Bible in one year - Motingʼo Loko Manyien

Bible in one year February 14

1. Negiloso lep dolo momin gi law mayom marambulu gi maralik kod marakwaro ma itiyogo e kama ler mar lemo. Bende negiloso lewni mopwodhi ne Harun kaka Jehova Nyasaye nochiko Musa.

2. Negiloso law mayom mar dolo miluongo ni efod gi dhahabu kod usi marambulu gi maralik kod marakwaro momin gi law mayom.

3. Ne githedho dhahabu marep-rep kendo ne gilire matindo tindo mondo olosgo law marambuluno gi maralik kod marakwaro kolose gi jatwengʼo molony.

4. Negiloso okanda ariyo mag gok mitweyogo law efodno e kondene gi yo ka nyime kod yo kangʼeye.

5. Okandane mochwe maber ne chalo kode kolose obedo gimoro achiel gi law mayom mar dolo miluongo ni efod bende nyaka lose gi dhahabu kod law momin mayom man-gi range marambulu gi maralik kod marakwaro kaka Jehova Nyasaye nochiko Musa.

6. Ne giketone kite mag oniks e yo michanogo dhahabu kendo negikedogi kaka ikedo kido ka gindiko nying yawuot Israel kuome.

7. Eka negitweyo kitego e lep akor mag law mayom mar dolo miluongo ni efod mondo gibed kaka kite mag rapar ne nyithind Israel kaka Jehova Nyasaye nochiko Musa.

8. Ne gitwangʼo law akor e yo ma jatwengʼo molony twengʼogo ka olose gi dhahabu kod usi marambulu, gi maralik kod marakwaro kod law mayom mar katana kendo momin maber ka law mayom mar dolo miluongo ni efod.

9. Noromre duto ka borne gi lachne romo bat achiel kendo nobane nyadiriyo.

10. Eka negichano laini angʼwen mag kite ma nengogi tek kuom lawno. Laini mokwongo ne gichane kite kaka rubi, topaz gi beril;

11. e laini mar ariyo ne ochanie kite kaka tarkus, gi safir kod emerald,

12. to e laini mar adek ne gichane kite kaka jasinth, gi agat kod amethist

13. kendo e laini mar angʼwen ne gichane kite kaka krisolit gi oniks kod jaspa. Kidigo duto negichano kaka thiwni mag dhahabu.

14. Kitego duto nondikie nying yawuot Israel apar gariyo, ka okedgi kaka kido ka moro ka moro ochungʼ ne nying dhout Israel apar gariyogo.

15. Bende negilosone law akor thiwni mokedi mag dhahabu maler machalo kaka tol.

16. Ne gilose kaka ichano dhahabu kod chumbe molworore ariyo mag dhahabu mi gitweyo chumbe molwororego e riak law mar law akor.

17. Negitweyo thiwni ariyogo mag dhahabu e ratege mantie e riak law akor,

18. kendo negitweyo lak thiwnigo komachielo e laini ariyo mochan kaka dhahabu ka gichomego e tond law akor kuom law mayom mar dolo miluongo ni efod gi yo ka nyime.

19. Negiloso ratege ariyo mag dhahabu mi gichomogi e konde ariyo mamoko mag law akor gi yo ka iye e riake kama otwangʼ-go law mayom mar dolo miluongo ni efod.

20. Eka negiloso ratege ariyo mag dhahabu mi gichomogi e riak tonde ariyo mag gok yo ka nyime mar law mayom mar dolo miluongo ni efod machiegni gi kama oriwego but nungone.

21. Negitweyo ratege mag law akorno kuom ratege mag law dolo miluongoni efod gi tol e yo nungone mondo law kik gonyre kuom law efod kaka Jehova Nyasaye nochiko Musa.

22. Negiloso kandho marambulu mirwakogo law dolo mar efod, ma en tij jatwengʼo molony,

23. ka en gi otuchi e diere kaka ngʼut law kendo notwangʼ ngʼuteno gi pien mondo kik oyiechi.

24. Negiloso gik mongʼinore kaka olemo molos gi usi marambulu gi maralik, law momin mayom e riak lawno.

25. Bende negiloso gara kaka okode mag dhahabu maler mi gilierogi e riak aroyano ka gikikore gi gik mongʼinore kolemo.

26. Garago gi gik mongʼinore kolemogo nokikore e riak lawno alwora mondo orwake kitimo tich dolo kaka Jehova Nyasaye nochiko Musa.

