Bible in one year - Пэ Балтитко Романи чиб

Bible in one year April 15

1. Яви́р жре́биё выгия́ Симеоноскэ, Симеоноскирэ-чхавэ́нгирэ родыцо́скэ, пир лэ́нгирэ кхэри́тка ро́ды (пле́ми); и сыс лэ́нгири миштыпна́скири ме́ра машки́р Юда́скирэ-чхавэнгири миштыпна́скири ме́ра.

2. Дрэ лэ́нгири миштыпна́скири ме́ра сыс: Вирса́вия ци Шэва, Молада,

3. Хацар-Шуало, Бала́ и Ацэмо,

4. Елтоладо, Вефуло и Хорма,

5. Цыклаго, Беф-Маркавофо и Хацар-Суса,

6. Беф-Леваофо и Шарухено: трия́нда фо́рья лэ́нгирэ гавэнца.

7. Аино, Римоно, Еферо и Ашано: штар фо́рья лэ́нгирэ гавэнца,

8. и сарэ́ гава́, савэ́ сыс пашы́л далэ́ фо́рья аж кэ Ваалаф-Беера, ци кэ паш-дывэсы́тко (южно) Ра́ма. Ѓа́да, сыс Симеоноскирэ-чхавэ́нгирэ родыцоскири миштыпна́скири ме́ра, пир лэ́нгирэ кхэри́тка ро́ды (пле́ми).

9. Юда́скирэ-чхавэ́нгирэ роздыибнастыр (участкостыр) дыны́ сыс ме́ра Симеоноскирэ-чхавэ́нгирэ родыцо́скэ. Адя́кэ сыр Юда́скирэ-чхавэ́нгиро роздыибэн (участко) сыс древа́н баро́ ваш лэ́нгэ, то Симеоноскирэ чхавэ́ и дорэснэ́ миштыпна́скири ме́ра машки́р лэ́нгири миштыпна́скири ме́ра.

10. Три́то жре́биё выпыя Завулоноскирэ чхавэ́нгэ пир лэ́нгирэ кхэри́тка ро́ды, и тырдыяпэ лэ́нгирэ-миштыпнаскирэ меракири риг кэ Саридо;

11. И лэ́нгири исын межакири риг лэ́нгири джа́ла кэ мо́рё (дэрья́в) и кэ Марало и кхэтанякирэлапэ Дабешэфоса, и кхэтанакирэлапэ сыгнонэ рэкицаса, сави́ исын анги́л Иокнеамомо.

12. Саридатыр джа́ла ме́жа палэ кэ васточно риг, кэ кхамэскиро ўзгиибэн, кэ Кислоф-Фавороскири ме́жа; адатхы́р джа́ла кэ Даврафо и ґаздэ́лапэ кэ Иафиё;

13. адатхы́р проджа́ла кэ васто́ко дро Геф-Хеферо, дрэ Ита-Кацыно, и джа́ла кэ Римоно, Мифоаро и Нея;

14. и рискирэ́ла межакири риг паш-ратятыр (северостыр), кэ Ханафоно и ла́киро яго́ро пэ до́ло Ифтах-Эла.

15. Дурэды́р: Катафо, Нагалало, Шымроно, Идеало и Вифлее́мо: дэшуду́й фо́рья лэ́нгирэ гавэнца.

16. Ѓа́да, исын Завулоноскирэ-чхавэ́нгиро мэкно́ миштыпэ́н, пир лэ́нгирэ кхэри́тка ро́ды (пле́ми); ґа́да, исын фо́рья и лэ́нгирэ гава́.

17. Шта́рто жре́биё выгия́ Исахароскэ, чхавэ́нгэ Исахароскирэнгэ, пир лэ́нгирэ кхэри́тка ро́ды (пле́ми);

18. межакирэ ригаса лэнгирьяса сыс: Изреелё, Кесулофо и Сунемо,

19. Хафараимо, Шыоно и Анахарафо,

20. Равифо, Кишыоно и Авецо,

21. Ремефо, Ен-Ганимо, Эн-Хада и Беф-Пацецо;

22. и кхэтанякирэлапэ риг Фавороса и Шагацымоса и Вефсамисоса, и лэ́нгирэ ригакиро яго́ро пашы́л Иорда́но: дэшушов фо́рья лэ́нгирэ гавэнца.

