Bible in one year
January 1

1. Англэды́р сарэ́стыр Дэвэ́л создыя́ болыбэ́н и пхув.
2. Пхув сыс биформа́кири и чхучи́ (пусто), калыпэ́н сыс пэ саро́ хорипэ́н (бе́здна), и Дэвлэ́скиро Ду́хо (Фа́но) кхарэ́ласпэ (двигинэласпэ) упра́л паня́.
3. И пхэндя́ Дэвэ́л: “Мэк тэ явэ́л дуд (свэ́то).” И дуд яця́.
4. И дыкхця́ Дэвэ́л дуд, со ёв сыс шука́р; и роскэрдя́ (росчхудя́) Дэвэ́л дуд калыпна́стыр.
5. И дыя́ лав Дэвэ́л дудэ́скэ Дывэ́с, а калыпна́скэ Рат. И сыс бэльвэ́ль и сыс зло́ко (ра́нко)-пэ́рво дывэ́с.
6. И пхэндя́ Дэвэ́л: “Мэк тэ явэ́л сво́до (твердь) машки́р пани́, и мэк ёв тэ роскэрэ́л пани́ пане́стыр.”
7. И кэрдя́ Дэвэ́л сво́до, и роскэрдя́ пани́, саво́ сыс тэл буґло́ сво́до долэ́ пане́стыр, и саво́ сыс упра́л, кай сыс буґло́ сво́до. И яця́ адя́кэ.
8. И дыя́ лав Дэвэ́л сводо́скэ Болыбэ́н. И сыс бэльвэ́ль, и сыс зло́ко (ра́нко) – яви́р дывэ́с.
9. И пхэндя́ Дэвэ́л: “Мэк тэ скэдэ́нпэ паня́, савэ́ сыс тэл болыбэ́н, дро екх штэ́то, и мэк тэ ячэ́л шуки́ пхув.” И яця́ адя́кэ.
10. И дыя́ лав Дэвэ́л шукэ́ пхувьякэ, Пхув, а пане́нгэ, савэ́ сыс скэдынэ́, Мо́ри (Дэрьява́). И дыкхця́ Дэвэ́л, со дава́ сыс шука́р.
11. И пхэндя́ Дэвэ́л: “Мэк тэ барьякирэл пхув зэлэныбэн, чар, сави́ дэ́ла семи (вирингли); и кашт (дрэ́во), саво́ дэ́ла барьякирдо́ (пло́до) пир пэ́скиро ро́до, савэскирэ се́ми исын пэ пхув.” И яця́ адя́кэ.
12. И барьякирдя пхув зэлэныбэн; чар, сави́ дэ́ла семё; и кашт (дрэ́во), саво́ дэ́ла барьякирдо́ (пло́до) пир пэ́скиро ро́до, савэскирэ семи исын пэ пхув. И дыкхця́ Дэвэ́л, со дава́ сыс шука́р.
13. И сыс бэльвэ́ль, и сыс зло́ко (ра́нко) – три́то дывэ́с.
14. Тэ́ньци пхэндя́ Дэвэ́л: “Мэк тэ явэ́н дуда (светилы) пэ сво́до пир болыбэ́н, соб (кай) ёнэ тэ роскэрэн дывэ́с ратятыр, соб (кай) ёнэ тэ явэ́н сыр знаме́нии (ґертыка́) ваш часы (цыры), дывэса́ и бэрша́;
15. и мэк тэ явэ́н дуда пэ сво́до пир болыбэ́н, соб (кай) тэ дэн дуд пэ пхув.” И яця́ адя́кэ.
16. И кэрдя́ Дэвэ́л дуй барэ́ дуда: екх барэды́р дуд, соб (кай) тэ рикирэ́л зор пэ дывэса́, екх тыкнэды́р дуд, соб (кай) тэ рикирэ́л зор пэ ратя, адя́кэ-паць и чэргэня́.
17. И чхудя́ Дэвэ́л лэн пэ сво́до пир болыбэ́н, соб (кай) ёнэ тэ дэн дуд пэ пхув,
18. и тэ рикирэ́н зор пэ дывэса́ и ратя, и тэ роскэрэн (тэ росчхувэн) дуд (свэ́то) калыпна́стыр. И дыкхця́ Дэвэ́л, со дава́ сыс шука́р.
19. И сыс бэльвэ́ль и сыс зло́ко (ра́нко) – шта́рто дывэ́с.
20. И пхэндя́ Дэвэ́л: “Мэк тэ явэ́н паня́ пхэрдэ́ одолэнца [мэк тэ создэн паня́ одолэ́н-р.с.], савэ́ ползынэна, савэ́ исын джидэ́, и мэк тэ вурнян чирикля́ упра́л пхув пир болыбэ́н.”
