Beblia

Bible in one year April 29

1. Bang’e Naomi nowacho ni Ruth niya, “Nyara, onego ayudni kar dak, mondo ibed maber.

2. Ing’eyo ni Boaz mane ibet kitiyo but jotichne manyiri cha, en watwa. Awinjo ni ang’ nopiedh shairi gotienoni kar dinone.

3. Omiyo lwokri, kendo iwirri gi mo. Rwak lepi mabeyo, ilor idhi kuno. To kik iwe ong’eyi, ka pok ochiemo kendo ometho.

4. Kodhi nindo, to ng’i kama onindoe. Bang’e idonj kanyo, iel gir um gi yo ka tiende, kendo inind kanyono. Obiro wachoni gima onego itim.”

5. Ruth nodwoke ni, “Duto miwachona, abiro timo.”

6. Ruth nodhi kar dino motimo duto mane wuon odgi owachone.

7. Kane Boaz osechiemo kendo ometho morome, nodhi monindo but pidh cham. Eka Ruth nolidho, moelo gir um gi yo ka tiende, kendo onindo kanyo.

8. Odiewuor tir, gimoro nobwogo Boaz, mochiew. To ka nolokore, nopo konwang’o dhako moro konindo yo ka tiende!

9. Nopenje ni, “In ng’a?” Ruth nodwoke ni, “An Ruth, jatichni ma nyako. Yar gir um mondo iuma, nikech in e ng’at monego tera.”

10. Boaz nowachone niya, “Ruoth Nyasaye oguedhi, nyara! Gima itimo kawuononi nyiso long’o maber moloyo ma nitimo ni wuon odu, nikech ok iseluwo bang’ wuowi moro ma jachan kata ma japith.

11. Koro nyara, kik iluor. Abiro timoni duto miwacho, nikech jodalawa duto ong’eyo ni in nyako makare.

12. Adier an jadhoodu mahie, to nitie wadu moro mahie moloya.

13. Bed ka gotienoni, to kiny gokinyi, ka jalo nyalo timoni gima jadhoodu mahie onego tim, to ber, mondo otim kamano. To ka ok oyie timo kamano, to akuong’ora gi nying Ruoth Nyasaye, ni abiro timoni kamano. Koro nindi nyaka okinyi.”

14. Omiyo Ruth nonindo ka tiende nyaka huyuhuyu piny, to noa malo ka pod ng’ato ok nyal ng’eyo wadgi. Boaz nowachone niya, “Kik ng’ere ni dhako moro nende obiro kar nindo ka.”

15. Eka nomedo wachone niya, “Kel lawi mar abola, iyar.” Mi noyare, kendo Boaz noolone shairi ma dirom migerni auchiel, moyieye. Eka Ruth nodok dala.

16. Kane oduogo, wuon odgi nopenje niya, “Wach odhi nadi, nyara?” Ruth nonyise duto mane jagono otimone,

17. kendo nowachone niya, “Magi e migerni auchiel mag shairi momiya, nikech nowachona ni kik aduog ir wuon odwa gi lweta nono.”

18. Naomi nowachone niya, “Bed mos nyara nyaka ing’e gima biro wuok e wachni, nikech ng’atno ok bi ling’ mak oloso wachni kawuono.”

Ruth 4:1-22

1. Boaz nodhi e dhoranga Bethlehem, mobet piny. Bang’e noneno jadhoodgi mane osewuoyo kuome cha ka kadho kanyo, mowachone niya, “Akoni, bar ibi ku, ibed piny ka.” Kane osebiro, mobet piny,

2. Boaz noluongo jodong dala apar, mowachonogi niya, “Un beduru ka.”

3. Eka nowacho ni jal ma jadhoodgino niya, “Ing’eyo ni Naomi oseduogo koa Moab. Koro odwaro loko puoth Elimelek owadwa.

4. Omiyo naparo mondo anyisi wachno, kakwayi ni mondo ing’iewe e nyim joma obet ka, kendo e nyim jodongwa. Kiyie warogo, to ware. To ka ok idwar ware, to wachna mondo ang’e, nikech onge ng’at ma diware mak mana in, kata an.” Mi jadhoodgino nodwoke ni, “Abiro ware.”

5. Eka Boaz nowachone niya, “Chieng’ ming’iewoe puodhono kuom Naomi, to nyaka ikaw Ruth nyar Moab bende, ma chi jal ma notho mondo ichung wi ng’at mothono kuom mwandune.”