27. To negilosone Harun kod yawuote kandho mar law mayom mar katana, ma en tij jatwengʼo molony,

28. kendo ne gilosonegi kilemba motwangʼ gi law mayom mar katana gi ogute kaachiel gi sirwaru maiye,

29. kod okanda mayom mitweyo marambulu gi maralik kod marakwaro kaka Jehova Nyasaye nochiko Musa.

30. Negiloso gima opadore ka san gi dhahabu maler mondo obed osimbo maler mi gindiko kuome ni: Kama owal ne Jehova Nyasaye.

31. Eka ne gitweye gi tol marambulu e kilemba kaka Jehova Nyasaye nochiko Musa.

32. Koro tich duto mar Hemb Romo norumo. Jo-Israel notimo gik moko duto mana kaka Jehova Nyasaye nochiko Musa.

33. Eka negikelo hemb romono ir Musa: Ne en hema kod gigene duto gi ramakine gi sirnine gi bepene miriwo kod sirni gi rachungigi;

34. kod raum mag pien rombo molok makwar gi raum mar piende monyongʼ mayom mag le mag nembe kod pasia migengʼego;

35. kod Sandug Muma gi ludhene gi raum mar kar pwodhruok;

36. gi mesa kod gigene duto mag tich kod makati miketo e nyim Jehova Nyasaye;

37. gi rachungi mar taya molos gi dhahabu maler gi gigene duto kaka techene gi mo milielgo;

38. gi kendo mar misango mochwe gi dhahabu, gi mor pwodhruok, gi ubani mangʼwe ngʼar gi pasia molier e dhood hema;

39. kod kendo mar misango molos gi mula kaachiel gi singʼengene man kod ludhene, gi gik moko duto mitiyogo e kendono; gi karaya molos gi mula, kod rachungine;

40. kod pasia mag laru, gi sirnine kod rachungigi, kod pasia moumo kar donjo mar laru; loye mag laru gi tonde motwegigo, gi gik moko duto mar kar lemo ma en Hemb Romo;

41. gi lewni mochwe mag tij dolo mitiyogo e kama ler mar lemo ma gin lewni mag Harun jadolo kod lep yawuote ka gitiyogo kaka jodolo.

42. Jo-Israel nosetimo tije duto mana kaka Jehova Nyasaye nochiko Musa.

43. Musa ne onono tijno mi oneno ni negisetimo mana kaka Jehova Nyasaye nochiko. Omiyo Musa nogwedhogi.

Wuok 40:1-38

1. Eka Jehova Nyasaye nowacho ne Musa niya,

2. Chiel laru mar Hemb Romo, ma en Hemb Lemo maler chiengʼ mokwongo mar dwe mokwongo.

3. Ket Sandug Muma e iye kendo igengʼe gi pasia.

4. Kel mesa kendo ichanie gik moko duto monego bedi e wiye. Bangʼe ikel rachungi taya kendo imok teynige.

5. Ket kendo mar misango miwangʼoe ubani molos gi dhahabu e nyim Sandug Muma kendo iket pasia e dhood Hemb Romo.

6. Ket kendo mar misango miwangʼo pep e nyim dhood hekalu mar Hemb Romo;

7. bende ket karaya e kind Hemb Romo gi kendo mar misango mi iolie pi.

8. Bangʼe chielne laru alwora pasia bangʼe ilier pasia moro mondo ogengʼ dhoranga laru.

9. Kaw mor pwodhruok mondo ipwodhgo Hemb Romo kod gik moko duto mantie; iwale kod gigene duto kendo obiro bedo maler.

10. Eka iwir kendo mar misango miwangʼo pep kod gik moko duto mitiyogo e kendono, iwal kendo mar misangono to obiro bedo maler.

11. Wir karaya kod rachungine kendo iwalgi.

12. Kel Harun kod yawuote e dho Hemb Romo kendo ilwokgi gi pi.

13. Bangʼe rwak Harun gi lepe maler mag dolo, wire kendo wale mondo otina kaka jadolo.

14. Kel yawuote kendo irwaknegi kandho moro ka moro.

15. Wirgi mana kaka ne iwiro wuon-gi mondo mi gitina kaka jodolo. Wir margi biro miyo gibedo jodolo maga kuom tiengegi duto manyaka chiengʼ