21. И создыя́ Дэвэ́л барэн морёскирэ (дэрьявэ́скирэ) мачхэн, и каждо джидо́ ди, саво́ кхарэ́лапэ, савэ́нца паня́ исын пхэрдэ́ пир пэ́скиро ро́до, и ра́зна чирикля́ пхакэнца пир пэ́скиро ро́до. И дыкхця́ Дэвэ́л, со дава́ сыс шука́р.
22. И бахтякирдя́ Дэвэ́л лэн, ракири́: “Биянэн и тэ явэ́н тумэн бут-бут, и пхэрдякирэн паня́ дрэ мо́ри (дэрьява́), мэк тэ бияндён бут чирикля́ пэ пхув.”
23. И сыс бэльвэ́ль, и сыс зло́ко (ра́нко)-па́нджто дывэ́с.
24. И пхэндя́ Дэвэ́л: “Мэк пхув тэ дэл джиибэ́н джидэ́ дескэ пир пэ́скиро ро́до; кхэритконэ́ мурдалэ́нгэ (скотоскэ) и цапненгэ, ползучонэ джидыпнэнгэ и мурдалэ́нгэ пир пхув, кажнонэ́скэ пир пэ́скиро ро́до.” И яця́ адя́кэ.
25. И создыя́ Дэвэ́л пхувитконэ мурдалэ́н пир лэ́нгиро ро́до, и кхэритконэ́ мурдалэ́н пир лэ́нгиро ро́до, и кажнона цапня пэ пхув пир пэ́скиро ро́до. И дыкхця́ Дэвэ́л, со дава́ сыс шука́р.
26. И пхэндя́ Дэвэ́л: “Создаса манушэ́с, соб (кай) ёв тэ удэлпэ пир Амари́ патри́н (о́бразо), соб (кай) ёв тэ явэ́л кадасаво́-паць сыр Амэ сам; и мэк ёв тэ хулаинэ́л пэ морёскирэ (дэрьявэ́скирэ) мачхэндэ, пэ болыбна́скирэ чириклендэ, и пэ кхэритконэ́ мурдалэ́ндэ и пэ сари́ пхув, и пэ сарэ́ цапнендэ, савэ́ ползынэна пир пхув.”
27. И создыя́ Дэвэ́л манушэ́с пир Пэ́скири патри́н (о́бразо), пир Дэвлэ́скири патри́н (о́бразо) Ёв создыя́ лэс: муршэ́с и джувля́ создыя́ Ёв.
28. И бахтякирдя́ Дэвэ́л лэн, и Дэвэ́л пхэндя́ лэ́нгэ: “Биянэн и тэ явэ́н тумэн бут-бут, и пхэрдякирэн пхув и тэ лэн зор пэ ла́тэ, и тэ хулаинэн тумэ́ пэ морёскирэ (дэрьявэ́скирэ) мачхэндэ, и пэ болыбна́скирэ чирикле́ндэ и пэ кажнонэ́ мурдалэ́стэ, саво́ кхарэ́лапэ пир пхув.”
29. И пхэндя́ Дэвэ́л: “А́кэ, Мэ дыём тумэ́нгэ кажно чар, сави́ дэ́ла семи (вирингли), со исын пэ пхув, и кажно кашт (дрэ́во), дро саво́ исын каштуно семё, саво́ дэ́ла барьякирдэ́ (пло́ды): дава́ явэ́ла хабэ́н тумэ́нгэ.
30. И кажнонэ́ мурдалэскэ пэ пхув и кажнонэ́ болыбна́скирэ чириклякэ, и кажнонэ́ цапнякэ, сави́ ползынэла пир пхув, и дрэ савэ́ндэ исын джидо́ ди Мэ дыём кажно зэлэны (зэлэно) чар тэ хан.” И яця́ адя́кэ.
31. И дыкхця́ Дэвэ́л, со Ёв создыя́ и, акэ, дава́ сыс древа́н шука́р. И сыс бэльвэ́ль, и сыс зло́ко (ра́нко) – шо́вто дывэ́с.
1. Адя́кэ сыс создынэ болыбэ́н и пхув и саро́ свэ́то.
2. И кончындя Дэвэ́л Пэ́скирэ рэ́нды (де́лы) кэ эфта́то (битринэ́нгиро дэ́што) дывэ́с, савэ́ Ёв кэрэ́лас и пэ эфта́то дывэ́с Ёв откхиныя сарэ́ Пэ́скирэ рэндэ́ндыр (делэндыр), савэ́ Ёв кэрдя́.
