Beblia

Bible in one year April 9

1. To jo-Israel ne ok orito chik mane Nyasaye ogolo ni mondo oketh gik moko duto. Akan wuod Karmi ma wuod Zabdi ma wuod Zera ma ja-Juda nokawo gik mokwer mi Ruoth Nyasaye nokecho gi jo-Israel.

2. Kane gin Jeriko, Joshua noseoro jomoko mondo odhi Ai, dala man machiegni gi Bethaven, yo wuokchieng’ mar Bethel, mondo girang kaka piny chalo. Mi jogo notimo kamano.

3. Kane giduogo Jeriko, ne giwacho ni Joshua niya, “Jolweny duto ok onego dhi Ai to or mana ji alufu adek kata ariyo kende ema mondo odhi omonje. Kik imi jolweny duto sandre gi idho malo kuro, nikech joma odak kuno nok.”

4. Kamano ji ma dirom alufu adek nodhi Ai, to jo-Ai noriembogi,

5. kendo nonego ji alufu piero adek gauchiel kuomgi. Jo-Ai nolawogi chakre rangagi nyaka Shebarim, monegogi kama yo ridoree. Gikanyono chir mane jo-Israel nigo nolalnigi ka yamo.

6. Joshua gi jodong Israel noyiecho lepgi, kendo noolo buru e wigi. Ne giriere piny auma e nyim Sanduk mar Ruoth Nyasaye, mi giriyo kanyo nyaka odhiambo.

7. Joshua nowacho niya, “A Ruoth Nyasaye, ere gimomiyo isekelo jogi loka Jordan mana ni mondo ichiwgi e lwet jo-Amor, kendo itiekgi? Mad ne wasik loka cha!

8. A Ruoth Nyasaye ang’o ma dawachi ka koro wasigu oseriembo jo-Israel?

9. Kapo ni jo-Kanaan kod jopinyno duto owinjo wachni, to gibiro nur kuomwa, kendo yweyowa ka yuech. To koro ang’o ma nitim mondo ires nyingi maduong’ni?”

10. Ruoth Nyasaye nodwoko Joshua niya, “A malo! Ang’o momiyo inindo auma kamano?

11. Jo-Israel oseketho! Ok giserito chik mane amiyogi, to gisekwalo gik mokwer, kendo giriwogi gi mekgi.

12. Mano emomiyo ok ginyal siro wasikgi, to giringo nimar gin bende koro okwedgi. Ka ok giwang’o gimoro amora mokwer ma gisekawo, to ok anabed kodgi.

13. “A malo! Luong ji duto, kendo chikgi mondo gipwodhre ka giikore ni gima kiny notimre. Nyisgi ni Ruoth Nyasaye ma Nyasach Israel owacho ni gisekawo gik mokwer, omiyo kapok gigolo gigo kuomgi, to ok ginyal siro wasikgi.

14. Kiny gokinyi giniwuog oko libamba ka libamba, kendo libamba ma Ruoth Nyasaye okwanyo nowuog oko dhoot ka dhoot. To dhoot ma Ruoth Nyasaye okwanyo nowuog oko anywola ka anywola.

15. Eka anywola ma Ruoth Nyasaye okwanyo nowuog oko ng’ato ka ng’ato. To ng’at ma ombulu nonyis ni nokawo gik mokwer, nowang’ gi joge kaachiel gi mwandune duto, nikech osetimo gima nono, kendo oseketho chik mane Ruoth Nyasaye omiyo joge Israel.”

16. Joshua nochiew gokinyi mang’ich, moluongo jo-Israel oko libamba ka libamba, to libamba mar jo-Juda ema nokwany.

17. To noluongo dhout Juda, joka Zera ema nokwany. Kuom joka Zera, anywola mar Zabdi ema nokwany.

18. Kane ogolo ng’ato ka ng’ato kuom joka Zabdi, to Akan wuod Karmi, ma wuod Zabdi, ma wuod Zera, ema nokwany.

19. Eka Joshua nowacho ni Akan niya, “Wuoda, mi Ruoth Nyasaye ma Nyasach Israel duong’, kendo hulne richoni. Nyisa gima isetimo, ma ok ipanda kata achiel.”

