Beblia

Bible in one year March 26

1. “Ka jakor wach kata jalek moro ohonore e kindu, mokoro ni ranyisi kata hono moro biro timore,

2. mi ranyisi kata hono mowuoyeno otimore, kendo bang’e owachonu ni mondo udhi uluw nyiseche mamoko ma ok ung’eyo, kendo ulam,

3. to kik uwinj wachne. Ruoth Nyasaye ma Nyasachu temou mondo ong’e ane kuhere gi chunyu duto.

4. Luwuru Ruoth Nyasaye ma Nyasachu kumiye duong’ kendo kurito chikene. Winjuru gima owacho, kendo lameuru kupadoru kuome.

5. To nyaka neg jakor wachno kata jalekno, nimar osewuoyo marach kodwaro ni mondo utamru winjo wach Ruoth Nyasaye ma Nyasachu mane oresou, kagolou Misri, kama nubedoe wasumbni. Ng’atno osetemo witou mondo uwe yo mane Ruoith Nyasaye ma Nyasachu ochikou mondo uluw. Kunege kamano, eka unugol richo ma kama kuomu.

6. “Ka owadu hie kata wuodi kata nyari kata chiegi mihero, kata mana osiepni migeno osemi ling’ling’ kawachoni ni mondo idhi ilam nyiseche mamoko ma in ok ing’eyo kata ma kwereni bende ne ok ong’eyo,

7. ma gin nyiseche mag ogendini moluorou, bed ni gin mabor kata machiegni,

8. to kik iyie, kata mana winjo wachne kik iwinji, nyaka inege anega mak iweye kata ikeche kata ichwake.

9. In ema nyaka ikwong keto lweti kuome, eka bang’e jou duto nokonyi nege.

10. Unugoye gi kite nyaka otho, nimar notemo hoyou mondo uwe Ruoth Nyasaye ma Nyasachu mane ogolou Misri kuma nubedoe wasumbni.

11. Jo-Israel duto nowinj wachno, mi ginidok, maluor, kendo gima rach makamano ok nochak otimre kuomu.

12. “Kuwinjo ni joweteu ma acheje osehoyo joma odak e dala moro ma Ruoth Nyasaye ma Nyasachu biro miyou mondo udagie,

13. ka giwachonigi ni mondo gidhi gilam nyiseche mamoko ma un ok ung’eyo,

14. to nonuru wachno matut. Koyud ni gima kuero kamano osetimore kuomu adier,

15. to nyaka uneg joma odak e dalano duto kaachiel gi dhok, kendo uketh chuth gik moko duto manie dalano.

16. Nyaka uchok mwandu duto mag dalano kanyakla, kendo uket e laru manie dier dalano. Eka uwang’ dala duto, kaachioel gi gik moko duto manie iye ka misango miwang’o pep ni Ruoth Nyasaye ma Nyasachu. Dalano ok noger kendo, to nodong’ gunda nyaka chieng’.

17. To kik ukaw gimoro kata achiel kuom gik monego keth chuthgo, eka mirima mager mar Ruoth Nyasaye norum, mi notimnu ng’wono kendo nomi unya kaka nosingore ni kwereu.

18. Ruoth Nyasaye ma Nyasachu biro timo kamano kuwinjo dwonde, kendo urito chikene ma amiyou kawuono, kendo kutimo gik malongo e nyime.

Rapar Mar Chik 14:1-29

1. “Un e nyithind Ruoth Nyasaye ma Nyasachu, omiyo kik usar dendu kata kik uliel nyiem wengeu kuywago ng’at motho,

2. nikech un joma ler mowal ni Ruoth Nyasaye ma Nyasachu. Ruoth Nyasaye noyierou kuom ogendini duto manie piny mondo ubed joge owuon.

3. “Kik ucham gimoro makuero.

4. To jamni gi le munyalo chamo e magi: Dhiang’ gi rombo gi diel

5. gi nyakech gi ogunde gi ngawo gi diend thim gi puro gi omoro kod nyambaja.

6. Unyalo chamo kit jamni gi kit le duto ma ombong’gi opogore ariyo, kendo ma nyamo kambula.

7. To mak mana ni kik ucham mago ma nyamo kambula, to ombong’gi ok opogore ariyo, kata mago ma ombong’gi opogore ariyo to ok nyam kambula kaka ngamia gi apuoyo kod terere. Mago nyamo kambula to ombong’gi ok opogore, omiyo nyaka ukwan-gi ka gik makuero.