16. Omiyo Musa notimo gik moko duto mana kaka ne Jehova Nyasaye ochike.

17. Kuom mano Hemb Romo nochungi chiengʼ mokwongo mar dwe mokwongo e higa mar ariyo.

18. Kane Musa ochungo Hema noketo rachungi kargi morwako bepe kendo ochungo sirni.

19. Eka noyaro hema ewi Hemb Romo mi oketo raum e wiye kaka Jehova Nyasaye nochike.

20. Nokawo Kite mag Rapar moketo ei Sanduk Muma; norwako ludhe e chumbe molworore mag Sanduk eka noyieyo raum e wiye.

21. Eka nokelo Sandug Muma ei Hemb Romo mogengʼe gi pasia kendo nogengʼo Sandug Muma kaka Jehova Nyasaye nochike.

22. Noketo rachungi taya ei Hemb Romo kochomo yo nyandwat mar oko mar laru,

23. kendo noketo makati miketo e nyim Jehova Nyasaye kaka Jehova Nyasaye nochike.

24. Noketo rachungi taya ei Hemb Romo komanyore gi mesa man yo milambo mar Hemb Romo

25. kendo noketo teyni kuome e nyim Jehova Nyasaye mana kaka Jehova Nyasaye nochike.

26. Musa noketo kendo mar misango molos gi dhahabu ei Hemb Romo e nyim pasia

27. mi nowangʼo ubani madum mangʼwe ngʼar kaka Jehova Nyasaye nochike.

28. Eka noketo pasia e dho Hemb Romo.

29. Noketo kendo mar misango miwangʼo pep machiegni gi dhood Hemb Romo mi nochiwoe misengni miwangʼo gi chiwo mag cham kaka Jehova Nyasaye nochike.

30. Noketo karaya mar logo e kind Hemb Romo gi kendo mar misango mi noolo pi e iye.

31. Kendo Musa gi Harun kod yawuote notiyo kode kaluoko lwetegi gi tiendegi.

32. Sa moro amora mane gidonjo e Hemb Romo kata kane gidhi machiegni gi kendo mar misango to ne gilwoko lwetgi gi tiendegi mana kaka Jehova Nyasaye nochiko Musa.

33. Eka Musa nochungo laru molworo Hemb Romo kod kendo mar misango mi noketo pasia e dhoranga laru. Omiyo Musa notieko tich.

34. Eka bor polo noumo Hemb Romo kendo duongʼ mar Jehova Nyasaye nopongʼo Hemb Romono.

35. Musa ne ok nyal donjo ei Hemb Romo nikech bor polo ne nitie kendo duongʼ mar Jehova Nyasaye nopongʼo kar lemo.

36. E wuodhe duto mag jo-Israel, e kinde moro amora ma bor polo ne oa ewi Hemb Romo negichako wuoth,

37. to ka bor polo ne ok otingʼore malo ne ok gichak wuoth nyaka chop odiechiengʼ motingʼore.

38. Kuom mano bor polo mar Jehova Nyasaye ne nitie ewi Hemb Romo godiechiengʼ, to mach ne nitie ei bor polono gotieno e nyim jo-Israel duto e wuodhegi.

Zaburi 22:16-21

16. Guogi oselwora; oganda mar joma richo oseketa diere, gisetucho lwetena gi tiendena.

17. Anyalo kwano chokena duto; ji ranga amingʼa kendo jara.

18. Ne gipogore lepa e kindgi giwegi kendo gigoyo ombulu ne nangana.

19. To in, yaye Jehova Nyasaye, kik ibed mabor koda. In e tekra, bi piyo mondo ikonya.

20. Res ngimana kuom ligangla, res ngimana e teko guogi.

21. Resa e dho sibuoche; resa e tunge jowi mager.

Ngeche 8:22-31

22. “Jehova Nyasaye nokwongo chweya kaka tichne mokwongo motelo ni tijene machon.

23. Noyiera aa chakruok manyaka chiengʼ, kapok piny kobetie.

24. Kapok nembe kobetie, nonywola kata ka sokni mopongʼ gi pi ne onge.

25. Nonywola ka gode madongo ne pok obedo kuonde ma gintie, bende ka gode matindo ne pod onge,

26. kapok ne ochweyo piny kaachiel gi pewene kata mana lowo mar piny.

27. Ne antie kane oketo polo kama entie, kata kane oketo giko mar nembe,

28. kane oketo boche polo malo, kendo kane oketo sokni mag nembe mogurore motegno,

29. kane ochiwo kuonde giko mag nam matin mondo pi kik okadh kama oketee, kendo kane oloso mise mar piny.

30. Ne an jatich molony mobedo bute. Napongʼ gi mor mogundho odiechiengʼ ka odiechiengʼ kamor e nyime kinde duto,

31. ka amor e pinye mangima kendo ail gi ji duto.