20. Akan nodwoke niya, “Adier aseketho e nyim Ruoth Nyasaye ma Nyasach Israel,

21. nikech kane aneno law maber molos Shinar, gi fedha ma pekne oromo kilo ariyo, kod dhahabu ma pekne oromo nus kilo kuom mwandu Jeriko, gombo nomaka, makawogi. Nakunyogi e hemba ka fedha ema akuongo keto e bur.”

22. Joshua nooro joote, modhi e hema piyopiyo. Ne giyudo gigo koyiki e lowo mana kaka Akan nowacho.

23. Ne gigologi, kendo gikelogi ir Joshua kod jo-Israel duto, mi giyarogi e nyim Ruoth Nyasaye.

24. Eka Joshua kod jo-Israel duto nokawo Akan nyakwar Zera, kaachiel gi fedha kod law kod dhahabu, gi yawuote gi nyige gi dhoge gi kenjene gi rombene gi hembe kod mwandune duto, moterogi e holo mar Akor.

25. Joshua nowacho ni Akan niya, “Isekelonwa masira marach! Koro in bende Ruoth Nyasaye biro keloni masira!” Eka jo-Israel duto nogoyo Akan kod joge gi kite nyaka githo, mi giwang’ogi kaachiel gi mwandune.

26. Ne gidhuro kuome kite mogundho, ma pod ni kanyo nyaka chil kawuono. Mano emomiyo pod iluongo kanyo ni Holo mar Akor, (tiende ni, holo mar masira). Eka bang’e mirimb Ruoth Nyasaye norumo.

Joshua 8:1-35

1. Ruoth Nyasaye nowacho ni Joshua niya, “Kik iluor, kendo kik chunyi nyosre. Kaw jolweny duto, kendo dhi imonj Ai. Anachiw ruodh Ai gi dalane gi joge kod pinye e lweti,

2. kendo unutim ni Ai kod ruodhe mana kaka nutimo ni Jeriko kod ruodhe. To wang’ni unyalo kawo dhok kod gik moko muyudo kuno. Koro or jolweny moko mondo odhi opond yo podho chieng’ mar dalano.”

3. Omiyo Joshua kod jolweny duto noikore mondo omonj Ai. Noyiero jolweny alufu piero adek, moorogi gotieno, kowachonigi niya,

4. “Ponduru yo podho chieng’ mar dalano, kubet machiegni kode, kendo kuikore.

5. An to anamonje gi jolweny modong’, to ka jogo nowuog mondo orad kodwa kaka ne gitimo chieng’ mokwongo, to wanaring e nyimgi.

6. Kuom mano ginipar ni waringogi kaka ne watimo mokwongo, mi ginilawwa nyaka chop waseywayogi mabor gi dalagi.

7. Kwaringo kamano, eka uwuogi kama upondoe, kendo ukaw dalagino, nikech Ruoth Nyasaye ma Nyasachu biro chiwe e lwetu,

8. kendo osechiko ni kusekawe to uwang’e. Koro timuru kamano.”

9. Eka Joshua noorogi yo podho chieng’ mar Ai, mondo gipond e kind dalano kod Bethel. Joshua nonindo kanyachiel gi jolweny,

10. to gokinyi mang’ich nochiew, mochokogi, kendo ne gidhi Ai, kotelo gi jodong Israel,

11. nyaka ne gichopo machiegni gi dalano. Ne gijot yo nyandwat mar Ai, to holo ne ni e kindgi gi dalano.

12. To Joshua noseoro ji maromo alufu abich yo podho chieng mar Ai mondo opond e kind dalano kod Bethel.

13. Kamano thoth jolweny nojot yo nyandwat mar Ai, to joma nopondo ne ni yo podho chieng’. Joshua to nonindo e holo.

14. Kane ruodh Ai oneno ni jo-Israel nowuok mapiyo gi joge duto mondo oked kodgi. Ne ok ong’eyo ni jolweny moko osepondone yo podho chieng’ mar dala.

15. Joshua kod jo-Israel nowuondore ni ologi, mi giringo ka gichomo thim.

16. Eka noluong jo-Ai duto mane ni e dala mondo olawgi. To kane gilawo Joshua kamano, ne gichwalora mabor gi dalagi.

17. Onge ng’ato kata achiel ma nodong’ e Ai, nikech ne gisewuok giduto mondo gilaw jo-Israel. Kuom mano ne giweyo dala nono.

18. Eka Ruoth Nyasaye nowacho ni Joshua niya, “Siem yo Ai gi tong’i, nimar abiro chiwe e lweti.” Mi Joshua notimo kamano.

