Beblia

Bible in one year September 13

1. Ma e wach mane Nyasaye onyiso e fweny kuom Damaski: Damaski biro kethore chuth, mi ute mukre kendo dhurre pidhe pidhe.

2. Ji ok nodag e mier mage nyaka chieng’, kendo miergo nodong’ mana kuonde ma jamni kwayoe mos ma onge gima thaggi.

3. Piny Israel ok nochak oobed gi dala mochiel motegno, bende Damaski ok nochak obed gi ruoth, kendo jo-Aram manok modong’ noneg duto, nimar duong’gi nolal nono, mana kaka duong’ mar Israel biro lal. Mago e weche mag Ruoth Nyasaye Manyalo Gik Moko Duto.

4. E ndalogo, duong’ mar Israel nomich matin, mana ka ng’at ma tuo ochamo dende, kendo chue ma yande ochuego olal nono,

5. kata ka tiang’ cham moseka. Adier, piny Israel nojwang’ mana ka puothe cham moseka e Holo Rafaim, kendo ma johulo osehuloe.

6. Joge manok kende ema nodong’, mana kaka olembe manok kende ema dong’ e yath kosepon. Olembe ariyo kata adek nyalo dong’ e bede yath man malo midimidi, to ang’wen kata abich nyalo dong’ e bedene moyarore gi piny. Mago e weche Ruoth Nyasaye Manyalo gik Moko Duto.

7. E ndalogo, ji nopar Nyasaye ma jachuechgi, kendo ginigen kuom Ng’ama Ler mar Israel.

8. Ok ginichak giket genogi kuom kende-mag-liswa, ma lwetgi ema oloso, kata kuom gimoro amora ma gin giwegi ema giseloso, bed ni en sirni milamo, kata kende mag ubani.

9. E ndalogo miechu mochiel motegno nodong’ nono, mi kethre, mana ka miech jo-Hivi gi jo-Amor mane giweyo ka jo-Israel obiro.

10. Mano notimre nimar wiu ne owil gi Nyasaye mane oresou. Adier, ne ok uparo lwanda ma en kar konyruoku. Emomiyo, kata ka upidho cham mabeyo mondo umigo nyisecheu manono duong’,

11. bende kata obedo ni umiyo chamgo twi mana chieng’ ma upidhogieno, mi kinyne githiew, to unuka mana chandruok kod rem ma ok rum!

12. Winjuru! Mano e koko mar ogendini mang’eny, gimor mana ka nam ma wuo! Chikuru itu! Donge uwinjo kaka ogendini mwomore, gimwomore mana ka apaka madongo!

13. To Nyasaye biro kwerogi, mi giring gidhi mabor, mana ka mihudhi mipiedho e gode, kendo ma yamo tero, kata ka buru ma kalausi keyo.

14. Kihondko nomak jo-Israel godhiambo, gokinyi to wasikgi norum pep! Mano e pok mowinjore gi joma yakowa.

Isaya 18:1-7

1. Nitie piny moro loka aora mag Ethiopia, ma yiedhi ng’enyie.

2. Pinyno oro joote kaluwo aora Nael gi yiedhi mohondhi gi odundu. Un joote ma jong’wech, doguru ir jou, gin ji maboyo kendo ma dendgi poth, ma ji oluoro kuonde duto. Gin ji marateke, maloyo ogendini mamoko, kendo ma pinygi aore opogo opogo.

3. Un ji duto modak e piny, unune koting’ bandeche lweny malo ewi gode, kendo unuwinj ka tung’ ywak.

4. To Ruoth Nyasaye nosewachona kama: “Abiro rango piny gie polo kar dakna, ka ayueyo mos, mana kaka piny kue mos ka chieng’ liet, kata ka tho omoko gokinyi e ndalo keyo.

5. Ananeg joma dwaro monjou ka pok gichopo, mana ka ng’ama ng’ado bede mzabibu gi ratong’ e kinde ma keyo podi, ma mzabibu osemoyo, kendo olembgi chiegni chiek,

6. ringregi duto nodong’ ni winy mae gode, mondo ocham e ndako oro, kendo ni ondiegi mondo ocham e ndalo chwiri.”

7. E ndalogo, ogandano noter chiwo e nyim Ruoth Nyasaye Manyalo Gik Moko Duto. Gin ji maboyo ma dendgi poth, ma ji oluoro kuonde duto. Gin ji marateke, maloyo ogendini mamoko, kendo ma pinygi aore opogo opogo. Ginikel chiwogo e got Sayun, kama ji lamoe Ruoth Nyasaye Manyalo Gik Moko duto.

Zaburi 106:32-39

32. Jo-Israel nomiyo Nyasaye mirima e sokni mag Meriba, kendo gima ne gitimono nokelo ni Musa chandruok.

33. Ne gimiyo iye owang’, mi ochadho wach.

34. Ruoth Nyasaye nosechikogi mondo gineg ogendini mokiewo kodgi,

35. to kar timo kamano, ne gikendore akenda kodgi, mi giluwo timbegi.

