Beblia

Bible in one year September 24

1. E ndalo Merodak-baladan wuod Baladan, ma ruodh Babulon, nooro joote ir Hezekia gi barupe kod mich, nikech ne owinjo ni yande otuo, to koro osedoko mangima.

2. Hezekia norwako jootego, monyisogi mwandune duto mane ni e ode mar keno, kaka fedha gi dhahabu gi gik mang’ue ng’ar, gi mo ma nengone tek kod gilweny, kaachiel gi gik moko duto mane ni kuonde kanone. Onge gimoro amora e ode kata e pinye mane ok onyisogi.

3. To bang’e janabi Isaya nobiro ir ruoth Hezekia, mopenjee niya, “Jogi oa kanye? To wach ang’o mokelogi?” Hezekia nodwoke ni, “Gia e piny Babulon, kuma bor.”

4. Janabi Isaya nomedo penje niya, “To ang’o ma gineno e odi?” Hezekia nodwoke ni, “Giseneno gik moko duto manie oda. Onge gimoro amora modong’ mak anyisogi e kuonde kenona.”

5. Bang’ mano Isaya nowacho ni Hezekia niya, “Winj wach Ruoth Nyasaye Manyalo Gik Moko Duto.

6. Ndalo biro ma gik moko duto manie odi, ma kwereni osekano nyaka chil kawuono, noter Babulon. Bende Ruoth Nyasaye omedo wacho ni onge gima nodong’ kata achiel mak oter.

7. Yawuoti moko nolok wasumbini. Adier moko kuom yawuoti hie nolok wasumbni mabuoch e od ruodh Babulon.”

8. Hezekia ne odwoke niya, “Wach Ruoth Nyasaye ma isenyisa ber.” To ne odwoke kamano, koparo ni en to kue biro siko e ndalone duto.

Isaya 40:1-31

1. Nyasachu wacho kama: “Houru chuny joga! Hogiuru!

2. Wuouru gi jo-Jerusalem gi muolo, kuwachonigi ni gisetieko ndalogi mag tuech, kendo ni osekumgi moromo. Ruoth Nyasaye osekumogi nyadiriyo kuom richogi duto.”

3. Dwol moro kok niya, “Losuru ni Ruoth Nyasaye yo e thim. Losuru ni Nyasachwa ndara mopie e piny motwo.

4. Hohni duto nobugi kendo gode duto nopie. Yore motimo gogni bende nobed maler, kendo kuonde motimo gode nobed pewe.

5. Eka duong’ maler mar Ruoth Nyasaye nofwenyre, mi ji duto nonene kaachiel, nimar Ruoth Nyasaye owuon ema owacho kamano.”

6. Dwol moro wacho niya, “Ting’ dwondi iwuo.” To moro dwoko ni, “Ere gima dawachi?” “Wach niya, ‘Dhano ka dhano chalo gi lum, kendo berne duto chalo gi maua manie pap.

7. Lum ner, kendo maua two, ka much Ruoth Nyasaye okudhogi. Chutho, dhano chalo gi lum.

8. Adier, lum two, maua bende ner, to wach Nyasachwa to osiko nyaka chieng’.’ ”

9. In mikelo ni Sayun wach maber, idh wi got mabor, kendo ikogi matek. Ee, in mikelo ni Jerusalem wach maber, ting’ dwondi, ikogi matek ka ok iluor, kiwacho ni miech Juda niya, “Eri, Nyasachu ni ka.”

10. Ng’euru ni Ruoth Nyasaye biro gi teko. Obiro loyo piny gi tekone maduong’ neuru, obiro gi joge mogonyo e lweny ka wuotho e nyime, ka gik moyako.

11. Ochalo jakwath ma sembo jambe, koting’o nyirombe e bade, kendo oriwogi e kore, kotelo ni mago man gi nyithindo, kotero modho.

12. En ng’a mane opimo pi nembe e chuny lwete, kata mane opimo duong’ mar polo gi lith lwete? En ng’a mane opimo lowo duto manie piny, kata mane opimo gode madongo gi matindo e ratil mak mana Ruoth Nyasaye?

