Beblia

Bible in one year April 19

1. Ruoth Nyasaye noweyo ogendini moko mondo otemgo jo-Israel mane ok okedo e ndalo mane gikawo piny Kanaan.

2. Notimo kamano ni mondo tienge jo-Isarel mabiro, kod joma ne pok opuonjore kaka ikedo, ong’e lweny.

3. Ogendinigo e magi: ruodhi abich mag jo-Filistia gi jo-Kanaan duto, gi jo-Sidon kod jo-Hivi mane odak Lebanon, chakre god Baal-hermon nyaka kama idonjogo Hamath.

4. Ruoth Nyasaye noweyo jogo mondo otemgo jo-Israel, kendo ong’ego ka ginyalo rito chike mane omiyo Musa mondo omi kweregi.

5. Omiyo jo-Israel nodak e kind jo-Kanaan gi jo-Hiti gi jo-Amon gi jo Perizi gi jo-Hivi kod jo-Jebus.

6. Ne ginywomo nyi jogo, to nyigi bende ne gimiyo yawuot jogo, kendo ne gilamo nyisechegi.

7. Wi jo-Israel nowil gi Ruoth Nyasaye ma Nyasachgi, mi timbegi nodoko maricho e nyime, ka gilamo Baal kod nyiseche ma mon miluongo ni Asher.

8. Kuom mano, Ruoth Nyasaye nokecho kodgi, mochiwogi e lwet Kushan-rishathaim ruodh Mesopotamia, mi gibedo e bwo lochne kuom higni aboro.

9. To kane jo-Israel oywak ni Ruoth Nyasaye mondo okonygi, nomiyo ng’ato moresogi. Ne en Othniel wuod Kenaz ma owadgi Kaleb matin.

10. Much Ruoth Nyasaye nobiro kuome, mi nobedo jatend jo-Israel. Nodhi kedo gi Kushan-rishathaim ma ruodh Mesopotamia, mi noloyo, nikech Ruoth Nyasaye nochiwo ruodhno e lwete.

11. Omiyo piny Israel nobet gi kue kuom higni piero ang’wen. Bang’e Othniel wuod Kenaz notho.

12. Timbe jo-Israel nochako obedo maricho kendo e nyim Ruoth Nyasaye, omiyo Ruoth Nyasaye nothuwo Eglon ruodh Moab mondo oked kodgi.

13. Eglon nochoko jo-Amon gi jo-Amalek, eka ne gidhi mi giloyo jo-Israel, kendo ne gikawo dala mar othidhe.

14. Jo-Israel nobedo e bwo loch Eglon ruodh Moab kuom higni apar gaboro.

15. To kane jo-Israel oywak ni Ruoth Nyasaye mondo okonygi, Ruoth Nyasaye nomiyogi ng’ato moresogi. Ne en Ehud wuod Gera ja-Benjamin, mane ng’at ma racham. Chieng’ moro jo-Israel noore mondo odhi ochul osuchgi ni Eglon ruodh Moab.

16. Ehud nothedho pand ligangla ma dhoge ariyo, to borne romo nus mita, mi notweye ei lawe e bathe ma korachwich.

17. Eka notero ni Eglon ruodh Moab osuru. Eglon ne ng’at machwe ahinya.

18. Kane Ehud osetieko chulo osuru, nowacho ni joma noting’o osuru mondo odhi adhiya.

19. To en owuon nowichore kar Kite Mopa man Gilgal, modok ir ruoth, kendo owachone niya, “Ruoth, an kodi gi wach maling’ling’.” Eka Ruoth nowacho ni joge mondo owuog oko, owenigi thuolo.

20. Noyudo Eglon obet e ode man ewi tado, mane ojabetie ka chieng’ kech. Ehud nosudo bute, mowachone niya, “Akeloni wach moa kuom Nyasaye.” Kane Eglon owinjo wachno, nochung’ e kome,

21. mi Ehud notero lwete ma kor acham, mowuodho ligangla e bathe ma kor achwich, mohobogo bund i Eglon.

22. Ligangla nodonjo e iye, molal kuno gi loge duto. Ehud ne ok oywaye oko to noweye, mi dhoge opowore mowuok kabang’ Eglon.