23. Ѓа́да, исын Исахароскирэ чхавэ́нгиро родыцоскиро мэкно́ миштыпэ́н, пир лэ́нгирэ кхэри́тка ро́ды; ґа́да, исын фо́рья и лэ́нгирэ гава́.

24. Па́нджто жре́биё выгия́ Асироскирэ чхавэ́нгирэ родыцо́скэ, пир лэ́нгирэ кхэри́тка ро́ды;

25. межаса лэнгирьяса сыс: Хелкафо, Хали, Ветено и Ахсафо,

26. Аламелехо, Амадо и Мишало. И кхэтанякирэлапэ межакири риг Кармилоса палатунэ́ рига́тыр и Шихоро-Ливнафоса;

27. тэ́ньчи (потом) джа́ла палэ кэ кхамэскиро ўзгиибэн дрэ Веф-Дагоно, и кхэтанякирэлапэ Завулоноса и долоса Ифтах-Эласа паш-дывэсэ́стыр, дро Беф-Емеко и Неиело, и джа́ла пашы́л Кавуло, зэрвонэ (левонэ) рига́тыр;

28. дурыдыр: Евроно, Рехово, Хамоно и Кана́, кэ Сидоно баро́;

29. тэ́ньчи (потом) ме́жа рисёла кэ Ра́ма кэ Ти́ро фо́ро зоралэ́ тыноса, и рискирэ́ла межакири риг кэ Хоса, и яго́ро ла́киро пашы́л мо́рё (дэрья́в) дро штэ́то Ахзива.

30. Дурэды́р: Ума, Афеко и Рехово: биш тэ дуй фо́рья лэ́нгирэ гавэнца.

31. Ѓа́да, исын Асироскирэ-чхавэ́нгиро родыцоскиро мэкно́ миштыпэ́н, пир лэ́нгирэ кхэри́тка ро́ды (пле́ми); ґа́да, сыс фо́рья и лэ́нгирэ гава́.

32. Шо́вто жре́биё выгия́ Нефалимоскирэ чхавэ́нгэ, Нефалимоскирэ чхавэ́нгэ пир лэ́нгирэ кхэри́тка ро́ды;

33. межакири риг лэ́нгири гия́ Хелефостыр и дубравэндыр, со сыс дрэ Цананима, кэ Адами-Некево и кэ Иавнеило, кэ Лакумо, и ла́киро яго́ро (краё) сыс пашы́л Иорда́но;

34. адатхы́р рисёла ме́жа пэ западо кэ Азноф-Фаворо и джа́ла одотхы́р кэ Хукоко, и кхэтанякирэлапэ Завулоноса паш-дывэсэ́стыр (югостыр), и Асироса кхэтанякирэлапэ западостыр, и Юдаса пашы́л Иорда́но, кхамэскирэ ўзгиибнастыр.

35. Фо́рья зоралэ́ тынэ́нца исын: Цыдимо, Цэро, Хамафо, Ракафо и Хинерефо,

36. Адамо, Ра́ма и Асоро,

37. Кедесо, Едрея и Эн-Гацоро,

38. Иреоно, Мигдал-Ело, Хоремо, Беф-Анафо и Вефсамисо: дэшуеня фо́рья лэ́нгирэ гавэнца.

39. Ѓа́да, сыс Нефалимоскирэ-чхавэ́нгирэ родыцоскири ме́ра дро мэкно́ миштыпэ́н пир лэ́нгирэ кхэри́тка ро́ды (пле́ми); ґа́да, сыс фо́рья и гава́ лэ́нгирэ.