6. Jadhoodgino nodwoke niya, “Ka kamano, to ok anyal ware, nimar dipo kaketho mwanduna awuon. Ber mondo ikaw kara, iwar gino ma owinjore awar, nikech an ok anyal ware.”

7. E ndalo machon, jo-Israel ne nigi tim moro kuom wach waro gimoro kata loko gimoro. Ng’ato ne lonyo wuore, kendo miyo wadgi, mondo wachno obed gi teko. Mano e kaka jo-Israel ne miyo wach bedo gi teko e nyim joneno.

8. Omiyo ng’at cha nolonyo wuor, kawacho ni Boaz niya, “Ero, in ema mondo ing’iew puodhono.”

9. Eka Boaz nowacho ni jodongo kod ji duto niya, “Un e joneno kawuono, kang’iewo kuom Naomi gik moko duto mane mag Elimelek gi mag Kilion kod mag Malon.

10. Ruth nyar Moab, ma chi Malon bende akawo obed chiega, mondo achung wi jal mothono kuom mwandune, mondo kik nyinge lal kuom owetene, kata kuom dhoodgi.”

11. Eka jodongo, kaachiel gi ji duto mane nie dhorangach, nowacho niya, “Wan joneno. Ruoth Nyasaye mondo oguedh dhako ma donjo e odino, obed machal gi Rahel kod Lea, mon ariyo ma nogero dhood Israel. Bende in mondo iyud duong’ e Efratha, kendo ibed gi pak mathoth e Bethlehem.

12. Nyithindo ma Ruoth Nyasaye omiyi gi dhani mondo omi dhoodi obed machal gi dhood Perez, wuod Tamar chi Juda.”

13. Kamano Boaz nokawo Ruth, mobedo chiege, mi Ruoth Nyasaye noguedhe, momako ich, kendo nonywolo wuowi.

14. Bang’e mon nowacho ni Naomi niya, “Opak Ruoth Nyasaye tinende, ma ok oweyi nono. Koro in gi nyakwari. Nying nyathi mondo obed gi huma maduong’ e Israel.

15. Nobedni ng’ama duogo chunyi, kendo ka ng’ama riti e tiyoni, nikech chi wuodi moherino, kendo moloyoni yawuowi abiriyo, ema osenywolo nyathini.”

16. Naomi nokawo nyathi, moriwo e kore, kendo nobedo japite.

17. Mon wetene nochako nyathi nying ni Obed, kendo ne giwacho niya, “Osenywol ni Naomi nyathi.” En e wuon Jesse, ma wuon Daudi.

18. Magi e tienge mag Perez: Perez nonywolo Hezron,

19. to Hezron nonywolo Ram. Ram nonywolo Aminadab,

20. to Aminadab nonywolo Nashon. Nashon nonywolo Salmon,

21. to Salmon nonywolo Boaz. Boaz nonywolo Obed,

22. to Obed nonywolo Jesse. To Jesse nonywolo Daudi.

Zaburi 52:6-9

6. Joma oluoro Nyasaye none gima otimoreni, mi ginibed maluor. Gininyieri, ka giwacho niya,

7. “Neyeuru ng’at mane ok ogeno kuom Nyasaye, to ogeno mana kuom mwandune mathoth, kendo pakore gi richone!”

8. To an, achalo gi yadh zeituni, ma dongo maber e bath od Nyasaye, nimar ageno kuom hera mosiko mar Nyasaye nyaka chieng’.

9. A Nyasaye, abiro goyoni erokamano pile kuom gik ma isetimo, kendo ka an e kanyakla mar joma oheri, to anahul ni iber.

Ngeche 15:6-7

6. Joma kare nigi mwandu mang’eny e miechgi, to gik ma joricho yudo kelonigi mana chandruok.

7. Lew ng’at mariek lando rieko. Ng’at mofuwo to wechene obam.

Luka 20:1-26

1. Chieng’ moro kane Yesu puonjo ji e Hekalu, kendo lando Wach Maber, jodolo madongo gi jopuonj Chik, kaachiel gi jodong oganda, ne jobiro ire,

2. mopenje niya, “Nyiswa ane! Ere teko ma in-go, momiyo itimo gik ma kamagi? Koso ng’ama omiyi teko mar timogi?”