3. Дэвэ́л бахтякирдя́ эфта́то (битринэ́нгиро дэ́што) дывэ́с и освэнцындя лэс, пал-дова́ со дрэ дава́ дывэ́с откхиныя Ёв сарэ́ Пэ́скирэ рэндэ́ндыр, савэ́ Ёв создыя́ и кэрдя́.
4. Акэ, исын лав, сыр ячнэ́ болыбэ́н и пхув, ке́ли сыс создынэ ёнэ, дрэ дова́ часо (цы́ро), ке́ли Рай Дэвэ́л (Яхва́), Дэвэ́л создыя́ пхув и болыбэ́н,
5. И кажно фэлдытко хру́сто (кусто), саво́ англэды́р на сыс пэ пхув, и кажно фэлдытко чар, сави́ англэды́р на бария; пал-дова́ со Рай Дэвэ́л, Дэвэ́л англэды́р на бичхадя́ брышы́нд пэ пхув, и на сыс манушэ́с, соб (кай) тэ кэрэ́л буты́ пэ пхув;
6. нэ пхувья́тыр ґаздыя́пэ паро, и панякирдя пир сари́ пхув.
7. И Рай Дэвэ́л, Дэвэ́л пхувитконэ прахостыр создыя́ манушэ́с, и пхурдыя дрэ лэ́скирэ рутхуня (ноздри) ду́хо (фа́но) джиибна́скиро и яця́ ману́ш джидэ́ деса.
8. И Рай Дэвэ́л почхудя дро Эдэмо пэ васто́ко у́нта (садо); и мэкця́ одо́й манушэ́с, савэ́с Ёв создыя́.
9. И Рай Дэвэ́л кэрдя́ адя́кэ, соб (кай) тэ барьёл пхувья́тыр кажно кашт (дрэ́во), шука́р ваш якха́ и лачхо́ ваш хабэ́н, и машкира́л у́нта сыс джиибнытко кашт, и кашт, саво́ дэ́ла джиныбэ́н пал фуипэ́н и лачхипэ́н.
10. Эдэмостыр тхадэлас рэка (лэнь), сави́ панякирдя у́нта; и одотхы́р розджаласпэ пэ штар рэ́ки (лэня́).
11. Екха кхардэ́ Фисоно (Пишоно): ёй тхадэ́ла пир сари́ Хавиласкири пхув, доя́ пхув, кай исын сувнака́й;
12. и долэ́-пхувья́киро сувнака́й исын лачхо́; одо́й исын бдалахо и ониксо бар.
13. И явирья рэка (лэнь) кхардэ́ Гихоно; ёй тхадэ́ла пир сари́ Кушоскири пхув.
14. Тритона рэка (лэнь) кхардэ́ Хидэке́лё (Тигро); ёй тхадэ́ла анги́л Асирия. Шта́рто рэка (лэнь) исын Евфрато.
15. И лыя́ Рай Дэвэ́л, Дэвэ́л манушэ́с, и мэкця́ тэ дживэ́л лэс дрэ Эдэмоскири у́нта (садо), соб (кай) ёв тэ барьякирэл и тэ ракхэ́л ла.
16. И припхэндя́ Рай Дэвэ́л, Дэвэ́л манушэ́скэ, пхэни́: “Дрэ у́нта каштэ́стыр (дрэвостыр) ту явэ́са тэ хас;
17. а каштэ́стыр, саво́ дэ́ла джиныбэ́н пал фуипэ́н и лачхипэ́н, лэ́стыр на ха; пал-дова́ дрэ дава́ дывэ́с дро, дро саво́ ту хаса лэ́стыр барьякирдо́ (пло́до), ту мэрэ́са.”
18. И Рай Дэвэ́л, Дэвэ́л пхэндя́: “Налачхэс манушэ́скэ тэ явэс екхджинэскэ, Амэ создаса помогибнаскирэс (помошникос) пир лэ́стэ.”
19. О Рай Дэвэ́л, Дэвэ́л пхувья́тыр вычхудя́ сарэ́ фэлдытконэ мурдалэ́н (жывотнонэн) и сарэ́н болыбнытконэ чирикле́н, и яндя́ кэ ману́ш, соб (кай) ёв тэ дыкхэ́л, сыр ёв кхарэ́ла лэн, и соб (кай), сыр ману́ш кхарэ́ла кажно джидо́ ди, дасаво лав тэ ячэ́лпэ лэ́скэ.
