Beblia

Bible in one year April 10

1. Ruodhi duto ma nodak yo podho chieng’ mar Jordan nowinjo humb wechego. Ne gin ruodhi mag jo-Hiti, gi mag jo-Amor, gi mag jo-Kanaan, gi mag jo-Perizi, gi mag jo-Hivi, kod mag jo-Jebus, mane gin ogendini modak e gode, gi pewe kod e dho Nam Mediterenia nyaka Lebanon yo nyandwat.

2. Kane giwinjo wechego, ne giriwore giduto, mondo giked gi Joshua kod jo-Israel.

3. To kane jo-Gibeon owinjo gima Joshua osetimo Jeriko gi Ai, ne giparo mondo giwuonde.

4. Ne gikawo gunde moti moting’o chiemo motwo kendo mopur, mi giketo e ng’e kenjegi, kaachiel gi ndede mobaw obaw mag divai.

5. Ne girwako wuoch moyiech, kod nengni moti,

6. eka ne gibiro ir Joshua e kambi Gilgal, mi giwachone kod jo-Israel niya, “Waa e piny mabor ahinya, omiyo yie watim kodu winjruok mar kue.”

7. To jo-Israel nodwoko jo-Hivigo niya, “Ang’o ma dimi watim kodu winjruok mar kue? Kamoro udak mana machiegni kodwa.”

8. Jo-Hivi to nowacho ni Joshua niya, “Wayie bedo e bwo lochni.” Eka Joshua nopenjogi nyinggi, kendo kuma giaye.

9. Ne gidwoke niya, “Ruoth, waa e piny mabor ahinya nikech humb Ruoth Nyasaye ma Nyasachu. Wasewinjo gik ma notimore e Misri,

10. kendo gima notimo ni ruodhi ariyo mag jo-Amor man yo wuok chieng’ mar Jordan, ma gin Sihon ruodh Heshbon kod Og ruodh Bashan ma nodak Ashtaroth.

11. Omiyo jodongwa duto nochikowa mondo wakaw chiemo ma dirom wuoth, kendo wabi iru mondo wanyisu ni wayie bedo e bwo lochu. Kuom mano, yie watim kodu winjruok mar kue.

12. Neuru makati mwating’ogi. Kane wachako wuoth kwabiro ka, ne pod giliet, to koro gisetwo kendo gipur.

13. Neuru ndedewagi! Kane waoloe divai, ne ginyien, to koro giseyiech. Wuochewa gi lepwa bende oseti nikech wuoth mabor.”

14. Jotelo moko mag jo-Israel nobilo chiemb jogo, mak gipenjo Ruoth Nyasaye wach.

15. Omiyo Joshua norwako jootego, motimo kodgi winjruok mar kue, kokuong’orenigi ni ok noneggi, kendo jodong Israel bende okuong’orenigi kamano.

16. Chieng’ mar adek bang’ timo kodgi winjruokno, wach nofwenyore ni kara gin manaa jogweng’ modak machiegni.

17. Mano omiyo jo-Israel nochako wuoth, kendo bang’ ndalo adek ne gichopo e mier mane jogo odakie. Miego ne gin Gibeon gi Kefira gi Beeroth kod Kiriath-jearim.

18. Jo-Israel ne ok onegogi, nikech singruok mane jodong Israel otimo kodgi e nying Ruoth Nyasaye ma Nyasach Israel, to kata kamano ji duto nong’ur gi jodonggi.

19. To jodongo duto nodwokogi niya “Ng’euru ni ne wachamo kodgi muma e nying Ruoth Nyasaye ma Nyasach Israel, omiyo koro ok wanyal mulogi.

20. Wabiro weyogi mak wanegogi, mondo muma mane wachamo kodgi kik dognwa,

21. to wabiro ketogi joma baronwa yien kendo ma umbonwa pi.” Kamano jo-Israel duto noyie gi wach mane jodonggi onyisogi.

22. Joshua noluongo jo-Gibeon, mopenjogi niya, “Ere gimomiyo ne uwuondowa kamano? Nunyisowa ni ua e piny mabor ahinya, to kara un mana jogweng’!

23. Koro unubed joma okwedi nikech wachni, kendo e kinde duto unubed wasumbwa ma baro yien kendo ma umbo pi mitiyogo e Od Nyasachwa.”

24. Ne gidwoke niya, “Ruoth, ne watimo kamano nikech nonyiswa ni Ruoth Nyasaye ma Nyasachi nochiko Musa jatichne ni mondo ochiwnu pinyni duto, kendo ni mondo uneg ji duto modakie. Kuom mano, birou osemiyo kihondko omakowa.

