Beblia

Bible in one year September 10

1. Bang’e nyakwar Jesse moro nowuogi, mana ka bad yath maloth.

2. Roho mar Ruoth Nyasaye nobi kuome. En Roho makelo rieko gi ng’eyo, kendo ma ng’ado ni ji rieko, kendo miyo ji teko, bende en Roho ma puonjo ji luoro Nyasaye.

3. Ok nong’ad bura mana nikech gima oneno, bende ok nochiw parone mana nikech gima owinjo.

4. To nong’ad bura gi adiera ni joma odhier, kendo nochwak joma muol kaka owinjore. Dhoge ema nobed luth mogoyogo joma timbegi mono. Ee, wachne ema noneggo joricho.

5. Tim makare kod adiera nobed ka okanda motueyo e nungone, kendo adiera e misip ma notuego dende.

6. E ndalo lochne, otoyo nodag kaachiel gi rombe. Kwach bende nonind kaachiel gi diek, kendo nyaroya kod nyithi sibuor nodongi kaachiel, ma kata mana nyathi matin nokwagi akwaya.

7. Dhiang’ gi ondiek nobed osiepe, kendo nyithindgi nonind kanyakla. Sibuor nocham lum ka dhiang’,

8. kendo nyathi madhoth notug e dho bur thuond rai, bende rawera noso lwete asoya e bur thuond hu.

9. Onge gima nohiny ng’ato, kata ma noketh gimoro e gode maler duto, nimar joma ong’eyo Ruoth Nyasaye nopong’ piny, mana ka pi mopong’o nam.

10. E ndalogo, nyakwar Jesseno noketi ka ranyisi ni ji. Ogendini nobi ire, kendo dalane nobed gi duong.

11. E kindego, Ruoth Nyasaye norie bade mondo odwok joge manok modong’ mapod Asuria gi Misri ma nyandwat kod ma milambo gi ma Ethiopia gi Elam, gi Babulon gi Hamath, kod mag pinje manie dhonam.

12. Eka enoting’ bandera malo mondo obed ranyisi ni ogendini, mi ochok jo-Israel mane oriemb e pinygi, kendo ochok jo-Juda moke, kogolo e tung’ piny gi tung’ piny.

13. Nyiego mar jo-Israel nolal nono, kendo sadha mar jo-Juda norum. Adier, nyiego ok nomak jo-Israel gi jo-Juda, kendo jo-Juda ok nobed wasik jo-Israel.

14. Ginimonj jo-Filistia yo podho chieng’, kendo giniriwre kaachiel, mi giyak jo yo wuok chieng, kamano ginikaw piny Edom gi piny Moab, kendo jo-Amon bende nobed e bwogi.

15. Ruoth Nyasaye nomi Nam Makwar duon, eka norie lwete e aora Yufrate, mi okel yamo maliet ma opoggo aorano dibiriyo, mondo ji ong’ade ka otwo.

16. Kamano ndara nobedie ni jo-Ruoth Nyasaye manok, modong’ kuom joma ne oter Asuria mana kaka ndara nobetie ni jo-Israel kawuok Misri.

Isaya 12:1-6

1. Chieng’no unuwach niya, “A Ruoth Nyasaye wabiro paki! Kata obedo ni mirima osemaki kodwa, to koro oselendo, mi ikweyo chunywa.

2. Adier, Nyasaye e jareswa. Wan gi geno kendo ok waluor, nimar Ruoth Nyasaye e kar konyruokwa, kendo e okumbawa. Osenyiso ni en e jareswa.”

3. Kuom mano ubiro yudo gik mabeyo gi mor kuom Ruoth Nyasaye ma resou.

4. Chieng’no un duto unuwach niya, “Gouru erokamano ni Ruoth Nyasaye, kendo lameuru. Landuru ni ji duto gik mosetimo. Ka uhulo ni nyinge nigi duong’ moloyo.

5. Weruru ni Ruoth Nyasaye wende pak nikech oselocho, kendo mano nyaka ng’ere e piny duto.

6. Un joma odak Sayun, koguru gi mor, nimar Ng’ama Ler mar Israel odak e dieru gi duong’ne duto.”

Zaburi 106:6-18

6. Wasetimo richo kaka kwerewa notimo. Adier, wasebedo joricho ma timbegi mono.

7. Kwerewa ne ok owinjo tiend honni malich, mane Nyasaye otimo e piny Misri. Wigi ne owil gi timbe mathoth mane nyiso herane, mi ne gipiem kode e Nam Makwar.

8. To kata kamano, ne oresogi kaka ne osesingore, mondo onyisgo tekone maduong’!

9. Ne ogolo chik, mi Nam Makwar oduono, eka ne otelo ni joge mong’ade, mana ka gima en lowo motwo.

10. Kamano ne oresogi kuom jogo mane mon kodgi. Adier, nokonyogi e lwet wasikgi.

11. Pi noimo wasikgi ma onge kata achiel modong’.

12. Bang’e joge noyie ni wechene gin adier, mi giwerone wende pak.

13. To piyopiyo nono wigi ne owil gi gima ne osetimonigi, mi gichako gitimo gik moko ka pok gipenje mondo ong’adnigi rieko.

14. Wuoro ne omakogi e thim, mi gitemo Nyasaye ka gikwaye ring’o.

15. Kuom mano ne omiyogi, to kata kamano, ne okelonigi tho malich.

16. Kane pod gin e thim, nyiego ne omakogi gi Musa, kendo gi Harun, jatich mowal ni Ruoth Nyasaye.

17. Eka piny nobarore momwonyo Dathan, kaachiel gi Abiram kod joode.

18. Mach ne omwoch kuom joma ne luwogi, mi owang’o joma richogo pep.

Ngeche 25:3-5

3. Onge ng’ama ong’eyo chuny ruoth, nimar parone oyombowa mana kaka bor mar polo, kendo tut mar nam.

4. Ka ogol chilo kuom fedha, eka jatheth nyalo thedho gimoro maber gi fedhano.

5. Kamano bende kogol jong’ad rieko maricho e nyim ruoth, to lochne gurore motegno, nikech orito piny gi adiera.

2 Korintho 2:1-17

1. Mano emomiyo naneno ni ber mondo kik achak alimu kendo, ka limbenano dimiu chuny lit,

2. nikech ka amiyou chuny lit, to koro ere ng’ama dimiya mor, ka ok mana un ma asemiyo chuny litgo?

3. Mano emomiyo nandikonu baruano. Ne ok adwar biro iru mondo ayud chuny lit kuom joma onego miya mor, nimar ang’eyo malong’o ni ka amor to un bende umor uduto.

4. Ne andikonu ka chunya okuyo kendo chandore ahinya, kendo ka pi wang’a chuer mang’eny, to ok ni mondo amiu chuny lit, to mana ni mondo ung’e hera maduong’ ma aherougo.

5. Ng’at moro osekelo chuny lit, to ok an ema osemiya chuny litno, to mana machiegni un duto ema osemiyou chuny lit, ka ok adwar jimbo wach.

6. To kum ma jou mathoth osemiyo ng’atno oseromo,

7. omiyo koro onego uwene kethone, kendo uduog chunye, nono to kuyo malit ohewe.

8. Emomiyo akwayou mondo unyise ni uhere.

9. Mano emomiyo ne omiyo andikonu, mondo atemugo, ang’e ka un joma oyie winjo wach.

10. Ka uweyo ni ng’ato kethone, to an bende aweyone kethone, nikech kapo ni aweyo ni ng’ato kethone, to aweyone mana nikech un, kendo e nyim Kristo,

11. mondo Satan kik lowa, nikech wang’eyo riekone!

12. Kane achopo Troa mondo aland Wach Maber mar Kristo, ne ayudo ka dhoot oyaworena malach mondo ati ni Ruoth.

13. To chunya ne onge gi kue, nikech ne ok anwang’o owadwa Tito. Omiyo nagoyo oriti ni jokuno, mi achweyo Makedonia.

14. To wagouru ni Nyasaye erokamano nikech wan ma wan kuom Kristo, otelonwa pile koselocho, kendo komiyo walando wach man kuom Kristo kuonde duto, mana ka tik mang’ue ng’ar.

15. Wachalo gi ubani mang’ue ng’ar mar misango ma Kristo ochiwo ni Nyasaye, malandore e kind joma ireso kod joma lal.

16. Kuom joma lal en tik mar tho makelo tho, to kuom joma ireso to en tik mar ngima. Koro ere ng’ama nyalo gik ma kamago?

17. Wan ok wachal gi ji mathoth makonyore gi Wach Nyasaye e yo ma ok kare, mondo oyudgo ohala. Ooyo, wan joma Nyasaye oseoro, omiyo wawuoyo e nyim Nyasaye gi adiera ka joma ni kuom Kristo.

Luo Bible 2015