Beblia

Bible in one year July 21

1. Kane due mar abiriyo ochopo, jo-Israel koro noyudo odak e miechgi. Ne gichokore Jerusalem, maonge kata ng’at achiel modong’.

2. Eka Joshua wuod Jozadak gi jodolo wetene kod Zerubabel wuod Shealtiel gi owetene ne jogero kendo-mar-misango mar Nyasach Israel, mondo otimie misengni miwang’o pep, kaka ondiki e chik Musa ng’at Nyasaye.

3. Mokwongo ne gichungo kendo-mar-misango kare machon, nikech ne giluoro joma koro nodak e pinyno, mi gitimoe ni Ruoth Nyasaye misengni miwang’o pep, okinyi godhiambo.

4. Ne gitimo Sap Kiche kaka nondiki, kendo ne gitimo misengni miwang’o pep kaka chik dwaro odiechieng’ kodiechieng’.

5. To bende ne gitimo misengni mapile, gi misengni mag Sabato gi mago mitimo ka due opor, kod mag sewni moko duto mowal ni Nyasaye, kendo ne gichiwo mich mane ji okelo ni Ruoth Nyasaye kuom herogi.

6. Ne gichako timo misengni miwang’o pep e odiechieng’ mokwongo mar due mar abiriyono, kata obedo ni mise mar Hekalu mar Ruoth Nyasaye ne pok oketi.

7. Jogedo gi jopa kite ne gimiyo pesa, to jo-Sidon gi jo-Turo ne gimiyo chiemo gi gik mimadho kod mo, mondo odhi Lebanon, okwang’ yiend sida nyaka dhowath Jopa. Kuros ruodh Persia ema nosemiyogi thuolo mar timo kamano.

8. E due mar ariyo mar higa mar ariyo bang’ duokgi e Od Nyasaye Jerusalem, Zerubabel wuod Shealtiel kod Jeshua wuod Josadak ne jochako tich, ka jodolo gi jo-Lawi gi jo-Israel wetegi duto ma noa e tuech, mobiro Jerusalem, konyogi. Ne giyiero jo-Lawi ma hikgi piero ariyo kadhi nyime, mondo orit tich Od Ruoth Nyasaye.

9. To Jeshua gi yawuote kod owetene ma Kadmiel gi Binui kod Hodavia ne jokawo tich rito joma ne tiyo e Od Nyasaye.

10. Kane jogendo oseketo mise mar Hekalu mar Ruoth Nyasaye, jodolo morwako lep dolo, nochung’ keregi ka goyo tung’, kendo jo-Lawi ma nyikwa Asaf bende nogoyo ongeng’o ka pako Ruoth Nyasaye kaka Daudi ruodh Israel nochiko.

11. Ne giolo wer, ka gipako kendo gigoyo erokamano ni Ruoth Nyasaye niya, “En erokamano, nimar herane kuom jo-Israel osiko nyaka chieng’.” Ji duto nopako Ruoth Nyasaye gi duol maduong’ nikech mise mar Od Ruoth Nyasaye noseketi.

12. To thoth jodolo gi jo-Lawi kod jodong dhoudi mane koro hikgi oniang’, kendo ma noseneno Hekalu mokwongo, noywak, koneno ka mise mar odni oketi. To ji mang’eny nokok matek nikech mor mane gin go.

13. Ji ne ok nyal pogo ywak gi mor, nikech koko mar ji ne duong’, kendo ne nyalo winjore gi kuma bor ahinya.

Ezra 4:1-24

1. Kane wasik jo-Juda gi jo-Benjamin owinjo ni joma oa e tuech koro gero Hekalu ni Ruoth Nyasaye ma Nyasach Israel,

2. ne gidhi ir Zerubabel gi Jeshua kod jodong dhoudi, mi giwachonigi niya, “We wakonyu gedo, nikech Nyasachuno ema wan bende walamo, kendo wasebedo ka watimone misango, chakre ndalo loch Esarhadon ruodh Asuria, ma nokelowa ku.”

3. To Zerubabel gi Jeshua kod jodong dhout Israel mamoko nodwokogi niya, “Uonge tich gi ot mwagero ni Nyasachwani. Wabiro gere ni Ruoth Nyasaye ma Nyasach Israel wan kendwa, kaka Kuros, ruodh Persia, nochikowa.”

4. Bang’e joma koro nodak e pinyno nonyoso chuny jo-Juda, ka gibwogogi ni mondo kik gigedi.

5. Ndalo duto mane Kuros rito piny, ne gimiyo jodonge asoya mondo oketh wach jo-Juda. Mano nodhi nyime nyaka ndalo loch Darius ruodh Persia.

6. Kane Ahasuerus ochako loch, joma koro nodak e pinyno nondiko barua kadonjo ni jo-Jerusalem gi jo-Juda.

7. E ndalo mane Artaxerxes obedo ruodh Persia, Mithredath gi Tabeel kod jowetene nondikone. Baruano nondiki gi dho Aram, kendo nosome gi dho Aram.

