Beblia

Bible in one year June 27

1. Kane Daudi osechako dak e ode mane ogero, nowacho ni Nathan janabi niya, “Koro an adak e ot moger maber gi yiend sida, to Sandug Muma mar Ruoth Nyasaye nie hema.”

2. Nathan nodwoko Daudi niya, “Tim duto midwaro, nikech Nyasaye ni kodi.”

3. To gotienono, wach Ruoth Nyasaye nobiro ni Nathan niya,

4. “Dhi inyis Daudi jatichna ni Ruoth Nyasaye owacho niya: ‘In ok ema nigerna ot mondo adagie.

5. Chakre ndalo mane agoloe jo-Israel e piny Misri nyaka chil kawuono, pok adak e ot, to asebet kadak e hema.

6. Kuonde duto mane awuothoe gi jo-Israel, ne ok apenjo achiel kuom jobura mane aketo mondo obed jokwadh joga Israel gimomiyo ok gigerona ot mar yiend sida.’

7. Bende inyis Daudi ni Ruoth Nyasaye Manyalo Gik Moko Duto owacho kama: ‘Nagoloi e lek kuma nikwayoe rombe, mondo ibed jatend joga Israel.

8. Asebet kodi kuonde duto midhiye, kendo asetiekoni wasiki duto. Abiro miyo nyingi bedo gi huma, ka humb joma dongo mag piny,

9. kendo abiro miyo joga Israel pinygi giwegi. Anagurgi kuno, mi gidagie mak othaggi kendo. Jomahundu ok nochak ochandgi kaka ne chandogi chon,

10. chakre ndalo mane aketoe jobura mondo orit joga Israel, to natiek wasiki duto. An Ruoth Nyasaye anamiyi duong’, kendo anaguedh dhoodi mondo osiki.

11. Kisetho, miluwo kwereni, anaket achiel kuom yawuoti kari, kendo anagur lochne obed motegno.

12. En ema nogerna ot, kendo anami lochne osik nyaka chieng’.

13. Anabedne ka wuon mare, to enobed ka wuoda. Ok nagol herane kuome, kaka ne agolo kuom jal mane okuongoni bedo ruoth,

14. to anami obed motegno, kendo anami lochne gurre kuom joga nyaka chieng’.’’

15. Nathan nonyiso Daudi weche duto mane ofwenyne,

16. mi ruoth nodhi e nyim Ruoth Nyasaye, mobet piny. Nowacho niya, “A Ruoth Nyasaye, an ng’a, koso dhooda en ang’o, momiyo imiya duong’ kama?

17. A Nyasaye, gima isetimona pod in ikwano ka gima tin, nimar bende isewacho ni dhooda nosik kuom ndalo mang’eny, kendo isenyisa kaka tienge mabiro nochal.

18. A Ruoth Nyasaye, in ema ing’eya oko gi iye. Ang’o ma damed wachoni kuom duong’ ma isemiya?

19. Isemiya duong’ ma kama nikech ihera, kendo nikech mano ema idwaro.

20. A Ruoth Nyasaye, pok wawinjo ni nitie Ruoth Nyasaye moro machal kodi. Onge Nyasaye machielo, to mak mana in.

21. Ere oganda moro e piny, machalo gi jogi Israel? Bende nitie jopiny moro mane isedhi miwaro e tich wasumbni, miloko jogi? Isemiyo nyingi duong’ kuom timbe madongo kendo malich nikech iseriembo ogendini moko mondo owe thuolo ni jogi mane ireso kigolo e piny Misri.

22. Niloko jo-Israel mondo obed jogi nyaka chieng, kendo in Ruoth Nyasaye, ema isedoko Nyasachgi.

23. To koro Ruoth Nyasaye, mi singruok misetimona kaachiel gi dhooda mondo osik nyaka chieng’, kendo ichop gima isewacho.

24. Singruoknino mondo ogurre, kendo nyingi oyud duong’ nyaka chieng’, ka ji wacho niya, ‘Ruoth Nyasaye Manyalo Gik Moko Duto, ma Nyasach Israel en Nyasachgi adier!’ Kamano dhooda nodongi e nyimi.