25. Koro wan e lweti, omiyo timnwa gima ineno ni ber.”

26. Kamano Joshua noresogi e lwet jo-Israel, mi ne ok ginegogi.

27. To chakre kanyono noketogi jobar yien kod joumb pi ni jo-Israel, kendo ni tich kendo-mar-misango mar Ruoth Nyasaye. Pod gitiyo kamano nyaka chil kawuono kamoro amora ma Ruoth Nyasaye oyiero.

Joshua 10:1-43

1. Adoni-zedek ruodh Jerusalem nowinjo ni Joshua okawo Ai, moketho chuth, kendo osetimo ni Ai gi ruodhe mana kaka notimo ni Jeriko gi ruodhe. Nowinjo bende ni jo-Gibeon osetimo winjruok mar kue gi jo-Israel, kendo odak kodgi.

2. Kuom mano, jo-Jerusalem nobwok ahinya, nimar Gibeon ne en kama duong’ machalo dala ruoth. Noduong’ moloyo Ai, kendo joge ne gin jolweny marateke.

3. Omiyo Adoni-zedek ruodh Jerusalem nooro wach ni Hoham ruodh Hebron, gi Piram ruodh Jarmuth, gi Jafia ruodh Lakish, kod Debir wuod Eglon, kowachonogi niya,

4. “Biuru ukonya monjo jo-Gibeon, nikech gisetimo winjruok mar kue gi Joshua kod jo-Israel.”

5. Kamano ruodhi mag Jerusalem gi Hebron gi Jarmuth gi Lakish kod Eglon, ma gin ruodhi abich mag jo-Amor, noriwo jolwenjgi kaachiel, mi gimonjo Gibeon.

6. To jo-Gibeon nooro wach ni Joshua e kambi Gilgal ka giwachone niya, “Bi ikonywa, kik iwewa, nikech ruodhi mag jo-Amor modak e piny gode oseriwore mondo onywaknwa. Omiyo bi mondo ireswa.”

7. Kamano Joshua nodhi gi thuondi duto, kod joge duto mag lweny.

8. Ruoth Nyasaye nowachone niya, “Kik iluorgi, nikech asechiwogi e lweti, kendo onge kata ng’at achiel ma nosiri.”

9. Eka Joshua noa Gilgal, mowuotho otieno duto nyaka Gibeon. Nomonjo jo-Amor apoya,

10. kendo Ruoth Nyasaye notaro wang’gi mokeyogi e nyim jo-Israel, mi nologi chuth. Jo-Israel nolawogi e yo maridore Beth-horon, mi ne ginegogi nyaka Azeka gi Makeda.

11. E kinde mane jo-Israel riembogi e yo maridoreno, Ruoth Nyasaye nodiro kuomgi pe madongodongo, monegogi nyaka Azeka. Peno nonego ji mang’eny moloyo mane jo-Israel onego.

12. Chieng’ mane Ruoth Nyasaye ochiwoe jo-Amor e lwet jo-Israel, Joshua nowuoyo gi Ruoth Nyasaye, kowacho e nyim jo-Israel duto kama: “A wang’chieng,’ chung’ achung’a ewi Gibeon. To in due, mondo ichung’ ewi holo Aijalon.”

13. Kamano wang’chieng’ nochung’ kendo due bende ne ok osudo nyaka jo-Israel notieko chulo kuor kuom wasikgi. Wachno ondik e Kitap Jashar. Wang’chieng’ nosiko mana e kor polo. Ne ok oruyo podho nyaka kane osebet kanyo odiechieng’ ngima.

14. Pok osebedoe odiechieng’ machal kamano, ma Ruoth Nyasaye owinjoe dwond dhano, nimar chieng’no Ruoth Nyasaye nokedo ni jo-Israel.

15. Bang’e Joshua kod jo-Israel duto nodok e kambi Gilgal.

16. Ruodhi abichgo noringo mopondo e rogo man Makeda,

17. to noyudgi, monyis Joshua ni gipondo kanyo.

18. Eka Joshua nowacho niya, “Ng’ieluru kite madongo olorgo dho rogono, kendo uket ji orite.

19. To kik udek kuno, to meduru mana lawo wasiku, kendo kik uwe gichop e miechgi mak unegogi, nimar Ruoth Nyasaye ma Nyasachu osechiwogi e lwetu.”