40. Дано́скирэ чхавэ́нгирэ родыцо́скэ, пир лэ́нгирэ кхэри́тка ро́ды, выгия́ эфта́то жре́биё;

41. лэ́нгирэ миштыпнаскирэ меракирэ ригаса сыс: Цора, Ештаоло и Ир-Шэмешо,

42. Шаалавино, Аиалоно и Иола,

43. Елоно, Фимнафа и Екроно,

44. Елтеке, Гиввефоно и Ваалафо,

45. Игудо, Бене-Верако и Гаф-Римоно,

46. Ме-Иарконо и Раконо межаса на́дур Иопиятыр. И выгия́ Дано́скирэ чхавэнгири риг тыкны ваш лэ́нгэ.

47. И Дано́скирэ чхавэ́ гинэ́ марибна́са пэ Ласемо, и лынэ́ лэс, и домардэ́ лэс куртала́са, и дорэснэ́ лэс дро миштыпэ́н пэ́скэ, и лынэ́ тэ дживэ́н дрэ лэ́стэ, и кхардэ́ Ласемо Даноса пир пэ́скирэ дадэ́скиро лав Дано.

48. Ѓа́да, исын Дано́скирэ чхавэ́нгирэ родыцоскирэ миштыпна́скири ме́ра, пир лэ́нгирэ кхэри́тка ро́ды; ґа́да, фо́рья и гава́ лэ́нгирэ.

49. Ке́ли мэкнэ́ ёнэ пхув тэ роздэн, пир ла́кирэ ме́жы, тэды Израилёскирэ чхавэ́ дынэ́ машки́р пэ́стэ миштыпна́скири ме́ра Исусо́скэ, Навиноскирэ чхавэ́скэ:

50. пир Ра́скиро-Дэвлэ́скиро упхэныбэ́н дынэ́ ёнэ лэ́скэ фо́ро Фамнаф-Сараи, саво́ ёв мангдя́, пэ бэ́рга Ефремо́скири; и кэрдя́ ёв фо́ро и дживдя́ дрэ лэ́стэ.

51. Ѓа́да, сыс миштыпнаскирэ меры, савэ́ раша́й о Елиза́ро, Ису́со, Навиноскиро чхаво́, и барыдыра́ пэ стрэ́чы роздынэ Израилёскирэ-чхавэ́нгирэ родыцэнгэ, пир жре́биё, дрэ Сило́мо, анги́л Ра́скирэ-Дэвлэ́скиро муй, пашы́л скэдыибнаскирэ скиниякиро загиибэ́н. И мэкнэ́ тэ роздэн (тэ роскэрэн) пхув.

Joshua 20:1-9

1. И пхэндя́ Рай Дэвэ́л Исусо́скэ:

2. “Пхэн Израилёскирэ чхавэ́нгэ: кэрэ́н пэ́стэ знашыбнаскирэ фо́рья, пал савэ́ Мэ ракирдём тумэ́нгэ пирда́л Мойзастэ,

3. соб (кай) могиндя́ тэ нашэ́л одори́к умарибнари, саво́ домардя́ манушэ́с, со дыяпэ дукха́, накамишы; мэк далэ́ фо́рья тэ явэ́н тумэ́ндэ зракхибнаса манушэ́стыр, саво́ отхала палэ пал рат,

4. И кон нашэла дрэ екх далэ́ форье́ндыр, мэк тэ тэрдёл пашы́л форо́скирэ вудара́ и тэ роспхэнэл дро саро́ шуныбэ́н далэ́ форо́скирэ пхурыдырэнгэ пэ́скиро рэ́ндо; и ёнэ лэс прилэ́на кэ пэ дро фо́ро, и дэ́на лэ́скэ штэ́то, соб (кай) ёв тэ дживэ́л лэ́ндэ;

