Beblia

Bible in one year April 5

1. Kane Musa ng’at Nyasaye chiegni tho, noguedho jo-Israel, kowacho kama:

2. “Ruoth Nyasaye nobiro koa Sinai. Ne orienynigi gie Seir, kendo gie got Paran. Nobiro ka ji maler gana gi gana oruowo e bathe ma korachwich.

3. Adier, ohero joge maler, kendo oguedhogi. Giluwe kamoro amora modhiye, kendo giwinjo chikene

4. mane Musa omiyowa, mondo obed mwandu mar oganda joka Jakobo.

5. Ruoth Nyasaye nodoko Ruodh Israel ma bende iluongo ni jo-Jeshurum, kane jodong dhoutgi ochokore kaachiel.”

6. Kuom jo-Reuben, Musa nowachoe niya, “Jo-Reuben mondo obed mangima kendo kik githo, to kata kamano, onego gibed manok.”

7. Kuom jo-Juda to nowuoyoe kama, “A Ruoth Nyasaye, winj ywak jo-Juda mondo idwokgi kuom ogandagi. Bednigi tekregi ma gisirorego kendo ikonygi kuom wasikgi.”

8. Jo-Lawi to nowuoyo kuomgi niya, “A Ruoth Nyasaye, nimiyo nyikwa Lawi ombulu miluongo ni Urim gi Thumim mondo ging’ego dwaroni, nikech gin joma tiyoni gi adiera. Ne itemogi Masa, kendo e sokni mag Meriba mi inwang’o ni gin joma inyalo geno.

9. Hera mane giherigo oloyo hera mane giherogo wuonegi gi minegi kod owetegi, kata nyithindgi, nikech ne giluwo mana chikeni, mi girito singruok mari maber.

10. Gipuonjo joka Jakobo wecheni. Ee, gipuonjo jo-Israel chikeni. Giwang’oni misengni, madum tik mamit, kendo gitimoni misengni miwang’o pep e kendoni mar misango.

11. A Ruoth Nyasaye, guedh riekogi duto, kendo iyie gi tichgi. Tiek wasikgi duto, mondo wasikgigo kik chak bed gi teko.”

12. To kuom jo-Benjamin nowuoyoe kama, “Joma Ruoth Nyasaye ohero odak gi kue; Nyasaye Maduong Moloyo ritogi seche duto, kendo gidak e godene.”

13. Kuom joka Josef to nowachoe niya, “Ruoth Nyasaye onego guedh lopgi, gi chiwo maber moa e polo malo, kaachiel gi pi manie bwo piny,

14. gi olembe mabeyo ma chieng’ onyago, kod olembe mabeyo manyak due ka due,

15. gi gik mabeyo mag gode machon mochwere,

16. kaachiel gi gik mabeyo mag piny, kod gik moko duto manie iye, gi ng’wono mar Jal modak e Bungu Maliel. Guethgi duto onego bed ewi joka Josef, jal mane oyier kuom owetene.

17. Dhoode nochal gi nyarwath makayo, ma tungene chalo gi tung jowi, ma obiro chwowogo ogendini, moriembgi nyaka tung piny gi tung’ piny. Tungego gin gi ji tara gi tara ma jo-Efraim, kod ji gana gi gana ma jo-Manase.”

18. Jo-Zebulun to nowuoyo kuomgi kama, “Un jo-Zebulun, beduru mamor e wuodheu, kendo un jo-Isakar, beduru mamor e hembeu.

19. Dhoudi ariyogo biro luongo ogendini e got, kama gitimoe misengni makare, nimar gibiro yudo mwandu mogundho e nembe, kendo gik mabeyo mopondo e dhonam.”

20. Kuom jo-Gad to nowuoyoe niya, “Oguedh jalo mayaro tong’ jo-Gad. Dhood Gad chalo gi sibuor madhako, mogwom piny, ka yiecho bat gi wi gima omako.

21. Ne giyiero piny koma ber moloyo, nikech gin ema nopognigi migap jatelo. Ne gibiro ir jotend ji, kendo ne gitimo kaka Ruoth Nyasaye dwaro, ka girito chike mane Ruoth Nyasaye omiyo jo-Israel.”

22. Kuom jo-Dan nowachoe kama, “Dhood Dan chalo gi nyathi sibuor, machikore koa Bashan.”

23. Kuom jo-Naftali to nowuoyoe niya, “Dhood Naftali nigi gik moko duto modwaro, kendo en gi gueth mogundho, moa kuom Ruoth Nyasaye. Bende opogne nam Galili kod dho wedhe ma milambo.”