19. Kane jo-Israel mopondo oneno ranyisi ma Joshua otimono, ne giwuok. Ne giringo piyopiyo, mi gidonjo e dala, kendo kane gisekawe, ne giwang’e gi kanyono.

20. Kane jo-Ai ogoyo machiemo, ne gineno iro kadum e dala kochomo polo. Onge kuma ne ginyalo tonyie, nikech jo-Israel ma noyudo wuondore ni ringo kochomo thim, nolokore gi joma ne lawogi.

21. Joshua gi jo-Israel duto nolokore gi jo-Ai nikech ne gineno ka joma nopondo koro osekawo dala, mi owang’o.

22. Jo-Ai mane owuok mondo orad gi jo-Israel koro noket diere, mi jo-Israel nonegogi duto, maonge modong’ kata motony,

23. mak mana ruodh Ai ema ne gimako kangima, mi gitero ir Joshua.

24. Kane jo-Israel osenego jo-Ai duto mane ni e pap, kod mane ni e thim kuma ne giselawogie, ne gidok Ai, mi ginego ji duto ma nodong’ kuno.

25. Chieng’no noneg jo-Ai duto, ma onge ng’ama dichwo kata madhako ma nodong’. Ne giromo ji alufu apar gariyo.

26. Joshua ne ok oweyo siemo Ai gi tong’ nyaka noneg ji duto ma nodak kuno.

27. Jo-Israel nokawo mana dhok gi mwandu mane giyudo, kaluwore gi wach mane Ruoth Nyasaye owacho ni Joshua.

28. Kamano Joshua nowang’o Ai chuth, moweye kokethore, ma onge ji modakie nyaka chil kawuono.

29. Noliero ruodh Ai e yath, moweye kanyo nyaka odhiambo. To ka chieng’ podho, nogolo chik mondo ong’ade oko e yath. Ne giwito ringre e dhoranga dala, mi gidhuro kuome kite mogundho, ma pod ni kanyo nyaka chil kawuono.

30. Joshua nogero kendo-mar-misango ni Ruoth Nyasaye ma Nyasach Israel e got Ebal.

31. Nogere gi kite ma ok opa gi gir nyinyo, kaluwore gi chik mane Musa jatich Ruoth Nyasaye omiyo jo-Israel, kaka ondik e kitap Chik mar Musa. Ne gitimo ni Ruoth Nyasaye misengni miwang’o pep kod mag sawo e kendono.

32. Joshua nondiko chik Musa e kitego e nyim jo-Israel.

33. Mi jo-Israel duto gi joma nobiro kodgi, kaachiel gi jodongo gi jotelo kod jong’ad bura, nochung’ e dir Sandug Muma mar Ruoth Nyasaye koni gi koni, ka gimanyore gi jo-Lawi ma jodolo ma noting’e. Jo-Israel moko nochung’ kochomo got Gerazim, to modong’ nochomo got Ebal, mondo oguedhgi kaka Musa jatich Ruoth Nyasaye nosechiko chon.

34. Eka Joshua nosomo weche duto mag gueth kod mag kuong’ mana kaka ondik e Kitap Chik.

35. Ne ok oweyo kata wach achiel kuom weche mane Musa osechiko, to nosomogi duto gi dwol maduong’ ni jo-Israel duto, machwo gi mamon gi joma tindo, kod joma nobiro kodgi.

Zaburi 43:1-5

1. A Ruoth Nyasaye, ng’ad bura ma nyiso ni aonge ketho, kendo chwaka mondo joma ok ong’eyi kik loya. Yie igola e lwet joricho ma jomriambo.

2. In e Nyasaye ma lwandana, to ere gima omiyo koro ijwang’a? Koso ang’o momiyo onego abed kakuyo mana nikech wasika?

3. Or ler kod adiera mari mondo otelna, kendo odwoka Sayun, godi maler, e Hekalu mari ma idakie.

4. Bang’e anadhi e kendoni mar misango, A Nyasaye. Anapaki gi thum, yaye Nyasaye ma Nyasacha.

5. Ere gima omiyo chunya lit? Koso ang’o momiyo chunya parore? Anaket genona kuom Nyasaye, mi anachak apake kendo. En e jakonyna kendo Nyasacha.