20. И дыя́ лав (кхарибэн) ману́ш кажнонэ́ кхэритконэ́ мурдалэскэ и болыбна́скирэ чирикленгэ и фэлдытконэ мурдалэ́нгэ; нэ ваш манушэ́скэ помогибнаскиро на латхяпэ (ластяпэ), на пир лэ́стэ.
21. И кэрдя́ Рай Дэвэ́л, Дэвэ́л адя́кэ, со зорало́ соибэн пыя́ пэ манушэ́стэ; и, ке́ли засуця ёв, то Рай Дэвэ́л, Дэвэ́л лыя́ екх лэ́скиро пашваро, и одова́ штэ́то зачхакирдя лочаса (плотяса).
22. И Рай Дэвэ́л, Дэвэ́л создыя́ пашварэстыр джувля́, саво́ Ёв лыя́ манушэ́стыр, и яндя́ ла кэ ману́ш.
23. И пхэндя́ ману́ш: “Ѓа́да, дава́ исын кокало мирэ́ кокалэндыр и лоч (плоть) мирэ́ лочатыр; ёй явэ́ла тэ кхарэлпэ джувля́са (ромня́са): пал-дова́ со сыс лыны ромэстыр.”
24. Палдава́ ману́ш мэкэ́ла пэ́скирэ дадэ́с и да, и приячэла кэ пэ́скири ромны́, и ёнэ явэ́на екх лоч.
25. И сыс дуйджинэ́ нангэ, Адамо и лэ́скири ромны́, и ёнэ на ладжандынэ.
1. Бахтало́ исын одова́ ману́ш, саво́ на псирэ́ла тэ скэдэлпэ надэвлытконэ манушэ́нца, саво́ исын на тэрдо́ пэ дром грэхитконэ́ манушэ́нца, и саво́ исын на бэшто́ дрэ кампания, кай санапэ Дэвлэ́стыр.
2. А лэ́скири ра́дыма исын дрэ Дэвлэ́скиро Зако́но и ёв розлэла лэ́скиро Зако́но дывэсэ́ и раты́.
3. И ёв явэ́ла сыр кашт (дрэ́во), со исын чхудо паш панигвалэ рэ́ки (лэня́), саво́ дэ́ла пэ́скири пхабай дро аплодоскиро уляго (пора). Лэ́скирэ патря (листы) ние́кхвар на зашутёна и саро́, со ёв тэ на кэрэ́л, явэ́ла тэ джал бахтяса.
4. А чорэ́ мануша́ на адасавэ́ исын сарэ́са. Ёнэ исын сы́рбы чхучо́ пхус, со балва́л рострадэла.
5. Палдава́ надэвлытка мануша́ на проджа́на Дэвлэ́скиро Сэ́ндо, а грэхи́тка мануша́ на явэ́на тэ скэдэ́нпэ патяибнытконэ манушэ́нца.
6. Пал-дова́ со Дэвэ́л джинэ́ла дром, пир савэ́ чачунэ́ мануша́ псирэ́на, а надэвлытка дрома́ хасёна.
1. Соломоно́скирэ притчы, Давидо́скирэ чхавэ́скирэ, Израилёскирэ-крали́скирэ тумэ́нгэ,
2. соб (кай) тумэ́ тэ джинэ́н годыпэ́н, и тэ сыклён чачипнаскэ, соб (кай) тумэ́ тэ ґалён хор лава́ ракирибнастыр;
3. соб (кай) тумэ́ тэ дорэсэн (тэ ґалён) годыпэ́н, чачипэ́н, чачипнытко отлыджаибэн и чачуно́ сэ́ндо.
4. Тэ дэн годы́ простонэ-илэскирэнгэ джиныбэ́н и розлыибэн тэрнэ́ манушэ́скэ.
5. Кон исын годо́ (годьваро́) ману́ш, явэ́ла тэ шунэ́л и тэ сыклёл буты́р; ману́ш барэ́ годя́са дорэсэ́ла пэ́скэ лачхо́ годыпэ́н (совето),
6. соб (кай) тэ ґалёл притча и чорахано выпхэныбэн, годэ́-манушэ́нгирэ лава́ и лэ́нгирэ шэрэпхарибнытка (загадки).
7. Анги́л сарэ́стыр трэй тэ дарэс Дэвлэ́стыр, соб (кай) тэ явэ́л дава́ джиныбэ́н, нэ бигодякирэ мануша́ на прилэ́на кэ годы́ годыпэ́н и упхэныбэ́н.
1. Лылвари́ (книга) пал Исусо́скиро Христосо́скиро ро́до, Давидо́скирэ Чхавэ́скиро, Аврамоскирэ Чхавэ́скиро.
