Beblia

Bible in one year August 5

1. Ne nitie ng’at moro ma nyinge Ayub, mane odak e piny Uz. Ne en ng’at makare kendo maler, mane oluoro Nyasaye, kendo otang’ ni richo.

2. Nonywolo yawuowi abiriyo gi nyiri adek,

3. kendo ne en gi rombe alufu abiriyo gi ngamia alufu adek gi dhok alufu achiel kod kenje mia abich. To bende ne en gi jotich mogundho. Kamano ne en ng’at momewie moloyo ji duto ma nodak e pinje man yo wuok chieng’.

4. Yawuote ne timo sawo, moro ka moro e ode, kendo luongoe owetene mamoko duto. Bende ne giluongoe nyiminegi adekgo mondo okonygi chiemo.

5. Kane sawo ka sawo oserumo, Ayub ne chiew gokinyi mang’ich, kendo timo misango mondo opwodhgo nyithinde. Ne otimo kamano pile, koparo ni dipo ka achiel kuomgi oketho kuom yanyo Nyasaye gi chunye.

6. To kinde nochopo ma yawuot polo obiro e nyim Ruoth Nyasaye, kendo Satan bende ne ni kodgi.

7. Ruoth Nyasaye nopenje ni, “Ia kanye?” Satan nodwoke niya, “Asebedo ka abayo abaya e piny, kalworora koni gi koni.”

8. Eka Ruoth Nyasaye nochako openje ni, “Bende inenoe Ayub jatichna? Onge ng’at makare kendo maler ka en e piny ngima, moluora kendo otang’ gi richo.”

9. Satan nodwoko ni, “Bende Ayub diluori adier, ka ok oyud gimoro kuomi?

10. Donge irite maber, kaachiel gi joode kod gimoro amora ma en go? Iguedho gik moko duto motimo, kendo isemiye dhok mopong’o piny.

11. To koro sani temie kawo gik moko ma en go ka ane ka dang’ ok okuong’i e wang’i!”

12. Ruoth Nyasaye nowacho ni Satan niya, “Kara ber, aketo gik moko duto ma en go e tekoni, mak mana ni en owuon to kik ihinye.” Bang’ mano Satan noa odhi.

13. Chieng’ moro kane oyudo nyithind Ayub timo sawo e dala owadgi maduong’,

14. ng’at moro nobiro ir Ayub ka ringo, mowachone niya, “Nende oyudo wapuro gi dhok, ka kenje bende kwayo machiegni e lek.

15. Eka wapo ka jo-Sabea omonjowa moyako jamnigo duto. Nende ginego jotichni duto pep, mak mana an kenda ema atony, omiyo abiro mondo anyisi.”

16. To kane pok otieko wuoyo, jatich machielo nobiro mowacho niya, “Polo nende ogoyo rombe gi jokwath, motho pep, mak mana an kenda ema atony, omiyo abiro mondo anyisi.”

17. Kane pok otieko wuoyo, jatich machielo notucho, mowacho niya, “Mony adek mag jo-Kaldai nende omonjowa, mokawo ngamia mawa, kendo onego jotichni duto, mak mana an kenda ema atony, omiyo abiro mondo anyisi.”

18. To kane pok otieko wuoyo, jatich mar ang’wen nobiro, mowacho niya, “Nyithindi nende timo sawo e dala wuodi maduong’

19. mi kalausi moa e thim ogoyo ot piny, monego nyithindi duto pep. An kenda ema atony, omiyo abiro mondo anyisi.”

20. Bang’e Ayub nochung’, moyiecho lepe kanyisogo kuyo ma en go. Ne olielo wiye apwodha mopodho piny auma.

21. Eka nowacho niya, “Kane awuok ei mama, to ne aonge gi gimoro, kendo chieng’ ma atho, to ok nadog gi gimoro. Ruoth Nyasaye ema ne ochiwo, kendo en ema koro osekawo. Nying Ruoth Nyasaye opaki!”

