Beblia

Bible in one year June 14

1. E higa mar piero ariyo gabiriyo mar loch Jeroboam ruodh Israel, Uzia wuod Amazia nodoko ruodh Juda.

2. Ne en jahigni apar gauchiel kane ochako tich, kendo norito piny kuom higni piero abich gariyo, kodak Jerusalem. Min mare ne nyinge Jekolia nyar Jerusalem.

3. Timbene ne long’o e nyim Ruoth Nyasaye, mana kaka timbe Amazia wuon mare.

4. To kata kamano hembko mane ni kuonde moting’ore ne ok okethi, kendo ji ne pod timo misengni kendo wang’o ubani kuondego.

5. Ruoth Nyasaye nomiyo ruoth tuo mar dhoho, mi nodak e ot kar kende nyaka otho. Jotham wuode nodoko jatelo e od ruoth, morito piny,

6. Weche moko mag Uzia, gi timbene duto, ondiki e Kitap Weche mag Ndalo mag Ruodhi mag Juda.

7. Uzia notho, moyike but kwerene e dala Daudi. Jotham wuode nodoko ruoth kare.

8. E higa mar piero adek gaboro mar loch Uzia ruodh Juda, Zekaria wuod Jeroboam nobet ruodh Israel kuom dueche auchiel, kodak Samaria.

9. Timbene ne richo e nyim Ruoth Nyasaye, mana kaka timbe kwerene. Noluwo timbe maricho mane Jeroboam wuod Nebat omiyogo jo-Israel obedo joricho.

10. Shalum wuod Jabesh nojame, monege Ibleam, kendo nokawo lochne.

11. Timbe moko duto mag Zekaria ondiki e Kitap Weche mag Ndalo mag Ruodhi mag Israel.

12. Kamano weche mane Ruoth Nyasaye osingorego ni Jehu, kowachone ni nyikwaye nobed ruodhi mag Israel nyaka tieng’ mar ang’wen, nochopo kare.

13. E higa mar piero adek gochiko mar loch Uzia ruodh Juda, Shalum wuod Jabesh nokawo loch, morito piny due achiel, kodak Samaria.

14. To Menahem wuod Gadi noa Tirza modhi Samaria. Nonego Shalum wuod Jabesh kuno, mokawo lochne.

15. Koro timbe moko duto mag Shalum, kendo kaka nojamo Zekaria, ondiki e Kitap Weche mag Ndalo mag Ruodhi mag Israel.

16. E ndalogo ema Menahem nokawoe Tapua, kaachiel gi mbape duto, chakre Tirza kadhi nyime. Nonego jo-Tapua duto, koriedo iye mon mayach, kendo noketho dalano chuth, nikech ne gidagi yawone dhorangach.

17. E higa mar piero adek gochiko mar loch Uzia ruodh Juda, Menahem wuod Gadi nodoko ruodh Israel, morito piny kuom higni apar, kodak Samaria.

18. Timbene ne richo e nyim Ruoth Nyasaye, kaka timbe maricho mane Jeroboam wuod Nebat omiyogo jo-Israel obedo joricho.

19. Ndalogo ema Pul ruodh Asuria nomonjoe e piny Israel, to Menahem nomiyo Pul fedha moromo kilo alufu mia adek, mondo Pul okonye jiwo lochne obed motegno.

20. Menahem noloso pesa kuom jo-Israel man gi mwandu, mochulogo ruodh Asuria, koketo ni ng’ato ka ng’ato nus kilo mar fedha. Omiyo ruodh Asuria noweyo piny Israel, mi nodok thurgi.

21. Koro weche moko mag Menahem, gi timbene duto ondiki e Kitap Weche mag Ndalo mag Ruodhi mag Israel.

22. Menahem notho, moluwo kwerene, mi Pekahia wuode nodoko ruoth kare.

23. E higa mar piero abich mar loch Uzia ruodh Juda ema Pekahia wuod Menahem nodokoe ruodh Israel, morito piny kuom higni ariyo, kodak Samaria.