23. Eka Ehud nowuok oko mochiego dhoudi.

24. Kane osedhi, jotich Eglon nodwogo, mi giyudo ka dhoot ochiegi, to ne giparo ni ruoth odonjo e ot maiye mondo olosre.

25. To kane gineno ni koro giserito motamo wang’gi, ne gikawo kifungu mi giyawogo dhoot, kendo ne ginwang’o ruodhgi koriere piny e dier ot kotho.

26. To Ehud noseringo e sa mane jogo pod ogalore ka girito e dhoot cha. Nokadho kar Kite Mopa, motony odhi Seira.

27. Kane ochopo kuno, nogoyo tung’ e piny gode mag Efraim mondo ji oywor ni lweny. Eka notelo ni jo-Isarel, kendo ne gilor kode ka gia e piny godego.

28. Nowachonigi niya, “Luwauru, nimar Ruoth Nyasaye osechiwo wasiku ma jo-Moab e lwetu.” Omiyo ne gilor ka giluwe, kendo ne girito kuonde ming’adogo aora Jordan mondo kik jo-Moab kadhi. Ne ok giyie mondo ng’ato oidh loka.

29. Ne ginego jo-Moab ma rateke kendo ma jochir alufu apar, kendo chieng’no onge kata ng’ato achiel mane otony.

30. Kamano jo-Israel noloyo jo-Moab, mi pinyno nobedo gi kue kuom higni piero aboro.

31. Jatelo mane owuok bang’ Ehud ne en Shamgar wuod Anath. Nonego jo-Filistia mia achiel mana gi bidhi. En bende noreso jo-Israel.

Jong’ad Bura 4:1-24

1. Bang’ tho Ehud, timbe jo-Israel nochako obedo maricho e nyim Ruoth Nyasaye,

2. omiyo nochiwogi e lwet Jabin ruodh jo-Kanaan ma nodak Hazor. Jaduong’ jolweny Jabin ne nyinge Sisera. Nodak Harosheth-hahagoim,

3. kendo ne en gi geche lweny mag nyinyo mia ochiko. Nothago jo-Israel malit kuom higni piero ariyo. Omiyo jo-Israel noywak ni Ruoth Nyasaye mondo okonygi.

4. E ndalogo Debora janabi madhako ma chi Lapidoth ne jang’ad bura e Israel.

5. Nothoro bet e tiend yadh othidhe man e kind Rama gi Bethel e piny gode mag Efraim. Yadhno niluongo ni yadh Debora. Jo-Israel ne dhi ire mondo ong’adnigi bura kanyo.

6. Chieng’ moro Debora noluongo Barak wuog Abinoam ma nodak Kedesh e piny Naftali, mowachone niya, “Ruoth Nyasaye ma Nyasach Israel ochiki mondo idhi e piny Naftali gi Zebulun, ikawie ji alufu apar mondo idhigo e got Tabor.

7. Enomi Sisera jaduong’ jolweny Jabin bi e aora Kishon, kaachiel gi gechene kod ogandane, kendo nochiwgi e lweti kuno.”

8. Barak nodwoke niya, “Anyalo mana dhi ka in bende idhi koda, to ka ok idhi to an bende ok adhi.”

9. Debora nowachone niya, “Adier abiro dhi kodi, to kata kamano, lwenjni ok nokelni duong’, nimar Ruoth Nyasaye biro chiwo Sisera mana e lwet dhako.” Kamano Debora noa malo, modhi gi Barak Kedesh.

10. Barak noluongo jo-Zebulun gi jo-Naftali ire Kedesh, mi nodhi gi ji alufu apar ma nobiro. Debora bende nodhi kode.

11. Noyudo ka ng’at moro miluongo ni Heber ja-Keni oguro hembe Elonbezaananim man but Kedesh, nimar nosedar moweyo jo-Keni ma nyikwa Hobab, ma or Musa.

12. Kane onyis Sisera wach ni Barak wuod Abinoam osedhi got Tabor,

13. nochoko gechene mia ochiko mag nyinyo kod jolwenje duto. Eka ne giwuok Harosheth-mar-ogendini, mi gidhi e aora Kishon.

14. Debora nowacho ni Barak niya, “A malo! Kawuononi Ruoth Nyasaye biro keto Sisera e lweti. Ruoth Nyasaye osewuok kedo e nyimi.” Kamano Barak nobiro koa got Tabor gi ji alufu apar.