22. Kuom mano, kata obedo Ayub osesandore malit kamano, to ne ok oketho, kata wacho ni Nyasaye rach, ne ok owacho.

Ayub 2:1-13

1. Kane kinde ochopo ma yawuot polo ochako obiroe e nyim Ruoth Nyasaye, Satan bende ne ni kodgi.

2. Ruoth Nyasaye nopenjo Satan ni, “Ia kanye?” Satan nodwoke ni, “Asebedo ka abayo abaya e piny, ka alworora koni gi koni.”

3. Ruoth Nyasaye ne ochako openje niya, “Bende inenoe Ayub jatichna? Onge ng’at makare kendo maler kaka en e piny ngima, moluora kendo motang’ ni richo. Ne imiyo ayieni mondo iteme kayiem nono, to kata kamano pod ok oketho.”

4. To Satan nodwoko ni, “Dhano nyalo yie weyo gimoro amora ma en go mana ni mondo obed mangima.

5. To koro temie kimulo dende ane, ka dang’ ok okuong’i!”

6. Mano omiyo Ruoth Nyasaye nowacho ni Satan niya, “Kara ber, koro ero akete e tekoni mondo itimne gima idwaro, to kik inege.”

7. Bang’ mano, Satan nowuok oa e nyim Ruoth Nyasaye mi odhi ogoyo Ayub gi tuoche buche, mokuodo dende chakre lith tiende nyaka paw wiye.

8. Ayub nodhi mobet e buch kendo, mi okawo mbalatago mondo ogwonyrego.

9. Eka chiege nopenje niya, “Pod iyie ayiea kuom Nyasachi? Ere gimomiyo ok inyal yanye mondo itho?”

10. To Ayub nodwoke niya, “Iwuoyo mana kaka dhako mofuwo wuoyo. Ka Nyasaye okelonwa gima ber, to wakawo. Koro ere gimomiyo wang’ur kokelonwa chandruok?” Kuom mano, kata obedo ni Ayub nosechandore malit kamano, to ne ok oketho dhoge.

11. Osiepe Ayub adek, ma Elifaz ja-Teman gi Bildad ja-Shua kod Zofar ja-Nama nowinjo kaka Ayub osebedo gi thagruok. Omiyo ne giparo ni mondo gidhi gilime, kendo giho chunye.

12. Kane gikwongo nene, kapod gin mabor kode, ne ok ginyal ng’eye. To kane ging’eye, ne gichako ywak malit, mi giyiecho lepgi kendo gibuko wigi buru.

13. Bang’e ne gibet e lowo kanyo kode kuom ndalo abiriyo odiechieng’ gotieno, ka ok giwuo nikech ne gineno kaka othagore malit.

Zaburi 91:7-13

7. Ji gana nyalo podho buti, Ee, ji gana gi gana nyalo tho machiegni kodi, to in onge gima nyalo hinyi.

8. Inirang aranga mi ine kaka joricho yudo kum.

9. Ne ikawo Nyasaye Maduong’ Moloyo, kaka kar konyruokni kendo kar dakni,

10. omiyo masira moro ok nomaki, bende kata mana gimoro marach ok nobi machiegni gi dalani.

11. Nyasaye biro keto malaikane mondo oriti, kendo okonyi kamoro amora midhiye.

12. Ginitayi gi lwetgi, mondo kik ichwany tiendeni e kite.

13. Ininyon sibuoche gi thuonde. Koda ka sibuoche mager kod thuonde malich man gi kwiri.

Ngeche 22:13-14

13. Ng’at ma janyawo budho abudha e dala, kawacho ni sibuor dipo kochame kowuok oko.

14. Terruok en bur matut ma joma Ruoth Nyasaye okechogo nyumoree.

Rumi 7:1-25

1. Owetena, un joma ong’eyo kaka chik tiyo, omiyo ung’eyo ni chik otueyo ng’ato mana ka pod ongima.

2. Wakawuru dhako man gi chwore kaka ranyisi: Chik kend otueye kuom chwore ka pod chwore ngima. To ka chwore otho, to ogonye kuom chik mane otueye kuom chwore.

