1. Jordan thlang lam tlângrama awm te, tlâng bulṭhut rama awmte leh Mediteranean tuipui kama Lebanon tlâng thlenga awm Hit-ho lal te, Amor lal te, Kanan lal te, Periz lal te, Hiv-ho lal te, Jebus lal te chuan Israel-ho chakzia an lo hria a.
2. An inko khâwm a, Josua leh Israel-te chu lo beih rawn zai an rêl a.
3. Gibeon khuaa awm Hiv mite chuan Jeriko leh Ai khua Josuan a sawisak dân an hriat chuan,
4. finrâwl an thawh ve ta a. Palai ni âwm tak tak an insiam a, ip hlui tak hi sabengtung an phurhtîr a, an uain savun ip, hlui peh ver vurte chu bel ṭup a ni a,
5. pheikhawk hlui, bel ṭiam ṭuam an bun a, kawr hlui tak tak an ha a. An chhang kente chu a khirin a hmuar uar a.
6. Israel-te riahhmun Gilgal-ah chuan Josua an rawn pan a, a hnênah, “Ram hla tak aṭangin kan lo kal a, inremna thu i thlung ang u,” an ti a.
7. Israel mite chuan, “He lai hnaia mite in nih chuan thu kan thlunpui thei lo vang che u,” an ti a.
8. Josua hnênah, “I chhiahhlawh kan nih hi,” an ti a. Josua chuan, “Tute nge in nih? Khawi lam aṭanga lo kal nge in nih?” a ti a.
9. Anni chuan, “I chhiahhlawhte hi ram hla tak aṭanga lo kal kan ni. In Pathian, Lalpa chanchin kan lo hria a, Aigupta rama a thil tih hmingthang tak tak te,
10. Jordan râla Amor lal Sihona, Hesbon lal chungah te, Basan lal Astarot khua Oga chunga a thil tih te kan lo hria a.
11. Kan upate leh kan ram mite chuan, ‘Zan riak chaw keng ula, anni chu va hmu ula, in chhiahhlawh kan ni a, thu min thlunpui rawh u, va ti ang che u,’ min ti a.
12. Kan chhang kente hi kan lo chhuah tûk chuan a la lum thar thar a; tûnah zawng a khirin a hmuar tawh hi.
13. Kan savun ip tharte pawh a peh zo tawh a, kan thawmhnaw te, kan pheikhawkte pawh kan lo kal thui êm tawh avângin a hniar veng vung tawh a nih hi,” an ti a.
14. Israel mite chuan an chhang chu an lo eisak a. Lalpa an râwn lo.
15. Josua chuan ṭhiana inhmang tûrin thu a thlunpui a, tihhlum loh a tiam a, Israel pungkhâwmho hruaitute pawh chuan an tiam a.
16. Thu an tiam hnu ni thum lekah chuan chûng mite chu an ṭhenawm, an bul lawka awmte an ni tih an hre ta a.
17. Tichuan, Israel-hote chu ân insawn a, ni thum an kal a; chung mite awmna khua Gibeon te, Kafira te, Kiriat-jearim te chu an va thleng a.
18. Chûng mite chu Israel mite chuan an khawih thiang lo, Israel-te Pathian, Lalpa hmingin an hotute chuan thu an lo tiam tlat tawh si a. Pungkhâwmho chuan an hotute chu an dem hle a.
19. Hruaitute chuan pungkhâwmho hnênah, “Israel-te Pathian, Lalpa hming chhâlin thu kan lo tiam a, kan khawih a thiang tawh lo.
20. Kan thutiam avângin an nun kan zuah tûr a ni: chutilo chu, Pathian kut kan tuar ang.
21. Zuah ila, kan thing phurtuah leh tui chawitu-ah an ṭang dâwn nia,” an ti a.
22. Gibeon mite chu Josuan a ko va, “Kan bul hnai maia awm si, ram hla tak aṭanga lo kal kan ni tiin engtizia nge min bum le?
23. Hetianga in tih avângin Pathian ânchhia in dawng ta, Pathian ina tuah tûr thing phurtu leh tui chawitu atân chhiahhlawh in ni reng dâwn a ni,” a ti a.
24. Josua chu an chhâng a, “ Lalpa, in Pathian chuan a chhiahhlawh Mosia chu ram pum pui hi pe tûr che uin a ti a, in kalnaa awm apiang that vek tûrin a ti ngei bawk che u a. Chu chu kan lo hria a, kan hlau êm êm che u a, khati khân kan ti ta mai a nih kha, kan hlauh vâng che u a ni.
