Bible in one year March 1Leviticus 26:1-461. На кэрэ́н пэ́скэ вычхудэ́ образы (кумиры) и вычхиндлэ́ муя́ (изваянии), и сты́лбы на чхувэ́н пэ́стэ, и бара́ вычхиндлэ́ муенца на чхувэ́н пэ тумари́ пхув, соб (кай) тэ на бандён анги́л лэ́ндэ, пал-дова́ Мэ сом Рай Дэвэ́л, тумаро́ Дэвэ́л.2. Ракхэ́н са́ваты (суботы) Мирэ́ и дэн паты́в кэ свэ́нто Миро штэ́то. Мэ сом Рай Дэвэ́л.3. Ко́ли тумэ́ явэ́на тэ кэрэ́н пир Мирэ́ упхэныбэна́, и Мирэ́ припхэныбэна́ явэ́на тэ ракхэ́н и тэ кэрэ́н пир лэ́ндэ,4. тэды Мэ да́ва тумэ́нгэ брышында дрэ пэ́скиро часо (цы́ро), и пхув дэ́ла пэ́скирэ барьякирдэ́ (пло́ды), и фэлды́тка вэша́ дэ́на пэ́скиро барьякирдо́ (пло́до);5. и укэдыибэн маритко явэ́ла тэ доджал тумэ́ндэ кэ винаградоскиро скэдыибэ́н, а винаградоскиро скэдыибэ́н явэ́ла тэ доджал кэ сеиныбэн, и явэ́на тэ хан пэ́скиро маро́ чалэ́с, и явэ́на тэ дживэ́н пэ тумари́ пхув штылыткэс (бидаракирэс).6. Мэ бичхава́ва рама́нё (миро) пэ тумари́ пхув, тумэ́ пасёна тэ совэн, и нико́н тумэн на страхакирэла, Мэ традава криг мижэхонэ рискирибна́скирэ мурдалэ́н (зверен) тумарэ́ пхувья́тыр, и курта́ла на проджа́ла пир тумари́ пхув.7. И тумэ́ явэ́на тэ традэ́н тумарэн вэргэ́н, и пэрэ́на ёнэ анги́л тумэ́ндэ куртала́тыр;8. И пандж тумэ́ндыр протрадэна шэл манушэ́н, и шэл тумэ́ндыр протрадэна бут вэргэ́н кэ калыпэ́н, и пэрэ́на тумарэ́ вэ́рги анги́л тумэ́ндэ куртала́тыр.9. Мэ подыкхава пэ тумэ́ндэ, и бутэ́-бияныбнытконэнца (плодороднэнца) Мэ кэра́ва тумэн, и Мэ бутырьякирава бут тумэн, и Мэ ява́ва твардо (би кунипнаскиро) дрэ Миро завето (доракирибэ́н) тумэ́нца;10. и тумэ́ явэ́на тэ хан пхурано́ явирэ-бэршытко, и вычхурдэна пхурано́ ваш нэво́:11. и Мэ чхува́ва Мири́ ша́тра (кхэр) машки́р тумэ́ндэ, и Миро дескэ тумэ́ на явэ́на джунгалэ́ (стэтка);12. и Мэ ява́ва тэ псирав машки́р тумэ́ндэ, и Мэ ява́ва тумарэ́ Дэвлэ́са, а тумэ́ явэ́на Мирэ́ мануша́.13. Мэ сом Рай Дэвэ́л, тумаро́ Дэвэ́л, Саво́ вылыджия́ тумэн Египто́скирэ пхувья́тыр, соб (кай) тумэ́ тэ на явэ́н одо́й писхарье́нца, и тэ пхагирав састыра́ тумарэ́ ґамостыр, и Саво́ лыджия́ тумэн заґаздынэ шэрэ́са.14. Ко́ли тумэ́ на кандэ́на Ман, и на явэ́на тэ кэрэ́н пир сарэ́ далэ́ припхэныбэна́,15. и ко́ли тумэ́ явэ́на тэ на прилэ́н патыва́са Мирэ́ упхэныбэна́, и