8. Rehum, ma jaduong’ pinyno, kod Shimshai jagoro ne jondiko barua ni ruoth Artaxerxes, ka ketho nying Jerusalem. Baruano nochak kama:

9. “Wan jondik baruani wan Rehum ma jaduong’ piny, gi Shimshai jagoro, kod jowetewa duto ma jong’ad bura gi jodongo gi joteko gi jotich madongo, gi jo-Erek gi jo-Babulon gi jo-Elam modak Susa,

10. kod ji mamoko mane Asnapar ruoth moluor kendo mogen odaro momiyo kar dak e dala mar Samaria, kendo e piny man loka aora Yufrate.”

11. Baruano nodhi nyime kawacho kama: “Kuom ruoth Artaxerxes. Wan wasumbni magi modak loka Yufrate, wamosi.

12. Ruoth, mondo ing’e ni jo-Yahudi mane owei mobiro kuondegi, osechopo Jerusalem, kendo ochako gero dala marach ma nong’anyono. Gisepime kendo koro gitieko gero ohingane.

13. To ruoth, nyaka ing’e malong’o ni kapo ni gigero dalagino, mi gitieko ohingane, to ok ginigol osuru, kata golo chiwo, kata mana chulo gimoro amora, mi e gikone giniketh lochni.

14. To wan jotichni ok owinjore waling’ kwaneno kiketho nyingi. Mano emomiyo waseoro baruani kwanyisigo wach,

15. mondo onon kitepe mondikie weche ma notimore e ndalo ruodhi ma nokwongoni. Kirango kitepego, to ibiro nwang’o ni Jerusalem en dala ma jang’anyo, kendo ma jachand ruoth gi pinye. Bende jodalano osebedo ka jemo kuom higni mathoth. Mano emomiyo ne oketh dalano.

16. Koro ruoth, wanyisi ni ka oger dalano, mi ohinga mare orumo, to onge piny moro loka Yufrate ma nodong’ e bwo lochni.”

17. Ruoth nodwokogi kama: “To kuom Rehum ma jaduong’ piny gi Shimshai jagoro kod joweteu duto modak Samaria gi piny man loka aora Yufrate, amosou.

18. Barua ma nyocha uorona, osesomna maber,

19. omiyo nyocha agolo chik mondo onon kitepe, mi oseyud ni jodalano osebedo ka ng’anyo kuom kinde malach, kendo wich teko gi ng’anyo bende osebedo kosiko kanyo.

20. E ndalo mokadho ruodhi marateke norito Jerusalem, kendo noloyo piny duto man loka Yufraete. Ji ne goyonigi osuru mopogore opogore.

21. Kuom mano koro goluru chik mondo jogo owe tich. Dalano kik ger nyaka agol chik.

22. Neuru ni ok ujwang’o wachni, nono to wach marach kata gima lit biro wuok, ma diketh lochwa.”

23. Kane osesom barup ruoth Artaxerxes ni Rehum gi Shimshai kod jowetegi, ne gidhi Jerusalem piyopiyo, mi gichuno jo-Yahudi mondo owe tich.

24. Chakre chieng’no, tich Od Nyasaye man Jerusalem nochung’, mi nosiko kamano nyaka higa mar ariyo mar loch Darius ruodh Persia.

Zaburi 86:11-17

11. A Ruoth Nyasaye, nyisa yori mondo awuothie gi adiera. Puonja kaka daluori gi chuny achiel.

12. Abiro paki gi chunya duto, A Ruoth Nyasacha, bende abiro miyo nyingi duong’ nyaka chieng’,

13. nikech hera miherago lich, kendo nimar iseresa e bur matut mar tho.

14. A Nyasaye, josunga ma timbegi richo dwaro nega. Gin joma ok dewi.

15. Ruoth, in e Nyasaye ma jang’wono kendo makecho ji. Iyi ok wang’ piyo, kendo inyiso adierani kod herani mosiko.

16. Duog ira mondo ikecha. Meda teko, kendo resa.

17. A Ruoth Nyasaye, nyisa gima dimi ang’e ni ihera, mondo joma mon koda oyud wichkuot ka gineno ni isekonya, kendo imiya yueyo.

Ngeche 21:17-18

17. Ng’at mohero raha, nyaka bed jachan. Adier, ng’at mohero kong’o gi chiemo mabeyo ok nyal bedo gi mwandu.

18. Chandruok ma joricho dwaro ni joma kare dok mana e wigi giwegi.

Tich Joote 22:1-30

1. “Owetena gi wuonena, winjuru ane weche ma anyisougo ni ok asetimo gimoro marach.”

2. Kane giwinjo kowuoyo kodgi gi dho Hibrania kamano, ne giling’ thi, mi Paulo nodhi nyime kowacho niya,

3. “An ja-Yahudi, monywol Tarso e piny Kilikia, to Jerusalem kaeri ema adongoe, ka an japuonjre Gamaliel. Ne apuonjora maber kaka onego arit Chik kwerewa e yo makare, kendo ne achiwora ni tich Nyasaye mana kaka un duto uchiworu kawuononi.