25. In kutah kan awm hi, ṭha in tih ang chuan min ti ang chu,” an ti a.
26. Josua chuan hetiang hian a ti ta a: anni chu a hum a, Israel-ten an thah a khap a,
27. bawihah a siam thung a. Israel mipuite leh Lalpa maichâm tâna thing phurtu leh tui chawitu-ah a dah ta a. Vawiin thleng hian amah an biakna tûr Lalpa hmun ruatah chuan chûng hna chu an thawk ta a ni.
1. Chutih lai chuan Jerusalem khaw lal chu Adoni-zedeka a ni a. Josuan Ai khua a lâk a, a tihchhiat vek thu te, Jeriko leh an lal a sawisak ang khân Ai khua leh an lal a sawisa tih thu te a lo hria a; Gibeon mite pawhin Israel-te nên inremna an nei a, an zîngah an tel ve ta tih te an lo hre bawk a.
2. Chuvângin, Jerusalem mite chuan an hlau hle a; Gibeon khua phei chu lal nei khaw dang tluk bawka tam an ni a. Ai khua ai pawhin an tam, indo pawh an thiam hle a ni.
3. Jerusalem lal Adoni-zedeka chuan Hebron lal Hohama te, Jarmut khaw lal Pirama te, Lakis lal Jafia te, Eglon lal Debira te chu thu a chah a.
4. “Lo kal ula, Gibeon-ho hi i bei teh ang, Josua leh Israel-te nên inremna an lo siam reng alâwm,” a ti a.
5. Amor-ho lal panga, Jerusalem lal te, Hebron lal te, Jarmut lal te, Lakis lal te, Eglon lal te chu an ṭang rual a, Gibeon khua chu an hual a, an bei ta a.
6. Gibeon mite chuan Gilgal-ah Josua hnênah zualko an tlântîr a, “I chhiahhlawhte hi thlahthlam teh suh, lo chho vat la, min han pui rawh,” an ti a.
7. Tichuan, Josua chu Gilgal aṭang chuan indo mi, mi huaisen rualte chu hruaiin a chho ta a.
8. Lalpa chuan Josua hnênah, “Huphurh suh, anni chu ka pe tawh a che; tu mahin an lo dang hauh lo vang che,” a ti a.
9. Gilgal aṭang chuan zankhuain Gibeon thlengin an kal a. Amor mite chu an bei ta thut a.
10. Amor mite chuan Israel-te an hmuh chuan Lalpan a tizâm a, Gibeon-ah chuan Israel-te chuan an that chiam a, a ṭhen chu Beth-horon kalkawngah an ûm thla a, chhak lamah Azeka leh Makeda thleng zakin an ûm a.
11. Kalkawnga an tlân laiin Lalpa chuan rial lian pui pui a dentîr a, Azeka thleng rawkin a dêng a. Israel-ho thah ai chuan rial dena thi chu an tam zâwk mah.
12. Lalpa chuan Israel mite chu Amor-ho a hnehtîr ni chuan Josuan Lalpa chu a bia a, Israel-te hriatah: “Chungtûrni, ding reng rawh, Gibeon chungah Chhawrthlapui, nang pawh Aijalon ruamah ding ve rawh,” a ti a.
13. Ni chu a ding a, thla chu a che bawk lo. An hmêlmate an sawisak nek hma chu. ‘Jasar lehkhabu’ an tihah chu thu chu ziak a ni. Vânlaizâwlah ni chu a ding a, ni khat hu lai a ding.
14. Chutiang khawpa mihring thu mai Lalpa chuan a zawm ni a la awm ngai lo, awm pawh a awm leh hek lo vang. Lalpa chuan Israel-te chu a dopui a ni.
15. Chûng hnu chuan Josua leh a hote chu an riahhmun Gilgal-ah an kîr leh ta a.
16. Amor lal panga kha an tlânchhia a, Makeda pûkah an biru a.
17. Josua hnênah, “Lal pangate kha kan hmu ta, Makeda pûkah an biru a ni,” an rawn ti a.
18. Josua chuan, “Pûk kawngka chu lung lian pui puiin chhîn ula, mi ṭhenkhat vêng tûrin dah rawh u.
19. Nangni erawh chuan hmêlmate chu tlân khalh ula, an khaw kulha an tlân lût tûr dang tlat rawh u, Lalpa, in Pathian chuan a hnehtîr che u hi,” a ti a.
20. Josua leh Israel-te chuan an hmêlmate chu an that chiam a, an that fai a ni deuh mai, an thah bâng tlêm chu an khaw kulhahte an tlân lût a.
21. Josua bûk khuarna Makeda-ah chuan a hote chu râlmuang takin an lo kal a; Israel-ho chu hnialkalh ngam rêng an awm lo.