13. Ere ng’at ma oseng’ado ni Ruoth Nyasaye rieko, kata mosechung’ e dire ka puonje?

14. Bende Ruoth Nyasaye osedwaroe rieko moro kuom ng’ato, kata dwaro ni mondo ng’ato opuonje adiera kod yore mabeyo? Ooyo, ok osetimo kamano,

15. nikech ogendini duto mag piny ok gimoro kipimo kode. Giromre mana gi pi maton kaa e dapi, kata ka buru momoko e ratil. Adier, chulni gi dhonembe duto yotne mana ka muya!

16. Yien duto manie piny Lebanon, kaachiel gi le duto man kuno, ok nyal romo timonego misango miwang’o pep.

17. Ogendini duto ok gimoro e nyime. Okwanogi ka gik manono ma onge tich.

18. En ng’a ma dipim gi Nyasaye? Koso ang’o ma diwachi ni chal kode?

19. Dochal gi kido ma ng’ato ochueyo, kendo ma jatheth dhahabu obawo gi dhahabu, mi othedhone thiwni mag fedha koso?

20. Koso dochal gi yien maber ma ok tow ma ng’ato oyiero, mi oluongo japecho molony mondo olosnego kido mopa ma ok nyal podho?

21. Donge ung’eyo, koso pok uwinjo,

22. ni Nyasaye obet e polo malo, kendo ni joma odak e piny chalone mana dede. Ok osewachnu kamano chakre chon? Koso pok uparo nyaka ne chue piny ni en ema ne oyaro polo mana ka pasia, kendo ogure mana ka hema midakie?

23. Odwoko ruodhi gi jotelo duto piny, mi lokre gima nono.

24. Ka okudho muya kuomgi, to giner, mi kalausi dhi kodgi mana ka mihudhi, nimar gichalo gi kodhi mokom machiegni, ma tiendegi pok ochwowo lowo.

25. Ng’ama Ler penjo niya, “To koro en ng’a ma duporago? Koso ere ng’ama dirom koda?

26. Ting’uru wengeu malo e polo, mondo upar ane ng’ama ne ochueyo gigo duto. Donge en mana Jal mane otelo ni oganda mar sulue, ka oluongo moro ka moro gi nyinge, mana ka gima en jaduong’ lweny motelo ni jolwenje? Tekone maduong’ malich omiyo onge kata mana sulue achiel ma ok ochung’ kare.

27. Un jo-Israel ma nyikwa Jakobo, ere gima omiyo ung’ur, kuwacho niya, “Ruoth Nyasaye ok ne yorewa, kendo ok ong’adnwa bura maber”?

28. Donge ung’eyo, koso pok uwinjo, ni Ruoth Nyasaye ma Nyasaye mochwere, kendo ma Jachuech piny malichni duto, ok ol, kendo ok nyosre? Parone tut, ma odhiero dhano ng’eyo.

29. En ema omiyo joma ool teko. Adier, omedo muya ni joma tekogi orumo.

30. Joma tindo nyalo ol, mi nyosre, kata mana yawuowi mopong’ bende nyalo chwanyore, mi podhi.

31. To joma ogeno kuom Ruoth Nyasaye, tekogi noduogi. Ginihu ka ongo, mana ka gima gin gi buombegi, kendo giniringi, to ok giniol, bende giniwuothi, to tekregi ok norum.

Zaburi 109:21-25

21. Ruoth Nyasacha, konya kaka ne isesingori, kendo resa nikech herani maber.

22. Adhier, kendo an jachan. Chunya chandore malit ahinya.

23. Achiegni lal nono ka tipo makadho. Adier, ahungora mana ka yamo mahungo bonyo.

24. Chongena onyosore nikech achando chiemo, kendo denda odhero marach.

25. Ka ji onena, to gigoyona siboi. Gitwenyo umgi ka gijara.

Ngeche 26:2-2

2. Kuong’ ma onge gima omiyo ok nyal mako ng’ato. Gikadho akadha ka winy mahuyo e kor polo to ok pi.

Galatia 2:1-21

1. Bang’ higni apar gang’wen, ne achako adok Jerusalem, ka wan gi Barnaba, kendo Tito bende ne wadhigo.

2. Ne adhi nikech Nyasaye nonyisa ni mondo adhi, mi achokora gi jodong kanyakla mar jo-Kristo kar kendgi, kendo nanyisogi Wach Maber ma alando ni joma ok jo-Yahudi, nimar ne ok adwar ni mondo tich mane asebedo ka atiyo, kata mapod atiyo, obed kayiem nono.