24. Timbene ne richo e nyim Ruoth Nyasaye, kaka timbe mane Jeroboam wuod Nebat omiyogo jo-Israel obedo joricho.

25. To Peka wuod Ramalia, mane jaduong’ne mar lweny, kaachiel gi jo-Gilead piero abich, nojame, monege Samaria e od ruoth. Kane Peka osenege kamano, nokawo lochne.

26. Koro weche moko mag Pekahia, gi timbene duto, ondiki e Kitap Weche mag Ndalo mag Ruodhi mag Israel.

27. E higa mar piero abich gariyo, mar loch Uzia ruodh Juda, ema Peka wuod Remalia nodokoe ruodh Israel, morito piny kuom higni piero ariyo, kodak Samaria.

28. Timbene ne richo e nyim Ruoth Nyasaye, kaka timbe mane Jeroboam wuod Nebat omiyogo jo-Israel obedo joricho.

29. E ndalo mag loch Peka ruodh Israel, Tiglath-pileser ruodh Asuria nobiro, mokawo Ijon gi Abel-bethmaaka gi Janoa gi Kedesh gi Hazor gi Gilead kod Galili. Kamano nokawo piny Naftali duto, motero jopinyno nyaka Asuria e tuech.

30. To e higa mar piero ariyo mar loch Jotham wuod Uzia, Hoshea wuod Ela nojamo Peka wuod Ramalia, monego, mi okawo lochne.

31. Koro weche moko mag Peka, kod timbene duto, ondiki e Kitap Weche mag Ndalo mag Ruodhi mag Israel.

32. E higa mar ariyo mar loch Peka wuod Remalia ruodh Israel, Jotham wuod Uzia nodoko ruodh Juda.

33. Ne en jahigni piero ariyo gabich kane ochako tich, morito piny kuom higni apar gauchiel, kodak Jerusalem. Min mare ne nyinge Jerusha nyar Zadok.

34. Timbe Jotham ne long’o e nyim Ruoth Nyasaye kaka timbe Uzia wuon mare.

35. To kata kamano hembko mane ni kuonde moting’ore ne ok okethi. Ji ne pod timo misengni kendo wang’o ubani kuondego. Jotham ema nogero dhorangach mamalo mar Od Ruoth Nyasaye.

36. Koro weche moko mag Jotham gi timbene duto, ondiki e Kitap Weche mag Ndalo mag Ruodhi mag Juda.

37. E ndalogo Ruoth Nyasaye nochako ooro Rezin ruodh Aram kod Peka wuod Remalia mondo omonj jo-Juda.

38. Jotham notho, moyik but kwerene e dala Daudi kwar mare. Ahaz wuode nodoko ruoth kare.

2 Ruodhi 16:1-20

1. E higa mar apar gabiriyo mar loch Peka wuod Remalia ema Ahaz wuod Jotham nodokoe ruodh Juda.

2. Ne en jahigni piero ariyo kane ochako tich, morito piny kuom higni apar gauchiel, kodak Jerusalem. To timbene ne ok long’o e nyim Ruoth Nyasaye kaka timbe Daudi wuon mare ne long’o.

3. Noluwo timbe ruodhi mag Israel, to gima rach moloyo, en ni nowang’o wuode ka gir misango, koluwo timbe makuero mag ogendini mane Ruoth Nyasaye oriembo mondo owe thuolo ni jo-Israel.

4. Bende notimo misengni, kendo nowang’o ubani, e hembko ewi gode, kendo e tiend yath moro amora motimo otiep.

5. E ndalogo, Rezin, ruodh Aram, gi Peka wuod Remalia ruodh Israel nodhi monjo Jerusalem. Ne gilworo Ahaz gi joge, to ne ok ginyal loye.

6. (Kindego bende ema ruodh Edom noriemboe jo-Juda Elath, modwoko ni jo-Edom, mi jo-Edom nodhi Elath, kuma gidakie nyaka chil kawuono.)

7. To kane Ahaz oyudo ni ruodhigo olwore kamano, nooro joote ir Tiglath-pileser ruodh Asuria, kowachone niya, “An nyathini kendo jatichni, yie ibi iresa e lwet ruodh Aram gi ruodh Israel ma kedo koda.”

8. Bende Ahaz nokawo fedha gi dhahabu mane nie Od Ruoth Nyasaye kod kar keno mar od ruoth, mooro ni ruodh Asuria kaka chiwo.