8. Mbidhi bende kik ucham, nikech kata ombong’ne opogore kamano, to ok onyam kambula omiyo en gima kuero. Kik ucham lego kata mulogi kik umulgi ka gisetho.

9. “Unyalo chamo rech duto man gi thuokgi kata man gi kagahla,

10. to kik ucham rech moro amora maonge gi gigo, nimar ka en kamano to en gima kuero.

11. “Unyalo chamo winy duto ma ok kuero,

12. to mago ma kuero ma kik ucham e magi: Ongo gi koga gi kwasi

13. gi kalamindi gi okunekune gi otenga gi winy machal kamago,

14. kod kit agak duto,

15. gi udo gi nyatawo gi okok kod kit olith duto,

16. gi tula matin gi tula maduong’ kod tula ma ite dongo,

17. gi mbusi gi achuth gi osou

18. kod nyamnaha gi kit ng’ang’a duto gi cherwa kod oliktik.

19. Gik mahuyo mang’eny kanyakla gin gik makuero, omiyo kik uchamgi.

20. To unyalo chamo gik mahuyo ma ok kuero.

21. Kik ucham gima otho kende, nimar un joma ler mowal ni Ruoth Nyasaye ma Nyasachu. Gima kamano unyalo miyo jopinje mamoko modak kodu mondo ocham, kata unyalo ng’iewe gi jopinje mamoko. “Kutedo nyadiel, to kik uolie cha min mare.

22. “Higa ka higa nyaka uket tenge achiel kuom apar mag gik moko duto monyak e puotheu, kaka cham gi divai gi mo, kaachiel gi nyithind jambu duto mokwong nywol.

23. Chamgiuru e nyim Ruoth Nyasaye ma Nyasachu kama obiro yiero mondo nyinge obedie. Kamano ubiro puonjoru luoro Ruoth Nyasaye ma Nyasachu ndalo duto.

24. To ka Ruoth Nyasaye ma Nyasachu oseguedhou gi gik mang’eny, kendo ng’atu moro odak mabor gi kama Ruoth Nyasaye biro yierono, ma ok onyal ting’o gigo motundgo kuno,

25. to onyalo lokogo pesa, moter kuno.

26. Kosetundo kuno, to onyalo ng’iewo gima ohero gi pesago, bed ni en ring dhiang’ kata ring rombo, divai kata kong’o. Unuchiem kuno gi joodu kumor e nyim Ruoth Nyasaye ma Nyasachu.

27. To dhiuru gi jo-Lawi modak kodu, ni mar dhood Lawi ok opogne piny kaka opognu.

28. “To bang’ higni adek ka higni adek, keluru achiel kuom apar mag gik monyaknu e higano, kendo uket e dhorangeyeu,

29. mondo jo-Lawi ma onge gi piny mopognigi, kod jopinje mamoko, gi nyithindo ma kiye kod mond liete modak kodu oyud chiemo moromogi. Kutimo kamano, to Nyasaye noguedh gik moko duto mutimo.

Zaburi 37:23-29

23. Ruoth Nyasaye telo ni dhano e yo monego oluw. Omako dhano matek, kendo orango kama oluwo.

24. Kata ka opodho, to ok nokungre gi ume, nimar Ruoth Nyasaye omako lwete.

25. Chakre tinna nyaka koro abedo jaduong’, pok anenoe ng’at makare ma Ruoth Nyasaye ojwang’o, kata ma nyithinde kuecho.

26. Kinde duto ong’won kendo oholo ji mabup. Mano ema omiyo nyithinde oguedhi.

27. We timo richo, mondo ibed ng’ama ber, eka inidag e piny nyaka chieng’,

28. nikech Ruoth Nyasaye ohero gima kare, kendo ok ojwang’ joma oluore, to oritogi pile. Nyikwa joricho to notiek chuth.