5. и ке́ли традэлапэ пал лэ́стэ ману́ш, саво́ отхала палэ пал рат, тэды лэ́нгэ нашты́ тэ выдэн дрэ лэ́скирэ васта́ умарибнарис, пал-дова́ со ёв на камишы замардя́ пэ́скирэ пашатунэс, лэ́стэ на сыс кэ ёв накамибэн ни тася́, ни пэ три́то дывэ́с;

6. мэк ёв тэ дживэ́л дрэ дава́ фо́ро, пака явэ́ла анги́л манушэ́ндэ пэ сэ́ндо, пака на мэрэ́ла баро́ раша́й, саво́ явэ́ла дрэ долэ́ дывэса́. А коригэды́р (позже) мэк тэ рисёл умарибнари и тэ джал дрэ пэ́скиро фо́ро и дрэ пэ́скиро кхэр, дрэ фо́ро, савэ́стыр ёв настя́.

7. И выкэдынэ́ Кедесо дрэ Галиле́я пэ Нефалимоскири бэ́рга, Сихемо пэ Ефремо́скири бэ́рга, и Кири́аф-Арба, явирэ́с Хевро́но, пэ Юдаскири бэ́рга;

8. пал Иорда́но, проти Ерихо́но кэ васто́ко выкэдынэ́: Бецэро пэ чхучи́ пхув, пэ лошчы́на, Рувимо́скирэ родыцо́стыр, и Рамо́фо дро Галаа́до Гадо́скирэ родыцо́стыр, и Голано дро Васа́но Манасия́скирэ родыцо́стыр.

9. Далэ́ фо́рья сыс дынэ́ ваш сарэ́ Израилёскирэ чхавэ́нгэ и ваш манушэ́нгэ, савэ́ явнэ́ явирэ рига́тыр, савэ́ дживэ́на дрэ лэ́ндэ, соб (кай) тэ нашэ́л одори́к кажно (сва́ко), кон замардя́ манушэ́с пир дош, соб (кай) тэ на мэрэ́л ёв манушэ́скирэ вастэ́стыр, саво́ отхала палэ пал рат, пака явэ́ла анги́л манушэ́ндэ пэ сэ́ндо.

Psalms 46:1-6

1. Хоро́скирэ Дирижоро́скэ. Кареёскирэ Чхавэ́ндыр пэ Чхаенгири Зан (Аламото).

2. Дэвэ́л исын амаро́ гарадыипэн и зоралыпэ́н, Ёв дэ́ла васт, ке́ли исын пхаро́.

3. Палдава́ амэ на страхадёваса, мэк пхув кхарэ́лапэ и мэк бэ́рги тэ пэрэ́н тэлэ́ дрэ мо́ри (дэрьява́).

4. Мэк паня́ тэ брилинэн (тэ ревинэн) и тэ кэрдён пенаса, мэк бэ́рги тэ тринскирэнпэ пэ́скирэ зорья́тыр. Сэ́ла.

5. Исын екх рэка (лэнь), савья́кирэ паня́ обрадынэна Дэвлэ́скиро фо́ро, свэ́нто штэ́то, кай дживэ́ла Са́мо (Най) Вучэды́р.

6. Дэвэ́л исын дро дава́ фо́ро, ёв на пэрэ́ла: Дэвэ́л подэла васт далэ́ фороскэ тасярлатыр.

Proverbs 14:7-11

7. Дурьёв (наш криг) дылынэ́ манушэ́стыр, савэскирэ уштэндыр ту на шунэса джиныбэ́н (годьварэ́ лава́).

8. Барэ́-годя́киро ману́ш джинэ́ла, со ёв кэрэ́ла акана́ и дурэды́р, нэ дылыно́ гаравэла пэ́скиро дылныпэ́н дро лэ́скири фрэнтыма, соб (кай) тэ хохавэ́л.

9. Дылынинька просана пэ́скирэ грэ́хи, нэ машки́р дэвлытконэндэ исын екх годы́.

10. Екх ило́ джинэ́ла пэ́скиро киркипэн, нэ чу́жо на пхэнэ́ла явирэскэ пал пэ́скири ра́дыма.