9. Ruodh Asuria noyie gi wechene, modhi omonjo Damaski, mokawo. Nodaro joma odakie, motero e tuech Kir. Rezin bende nonego.

10. Kane ruoth Ahaz odhi Damaski romo gi Tiglath-pileser ruodh Asuria, noneno kendo-mar-misango mane ni kuno, mi nooro ni Uria jadolo kido mar kendono gi romne duto, manyise kaka ochalo.

11. Uria jadolo noloso kendo-mar-misango machielo machal gi mano chuth, kendo notieke kapok ruoth Ahaz oduogo koa Damaski.

12. Kane ruoth oduogo, norango kendono. Eka noidho raidhi, kosudo machiegni kode.

13. Nowang’oe misango miwang’o pep, kod misango mar mogo. Bende notimoe misango miolo piny, kendo nokiroe remb misengni mag sawo.

14. To kendo-mar-misango mar mula mane nie nyim Ruoth Nyasaye nogolo e kind kendone manyien gi Od Ruoth Nyasaye, moketo yo nyandwat mar kendo manyienno.

15. Ruoth Ahaz nowacho ni Uria jadolo niya, “E kendo maduong’ni ema nitimie misango mar okinyi, kod mar mogo mitimo godhiambo, gi mar ruoth kod misangone mar mogo kod misengni miolo piny. Inikir kuome remo duto mag misengni mamoko. To kendo-mar-mula ema anapenjie Ruoth Nyasaye wach.”

16. Uria jadolo notimo gik mojo duto kaka ruoth Ahaz nochike.

17. Ruoth Ahaz nong’ado frembe mag rachungi mane nie Hekalu, kendo nogolo nyilerni mane nie wigi. Gima ne iluongo ni nam bende nogolo kuom ruedhi mag mula mane nie bwoye, mi orenjo e rachungi mar kite.

18. Bende nomuko agola mane okonyorego chieng’ Sabato, gi dhorangach ma oko mane odonjogo e Od Ruoth Nyasaye, nikech noluoro ruodh Asuria.

19. Timbe moko mag Ahaz ondiki e Kitap Weche mag Ndalo mag Ruodhi mag Juda.

20. Ahaz notho, moyike but kwerene e dala Daudi. Hezekia wuode nodoko ruoth kare.

Zaburi 73:21-28

21. Kane iya owang’, mi chunya odoko malit,

22. to ne abedo mofuwo ka dhiang’ e nyimi.

23. Kata kamano, e kinde duto in koda, kimako lweta.

24. Itelona, king’adona rieko, kendo chieng’ giko inirwaka kar duong’.

25. Ere ng’at moro ma an go e polo mak mana in? Kuom mano, ere gimoro machielo ma anyalo dwaro e piny?

26. Parona gi denda nyalo bedo manyap, to in e tekra, A Nyasaye. In kendi e mwanduna nyaka chieng’.

27. Chutho, joma oweyi biro lal nono, kendo initiek jogo ma ok oyie kuomi.

28. An to aonge gi gima berna, moloyo bedo machiegni kodi, yaye Nyasaye. A Ruoth Nyasaye, in ema aseyieri mondo ibedna kar konyruok mondo aland gik moko duto misetimo.

Ngeche 18:20-21

20. Weche duto mawuok e dho ng’ato duogo e wiye owuon.

21. Weche ma ng’ato wacho nyalo kelo ngima, to bende ginyalo kelo tho. Kuom mano, rit dhogi maber mondo wecheni okonyi.

Johana 21:1-25

1. Bang’ kinde moko, Yesu nochako ofwenyore ni jopuonjre e dho nam Galili, kendo ma e kaka nofwenyorenigi:

2. Simon Petro gi Thoma (mane onywol rude) ne jo nigi Nathaniel (ma ja-Kana Galili) gi yawuot Zebedi kod jopuonjre mamoko ariyo.

3. Simon Petro nowachonigi ni, “Adhi lupo.” To ne giwachone niya, “Wan bende wadhi kodi.” Omiyo ne gidhi giwuok, mi gidhi gidonjo e yiegi, to ne ok gimako gimoro otieno duto.