22. Josua chuan, “Pûk kawngka kha hawng ula, lal pangate kha han hruai chhuak teh u,” a ti a.
23. Jerusalem lal te, Hebron lal te, Jarmut lal te, Lakis lal te leh Eglon lal te chu pûk ata an rawn hruai chhuak a.
24. Hêng lal pangate hi a hnêna an rawn hruai chuan Israel mite chu a ko khâwm a, a sipai hruai hotute hnênah chuan, “Lo kal ula, hêng lal pangate hi an nghâwngah rap rawh u,” a ti a. An lo kal a, an nghâwngah an rap a.
25. Josua chuan, “Hlau mah ta che u, zâm pawh zâm suh u, huai takin ṭang sauh sauh rawh u. Lalpa chuan in do apiang hetiang hian a tihsak dâwn che u asin,” a ti a.
26. Chumi hnu chuan lalte chu Josua chuan a that a, thing pangaah a khai a; tlai thlengin an ruang chu a inkhai a.
27. Ni a tlâk dâwnah an ruang chu a lâk thlâktîr a, an bihrûkna pûkah chuan a paihtîr a, pûk kawngka chu lung lian pui puiin an chhîn a, tûn thlengin a la awm.
28. Chumi ni chuan Makeda khua chu Josua chuan a bei a, a la a, an lal pawh a man a, khuaa mi zawng zawng chu Jeriko lal a thah ang khân a that a.
29. Josua chu Makeda aṭang chuan Israel-hote nên Libna-ah an kal a, khua chu an bei a.
30. Lalpa chuan chu khua leh an lal chu Israel-te kutah a pe a; khuaa mi zawng zawng chu an sât hlum a, tu mah nungdamin an chhuah lo. An lal pawh Jeriko lal an thah angin an that a.
31. Libna khua aṭang chuan Josua leh Israel-te chu Lakis khuaah an kal a, an hual a, an bei a.
32. Israel-te kutah Lakis khua chu Lalpan a pe a, a ni hnih ni-ah an la ta mai a. Libna khua an tih ang bawk khân khuaa mi zawng zawng chu a sât hlum vek a.
33. Gezer khaw lal Horama chu Libna khua pui tûrin a lo chho va, Josua chuan ani chu a sipaite nên a lo hneh a, pakhat mah hmaih lovin a lo that a.
34. Josua leh Israel-te chu Libna aṭang chuan Eglon khuaah an kal a, an hual a, an bei a.
35. Chumi ni vêk chuan an la a, chumi ni chuan mi awm zawng zawng an sât hlum phiar a, Lakis an sawisak ang bawk khân an sawisa a.
36. Josua leh Israel-te chu Eglon aṭang chuan Hebron khuaah an chho va, an bei a.
37. Khua chu an la a, chuta awm zawng zawng chu an lal nên lam an sât hlum a, an chhehvêl khuaa awmte pawh an sât hlum a. Eglon khua an tih ang khân Hebron pawh chu an tichhe vek a, tu mah nungdamin an chhuah lo.
38. Josua leh Israel-te chu an kir a, Debir khua an bei a.
39. Khua chu an la a, an lal chu an man a; an chhehvêl khuate pawh an la a. Chûnga awm zawng zawng chu an sât hlum vêk a, Josua chuan Debir khua leh an lal chu Libna khua leh an lal an tih ang khân a ti a.
40. Josua chuan ram chu a la ta vek a. Tlângram te, khawchhak tlâng pang te, khawthlang tlâng bulṭhut phai te, chhim lam ramte nên lam a la a, an lalte chu a hneh vek a, tu mah a zuah lo. Israel-te Pathian, Lalpa thupêk angin thaw thei tawh phawt chu a that vek a.
41. Kades-barnea aṭangin Gaza inkâr ram zawng zawng, Gosen ram pawh, Gibeon thlengin Josua chuan a la a.
42. Chûng rama lal zawng zawng leh an ram chu, Israel-te Pathian, Lalpa chuan a beihpui avângin ṭum khatah Josua chuan a la a ni.
43. Josua leh Israel-te chu an riahhmun Gilgal-ah chuan an haw leh ta a.
1. Aw Pathian, hmasânga anhun laia i thiltihte, Kan pi puten min hrilh a, Kan bengin kan hria.
2. I kutin hnam dangte chu i hnawt chhuak a, An hmunah anni chu i phun a, Mi dangte chu i tidarh a, Anni chu i tipung ta a.
3. Ram chu khandaiha an lâk a ni lo va, An chak avânga inhumhim an ni hek lo; I kut ding lam, i bân pharin i awmpui a, I duhsak êm avânga la an ni zâwk si.