11. Фуе-манушэ́нгиро кхэр равэна тэлэ́, нэ дэвлытконэнгири ша́тра явэ́ла най шукарэдыр.

Lukaš 12:32-59

32. На андыршан, со тумэ́ сан на баро́ манушэ́нгиро ґурто, пал-дова́ со тумаро́ Дад дэ́ла ласкаса тумэ́нгэ Кралипэ́н.

33. Бикнэн, со тумэ́ндэ исын и роздэн ловэ́ богэнгэ; кэрэ́н пэ́скэ муе́нгирэ (кошэльки), савэ́ на ячэ́на пхуранэ́, кэдэн пэ́скэ кучипэ́н, саво́ на тыкнёла дро Болыбна́скиро Раё, карик чор на подганавэлапэ, и моль (мэль) на хасякирэ́ла.

34. Палдова́, кай тумаро́ кучипэ́н исын, одо́й явэ́ла тумаро́ ило́.

35. Явэ́н скэдынэ́ кэ саро́, мэк тэ хачон тумарэ́ яга;

36. тумэ́ сан сыр мануша́, савэ́ ужакирэ́на пэ́скирэ хула́с, кон исын пэ бьяв, ке́ли ёв джа́ла палэ свэнкостыр, ке́ли ёв явэ́ла кхэрэ́ и марэла дро вуда́р, соб (кай) тумэ́ тэды екха́тыр тэ отчхакирэн лэ́скэ.

37. Бахталэ́ исын одолэ́ дына́рья, конэ́с хула́й латхэ́ла, со ёнэ на сутэ́; чачэс, Мэ пхэна́ва тумэ́нгэ, со хула́й приготовинэлапэ и бэшлякирэла лэн пал сками́нд тэ откхинён; и джа́ла кэ ёнэ и ячэ́ла тэ подэл лэ́нгэ.

38. И, ко́ли ёв явэ́ла дрэ пашрат, и явэ́ла коригэды́р (позжэды́р), и латхэ́ла, со ёнэ адя́кэ-паць исын на сутэ́, явэ́на бахталэ́ кадалэ́ мануша́.

39. Нэ тумэ́ зоралэ́с джинэ́н, со, ко́ли кхэрэ́скиро хула́й джинэлас, ке́ли раты́ явэ́ла чор, ёв явэ́ла тэ ракхэлпэ и на дэ́лас, соб (кай) чор тэ подґанавэлпэ тэл лэ́скиро кхэр.

40. Палдава́ явэ́н скэдынэ́, пал-дова́ со Чхаво́ Манушэ́скиро явэ́ла дрэ дасаво мардо́ (шту́нда), со тумэ́ на думинэ́на.”

41. Тэды Пэ́три пхэндя́ Лэ́скэ: “Раё Дэ́вла! Ту ракирэ́са дава́ приме́ро (сыкаибэ́н) амэ́нгэ ци сарэ́нгэ?”

42. И пхэндя́ Рай Дэвэ́л: “Кон тэды исын патяибны́тко и годьваро́ писха́ри, конэ́скэ лэ́скиро хула́й дыя́ зор пэ лэ́скирэ бутярнэндэ, соб (кай) тэ дэл лэ́нгэ лэ́нгири паш марэстыр дро часо, саво́ трэй?

43. Бахтало́ исын кодова́ писха́ри, конэ́скиро хула́й сыр явэ́ла, латхэ́ла, со ёв кэрэ́ла адя́кэ, сыр упхэндло́ лэ́скэ;

44. чачэс, Мэ ракира́ва тумэ́нгэ: ёв дэ́ла лэ́скэ право пэ саро́ лэ́скиро миштыпэ́н, со исын лэ́стэ.