4. To kane piny koro yawore, Yesu ne nie dhonam, to jopuonjrene ne ok ong’eye.

5. Yesu nopenjogi niya, “Yawa! Bende usemakoe rech koso?” To ne gidwoke ni, “Ooyo.”

6. Eka nowachonigi niya, “Boluru tol e dir yie korachwich, to ubiro mako rech.” Omiyo ne gibolo tol, mi koro ne ok ginyal ywaye, nikech nomako rech mang’eny ahinya.

7. Eka japuonjre mane Yesu ohero cha nowacho ni Petro ni, “En Ruoth!” Kane Simon Petro owinjo ni en Ruoth, notueyo nangane e nungone, nikech ne en duk, mi ochikore e nam.

8. To jopuonjre mamoko nobiro gi yie, ka ywayo tol ma rech opong’o, nikech ne gichiegni gi dhowath, ma dirom mana mita mia achiel kende.

9. Kane gisegowo, ne gineno makati kod mach mar mirni koketie rech.

10. Yesu nowachonigi niya, “Kelieuru rech moko ma usemako.”

11. Eka Simon Petro nodonjo e yie, mi oywayo tol oko e dhowath, kopong’ gi rech madongo. Ne gin rech mia achiel gi piero abich gadek, to kata obedo ni ne ging’eny kamano, tol ne ok oyiech.

12. Yesu nowachonigi ni, “Biuru ugagi.” Jopuonjre ne luor penje ni en ng’a, nikech ne ging’eyo ni en Ruoth.

13. Yesu nobiro mokawo makati, omiyogi. Rech bende nomiyogi kamano.

14. Mano ne timo fwenyruok Yesu mar adek ni jopuonjrene, kane osechier oa kuom joma otho.

15. Kane gisegago, Yesu nopenjo Simon Petro niya, “Simon Wuod Johana, ihera moloyo joma mokogi koso?” Nodwoke ni, “Ee, Ruoth, ing’eyo ni aheri.” Yesu nowachone ni, “Kwa romba.”

16. Eka nochako openje kendo niya, “Simon wuod Johana, bende ihera?” Nodwoke ni, “Ee, Ruoth, ing’eyo ni aheri.” Yesu nowachone ni, “Kwa romba”

17. Bang’e nopenje kendo mar adek niya, “Simon wuod Johana, ihera adier?” Petro noparore nikech mano koro ne penjo mar adek ni, “Ihera?” Omiyo nodwoke ni, “Ruoth in ing’eyo gik moko duto. Ing’eyo ni aheri.” Yesu nowachone ni, “Kwa romba.

18. Adier, adier, awachoni ni, kane in rawera, to ne irwakori kendi iwuon, kendo ne idhi kamoro amora mihero. To ka chieng’ moro idoko ng’ama oti, to nirie lueti, mi ng’at machielo ema norwakni lepi, kendo teri kama idwaro dhiye.”

19. Nowacho kamano mondo kit tho mane Petro biro miyogo Nyasaye duong’ ong’ere. To kane Yesu osewacho wechego, noko ni Petro ni “Luwa!”

20. Petro nogoyo machiemo, moneno japuonjre mane Yesu ohero cha, kaluwo bang’gi. En ema ne obet but Yesu e kinde mane gichiemo, mi openje ni, “Ruoth, ere ng’ama biro ndhogi?”

21. Kane Petro oneno kamano, nopenjo Yesu ni, “Ruoth, jali to?”

22. Yesu nodwoke ni, “Ka adwaro ni mondo obed mangima nyaka aduogi, to mano obadhie ang’o? In to luwa aluwa.”

23. Wach Yesuno nolandore e kind owete, ni japuonjreno ok bi tho. To chutho, Yesu ne ok owacho ni ok notho, to nowacho ni, “Ka adwaro ni obed mangima nyaka aduogi, to mano obadhie ang’o?”

24. Mano e japuonjre mawacho wechegi, kendo en jal mane ondikogi, bende wang’eyo ni gima owacho en adier.

25. Bende nitie gik mang’eny mane Yesu otimo. Ka da bed ni ondikgi duto, moro ka moro, to aparo ni kata mana piny ngima ok dirom kano kitepe mondikgie.

Luo Bible 2015