech e ndalo mane ataro pok obiro, ji ne chiemo kendo metho, bende chuo ne kendo mon, nyiri bende ne dhi tedo, nyaka chieng’ mane Nowa odonjo e yie.

39. To ne ok ging’eyo gima timore nyaka ataro nobiro moimogi duto. Kamano e kaka biro mar Wuod Dhano bende nobedi.

40. E ndalogo, ji ariyo nobed katiyo e puodho: achiel nokaw, to machielo nowe.

41. Mon ariyo bende noyud ka rego: achiel nokaw, to machielo nowe.

42. Kuom mano, beduru motang’, nikech ok ung’eyo chieng’ ma Ruodhu biroe.

43. Ng’euru ni ka wuon ot ong’eyo sa ma jakuo biroe, to dobed korito ode, motam jakuo turo.

44. Mano omiyo un bende beduru kuikoru, nikech Wuod Dhano biro biro e sa ma ok ung’eyo ni onyalo biroe.

45. “Ere ng’ato kuomu ma chalo gi jatich mogen kendo mariek, ma ruodhe oketo mondo orit jotich wetene, kendo omigi chiemo e kinde mowinjore?

46. Jatich ma ka ruodhe oduogo, to yudo katiyo kamano, en jahawi.

47. Adier awachonu ni ruodhe nokete jarit mwandune duto.

48. To ka en jatich marach, to onyalo paro e chunye ni ruodhe biro deko kapok oduogo.

49. Omiyo onyalo chako goyo jotich wetene, kochiemo achima kendo ometho gi jomer.

50. To chieng’ moro nopo ka ruodhe oduogo dala e sa ma ok ong’eyo,

51. mi nong’ade sirunde sirunde. Kamano notere kama ywagruok gi muodo lak nitie, mondo okume kaachiel gi joma wuondore ni beyo!”

Luo Bible 2015