ко́ли тумаро́ ди исын насвало́ (брыдинэлапэ) Мирэ́ законэндыр адя́кэ, со тумэ́ на явэ́на тэ кэрэ́н пир сарэ́ Мирэ́ упхэныбэна́, пхагири Миро завето,16. то тэды и Мэ кэра́ва тумэ́нца адя́кэ: Мэ бичхава́ва пэ тумэ́ндэ дар, насвалыпэн и хачкирибэ́н, савэ́ндыр кхинёна якха́ и нашавэла зор ди, и тумэ́ явэ́на тэ почхувэн дрэ пхув тумарэ́ зя́рки (семи) ивья́, и тумарэ́ вэ́рги схана лэн;17. и Мэ рискира́ва Миро муй пэ тумэ́ндэ, и тумэ́ пэрэ́на анги́л тумарэ́ вэргэ́ндэ, и намала тумарэ́ явэ́на хулая́ пэ тумэ́ндэ, и тумэ́ праста́на, ке́ли нико́н на явэ́ла тэ традэлпэ пал тумэ́ндэ.18. Ко́ли пир саро́ дава́ тумэ́ на кандэ́на Ман, то тэды Мэ эфта́ мо́лы кэра́ва барэды́р ка́ра пал тумарэ́ грэ́хи,19. и Мэ пхагирава пхутькирды тумари́ нартыма (упорство), и болыбэ́н тумаро́ упра́л кэра́ва, сыр састы́р, и пхув тумари́, сыр харко́ма (медь);20. и ивья́ (напра́снэс) явэ́ла тэ зджал тумари́ зор, и пхув тумари́ на дэ́ла пэ́скирэ чарьенгэ тэ барьён, и пхувья́кирэ вэша́ на дэ́на пэ́скирэ барьякирдэ́ (пло́ды).21. Ко́ли пало́ саро́ дава́ тумэ́ джа́на пэ Ма́ндэ, и на закамэна тэ шунэ́н Ман, тэды Мэ дочхувава тумэ́нгэ марибэ́н дрэ эфта́ мо́лы пал тумарэ́ грэ́хи:22. и Мэ бичхава́ва пэ тумэ́ндэ фэлдытконэ рискирибна́скирэ мурдалэ́н (зверен), савэ́ отлэна тумарэ́ чхавэ́н, хасякирэна тумарэ́ кхэритконэ́ мурдалэ́н (ското), и тумэн скэрэна тыкнэды́р, адя́кэ, со явэ́на чхучэ́ тумарэ́ дрома́.23. Ко́ли и пало́ дава́ Мэ на высыклякирава тумэн, и тумэ́ джа́на пэ Ма́ндэ,24. то тэды и Мэ джа́ва пэ тумэ́ндэ, и чхува́ва ка́ра пэ тумэ́ндэ дрэ эфта́ мо́лы пал тумарэ́ грэ́хи,25. и яна́ва Мэ курта́ла пэ тумэ́ндэ тэ отхал палэ пал завето; и ко́ли тумэ́ гарадёна дрэ тумарэ́ фо́рья, тэды Мэ бичхава́ва пэ тумэ́ндэ фра́нсы (фуя́), и отдынэ́ тумэ́ явэ́на дрэ вэргоскирэ васта́.26. А маро́, саво́ дэ́ла зор манушэ́скэ, Мэ хасякира́ва тумэ́ндэ; дэш джувля́ явэ́на тэ пэкэн тумаро́ маро́ дро екх бов, и явэ́на тэ отдэ́н маро́ тумаро́, важыны лэс; тумэ́ явэ́на тэ хан, и на явэ́на чалэ.27. Нэ ко́ли ишчо (инкэ́) и пало́ дава́ тумэ́ на кандэ́на Ман и джа́на пэ Ма́ндэ,28. тэды и Мэ дрэ холы́ джа́ва пэ тумэ́ндэ, и чхува́ва ка́ра пэ тумэ́ндэ дрэ эфта́ мо́лы пал тумарэ́ грэ́хи,29. и тумэ́ явэ́на тэ хан тумарэ́-чхавэнгири лоч (плоть), и лоч тумарэ́-чхаенгири явэ́на тэ хан;30. Мэ роспхагирава кэ пхув тумарэ́ вучипэна́, и роспхагирава тумарэ́ сты́лбы, и чхурдава тэлэ́ тумарэ́ тру́пы пэ тумарэ́-идолэнгирэ котэра́, и ячэ́на джунгалэ́ (брытка) тумэ́ Мирэ́ дескэ;31. а тумарэ́ форье́ндыр Мэ кэра́ва чхучи́ пхув, и скэрава чхучэ́ тумарэ́ кхангирья, и Мэ, на ява́ва тэ сунгавав гудло́ тхув тумарэ́ яныбнастыр.32. И Мэ кэра́ва тумари́ пхув чхучи́ адя́кэ, со дэнапэ дивоскэ пал ла́тэ тумарэ́ вэ́рги, савэ́ дживэ́на пэ ла́тэ;33. а тумэн росчхурдава Мэ тэ дживэ́н машки́р манушэ́ндэ и нангякирава пала́л пал тумэ́ндэ курта́ла, и явэ́ла пхув тумари́ чхучи́ и фо́рья тумарэ́ роспхагирдэ́.34. Тэды пхув чалякирэла пэс пал пэ́скирэ са́ваты (суботы) дрэ сарэ́ пэ́скирэ чхучипнаскирэ дывэса́; ке́ли тумэ́ явэ́на пэ тумарэ́-вэргэнгири пхув, тэды явэ́ла тэ откхинёл пхув, и чалякирэла пэс пал пэ́скирэ са́ваты.35. Ёй, пхув, явэ́ла тэ откхинёл дрэ сарэ́ пэ́скирэ чхучипнаскирэ дывэса́, ци бут ёй на откхиныя дрэ тумарэ́ са́ваты, ке́ли тумэ́ дживдэ́ пэ ла́тэ.36. Одолэ́нгэ, кон ячэ́лапэ тумэ́ндыр, Мэ бичхава́ва дрэ ило́ намуршыпэн пэ пхув лэ́нгирэ вэргэнгири, и шумо патренгиро (листэнгиро), саво́ кунинэлапэ, традэ́ла лэн, и тумэ́ праста́на, сыр куртала́тыр, и пэрэ́на, ке́ли нико́н на традэлапэ,37. и обштавэнапэ екх пэ екхэ́стэ, сыр куртала́тыр, на дыкхи́ пэ дава́, сыр нико́н на традэлапэ, и на явэ́ла тумэ́ндэ зор тэ тэрдён анги́л тумарэ́ вэргэ́ндэ;38. и хасёна тумэ́ машки́р манушэ́ндэ, и схала тумэн пхув тумарэ́ вэргэнгири;39. а кон яця́пэ тумэ́ндыр, явэ́на тэ хасён со дывэ́с пал пэ́скиро чорипэ́н пэ тумарэ́-вэргэнгири пхув, и пал пэ́скирэ-дадэ́нгиро чорипэ́н хасёна тумэ́.40. Нэ ко́ли ёнэ приґалёнапэ дро пэ́скиро чорипэ́н и дрэ пэ́скирэ-дадэ́нгиро чорипэ́н, сыр ёнэ ґаздынэ́пэ проти Ма́ндэ и гинэ́ пэ Ма́ндэ,41. пал со и Мэ гиём пэ лэ́ндэ и лыджиём лэн андрэ́ пэ лэ́нгирэ-вэргэнгири пхув; тэ́ньчи, сашты́, лэ́нгиро наобчхиндло ило́ ковлёла, и тэды ёнэ явэ́на тэ вырикинэн пал пэ́скиро чорипэ́н,42. то Мэ пририпирава Миро завето Яковоса, и Миро завето Исаакоса, и пририпирава Миро завето Авраамоса, и пхув пририпирава.43. То тэды сыр пхув явэ́ла ячкирды лэ́нца, и явэ́ла тэ чалякирэл пэс пал пэ́скирэ са́ваты, палдава́ яця́ чхучи́ (пусто) лэ́ндыр, и ёнэ явэ́на тэ вырикирэн пал пэ́скиро чорипэ́н, пал-дова́, со ёнэ на прилэнас патыва́са Мирэ́ зако́ны, и лэ́нгирэ дескэ сыс джунгалэ́ (брыдка) Мирэ́ упхэныбэна́,44. и тэды, сыр ёнэ явэ́на пэ лэ́нгирэ-вэргэнгири пхув, – Мэ на ява́ва тэ на прилав лэн патыва́са, и ёнэ на явэ́на джунгалэ́ Ма́нгэ кэ дава́, соб (кай) тэ хасякира́в лэн, соб (кай) тэ роскушав Миро завето лэ́нца, пал-дова́ со Мэ сом Рай Дэвэ́л, лэ́нгиро Дэвэ́л;45. Мэ пририпирава ваш лэ́нгэ завето лэ́нгирэ дадэ́нца, савэ́н вылыджиём Мэ Египто́скирэ пхувья́тыр анги́л манушэ́нгирэ якха́, соб (кай) тэ явав лэ́нгирэ Дэвлэ́са: Мэ сом Рай Дэвэ́л.’”46. Ѓа́да, исын упхэныбэна́ и стату́ты и зако́ны, савэ́ Рай Дэвэ́л чхудя́ машки́р пэ́стэ и машки́р Израилёскирэ чхавэ́ндэ пэ бэ́рга Синаё, пир Мойзастэ.Leviticus 27:1-341. И пхэндя́ Рай Дэвэ́л Мойза́скэ, ракири́:2. “Ра́кир Израилёскирэ чхавэ́нгэ и пхэн лэ́нгэ: ‘Кон совлахала тэ высвэнцынэл вари-конэ́скиро ди Ра́скэ-Дэвлэ́скэ пир тыри́ тими́н (цэна),3. то тыри́ тими́н муршэскэ бишэ́ бэршэ́ндыр кэ шовдэша́ исын банги тэ явэ́л пандждэша́ руповэ шэ́кели, пир шэ́келё свэнтонэскэ;4. ко́ли дава́ исын джувлы́, тэды тыри́ тими́н исын банги тэ явэ́л трия́нда шэ́кели;5. панджэ́ бэршэ́ндыр кэ биш бэрш тими́н тыри́ муршэскэ исын банги тэ явэ́л трия́нда шэ́кели, а джувля́кэ дэш шэ́кели.6. А чхонэстыр кэ пандж бэрш тими́н тыри́ муршэскэ исын банги тэ явэ́л пандж рупувэ́ шэ́кели, а джувля́кэ тыри́ тими́н трин рупувэ́ шэ́кели;7. шовдэшэ бэршэ́ндыр и пхурэды́р муршэскэ тыри́ тими́н исын банги тэ явэ́л дэшупандж рупувэ́ шэ́кели, а джувля́кэ дэш шэ́кели.8. Ко́ли ёв исын чороро́ и на дрэ зор тэ заплэскирэл пир тыри́ тими́н, тэды мэк тэ сыкавэ́н лэс раша́скэ, и раша́й мэк тэ дэл лэ́скэ тими́н (чол): ада́кицы, кицы́ исын мол исын манушэ́скиро барвалыпэ́н, саво́ дыя́ совла́х, мэк тэ дэл лэ́скэ тими́н раша́й.9. Ко́ли дова́ тэ явэ́н кхэри́тка мурдала́ (ското), савэ́н янэ́на дро свэ́нто дыибэ́н (жэ́ртва) Ра́скэ-Дэвлэ́скэ, тэды саро́, со дыно́ Ра́скэ-Дэвлэ́скэ, исын банго́ тэ явэ́л свэ́нто.10. Нашты́ тэ выпарувэн лэс и тэ запарувэс лачхо́ налачхэса ци на́лачхо лачхэса; ко́ли лэ́ла кон тэ запарувэл мурдалэс мурдалэса, тэды и ёв и лэ́скиро запаруибэн явэ́ла свэ́нто.11. Ко́ли дова́ явэ́ла