3. To ka odhi odak gi dichwo moro ka chwore pod ngima, to iluonge ni dhako materore. To ka chwore otho to chik ok otueye. En thuolo omiyo ka ng’at machielo koro okende, to ok en dhako materore.

4. Owetena, un bende uchalo kamano. Ne udoko fuond ringre Kristo, omiyo Chik onge gi teko kuomu, nikech uchalo joma otho. Mano notimore mondo ubed jo-ng’at machielo, ma en Jal mane ochier oa kuom joma otho, mondo wan duto wanyag olemo ni Nyasaye.

5. E ndalo mane pod waluwo timbe mag dhano, Chik nomiyo gombo otiyo e ngimawa, mi onywolo mana tho.

6. To koro osegonywa kuom Chik mane otueyowa, nikech wachalo joma osetho. Koro ok wati ni Nyasaye e yo machon, kwaluwo mana Chik mondiki, to watiyone ka wan gi ngima manyien ma Roho kelo.

7. Koro ere gima dwawachi? Dwawach ni Chik en richo koso? Ngang! Ayie ni ka da Chik onge, to ok dang’eyo ni richo en ang’o. Ka da ni Chik ok owacho ni ‘Kik igombi,’ to da ok ang’eyo ni gombo en ang’o.

8. Chikno nomiyo richo thuolo, mi okelo gombo duto mopogore opogore e chunya. Ka da onge Chik, to richo dobedo gima otho.

9. Chon ne ok ang’eyo wach Chik, to ne angima angima. To kane ang’eyo Chik, richo nodoko mangima, mi an to atho.

10. Kamano chik mane oketi mondo okel ngima, nokelona mana tho,

11. nikech richo noyudo thuolo ma Chik okelo, mi owuonda, kendo onega.

12. Kuom mano, Chik Musa en gima ler, kendo chike moting’o bende ler, kendo kare, kendo beyo.

13. Kara dwawachi ni gima ber ema nomiyo atho koso? Ngang’! Richo notiyo gi gima ber, mi onega, mondo richo ong’ere malong’o ni en ang’o. Kamano chik nyiso ni richo en gima rach moloyo.

14. Wang’eyo malong’o ni Chik Musa ber, nikech oa kuom Nyasaye. An to an mana dhano matho, moseng’iew modoko misumba richo.

15. Gik ma atimo odhiera, nikech ok atim gik ma adwaro ni mondo atim, to atimo mana gik ma ok adwar.

16. To ka atimo gik ma ok adwar timo kamano to mano nyiso ni ayie ni Chik ber.

17. To chutho ok an ema atim gigo, to richo modak e chunya ema timogi.

18. Ang’eyo ni an kaka dhano, onge gima ber man kuoma, nikech kata obedo ni adwaro timo gima ber, to ok anyal.

19. Gima ber ma adwaro timo ok atim, to gima rach ma ok adwar ema atimo.

20. To ka atimo gima ok adwar timo kamano to mano nyiso ni ok an ema atim gino, to richo modak kuoma ema time.

21. Koro gima asefwenyo en ni, ka adwaro timo gimoro maber, to richo kende ema arodhnogo.

22. E chunya maiye to amor gi Chik Nyasaye,

23. to e ringra anwang’oe chik machielo makedo gi chik ma chunya oyiego. Chikno omiyo abedo misumba richo modak e ringra.

24. Yaye! Mano kaka an ng’at machandore! Ng’ano ma biro resa e ringruok mar thoni?

25. Agoyo ni Nyasaye erokamano, nikech Yesu Kristo Ruodhwa ema biro resa! Kuom mano, aneno ni an awuon arito Chik Nyasaye mana gi parona kende, to e ngimana mar dhano to aluwo mana chik mar richo.

Luo Bible 2015