Mathayo 27:1-26

1. Gokinyi mangʼich, jodolo madongo duto gi jodong oganda noporo wach ni mondo gineg Yesu.

2. Ne gitweye mi gitere nyaka ne gichiwe e lwet Pilato, mane en ruoth.

3. Ka Judas, ngʼat mane ondhoge oneno ka osengʼadne Yesu buch tho, luoro nomake mi nodwoko pesa mamingli mag fedha piero adek ne jodolo madongo gi jodongo,

4. kowacho niya, “Aseketho, nimar asendhogo remo maonge ketho.” To negidwoke niya, “Mano obadhowa e angʼo? Mano en wachni iwuon.”

5. Omiyo Judas nowito pesago ei hekalu bangʼe oa odhi. Eka nodhi modere.

6. Jodolo madongo nokwanyo ngʼinjo mag fedhago kendo giwacho niya, “Chik ok oyie mondo okan gini kar keno, nikech en pesa remo.”

7. Omiyo ne giporo wach mondo giti gi pesago kuom ngʼiewo puoth jachwe agulni mondo obed kama iyike jodak.

8. Mano emomiyo osebedo kiluongo kanyo ni puoth remo nyaka kawuono.

9. Eka gima Jeremia janabi nowacho niya, “Negikawo pesa mamingli mag fedha moromo piero adek, mane en nengo mane jo-Israel oketone,

10. kendo negitiyo kodgi kuom ngʼiewo puoth jachwe agulni, kaka Jehova Nyasaye nochika,” nochopo kare.

11. E thuolono Yesu nochungʼ e nyim ruoth, kendo ruoth nopenje niya, “In e ruodh jo-Yahudi koso?” To Yesu nodwoke niya, “Ee, en kaka iwachono.”

12. Kane jodolo madongo gi jodongo odonjone, ne ok odwoko gimoro amora.

13. Eka Pilato nopenje niya, “Donge iwinjo neno ma jogi donjonigoni?”

14. To Yesu nolingʼ alingʼa ma ok odwoke kata wach achiel mane odonjnego, kendo mano nomiyo ruoth owuoro ahinya.

15. To ruoth nohero gonyo ne oganda ngʼat achiel motwe e kinde mag sawo mar Pasaka.

16. E ndalono ne gin gi ngʼat motwe ma achach mane iluongo ni Barabas.

17. Omiyo ka oganda nosechokore kaachiel, Pilato nopenjogi niya, “En ngʼat mane mudwaro mondo agonynu: Barabas koso Yesu miluongo ni Kristo?”

18. Nimar nongʼeyo ni ich lit ema nomiyo giketo Yesu e lwete.

19. Kane oyudo Pilato obet e kom jongʼad bura, chiege nokowone wach niya, “Walri iaye wach ngʼat maonge kethono, nimar wachne nochanda ahinya kawuono e lek mane aleko kuome.”

20. To jodolo madongo gi jodongo mag oganda nojiwo oganda mondo Barabas ema gikwa ogonynegi to Yesu to mondo onegi.

21. Ruoth nopenjogi niya, “Kuom ji ariyogi, en ngʼa mudwaro mondo agonynu?” Negidwoke niya, “Barabas.”

22. Pilato nopenjogi niya, “To koro atim angʼo gi Yesu miluongo ni Kristo?” Negidwoke riat niya, “Gure!”

23. Pilato nopenjogi niya, “Nangʼo? En ketho mane mosetimo madimi gure?” To negimedo kok matek moloyo kagiwacho niya, “Gure!”

24. Kane Pilato oneno ni onge gima nonyalo timo, to ni mahu ema koro ne chakore, nokawo pi mi ologo e nyim ogandano, kowacho niya, “An aler kuom remb ngʼatni, en wachu!”

25. To ji duto nodwoko riat niya, “Rembe mondo obed e wiwa gi nyithindwa!”

26. Eka nogonyonegi Barabas, to Yesu to nogolo chik mondo ochwadi bangʼe nokete e lwetgi mondo gigure.

Luo Bible 2020

Muma Maler Mar Nyasaye, Motingʼo Loko Manyien™ Weg Loko © 1980, 2002, 2003, 2020 otim gi Biblica, Inc. MItiyo kode gi thuolo moa kuom Biblica, Inc. Biblica, Inc. nigi ratiro duto e piny mangima. Holy Bible, New Luo Translation™ Copyright © 1980, 2002, 2003, 2020 by Biblica, Inc. Used with permission. All rights reserved worldwide