4. Ne asando chwo gi mon mane luwo Yor Ruodhni, mi anego moko kuomgi, to moko aketo e jela.

5. Jadolo maduong’ kaachiel gi buch jodongo duto nyalo nyiso ni awacho adier, nikech ne gimiya barupe ma gindiko ni jo-Yahudi wetena man Damaski, mi ne awuok mondo adhi kuno amak joma luwo Yorno akel Jerusalem kotue mondo osandi.

6. “To kane oyudo awuotho, ka koro achiegni chopo Damaski kar odiechieng’ tir, ler marieny nong’angni molwora.

7. Ne apodho piny mi awinjo dwol moro kawachona ni, ‘Saulo! Saulo! Isanda nang’o?’

8. Eka ne apenjo ni, ‘In ng’a Ruoth?’ Ne odwoka ni, ‘An Yesu ja-Nazareth ma isando!’

9. Joma ne wan-go noneno lerno, to ne ok giwinjo dwond ng’ama ne loso kodano.

10. Ne apenjo niya, ‘Ere gima datim, Ruoth?’ Eka Ruoth nowachona ni, ‘A malo idhi Damaski, kuma ibiro nyisie gik moko duto ma aseyieri mondo itim.’

11. Ne alokora muofu nikech ler mang’angnino, omiyo jowuodha ne otaya gi lweta motera Damaski.

12. “Ne nitie ng’at moro ma nyinge Anania mane ng’ama odimbore ahinya kaka Chik Musa dwaro, kendo mane jo-Yahudi duto modak Damaski ogeno.

13. Ne obiro ira mochung’ buta, kendo owacho na ni, ‘Owadwa Saulo! Chak inen kendo!’ Gikanyono ne achako aneno, mi ang’iye.

14. Eka ne owachona niya, ‘Nyasaye ma Nyasach kwerewa oseyieri mondo ing’e gima odwaro, kendo ine Jatichne Makare kendo iwinj dwonde owuon kowuoyo kodi.

15. Osetimo kamano mondo ibed jatichne, kinyiso ji duto gik ma iseneno kendo isewinjo.

16. To koro ere gima pod irito? A malo obatisi, mondo olwokni richoni, kiluongo nying Ruoth.’

17. “Ne adok Jerusalem, kendo kane oyudo alemo e Hekalu, ayula wang’ ne otera,

18. mi aneno Ruoth e fweny, kowachona ni, ‘Reti ia Jerusalem piyo, nikech joma odak ka ok nyal yie weche ma iwacho kuoma.’

19. An to ne adwoke ni, ‘Ruoth, ging’eyo malong’o ni an ema ne abet kadhi e ut lemo duto, mi amako joma oyie kuomi, kendo agoyo.

20. Bende kane oneg Stefano mane hulo weche kuomi, ne antie, kendo ne ayie gi nekne, bende ne arito ni joma ne onege lepgi.’

21. To Ruoth nowachona ni, ‘Dhiyo nikech abiro teri kuonde maboyo ir joma ok jo-Yahudi.’ ”

22. Ji noseyudo obet kawinjo weche Paulo, to kane ochopo e wachno, ne gikok matek niya, “Negeuru! Ng’at ma kama ok owinjore obed mangima!”

23. Ne gimedo kok matek ka gikwadho lepgi, kendo gikiro buru e kor yamo,

24. nyaka jaduong’ lweny nogolo chik mondo otere kama askeche odakie, ochwade kinonego gima omiyo ji kok kamano nikech en.

25. To kane gisetueyo Paulo mondo gichwadi, Paulo nopenjo jatend askeche mane ochung’ kanyo ni, “Bende chik oyie mondo ochwad ng’at ma ja-Rumi kata ka pok oyale mi bura oloye?”

26. Kane jatelono owinjo kamano, nodhi ir jaduong’ lweny mopenje ni, “Ang’o ma idwaro timoni? Jali en ja-Rumi!”

27. Eka jaduong’ lweny nobiro ir Paulo mopenje ni, “Nyisa ane! In ja-Rumi koso?” Paulo nodwoke ni, “Ee an.”

28. To jaduong’ lweny nowacho ni, “An ne adoko ja-Rumi mana ka achulo pesa mang’eny!” Paulo to nonyise ni, “An to an ja-Rumi hie.”

29. Gikanyono joma ne dwaro chwade noa kuome, kendo jaduong’ lweny bende nodoko maluor kane ofwenyo ni en ja-Rumi.

30. To jaduong’ lweny ne dwaro ng’eyo malong’o gima omiyo jo-Yahudi donjo ni Paulo, omiyo kinyne nogolo chik mondo ogony nyororo mane otueyego. Eka noluongo jodolo madongo kod jokanyo duto mag bura maduong’ mar jo-Yahudi mondo ochokre, mi nokawo Paulo otero e nyimgi.

Luo Bible 2015