24. Talhfiak hmang lo chuan a fa a hua a ni, A hmangaih chuan tuk tin zilh rawh se.
25. Mi dikte chuan kham tâwk ei tûr an nei ang a, Mi sualte chu an ril a ṭâm fo vang.
1. Chumi zawhah chuan Lalpan mi dang sawmsarih a ruat a, an kalna tûr khaw tinah leh hmun tinah lo kal hmasa tûrin pahnih zêlin a tîr a.
2. An hnênah, “Buh seng tûr a tam tehlul nên, thawktu lah an tlêm si. Chutichuan, a buh seng tûra mi tîr tûrin buh Neitupa dîl rawh u.
3. “Kal ta ula, chinghne zînga berâmno lût angin ka tirh che u hi.
4. Tangka ip te, iptê te, pheikhawk te keng suh u; kalkawngah tu mah chibai bûk hek suh ang che u.
5. In thlen in apiangah, ‘He inah hian thlamuanna thleng rawh se,’ ti hmasa zêl ang che u.
6. Chu inah chuan thlamuanna ngaina mi an lo awm chuan, in thlamuanna thu chu an chungah awm sela, an awm loh erawh chuan in hnênah lo kîr leh rawh se.
7. Chumi in hlîrah chuan chêng ula, an pêk apiang che u eiin in ang che u, hnathawktu chu hlawh hmu tlâk a ni. In hrang hrangah thleng lâwr suh u.
8. “Tin, khua in luhna apiangah an lo lawm che u chuan, an hlui che u apiang ei ula,
9. damlo awmte pawh tidam ula, an hnênah, ‘Pathian ram chu in hnênah a lo thleng ta,’ ti ang che u.
10. In luhna khuaten an lo ngaihsak loh che u chuan, in chhuahsan pahin an kawtlaiah,
11. ‘In khaw vaivut takngial pawh hi kan kai duh lo ve, kan kephah ata kan vuak fai hi; Pathian ram in hnênah a lo thleng ta tih erawh chu lo hre rawh u,’ in ti dâwn nia.
12. Ka hrilh a che u. Rorêl ni-ah chuan chu khaw tuar tûr ai chuan Sodom khaw tuar tûr chu a ziaawm zâwk ang.
13. “Nang Korazin, i chung a pik e. Nang Bethsaida, i chung a pik e; in zînga thil mak tihte kha Tura leh Sidona tih ni sela, saiip puan sina vaivut zîngah ṭhuin an simzia an tilang daih tawh tûr.
14. Rorêlnaah chuan in tuar tûr aiin Tura leh Sidon tuar tûr chu a ziaawm zâwk ang.
15. Nang pawh, Kapernaum, vân thlenga chawisân i ni dâwn êm ni? Mitthi khaw thlenga nam thlâk asin i nih dâwn!
16. “In thu awih chuan ka thu pawh an awih ang, a hnâwl che u chuan kei pawh mi hnâwl a ni; tin, kei mi hnâwltu chuan mi tîrtu pawh a hnâwl a ni e,” a ti a.
17. Sawmsarihte chu hlim takin an lo haw leh a, “Lalpa, ramhuaite pawh i hming avângin kan thu thuin an awm,” an rawn ti a.
18. Ani chuan an hnênah, “Vân ata ṭêk anga Setana tla ṭhuai kha ka lo hmu reng asin.
19. Ngai teh u, rûl te, khawmualkaikuang te, hmêlmapa chakna zawng zawngte rah beh theihna thu ka pêk che u hi, eng mahin a tina hauh lo vang che u.
20. Amaherawhchu, thlaraute in thu thu-a an awm avâng hian lâwm suh u, vâna in hming ziak a nih avângin lâwm zâwk rawh u,” a ti a.
21. Chumi lai tak chuan Thlarau Thianghlimah a lâwm ta êm êm a. “Aw ka Pa, lei leh vân Lalpa, nangin mi fingte leh mi thiamte lakah hêng thu hi i thup tlat a, mi mâwlte hnêna i puan avângin ka fak a che; a ni, ka Pa, chutiang chu ṭha i tih zâwng tak a ni.
22. Ka pain engkim mi kawltîr tawh; Fapa hi tu nge a nih Pa chauh lo chuan tu man an hre lo; Pa pawh chu tu nge a nih, Fapa leh an hnêna Fapain a puan duhnate chauh lo chuan tu man an hre lo,” a ti a.
23. Tin, a zirtîrte lam a hawi a,
24. Ka hrilh a che u, zâwlneite leh lal tam takte pawhin in thil hmuhte hi hmuh an lo duh ṭhîn a, an hmu si lo; in ngaihthlâkte hi ngaihthlâk an duh a; mahse, an ngaithla si lo,” a ti a.
Mizo Bible CL BSI 1995
Mizo (Lushai) C.L. Bible - PATHIAN LEHKHABU THIANGHLIM 1995 by The Bible Society of India