Ngeche 13:22-23

22. Ng’at makare bedo gi mwandu moweyo ni nyithinde. Mwandu joricho to nodog ni joma kare.

23. Puothe jochan dinyag cham mathoth moromogi, ka da bed ni adiera ni e piny!

Luka 9:37-62

37. Kinyne ka ne gilor gia e got, oganda maduong’ noromo gi Yesu.

38. To ng’at moro kuom jogo nokok niya, “Japuonj, asayi, rangie wuodani! En e nyathina kende,

39. to ka jachien marach obuke, to goye piny, kendo okok matek, kogwecho, kendo dhoge wuok buoyo. Jachiendno sande malit, kendo weye mana ka tekone orumo.

40. Nende akwayo jopuonjreni mondo ogol jachiendno, to notamogi.”

41. Yesu nodwoko niya, “Yaye, ma tieng’ maonge gi yie, kendo mobam manadi! Nyaka karang’o ma onego abedie kodu, ka achandora kodu kama!” Eka nowacho ni ng’atno ni, “Kel wuodi ka.”

42. To e sa mane nyathino dhi ir Yesu, jachien nogoye piny, moguecho marach. Yesu nokwero jachiendno matek, mi ochango wuowino, eka odwoke ni wuon mare.

43. Ji duto mane ni kanyo nowuoro ahinya duong’ mar Nyasaye. Kane pod ji hum kuom gik moko duto mane Yesu timo, ne owacho ni jopuonjrene niya,

44. “Chikuru itu maber, mondo uwinj gima awachonuni; Wuod Dhano ibiro keto e lwet ji.”

45. To jopuonjrene ne ok owinjo tiend wachno. Ne opandorenigi mondo kik ging’e tiende, to bende ne giluoro penje.

46. Mbaka nowuok e kind jopuonjre Yesu ka gipiemore ni ere ng’ama duong’ moloyo kuomgi.

47. To Yesu nong’eyo gima ne giparo, omiyo nokawo nyathi moro, moketo ochung’ e dire.

48. Eka nowachonigi niya, “Ng’ama orwako nyathi ma kama e nyinga, to orwako mana an, kendo ng’ama orwaka, to orwako mana Jal mane oora, nimar ng’at matinie moloyo kuomu duto, e ng’at maduong’ie moloyo.”

49. Johana nowacho ni Yesu niya, “Ruoth, ne waneno ng’ato ka golo jochiende e nyingi, to ne wakwere, nikech ok en achiel kuomwa.”

50. To Yesu nodwoke kawachonigi niya, “Kik ukwer ng’at ma kamano, nikech ng’at ma ok mon kodu en jakoru.”

51. Kane kinde monego tergo Yesu e polo koro chiegni, ne owuok koketo chunye mondo odhi Jerusalem.

52. Nooro joote moko mondo otel nyime, mi jootego nodhi e dala jo-Samaria moro mondo olosne kar bworo.

53. To jodalano nodagi rwako Yesu, nikech nong’ere ni odhi Jerusalem.

54. To kane jopuonjre Yesu ma Jakobo kod Johana oneno kamano, ne gipenjo Yesu niya, “Ruoth, idwaro mondo waluong mach oa e polo, obi otiekgi koso?”

55. To Yesu nolokore irgi, mokwerogi,

56. eka ne gidhi e dala machielo.

57. Kane oyudo giwuotho, ng’at moro nowacho ni Yesu niya, “Ayie luwi kamoro amora midhiye.”

58. To Yesu nodwoke ni, “Bwe nigi buchegi, kendo winy bende nigi utgi; Wuod Dhano to onge kata gi kama ketie wiye.”

59. Eka Yesu nowacho ni ng’at machielo ni, “Luwa!” To ng’atno nodwoke niya, “Jaduong’, yiena mondo akwong adog ayik wuora.”

60. To Yesu nokone ni, “We joma otho oyik jogi motho. Into dhiyo iland Wach Maber mar Loch Nyasaye.”

61. Bang’e ng’at moro machielo nowacho ni, “Jaduong’, an bende ayie luwi, to mokwongo yie adog ago ni joodwa oriti.”

62. To Yesu nodwoke ni, “Ng’at mosiko paro mana chien, ok owinjore gi Loch Nyasaye, mana kaka ng’at ma kosemako kue dhiang’ mochako pur, to osiko ng’iyo mana chien, ok nyal puro maber.”

Luo Bible 2015