24. To kuom jo-Asher nowachoe kama, “Dhood Asher mondo oyud gueth moloyo dhout owetene mamoko. Dhout owetene mondo oher dhoode, kendo mondo dhoode odag maber.

25. Lodi mag dhorangeyene obed mag chuma gi mag mula, kendo tekone omedre ndalo duto.

26. “Onge nyasaye moro machal gi Nyasach joka Jeshurun maringo e kor polo e duong’ne maler mondo okonyu.

27. Nyasaye mochwere ma nyaka chieng’ en kar daku, kendo bedene mochwere ema konyou. Noriembonu wasigu, mi ogolo chik mondo oneggi.

28. Kamano jo-israel odak gi kue. Adier, nyikwa Jakobo odak maonge ng’ama thagogi e piny machiego cham gi divai, kama tho moa e polo tonie maber.

29. Ere joma mor ka un, un jo-Israel ma Ruoth Nyasaye owaro! Ruoth Nyasaye e kuot mogeng’ou, kendo en e liganglau mar duong’. Wasiku mondo obolrenu, kendo unyon hembko maggi gi tiendu.”

Rapar Mar Chik 34:1-12

1. Musa nowuok oa e paw Moab moidho got Nebo nyaka wi Pisga yo wuokchieng’ mar Jeriko, mi Ruoth Nyasaye nonyise piny Kanaan duto, chakre Gilead nyaka Dan,

2. gi piny Naftali duto, kod piny Efraim gi Manase kaachiel gi piny Juda duto nyaka nam Mediterenia man yo podho chieng’,

3. gi piny man yo milambo, kod paw holo man yo Jeriko miluongo ni Dala Othidhe, nyaka Zoar.

4. Ruoth Nyasaye nowachone niya, “Ma e piny mane asingora ni Ibrahim gi Isaka kod Jakobo ni nami nyikwagi. Asenyisigo mondo inene gi wang’i, to kata kamano, ok niidh loka, midonjie.”

5. Kamano, Musa jatich Ruoth Nyasaye notho e piny Moab kuno, mana kaka Ruoth Nyasaye nosewacho,

6. mi noyike e holo momanyore gi Beth-peor e piny Moab. To onge ng’ama ong’eyo liende nyaka chil kawuono.

7. Musa ne otho ka jahigni mia achiel gi piero ariyo, to ne pod en ng’at matek ma wang’e bith.

8. Jo Israel noywage e paw Moab kuom ndalo piero adek, nyaka ndalo miywagego norumo.

9. Joshua wuod Nun nomi rieko mathoth, nikech Musa noseyieyo lwete kuome, mi jo-Israel nowinje, motimo gik mane Ruoth Nyasaye ochiko Musa.

10. Nyaka koroni janabi moro machal gi Musa, mane Ruoth Nyasaye romogo wang’ gi wang’, pok owuok e Israel.

11. Paruru ranyisi gi honni duto mane Ruoth Nyasaye ooro Musa mondo odhi otim ni Farao gi joge kod piny Misri duto,

12. kendo paruru timbe madongo kendo malich mane Musa otimo, ka jo-Israel neno.

Zaburi 40:13-17

13. A Ruoth Nyasaye, yie iresa! Reti piyo mondo ikonya, yaye Ruoth Nyasaye.

14. We joma dwaro ketho ngimana oyud wichkuot giduto, mi ging’eng nono. Bende jogo ma giyo kamor ni ahinyora onego dwok chien, kendo wigi okuot.

15. Ee, joma goyona siboigo onego odhier nono kologi.

16. To ji duto mabiro iri obed mamor kendo mail. Ji duto mohero warruok maa kuomi onego wach pile niya, “Mano kaka Ruoth Nyasaye duong’!”

17. An jachan, kendo ok anyal yudo kaka akonyora, to yie ipara in Ruoth Nyasaye. In e jakonyna kendo jawarna. Kik ideki, yaye Nyasacha!

Ngeche 13:13-14

13. Kitamori winjo puonj, to idwaro mana chandruok, to kiwinjo gima iwachoni, to iyudo pok maber.

14. Puonj mar ng’at mariek en soko mar ngima, ma reso ng’ato e tho.

Luka 8:1-25

1. Bang’ kinde moko, Yesu nowuotho e mier madongo kod matindo duto, kalando Wach Maber mar Loch Nyasaye. Jopuonjrene apar gariyo bende ne jodhi kode,

2. kaachiel gi mon moko mane osegolonigi jochiende maricho, kendo ochango tuochegi, kaka Maria, mane iluongo ni Magdala, mane osegolone jochiende abiriyo,

3. gi Joana chi Chuza, mane jatelo e od Herode, gi Susana, kaachiel gi mon mamoko mang’eny. Mon-go ne konyo Yesu kod jopuonjrene mana gi gigi giwegi.