25. In, Nyasacha, isenyisa ni ibiro dongo oda. Kuom mano asebedo gi chir mondo alem e nyingi.

26. A Ruoth Nyasaye, in e Nyasaye kendo isesingorina maber kama.

27. Emomiyo, Ruoth Nyasaye, yie iguedh oda mondo osik e nyimi nyaka chieng’, nimar gima iseguedho, nobed gi hawi ndalo duto.”

1 Weche Mag Ndalo 18:1-17

1. Bang’e Daudi noloyo jo-Filistia, mi gibedo moboch, kendo nomayogi Gath gi mier mokiewo kode.

2. Noloyo jo-Moab bende, mi gibet e bwo lochne, kendo ne gigolone osuru.

3. Bende Daudi noloyo Hadadezer ruodh Zoba-hamath, kane ruodhno dhi chungo rapar mar lochne e lweny but aora Yufrate.

4. Daudi nomaye geche lweny alufu achiel, kendo nomako joidh farese alufu abiriyo, kod jolweny moko alufu piero ariyo. Nong’ado odond farese duto mag geche lweny, moweyo mana farese mia achiel.

5. To kane jo-Aram moa Damaski obiro mondo okony Hadadezer ruodh Zoba, Daudi nonego ji alufu piero ariyo gariyo kuomgi.

6. Eka noketo askeche ma jorit e piny jo-Aramgo, mi ne gibedo e bwo lochne, kendo ne gigolone osuru. Kuonde duto mane Daudi dhiye, Ruoth Nyasaye ne miyo olocho.

7. Daudi noyako gilweny mag dhahabu mane jorit Hadadezer oting’o mokelo Jerusalem.

8. Bende noyako munde mathoth ahinya e Tibhath kod Kun ma miech Hadadezer. Mundego ema ne Solomon olosogo gima ne iluongo ni Nam gi sirni kod gik moko duto mitiyogo e Hekalu.

9. Kane Tou ruodh Hamath owinjo ni Daudi oseloyo jolweny mag Hadadezer,

10. nooro Hadoram wuode ir ruoth Daudi mondo omose, kendo opake kuom loyo Hadadezer nimar Hadadezer ne jasik Tou. Hadoram nokelo ni Daudi gik moko mag dhahabu gi mag fedha kod mag mula.

11. Magi bende ruoth Daudi nochiwo ni Ruoth Nyasaye, kaachiel gi fedha kod dhahabu ma noyako kuom ogendni mamoko duto mane oseloyo, kaka jo-Edom gi jo-Moab gi jo-Amon gi jo-Filistia kod jo-Amalek.

12. Abishai wuod Zeruya nonego jo-Edom alufu apar gaboro e holo Kado.

13. Noketo askeche ma jorit e piny Edom, mi jo-Edom duto nobet e bwo loch Daudi. Kuonde duto mane Daudi dhiye, Ruoth Nyasaye ne miyo olocho.

14. Daudi nobedo ruodh Israel duto, morito piny gi kue, kong’ado bura kare ni joge duto.

15. Joab wuod Zeruya ne jatend jolweny, to Jehoshafat wuod Ahilud ne jachan weche.

16. Zadok wuod Ahitub kod Ahimelek wuod Abiathar ne jodolo, Savsha to ne jagoro.

17. Benaya wuod Jehoyada ne jatend jo-Kereth kod jo-Peleth, kendo yawuot Daudi ne jodongo ma konye.

Zaburi 78:17-25

17. To kata kamano, pod ne gisiko mana ka gitimo richo e nyime, kendo ne gipiem e thim gi Ngama Duong’ Moloyo.

18. Ne gitemo Nyasaye marayiem, ka gikwaye chiemo mondo gineggo kech.

19. Ne giwuoyo kuome marach, ka gipenjore, niya, “Bende Nyasaye nyalo miyowa chiemo e thim ka adier?

20. Chutho nogoyo lwanda, mi pi obubnie molokore aore, to koro kuon gi ring’o bende domiwa?”

21. Kane Ruoth Nyasaye owinjo kamano, nokecho gi nyikwa Jakobo, mi omonjogi gi mach. Adier, mirima mager nomake gi jo-Israel,

22. nikech ne ok giyie kuome, kendo ne ok gigeno ni doresgi.