20. Joshua kod jo-Israel nonego jo-Amor motieko, mak mana ji manok ma nodonjo e mier mochiel gi ohinga ema notony.

21. Eka jolweny duto nodwogo ir Joshua Makeda kangima. Onge ng’ama notemo timo gimoro marach ni jo-Israel.

22. Koro Joshua nowacho ni mondo oel dho rogo, kendo okelne ruodhi abichgo.

23. Mi ne gitimo kamano. Ne gin ruodhi mag Jerusalem gi Hebron gi Jarmuth gi Lakish kod Eglon.

24. Kane gisekelogi ire, Joshua noluongo jo-Israel duto, mowacho ni jotend jolweny ma nodhi kode niya, “Suduru ka, mondo unyon ng’ut ruodhigi.” Mi ne gitimo kamano.

25. Eka Joshua nowacho ni jotelogo niya, “Kik uluor kata kik chunyu nyosre. Beduru gi chir kendo gi jing’o, nimar mano e kaka Ruoth Nyasaye notim ni wasigu duto mubiro kedogo.”

26. Bang’e Joshua nonego ruodhigo, kendo nolierogi e yien abich, mi ne giriyoe nyaka odhiambo.

27. Kane chieng’ podho, Joshua nogolo chik, mi ong’adgi oko, kendo nowitgi e rogo mane gisepondoeno. Eka nolor dho rogo gi kite madongo, ma pod ni kanyo nyaka chil kawuono.

28. Chieng’no, Joshua nokawo Makeda, monego ruodhe gi joge. Notiekogi duto, kaachiel gi gimoro amora mangima mane ni kuno. Ne ok oweyo ng’ato ka ngima kata achiel, kendo notimo ni ruodh Makeda mana kaka nosetimo ni ruodh Jeriko.

29. Bang’ mano Joshua gi jo-Israel duto noa Makeda modhi Libna. Ne gimonjo dalano,

30. mi Ruoth Nyasaye nochiwe gi ruodhe e lwetgi, kendo ne ginego joma odakie duto, kod gimoro amora mangima mane ni kuno. Ne ok giweyo kata ng’at achiel kangima, kendo ne gitimo ni ruodh dalano mana kaka ne gitimo ni ruodh Jeriko.

31. Kane Joshua kod jo-Israel duto oa kanyo, ne gidhi mi gilworo Lakish. Ne gimonje,

32. kendo Ruoth Nyasaye nochiwe e lwetgi. Ne gikawe bang’ ndalo ariyo, mi ne ginego gimoro amora mangima mane ni kuno, kaka ne gisetimo Libna.

33. E kindeno, Horam ruodh Gezer nobiro mondo ores Lakish, to Joshua nonege kaachiel gi joge, ma onge ng’ama otony.

34. Joshua kod jo-Israel duto noa Lakish modhi Eglon. Ne gilwore kendo gimonje,

35. mi gikawe mana odiechieng’no. Ne ginego ji duto modakie, kod gimoro amora mangima mane ni kuno, mana kaka ne gitimo Lakish.

36. Kane gia Eglon, Joshua kod jo-Israel duto nodhi momonjo Hebron.

37. Ne gikawe, mi ginego ruodhe kod gimoro amora mangima mane ni kuno, kaachiel gi mago mane nie mier matindo mokiewo kode. Joshua noketho dalano chuth, ma ok oweyo kata ng’at achiel kangima, mana kaka ne gitimo Eglon.

38. Bang’e Joshua gi jo-Israel duto nowichore mochomo Debir, mi gimonje.

39. Ne gikawe kaachiel gi ruodhe kod mier matindo mokiewo kode, mi ne ginego ji duto kod gimoro amora mangima mane ni kuno. Ne ok giweyo ng’ato otony kata achiel. Ne gitimo ni Debir gi ruodhe mana kaka ne gitimo ni Hebron kod Libna gi ruodhi maggi.

40. Kamano Joshua nokawo pinyno duto. Noloyo ruodhi mag piny gode, kod mag piny milambo, gi mag pewe, kod mag kuonde motimo thidhiya. Nonego ji duto, ma ok oweyo ng’ato otony kata achiel, kotieko gimoro amora ma yueyo, kaka Ruoth Nyasaye ma Nyasach Israel nosechiko.

41. Nonego jopinjego duto, chakre Kadesh-barnea nyaka Gaza, kokwako piny duto mar jo-Goshen nyaka Gibeon.

42. Joshua nomako ruodhigo duto, kaachiel gi pinjegi e lweny achielno, nimar Ruoth Nyasaye ma Nyasach Israel nokedo ni joge.

43. Bang’e Joshua gi jo-Israel duto nodok e kambi Gilgal.

Zaburi 44:1-3

1. A Nyasaye, wasewinjo gi itwa, ka kwerewa hulonwa timbe madongo mane itimo e ndalogi.

2. Ne ginyisowa kaka in iwuon ne iketogi e pinywani to iriembo ogendini mane ok ong’eyi, kendo kaka ne ikumo ogendini mamokogo, to imiyo jogi iwuon odak maber.