вари-саво́ нажужо мурда́л, савэ́с на янэ́на Ра́скэ-Дэвлэ́скэ дро свэ́нто дыибэ́н, то дова́ трэй тэ сыкавэ́н раша́скэ,12. и раша́й дэ́ла тими́н лэ́скэ, ци лачхо́ ёй ци на́лачхо, и саво́ дэ́ла раша́й тими́н, адя́кэ и трэй тэ явэ́л.13. Нэ ко́ли вари-кон (хула́й) камэ́ла тэ выкинэл лэс, тэды мэк тэ дочхувэл па́нджто паш кэ тыри́ тими́н.14. Ко́ли кон отдэ́ла пэ́скиро Кхэр Ра́скэ-Дэвлэ́скэ дрэ свэнтыма, тэды раша́й исын банго́ тэ дэл тими́н лэ́скэ, адя́кэ и явэ́ла.15. Ко́ли ману́ш, саво́ отдыя́ пэ́скиро кхэр, закамэ́ла тэ выкинэл лэс, тэды мэк ёв тэ дочхувэл па́нджто рупэскири паш тырэ́ тиминакэ, и тэды явэ́ла лэ́скиро.16. Ко́ли вари-кон пэ́скирэ хулаибнастыр отдэ́ла фэ́лда Ра́скэ-Дэвлэ́скэ, тэды тыри́ тими́н трэй тэ явэ́л пир сеиныбнаскири тими́н: пал сеиныбэн хомеро ґэрсто (ячменё) пандждэша́ шэ́кели рупэ́са.17. Ко́ли свэнкитконэ бэршэстыр вари-кон отдэ́ла пэ́скири фэ́лда, дава́ трэй тэ явэ́л пир тыри́ тими́н;18. ко́ли вари-кон отдэ́ла пэ́скири фэ́лда пало́ свэ́нко, тэды раша́й исын банго́ тэ розгинэл руп пир бэрша́, савэ́ ячнэ́пэ свэнкоскирэ бэршэстыр, и исын банго́ пэ ада́кицы тэ тыкнякирэл тыри́ тими́н.19. Ко́ли ману́ш, саво́ отдыя́ фэ́лда, закамэ́ла ла тэ выкинэл, тэды мэк ёв тэ дочхувэл па́нджто рупэскиро/и паш тырэ́ тиминакири, и ёй ячэ́лапэ пал лэ́стэ;20. ко́ли ёв фэ́лда на выкинэла, и фэ́лда явэ́ла бикиндлы явирэ манушэ́скэ, тэды ла нашты́ тэ выкинэл:21. доя́ фэ́лда, ке́ли ёй отджала сыр свэнкоскири, явэ́ла свэ́нто Ра́скэ-Дэвлэ́скэ, сы́рбы фэ́лда совлахады; раша́скэ ёй ячэ́лапэ дро хулаибэн.22. А ко́ли вари-кон отдэ́ла киндлы фэ́лда Ра́скэ-Дэвлэ́скэ сыр свэ́нто, сави́ на лэ́скирэ фэлдэндыр,23. тэды раша́й исын банго́ тэ розгинэл лэ́скэ ци бут тими́н кэ свэнкоскиро бэрш, и ёв исын банго́ ёв тэ отдэ́л пир розгиныбэн дрэ дова́-паць дывэ́с, сыр Ра́скирэ-Дэвлэ́скири свэнтыма.24. А фэ́лда пэ свэнкоскиро бэрш пириджала нэвэ́с кэ одова́ ману́ш, конэ́стыр киндлэ, конэ́скэ приджалапэ доя́ пхув дро хулаибэн.25. Кажно тыри́ тими́н исын банги тэ явэ́л пир шэ́келё раша́скэ, биш геры трэй, соб (кай) тэ явэ́н дрэ шэ́келё.26. Фэ́ни (екхэ) пэрвонэ́ тыкнорэн мурдалэ́ндыр, савэ́ отлыджанапэ Ра́скэ-Дэвлэ́скэ, нашты́ нико́н тэ дэл дрэ свэнтыма: ци гурув да, ци тыкно́ кхэри́тко