36. Kuom mano jo-Nyasaye nolamo kido mag nyiseche manono, mi mano nolokorenigi obadho.

37. Ne gichiwo yawuotgi gi nyigi ka misengni ni nyiseche mag jopinje mamoko nono.

38. Adier, ne gichwero remb yawuotgi gi nyigi ma onge ketho ka gichiwonigi ni nyiseche manono mag Kanaan, mi piny nodoko mogak nikech remo ma nochuerno.

39. Gin bende ne gidoko mogak gi timbegi modwanyorego, mi giweyo luwo Nyasaye.

Ngeche 25:11-12

11. Wach mowachi maber e kinde mowinjore chalo gi gimoro maber, molos gi dhahabu, moket ei adita mochue gi fedha.

12. Siem ma ng’at mariek siemogo ng’at ma chiko ite, ber moloyo tere mar dhahabu, kata tigo molos gi dhahabu.

2 Korintho 5:1-21

1. Wang’eyo ni ka ringrewa, ma en kiru mwadakie e pinykani, omuki, to wan gi ot ma Nyasaye osegeronwa e polo. En ot mosiko nyaka chieng’, ma ok oger gi lwet dhano.

2. Adier, ka pod wan e kiru ma wan-go e pinykani, to wachur kwagombo mondo warwakre gi odwa manie polo,

3. nikech kwarwakore kode to ok noyudwa ka wan duge.

4. Ka pod wan e kiru mae pinyni to wachur ka ting ohewowa. To mano ok onyiso ni wadwaro lonyo ringrewa mar pinyni oko. Ooyo, wadwaro mana rwako ringrewa manyien manie polo, mondo ngima mochwere omwony mano matho.

5. Mano e gima omiyo Nyasaye nochweyowa, kendo osemiyowa Roho kaka mich mokwongo mar gueth mwabiro yudo achien.

6. Kuom mano, wan gi chir pile, nikech wang’eyo ni, kapod wadak e ringruok e pinyni, to ok wadak kanyachiel gi Ruoth.

7. Yie ema telonwa, to wengewa ok telnwa.

8. Awacho ni wan gi chir, kendo daber kwaweyo dak e ringruok, mi wadhi wadak gi Ruoth.

9. Emomiyo, kata ka wan ka, kata ka waonge, to waketo chunywa kuom bedo malong’one,

10. nikech waduto nyaka wachung’ e nyim kom bura mar Kristo, mondo ng’ato ka ng’ato oyud pok moromo gi gik mabeyo kata maricho mane otimo kapod en e ringruok.

11. Wang’eyo ni tiend luoro Ruoth en ang’o, emomiyo wayuayo ji. Nyasaye ong’eyo chutho ngimawa kaka chal, kendo ageno ni un bende ung’eyowa maber e chunyu maiye kaka wachal.

12. Ok watem mondo wachak wapakrenu kendo, to wamiyou thuolo mondo ubed gi mor nikech wan, kendo mondo ubed gi gima unyalo dwokogo jogo mapakore nikech gik moko, to ok nikech gik mag chuny.

13. Ka neko omakowa, to en nikech Nyasaye, to ka parowa ni kare, to en nikech un,

14. nimar hera mar Kristo oloyowa chuth. Waseng’eyo malong’o ni ng’at achiel notho ni ji duto, omiyo ji duto bende ne otho.

15. Ne otho ni ji duto mondo ji mangima kik bed mangima kagiparo mana gin giwegi, to gibed mangima mana ka gitiyo ni Jal mane othonigi kendo ochier nikech gin.

16. Omiyo koro ok wanon tim ng’ato e yo ma dhano nonoe. Kata obedo ni ne wang’eyo Kristo e yorno, to koro ok wang’eye kamano.

17. Ka ng’ato obedo kuom Kristo to ochueye ng’ama nyien. Gik moko duto machon osekadho, kendo gik manyien osechopo.

18. Mago duto a kuom Nyasaye. En owuon ema ne omiyo wawinjore kode kuom Kristo, kendo nomiyowa tich mar kelo winjruok e kinde gi ji mamoko bende,

19. kwanyisogi ni Nyasaye nomiyo piny owinjore kode kuom Kristo, ka ok okwan ni ji richogi. Wan ema ne Nyasaye omiyowa wach winjruokni.

20. Omiyo wan joote Kristo, kendo Nyasaye owuon ema wuoyonu gi dhowa. Wasayou e nying Kristo ni mondo uwinjru gi Nyasaye.

21. Kristo ne onge gi richo kata matin, to Nyasaye notime richo nikech wan, mondo kuom en wabed joma kare kaka Nyasaye.

Luo Bible 2015