3. Jogigo ne ok okawo piny gi gigegi mag lweny, bende ne ok gilocho gi tekregi giwegi. To ne gilocho mana nikech tekoni maduong’, kendo nikech ne in kodgi. Mano e kaka niherogi!

Ngeche 13:24-25

24. Ka ok ichwad wuodi to kara ok ihere, ka ihere adier to nyaka ikume.

25. Joma kare nigi chiemo moromogi. Joricho to denyo ndalo duto.

Luka 10:1-24

1. Bang’ mano, Ruoth Yesu noyiero ji piero abiriyo gariyo mamoko, moorogi ariyo ariyo, mondo gitel nyime e mier duto kod kuonde duto mane en owuon odwaro dhiye.

2. Nowacho nigi niya, “Cham ochiek mathoth, to jokeyo ema nok. Emomiyo kwauru wuon puodho mondo oor jotich odhi okane cham.

3. Koro dhiuru! Aorou mana ka rombe madhi e dier ondiegi.

4. Kik uting’ ofuk pesa, kata sandug wuoth, kata wuoche, kendo kik umos ng’ato e yo kudhi.

5. Ot aota mudonje, to wachie uru ni, ‘Kue obed e odni.’

6. Ka ng’at mohero kue nie odno, to noyud kue muguedhogo odno. To ka onge ng’at mohero kue, to kue muguedhogo odno noduognu.

7. Beduru mana e odno, kendo chamuru gik ma gimiyou, nikech jatich ber gi pokne; to kik uring e udi.

8. Ka udonjo e dala moro, mi jodalano orwakou, to chamuru achama chiemo ma gimiyou.

9. Bende changuru joma tuo man kuno, kunyisogi ni Loch Nyasaye osesudo machiegni kodgi.

10. Ka udonjo e dala moro, mi jodalano odagi rwakou, to wuoguru e laru, kendo uwach niya,

11. ‘Kata mana buch dalau momoko e tiendewa wateng’onu! To ng’euru ni Loch Nyasaye osesudo machiegni.’

12. Awachonu ni Chieng’ Bura, Nyasaye nokum dalano malit moloyo kaka nokum Sodom!

13. “Yaye, Un jo-Korazin! Mano kaka unune malit! Yaye, un jo-Bethsaida! Mano kaka un bende unune malit! Dine bed ni honni mane otimnu, notim mana ni jo Turo gi jo-Sidon, to dikoro ne giseloko chunygi, mi gibet piny ka girwako piende gugru, kendo gibukore buru.

14. Chieng’ Bura, Nyasaye nokumu malit moloyo kaka nokum Turo gi Sidon!

15. To in dala mar Kapernaum, iparo ni initing’ri malo nyaka e polo koso? Ooyo, ibiro boli piny, mana e Piny Joma Otho!”

16. Eka Yesu nowacho ni jopuonjrene niya, “Ng’ama owinjou, owinjo mana an, to ng’ama odagiu, to odagi mana Jal mane oora.”

17. Jopuonjre piero abiriyo gariyogo noduogo gi mor, kawacho niya, “Ruoth, kata mana jochiende bende winjowa ka wakwerogi e nyingi!”

18. Yesu nowachonigi ni, “Ne aneno ka Satan lwar a e polo, mana ka mil polo!

19. To ng’euru ni asemiyou teko duto mag Jasigu, kendo onge gima nohinyu ngang’!

20. To kik ubed mamor ni jochiende winjou, to beduru mamor mana nikech nyingu ondiki e polo.”

21. E sa nogo, Roho Maler nomiyo Yesu odoko mamor ahinya, mi owacho niya, “A Wuora, ma Ruodh polo gi piny, agoyoni erokamano nikech isepando wechegi ni joma riek kod joma osomo, to isenyisogi mana ji ajia. Adier Wuora, osetimore kamano, nikech mano e kaka ne long’oni.

22. “Wuora oseketo gik moko duto e lweta. To onge ng’ama ong’eyo Wuowi, mak mana Wuowi kod joma Wuowi omiyo ong’eye.”

23. Eka nolokore ir jopuonjrene, mowachonigi kar kendgi ni, “Un to, un johawi kuom neno gik munenogi!

24. Awachonu ni, jonabi kod ruodhi mang’eny ne jogombo neno gik ma koro unenogi, to ne ok ginyal neno, bende ne gigombo winjo gik ma uwinjogi, to ne ok ginyal winjo.”

Luo Bible 2015