29. Ng’at makare nodag e piny gi kue nyaka chieng’.

Ngeche 12:15-16

15. Pile ng’at mofuwo paro ni en kare. Joma riek to chiko itgi ni puonj.

16. Ng’at mofuwo nyiso mirimbe piyopiyo. Ng’at mariek to mwonyo ayany.

Luka 2:25-52

25. E kindeno ne nitie ng’at moro Jerusalem, ma nyinge Simeon. Ne en ng’at makare, moluoro Nyasaye, kendo nogeno ni Mesia biro biro reso Israel. Roho Maler ne ni kode,

26. kendo nosenyise ni ok notho ka pok oneno Mesia ma Ruoth Nyasaye biro oro.

27. Roho Maler notero Simeon nyaka e Hekalu, kendo kane jonywol Yesu okelo nyathigi e Hekalu mondo otimne kaka chik dwaro,

28. Simeon nokawe moriwe e bade, mi odendo Nyasaye kowacho niya,

29. “A Ruoth, koro inyalo weya, an jatichni, adhi gi kue, mana kaka nisingori,

30. nikech aseneno warruok mikelo gi wang’a owuon. Iseike e nyim ogendini duto mana ka gineno.

31. En ler mabiro menyo yo ni ogendini ma ok ong’eyi,

32. kendo ma biro kelo duong’ ni jogi Israel.”

33. Wuon nyathi gi min mare ne jowuoro weche mane Simeon wacho kuom nyathigi.

34. Simeon noguedhogi, mowacho ni Maria min nyathino niya, “Nyathini oketi mondo ji mang’eny ochung’ e Israel, kendo enobed ranyisi ma ji dagi.

35. Kamano paro mopondo mae chuny ji mang’eny nofwenyre, kendo in bende inine malit, mana ka gima ligangla ochwowo chunyi.”

36. Ne nitie janabi madhako ma nyinge Ana nyar Fanuel, ma jadhood Asher. Ne en dhako moti ahinya. Ne okende ka en nyako, mi obet gi chwore kuom higni abiriyo,

37. to bang’e nobet chi liel nyaka odoko ja higni piero aboro gang’wen. Ne osiko komiyo Nyasaye duong’ e Hekalu odiechieng’ gotieno, kotueyo chiemo kendo olemo.

38. E sa mane Simeon oguedhoe jonywol Yesu, dhakono nochopo, mogoyo ni Nyasaye erokamano. Eka nowuoyo kuom nyathino ni ji duto mane ogeno ni Nyasaye biro reso Jerusalem.

39. Kane Josef kod Maria josetieko timo gik moko duto kaka chik Ruoth dwaro, ne gidok dalagi Nazareth e piny Galili.

40. Nyathino nodongo, modoko motegno. Ne en gi rieko mathoth, kendo hap Nyasaye ne ni kode.

41. Higa ka higa, jonywol Yesu ne dhi Jerusalem e Sawo mar Pasaka.

42. Kane Yesu odoko jahigni apar gariyo, ne gidhi giduto e Sawono kaka ne gijatimo.

43. To kane Sawo oserumo, ne gichako wuoth mondo gidog dala. Nyathi ma Yesu to nodong’ Jerusalem, ka jonywolne kia.

44. Ne giwuotho kuom odiechieng’ achiel, ka gigalo ni en ei oganda. Eka ne gichako manye kuom wedegi kod osiepegi,

45. to ne ok giyude. Omiyo ne gidok manye Jerusalem.

46. Bang’ ndalo adek, ne ginwang’e e Hekalu, kobet e dier jopuonj jo-Yahudi, kowinjo puonjgi, kendo openjogi weche.

47. Ji duto mane owinjo wechene ne ohum nono kuom riekone kod duokone.

48. Jonywolne nowuoro konene, mi min mare nopenje niya, “Nyathina, marang’o itimonwa kamano? Wasebet kwadwari gi wuoru, kwaparore ahinya!”

49. To Yesu nodwokogi niya, “Ere gimomiyo ne udwara? Donge ne ung’eyo ni onego abed e od Wuora?”

50. To ne ok giwinjo tiend gima ne owachonigi.

51. Eka noa kodgi, mi gidok Nazareth, kendo ne odak kodgi kuno komiyogi luor. To min mare nokano gik moko duto mosetimore e chunye.

52. Yesu nodongo, kendo riekone nomedore ahinya, ka Nyasaye gi ji medo bedo mamor kode.

Luo Bible 2015