15. Ruoth Nyasaye nodhuolo Sisera gi gechene kod jolwenje e nyim Barak, mi Sisera nolor e gache moringo gi tiende.

16. Barak nolawogi nyaka Harosheth, monego jolwenygo duto, mi kargi olal ma onge kata ng’at achiel ma nodong’.

17. To Sisera noringo modhi e hemb Jael chi Heber ma ja-Keni, nikech ne nitie winjruok e kind Jabin ruodh Hazor gi jood Heber.

18. Jael nowuok moso Sisera, mowachone niya, “Donji, ruoth, donji. Kik iluor.” Omiyo nodonjo e hema, mi Jael noume gi law.

19. Sisera nokone niya, “Riyo oloya, miyae pi amodhi.” Jael noyawo dho puk chak, moolone chak omadho, bang’e noume kendo.

20. Sisera nowachone niya, “Chung’ e dho hema, mondo ka ng’ato obiro ma penjo ka ng’ato ni ka, to ikwere ni onge.”

21. To Jael chi Heber nokawo tuor kod mulo migurogo hema. Nolidho, modhi ir Sisera mane oyudo nindo ogoyo ngoga. Noguro wiye gi mulono, mi obwongone othichore. Sisera nogwecho, motho.

22. Kane Barak obiro ka dwaro Sisera, Jael nodhi romone kawacho ne niya, “Bi mondo anyisi ng’ama idwaro.” Nodhi kode, moneno Sisera koriere piny otho, ka mulo migurogo hema othir e wiye.

23. Chieng’no Ruoth Nyasaye nomiyo jo-Israel oloyo Jabin ruodh Kanaan,

24. kendo ne githung’e ahinya gi lweny, nyaka ne gitieko kare chuth.

Zaburi 48:9-14

9. A Nyasaye, waparo herani mosiko ei Hekalu mari.

10. Ji duto paki kuonde duto, kendo humbi oselak e piny duto. Irito ji adiera,

11. omiyo jo-Sayun bedo mamor. Ing’ado bura kare, omiyo ilo opong’o mier mag Juda.

12. Wuothuru e got Sayun, kendo lworeuru, kukwano kuonde moger maboyo mag ng’icho

13. Bende nonuru ohingane, kaachiel gi kuonde mochiel motegno mag siro lweny,

14. mondo chieng’ moro unyis tieng’ mabiro ni Nyasayeni en Nyasachwa mochwere, kendo obiro telonwa nyaka chieng’.

Ngeche 14:18-19

18. Joma omemore yudo gima owinjore gi fupgi. Joma riek to riekogi medore ameda.

19. Joricho nokulre ni joma kare, kendo ginikuechi e dhoutgi.

Luka 14:25-35

25. Chieng’ moro kane oyudo ji mathoth luwo bang’ Yesu, nolokore, mowachonigi niya,

26. “Ka ng’ato obiro ira, to ok ojwang’o wuon kod min, gi chiege gi nyithinde koda ka ngimane owuon, to ok onyal doko japuonjrena.

27. Bende ng’at ma ok nyal ting’o msalape owuon mi luwa, ok nyal doko japuonjrena.

28. “En ng’a kuomu, ma kadwaro gero ot, to ok kwong bed piny, mi pim nengo, mondo one ane ka en gi pesa moromo tieko tijno?

29. Ka ok otimo kamano, to ok dotiek gero odno bang’ keto mise, kendo ji duto moneno gima otimore dinyiere,

30. kawacho ni, ‘Jali nochako gedo, to otame tieko!’

31. “Koso ka ruoth moro dwaro kedo gi ruoth machielo, donge okwongo obet piny mi one ane ka ji alufu apar ma en-go onyalo chomogo jal mabiro monje gi ji alufu piero ariyo?

32. Ka oneno ni ok donyal, to ooro joote ka pod ruoth machielo ni kuma bor, mondo onyise ni odwaro mondo giwinjre e yor kue.

33. Kamano bende onge ng’ato kuomu manyalo bedo japuonjrena ka ok oweyo gige duto.

34. “Kado ber, to ka ndhathe orumo, to ere kaka dumi ochak obed gi ndhadhu kendo?

35. Kado ma kamano onge gi tich kuom loso lowo, kata loso pidh owuoyo, omiyo ipuke mana oko. Ng’at man gi it mar winjo, to mondo owinji.”

Luo Bible 2015