23. To kata kamano nogolo chik mondo dhout polo oyawre.

24. Eka nomiyo manna, ma en chiemo moa e polo, ochuenigi ka koth mondo gicham.

25. Kamano Nyasaye nomiyogi chiemb malaika, mi gichamo nyaka giyieng’.

Ngeche 19:25-26

25. Josunga nyaka kum mondo joma kia gik moko opuonjre. Ng’at mariek to puonjore apuonja kokwere.

26. Ng’at mamon gi wuon, kendo riembo min e dala, kelo wichkuot kod achaya.

Tich Joote 8:1-25

1. Chieng’ onogo, kanyakla mar jo-Kristo man Jerusalem nochako yudo sand malit. Giduto nokegi kuonde duto e pinje Judea gi Samaria, mak mana joote kende ema ne odong’ Jerusalem.

2. Jomoko moluoro Nyasaye noyiko Stefano, kendo oywage malit.

3. E kindeno Saulo nochako ketho kanyakla mar jo-Kristo, kodhi e ot ka ot, kendo oywayo chwo gi mon oko, otero e jela.

4. Joma oyie mane osekego nodhi kuonde duto kalando Wach Maber.

5. Kamano Filipo, ma achiel kuomgi, nodhi e dala mar Samaria, molando wach Mesia kuno.

6. Kane jo-Samaria owinjo wach Filipo, kendo gineno honni mane otimo, ne gichiko itgi ni wechene gi chuny achiel.

7. Jochiende maricho nowuok kaywak matek kuom ji mang’eny, kendo joathany kod pudhe bende ne ochango,

8. mi mor maduong’ nobet e dalano.

9. To ng’at moro ma nyinge Simon nodak kuno, ne osebet ka otimo timbe ajuoke, kendo ne omako dho jo-Samaria nono, kowacho ni en ng’at maduong’.

10. Ji duto mae dalano, joma tindo gi joma dongo, noyie kode gi chuny achiel. Ne giwacho ni, “Jali e teko Nyasaye miluongo ni ‘Teko Maduong’’!”

11. Ne osemako dhogi gi timbene mag ajuokego kuom kinde malach, omiyo ne giyie kuome.

12. To kane Filipo olandonigi Wach Maber mar Loch Nyasaye, kod nying Yesu Kristo, ne giyie, mi obatisgi, chwo gi mon.

13. Kata mana Simon owuon bende nolokore, moyie kuom Yesu, kendo kane osebatise nosiko kowuotho gi Filipo, kendo nowuoro ahinya koneno honni kod ranyisi mang’eny katimore.

14. Kane joote man Jerusalem owinjo ni jo-Samaria oseyie Wach Nyasaye, ne gioronigi Petro kod Johana,

15. mi odhi kuno kendo olemonigi mondo ginwang’ Roho Maler,

16. nikech Roho Maler ne pok olor kuom moro kuomgi. Ne osebatisgi mana e nying Yesu Kristo kende.

17. Petro kod Johana ne joyieyo lwetgi kuomgi, mi ginwang’o Roho Maler.

18. Kane Simon oneno ni ji oyudo Roho Maler ka joote oyieyo lwetgi kuomgi, ne omiyo Petro gi Johana pesa,

19. kowachonigi niya, “An bende miyaeuru tekono, mondo ng’ato ang’ata ma ayieyo lweta kuome to oyud Roho Maler.”

20. To Petro nodwoke ni, “Pesani mondo olal nono kodi, nikech iparo ni inyalo ng’iewo mich mar Nyasaye gi pesa!

21. Ionge gi giri moro, kata migawo moro e tijwani, nikech chunyi ok long’o e nyim Nyasaye.

22. Omiyo lokri iwe paroni maricho, ikwa Ruoth Nyasaye mondo kanyalore to oweni kuom paro ma kamano,

23. nikech aneno ni chunyi opong’ gi nyiego, kendo in misumba richo.”

24. Simon nodwoko Petro gi Johana ni, “Yieuru ulamna Ruoth, mondo gik musewachogo kik timrena.”

25. Kane gisenyiso ji gik ma ging’eyo kuom Yesu, kendo gipuonjogi Wach Ruoth, ne gidok Jerusalem. To kane ginie yo gidok, ne gilando Wach Maber e miech Samaria mang’eny.

Luo Bible 2015