мурда́л, ёнэ исын Ра́скирэ-Дэвлэ́скирэ.27. Ко́ли мурда́л исын нажужо, тэды исын бангэ́ тэ выкинэл пир тыри́ тими́н и тэ дочхувэл кэ дова́ па́нджто паш; ко́ли на выкинэла, тэды исын бангэ́ тэ бикнэл пир тыри́ тими́н.28. Екх саро́ засовлахадо, со тэл совла́х ману́ш отдэ́ла Ра́скэ-Дэвлэ́скэ пэ́скирэ хулаибнастыр, ци манушэ́с, ци кхэритконэ́ мурдалэс, ци фэ́лда пэ́скирэ маёнкостыр, на бикнэлапэ и на выкинэлапэ; саро́ засовлахадо исын бари свэнтыма Раскири-Дэвлэ́скири;29. Саро́ засовлахадо, со исын совлахадо манушэ́ндыр, на выкинэлапэ: дава́ исын банго́ тэ явэ́л отдыно́ мэрибна́скэ.30. И кажно дэ́што паш, со пхув дэ́ла ци зя́рка, ци барьякирдо́ (пло́до) исын Ра́скирэ-Дэвлэ́скирэ: дава́ исын Ра́скирэ-Дэвлэ́скири свэнтыма.31. Ко́ли вари-кон закамэ́ла тэ выкинэл пэ́скири дэ́што паш, тэды мэк ёв тэ причхувэл кэ ла́кири тими́н па́нджто паш.32. И кажно дэ́што паш барэ́ и тыкнэ́ кхэритконэ́ мурдалэ́ндыр, сарэ́стыр, со проджа́ла тэл дэсто́ чхупнарискиро (жэзло), дэ́што паш исын бангэ́ тэ отдэ́н Ра́скэ-Дэвлэ́скэ;33. о ману́ш нашты́ тэ роскэдэл ци лачхо́ дова́, ци фуй, и нашты́ тэ запарувэл лэс; ко́ли кон лэс запарувэла, тэды и кокоро́ ёв и лэ́скиро запаруибэн явэ́ла свэнтонэса, и на могинэ́ла тэ явэ́л выкиндло.’”34. Ѓа́да, исын припхэныбэна́, савэ́ ракирдя́ Рай Дэвэ́л Мойза́скэ ваш Израилёскирэ чхавэ́нгэ пэ бэ́рга Синаё.Psalms 29:1-61. Давидо́скиро Пса́лмо. Шарэ́н Рас-Дэвлэ́с, тумэ́, болыбны́тка зорья, шарэ́н Рас-Дэвлэ́с пал Лэ́скири сла́ва и зоралыпэ́н;2. Шарэ́н Рас-Дэвлэ́с пал Лэ́скиро славу́тно лав. Поклонинэнпэ (кэрэ́н шэрэ́са) патыва́са Ра́скэ-Дэвлэ́скэ дро Лэ́скиро мангипны́тко шукарипэ́н.3. Ра́скирэ-Дэвлэ́скири зан исын упра́л пэ паня́; Славу́тно Дэвэ́л грукинэла; Рай Дэвэ́л исын упра́л пэ вучэ́ паня́.4. Ра́скирэ-Дэвлэ́скири зан исын зоралыпнаскири, Ра́скирэ-Дэвлэ́скири зан исын райканы.5. Ра́скирэ-Дэвлэ́скири зан пхагирэ́ла кедры; чачо́, Рай Дэвэ́л пхагирэ́ла Ливаноскирэ кедры.6. И Ёв зачхувэла лэн тэ ухтэн сыр целянтос, Лива́но и Сирионо сыр тэрнэ́ гуруво́рэс.Proverbs 10:22-2522. Ра́скирэ-Дэвлэ́скиро бахтякирибэ́н барьякирэ́ла манушэ́с, ёв нисо́ на могинэ́ла тэ причхувэл кэ дава́, кэри буты́ пхарэ́с.23. Дылынэ́ манушэ́скэ тэ кэрэ́л чорипэ́н сы́рбы тэ броинэл, нэ манушэ́стэ, саво́ ґалёла, исын бут годыпэ́н.24. Дова́, со́стыр дарэ́ла фуй ману́ш, пэрэ́ла пэ лэ́стэ, нэ дова́, со древа́н исын дро́го чачунэ́ манушэ́нгэ, явэ́ла отмэкно лэ́нгэ.25. Рискирибнаскири балва́л (вихро) проджа́ла и фуй мануша́ буты́р на явэ́на, нэ чачуно́ ману́ш исын пэ ве́чно фунда́менто.Marek 7:1-131. Екхвар явнэ́ Фарисе́и и вари-савэ́ лылваритконэндыр, савэ́ явнэ́ Ерусалимо́стыр, и скэдынэ́пэ пашы́л Лэ́стэ.2. И дыкхнэ́, со вари-савэ́ Лэ́скирэ сыкляибны́тка ха́на “мэлалэ вастэ́нца”, со значынэ́ла, “на мо́ри васта́.”3. Рэ́ндо (де́ло) дро дова́, со сарэ́ Фарисе́и и сарэ́ Юды пририкирэнпэ кэ пхурэнгирэ-шэралэнгирэ присыкляибэна: ёнэ на бэшэна тэ хан, пака на выморна васта́,4. и ке́ли ёнэ явэ́на таргостыр, ёнэ на бэшэна тэ хан, пака на выморэна васта́; сыс и бут яви́р припхэныбэна́ тэ ракхэ́н: тэ морэн тахтая́ (чашы), мусэра (стаканы) и харкунэ́ (меди́тка) пирья;5. палдова́ Фарисе́и и лылвари́тка пхучнэ́ Исусо́стыр: “Со́скэ Тырэ́ сыкляибны́тка на кэрэ́на пир ґаратунэ́-манушэ́нгирэ присыкляибэна? Со́скэ ёнэ ха́на маро́ намордэ вастэ́нца?”6. И Ёв пхэндя́ лэ́нгэ: “Чачипэ́н пхэндя́ проро́ко Исаё, сыр ёв ракирдя́ пал тумэ́ндэ, дуемуитконэндэ: ‘Адалэ́ мануша́ кутякирэна ман пэ лава́, а чачунэ́с илэ лэ́нгирэ исын дур Ма́ндыр;7. лэ́нгиро кутякирибэн Ма́нгэ нисо́ на мол. Ёнэ сыклякирэ́на дова́, со мануша́ придуминдлэ.’”8. Тумэ́ ячкирдэ́ припхэныбэна́ Дэвлэ́скирэ и кэрэ́на фэ́ни (то́ка) пир манушы́тка присыкляибэна.9. Тумэ́ шука́р могинэ́на тэ отпарувэн Дэвлэ́скирэ припхэныбэна́ пэ пэ́скирэ присыкляибэна”, – ракирдя́ Ису́со.10. Мо́йза ж пхэндя́: “Кутякир дадэ́с пэ́скирэс и пэскирья́ да”, и, “Кон ракирэ́ла нашукар пэ дадэ́стэ пэскирэстэ ци датэ, тэ мэрэ́л адава́ ману́ш.11. Нэ тумэ́ сыклякирэ́на, со ко́ли манушэ́стэ исын вари-со тэ помогинэл лэ́скирэ да́кэ ци дадэ́скэ и ёв пхэнэ́ла: ‘Дава́ исын Корбано (дава́ значынэ́ла, со дава́ исын да́ро Дэвлэ́скэ)’,12. тэды тумэ́ далэ́са самонэса сыклякирэ́на манушэ́н тэ на кэрэ́н буты́р нисо́ ваш пэ́скирэ дадэ́нгэ,13. тумэ́ отпарувэна далэ́са Дэвлэ́скиро лав пэ́скирэ присыкляибнэнца, и дасавэ́ примеры (сыкаибэна) сашты́ тэ явэ́н тэ дав бут.” Romani Bible Baltic 2019 Maintained by the United Bible Societies for the Baltic Romani Mission