3. Yesu nodwokogi niya, “Weuru ane bende apenjue gimoro achiel. Nyisauru ane!

4. Teko ma Johana batisogo ji noa kuom Nyasaye koso kuom dhano?”

5. Eka jogo nochako wuoyo e kindgi giwegi, ka gipenjore ni, “Ere kaka dwadwoke? Ka wawacho ni teko Johana noa kuom Nyasaye, to obiro penjowa gima omiyo ne ok wayie wach Johana.

6. To ka wawacho ni noa kuom dhano, to ji duto man kagi biro chieliwa gi kite, nikech giyie ni Johana ne janabi.”

7. Kuom mano ne gidwoko ni ok ging’eyo kuma ne teko Johana oaye.

8. Eka Yesu nowachonigi ni, “Ka kamano, to an bende ok anyal nyisou kuma ayudoe teko ma atimogo gigi.”

9. Bang’e Yesu nogoyo ni ji ngero niya, “Ng’at moro noloso puoth mzabibu. Eka ne oweye e lwet jopur, mi owuok odhi wuoth e piny moro mabor kuom ndalo mang’eny.

10. To kane kinde ma olemo ochiekie ochopo, ne ooro jatichme ir jopurgo mondo oomne pokne kuom gik monyak e puodho. To jopurgo nogoyo ng’atno, moriembo gi lwete nono.

11. Kuom mano wuon puodho nochako ooro jatich machielo, to en bende jogo ne ogoye, kendo otimone marach, mi oriembe nono.

12. Eka nooro jatich mar adek, to mano bende ne gigoyo, mi giriembo.

13. Bang’ mano, wuon puodho nopenjore kawacho ni, ‘Koro ere gima koro datim? Ee, ang’eyo gima abiro timo, abiro oro wuoda awuon, nimar kamoro dipo ka gimiye luor.’

14. To kane jopurgo oneno wuodeno, ne giwacho e kindgi giwegi niya, ‘Ma eri e wuod wuon lowo. Wanegeuru mondo lopeni odong’nwa!’

15. Omiyo ne gidhire oko e tok puodho mi ginege.” Eka Yesu nopenjogi ni, “Koro uparo ni wuon puodho biro timo jopurgo nadi?

16. Donge obiro biro, mi oneg jogo, kendo okaw puodho mi omi jopur moko nono?” To kane ji owinjo kamano, ne giwacho ni, “Ngang’! Mano ok nyalre!”

17. Yesu norangogi, mopenjogi niya, “To kara, ere tiend weche mondiki e Muma ma wacho ni, Kidi mane jogedo odagi, ema koro osedoko kidi motegno moriwo kor ot’?

18. Ng’ato ang’ata mopodho kuom kidino notur matindotindo, to ka kidino ema opodho kuom ng’ato to norege ka buru!”

19. Jopuonj Chik kod jodolo madongo notemo mondo omak Yesu gikanyono, nikech ne ging’eyo ni osegoyo ngerono mana kuomgi, to kata kamano ne giluoro ji mane ni kanyo.

20. Omiyo ne girito mondo giyud thuolo maber. Ne gioro jombetre mane owuondore ni joma kare, mondo omake kowinjo kowacho gimoro marach, kendo okete e lwet ruoth.

21. Jombetrego nowacho ni Yesu niya, “Japuonj, wang’eyo ni gima iwacho kendo ipuonjo en adier. Bende wang’eyo ni ok iluoro wang’ ng’ato, kata dabed ni en ng’ama nadi, to ipuonjo yor Nyasaye gi adiera.

22. To koro, nyiswa ane ka Chikwa oyie mondo wagol osuru ni Kaisar, kata kik wagol?”

23. To Yesu noneno kaka gichikone obadho. Omiyo nowacho nigi ni,

24. “Nyisauru ane siling’ mondo ane.” Kane gisekelone siling’, nopenjogi niya, “Kidoni gi nying’ man kuom siling’ni gin mag ng’a?” Ne gidwoke ni, “Gin mag Kaisar.”

25. Eka Yesu nowachonigi niya, “Kara chiwuru ni Kaisar gi Kaisar to gi Nyasaye chiwuru ni Nyasaye!”

26. Kamano ne ok ginyal make kata gi wach achiel e nyim ji kanyo, omiyo ne giling’ thi, ka giwuoro dwokone!

Luo Bible 2015