4. Ji nosiko ka biro ir Yesu, kaa e mier duto, kendo chieng’ moro kane oganda maduong’ osechokore, Yesu nogoyonigi ngero niya,

5. “Ng’at moro ne odhi chuoyo, kendo kane oyudo ochuoyo, kodhi moko nolwar e wang’yo, mi ji nonyonogi, kendo winy nochamogi.

6. To kodhi moko nolwar kama otimo lwanda, kendo kane gisetwi, ne giwang’, nikech lowono ne ok ng’ich.

7. Kodhi moko to ne olwar e kind kudho, kendo kudho nodongo e kindgi, mothung’ogi.

8. Kodhi moko to nolwar e lowo maber, mi otwi, kendo odongo, bang’e moro ka moro nonyago kodhi mia achiel.” Eka Yesu notieko kawacho ni, “Ng’at man gi it mar winjo, to mondo owinji!”

9. Jopuonjre Yesu nopenje mondo onyisgi tiend ngerono,

10. mi nodwokogi niya, “Un osemiu ng’eyo weche mopondo mag Loch Nyasaye. Ji mamoko to ipuonjo mana e yor ngeche, kaka muma wacho ni, ‘Kata da ging’ichi manadi, to ok ginyal ng’eyo, bende kata da giwinji, to wach ok nyal donjonigi.’ ”

11. Eka nowacho ni jopuonjrene niya, “Tiend ngerono e ma: Kodhi en wach Nyasaye.

12. Omiyo kodhi mane olwar e wang’yo ochung’ kar joma winjo wachno, to Satan biro, kendo gole oko e chunygi, mondo kik gibed gi yie, mi wargi.

13. To kodhi mane olwar kama otimo lwanda ochung’ kar jogo ma winjo wachno, kendo yiego gi mor. To wachno ok mok e chunygi, to gibedo gi yie mana kuom ndalo matin kende, to ka tem obiro, to gipodho.

14. Kodhi mane olwar e kind kudho, to gin jogo, ma winjo wachno, to parruok, gi mwandu, kod mor mar piny, thung’ogi, kendo ok ginyag gimoro maber.

15. To kodhi mane olwar e lowo maber, gin joma winjo wachno gi chuny makare kendo malong’o, kendo gimake matek, nyaka chop ginyagi.

16. “Onge ng’at manyalo moko taya, to aye umo gi atonga, kata keto e bwo kitanda. To okete mana e rachungi taya, mondo orieny ni joma donjo e ot.

17. Onge gima opandi ma ok nong’ere kendo onge gimoro moum, ma ok nofwenyre ratiro.

18. Emomiyo chikuru itu maber mondo uwinj gima iwachonu, nimar ng’at man-go ema nomedi, to ng’at maongego, noma kata mana mano matin moparo ni en-go!”

19. Min Yesu kod owetene nobiro ire, to ne ok ginyal chopo bute nikech ji ne ng’eny ahinya.

20. Eka ng’at moro nowacho ni Yesu niya, “Meru kod oweteni ochung’ oko, dwaro neni.”

21. To Yesu nodwokogi ni, “Joma winjo wach Nyasaye kendo rito e mama kendo e owetena.”

22. Chieng’ moro Yesu nodonje e yie gi jopuonjrene, mowachonigi niya, “Wang’aduru nam mondo wadhi loka cha.” Kuom mano ne gisiayo yie.

23. To kane gikwang’, nindo notero Yesu. Eka ahiti mang’ongo notugore e nam, mi pi nochako pong’o yie kendo koro ne gichiegni tho.

24. Omiyo ne gisudo ir Yesu mi gichiewe, ka giwachone niya, “Ruoth! Ruoth! Watho!” Yesu noa malo, mokwero yamo gi apaka mager mi oling’, kendo nam nokue.

25. Bang’ mano, nopenjo jopuonjrene niya, “Ere yie ma un-go?” To ne giluor, kendo ne giwuoro, mi gipenjore niya, “Ma en ng’ama nadi, makwero kata mana yamo gi apaka, to winje awinjani!”

Luo Bible 2015