45. Нэ ко́ли дава́ писха́ри пхэнэ́ла пэ́скэ: ‘Миро рай зарикирэлапэ;’ и ёв лэ́ла тэ марэл дынарье́н и дынарицэн, тэ хал и тэ пьел, и тэ матёл,

46. тэды явэ́ла писхарискиро хула́й дро дова́-паць дывэ́с, дро саво́ ёв на ужакирэ́ла: и дро дова́-паць мардо́, пал саво́ ёв на джинэ́ла и хула́й росчингирэла лэс пэ паш и дэ́ла лэ́скэ дасави́ судьба, сыр напатяибнаскирэ манушэ́нгэ.

47. И одова́ писха́ри, кон джиндя́ лэ́скирэ хуласкири во́ля, а на сыс скэдыно́ и на кэрдя́ пир хуласкири во́ля, явэ́ла зоралэ́с мардо́ чупняса,

48. а кодова́ писха́ри, кон на джиндя́, нэ кэрдя́ адя́кэ, пал со ёв исын банго́, явэ́ла мардо́ чхупняса тыкнэды́р. Кажнонэстыр, конэ́скэ бут дыно́, пхучэна бут; и кажнонэ́ манушэ́стыр, конэ́скэ исын бут допатяндло, лэ́стыр пхучэна буты́р.

49. Мэ явдём тэ янав яг пэ дая́ пхув; и сыр Мэ кама́м, соб (кай) ёй тэ хачол какана́?

50. Ма́нгэ трэй тэ болавпэ, и сыр Мэ пиридживава, пака дава́ саро́ сполнинэлапэ!

51. На думинэн, со Мэ явдём тэ янав рама́нё (миро) пэ пхув? Над, Мэ пхэна́ва тумэ́нгэ, со на рама́нё (миро), а Мэ явдём тэ росчхував манушэ́н:

52. ададывэсатунэ дывэсэ́стыр сэмя панджинэ манушэ́ндыр росчхувэнапэ пэ паша́: тринджинэ явэ́на тэ росчхувэнапэ пэ паша́ дуйджинэнца, дуйджинэ́ явэ́на тэ росчхувэнпэ пэ паша́ тринджинэнца:

53. дад явэ́ла проти чхавэ́стэ, и чхаво́ явэ́ла проти дадэ́стэ; дай явэ́ла проти чхатэ, и чхай явэ́ла проти борьятэ, и бори явэ́ла проти сасятэ.”

54. И пхэндя́ Ису́со адя́кэ-паць манушэ́нгэ: “Ке́ли тумэ́ явэ́на тэ дыкхэ́н о́блоко, саво́ ґаздэ́лапэ западостыр (пал-панендыр), тэды тумэ́ ўраз ракирэ́на: ‘Брышы́нд явэ́ла; и адя́кэ ёв явэ́ла.’

55. И ке́ли тумэ́ чуинэна (шунэ́на), со паш-дывэсы́тко балва́л пхурдэла, тэды тумэ́ пхэнэ́на: ‘Хачкирибэ́н явэ́ла;’ и адя́кэ ёв явэ́ла.

56. Дуемуитка, тумэ́ сан! Тумэ́ джинэ́на, сыр тэ уґалён, со исын пэ пхув и пэ болыбэ́н; а сыр да тумэ́ на ґалёна часо, дро саво́ тумэ́ дживэ́на.

57. А со́скэ тумэ́ на роскэдэнапэ ваш пэ́скэ, со исын чачипэ́н?

58. Ке́ли ту джа́са кэ сэндоскиро барыдыро́ манушэ́са, савэ́са ту сан дрэ холы́, тэды спробин тэ уракирэс лэс пир дром, соб (кай) ману́ш тэ на затырдэл тут кэ сэнда́ри, а сэнда́ри тэ на отдэ́л тут фандари́скэ (истязателёскэ), и одова́ тэ на чхурдэл тут дро штарибэ́н.

59. Мэ пхэна́ва тумэ́нгэ: ту на выджаса одотхы́р, пака ту отдэса кэ най тыкнэды́р харкуны ґасприн.”

Romani Bible Baltic 2019

Maintained by the United Bible Societies for the Baltic Romani Mission