3. To kata mana Tito mane jawuodha ne ok ochun mondo oter nyangu, kata obedo ni ne ok en ja-Yahudi kamano.

4. To mak mana jomoko mane obiro kanyo kawuondore ni gin owete, ema ne dwaro ni mondo otere nyangu. Jogo ne obiro ling’ling’ mondo ocher ane ni thuolo manade ma wan-go kuom bedo jo-Kristo, nikech ne gidwaro lokowa wasumbni.

5. To ne ok wayie winjo wachgi kata matin, mondo adiera mar Injili kik lalnu.

6. To jogo mane onenore ka jotelo ne ok omiya wach moro manyien. (Awacho ni ne ginenore ka jotelo, nikech ok adewo gima gin, nimar Nyasaye ok odewo nenruok maoko mar dhano.)

7. Kar kelo wach moro manyien, to ne gineno ni Nyasaye osemiya tich lando Injili ni joma ok jo-Yahudi, mana kaka nomiyo Petro tich lando Injili ni jo-Yahudi.

8. Ne giyie ni Nyasaye mane omiyo Petro teko mar bedo jaote ni jo-Yahudi, ema bende ne omiya teko mar bedo jaote ni joma ok jo-Yahudi.

9. Kuom mano, Jakobo gi Petro kod Johana, ma ji oyiego ni jotelo mag kanyakla mar jo-Kristo, nong’eyo mich mane Nyasaye osemiya kuom ng’wonone, mi gimako lwet Barnaba kod lweta kaka ranyisi ni wariwore kodgi e tich. Ne wawinjore waduto ni wan wadhi ir joma ok jo-Yahudi to gin gidhi ir jo-Yahudi.

10. To ne gidwaro mana ni mondo wapar jochan, ma en gima an bende ne aseketo chunya ahinya mondo atim.

11. To kane Petro obiro Antiokia, ne akwere mana e wang’e, nikech kethone ne nenore ratiro.

12. Ne othoro chiemo gi owete ma ok jo-Yahudi, kane pok jomoko moa kuom Jakobo obiro, to kane jogo obiro, to nong’wony moweyogi, nikech noluoro joma ne dwaro mondo oter joma ok jo-Yahudi nyangu.

13. Jo-Yahudi moko mane ni kuno bende noriwore kode e ndhogruok ma kamano, mi kata mana Barnaba bende ne ndhogruokgino oywayo!

14. To kane aneno ni timgino ok oluwore gi adiera mar Injili, ne awacho ni Petro e nyimgi duto niya, “In, in ja-Yahudi, to iluwo tim joma ok jo-Yahudi, koro marang’o ichuno joma ok jo-Yahudi mondo olu tim jo-Yahudi?”

15. Chutho, wan wawegi nonywolwa jo-Yahudi, kendo ok wan joogendini mamoko ma joricho.

16. To kata kamano, wang’eyo ni mako Chik Musa ok nyal miyo ng’ato bed e winjruok gi Nyasaye, to mana yie kuom Yesu Kristo ema miyo ng’ato bedo e winjruok gi Nyasaye. Wan bende waseyie kuom Kristo Yesu, mondo wabed e winjruok gi Nyasaye kuom yie, to ok kuom mako Chik, nimar Muma wacho ni, “Onge ng’ama nyalo bet e winjruok gi Nyasaye kuom mako Chik.”

17. To ka wadwaro ni mondo wabed e winjruok gi Nyasaye kuom Kristo, to eka pod iyudo ni wan joricho mana kaka joma ok jo-Yahudi, koro uparo ni mano nyiso Kristo konyo tich richo koso?

18. Ng’ang’! Ka achako luwo yor Chik ma en yo ma aseweyo chuth ni onge gi tich, to mano nyiso ni an jaketh Chik!

19. Korka Chik to an ng’ama otho, ma Chik owuon ema onego, mondo obed mangima ni Nyasaye. Ne ogura gi Kristo e msalape,

20. mi koro ok an ema angima, to Kristo ema ngima e iya, kendo ngima ma koro an-goni, an-go mana nikech yie ma ayiego kuom Wuod Nyasaye, mane ohera, mi ochiwo ngimane nikech an.

21. Ok adwar miyo mich ma Nyasaye ochiwo kuom ng’wonone obed kayiem nono. To ka en adier ni mako Chik ema miyo ng’ato bedo e winjruok gi Nyasaye, to kara Kristo notho kayiem nono!

Luo Bible 2015