2. Авра́мо сыс Исако́скиро дад, Исако сыс Яково́скиро дад, Яково сыс дад Юда́скэ и лэ́скирэ пшалэ́нгэ;
3. Юда сыс Фаресо́скиро и Заро́скиро дад (лэ́нгири дай сыс Та́марь); Фаре́со сыс Эсромо́скиро дад, Эсро́мо сыс Арамо́скиро дад;
4. Ара́мо сыс Аминадаво́скиро дад, Аминада́во сыс Наасоно́скиро дад, Наасо́но сыс Салмоно́скиро дад;
5. Салмо́но сыс Ваозо́скиро дад (Ваозо́скири дай сыс Раха́в), Вао́зо сыс Авидо́скиро дад (Авидо́скири дай сыс Руфь); Авидо сыс Есеёскиро дад,
6. Есеё сыс крали́скирэ – Давидо́скиро Дад; Дави́до сыс Соломоно́скиро дад (Соломоно́скири дай сыс Урия́скири ромны́);
7. Соломо́но сыс Ровоамо́скиро дад, Ровоа́мо сыс Авия́киро дад, Авия́ сыс Аса́скиро дад;
8. Аса́ сыс Иосафато́скиро дад, Иосафа́то сыс Иорамо́скиро дад, Иора́мо сыс Ози́яскиро дад;
9. Ози́я сыс Иофамо́скиро дад, Иофа́мо сыс Ахазо́скиро дад, Аха́зо сыс Езэкия́скиро дад;
10. Езэки́я сыс Манасия́скиро дад, Мана́сия сыс Амоно́скиро дад, Амоно сыс Иосия́скиро дад;
11. Иосия сыс Иокимоскиро дад, Иокимо сыс дад Ехонияскэ и лэ́скирэ пшалэ́нгэ анги́л дова́, сыр Юдэ́н лыджинэ́ дро пле́но (пэ зор) тэ дживэ́н кэ Вавило́но.
12. Пало́ дава́, сыр лэн лыджинэ́ дро Вавило́но, Ехония сыс Салафиилоскиро дад; Салафиило сыс Зоровавелёскиро дад;
13. Зороваве́лё сыс Авиудоскиро дад, Авиудо сыс Елиакимоскиро дад, Елиакимо сыс Азороскиро дад;
14. Азоро сыс Садокоскиро дад, Садоко сыс Ахимоскиро дад, Ахимо сыс Елиудоскиро дад;
15. Елиудо сыс Елеазароскиро дад, Елеазаро сыс Матфаноскиро дад, Матфано сыс Яково́скиро дад;
16. Яково сыс Иосифоскиро (Ёзаскиро) дад, саво́ сыс Мариякиро ром, сави́ бияндя́ Исусо́с, Савэ́скэ лав дынэ́ Христо́со.
17. Адя́кэ сыс дэшуштар ро́ды Аврамостыр анги́л Давидо́стэ; Давидостыр анги́л дова́, сыр Юдэ́н лыджинэ́ дро Вавило́но исын дэшуштар ро́ды; и долэ́ дывэсэ́ндыр, сыр Юдэ́н лыджинэ́ дро Вавило́но анги́л Христосо́скиро бияныпэ́н исын дэшуштар ро́ды.
18. Адя́кэ, сыр Ису́со Христо́со бия́ндыя: пало́ (после) доракирибэ́н тэ лэнпэ, сыр Лэ́скирэ да́кэ Мариякэ трэиндя́ тэ выджа́л палоро́м пал Ёзастэ, нэ анги́л, сыр лэ́нгэ тэ зджанпэ (тэ лэнпэ), выгия́, со Ёй сыс пхари́ Свэнтонэ́ Духо́стыр (Фаностыр).
19. А Ёза (Иосифо), ром Ла́киро, сыс патывало ману́ш и на камдя́ тэ ладжакирэл Ла, и камдя́ чораханэ́с тэ отмэкэ́л Ла.
20. Нэ сыр ёв подуминдя дава́, Дэвлэ́скиро Янго́ло явдя́ кэ ёв дрэ сунэ́ и пхэндя́: “Ёзэ, Давидо́скиро чхаво́, на андырша тэ прилэс Мари́я сыр ромня́, пал-дова́ со Кодова́, Савэс ёй биянэ́ла, исын Свэнтонэ́ Духо́стыр (Фаностыр);
21. ёй биянэ́ла Чхавэ́с, ту дэ́са Лэ́скэ лав Ису́со, пал-дова́ со Ёв зракхэ́ла Пэ́скирэ манушэ́н грэхэ́ндыр.”
22. Нэ саро́ дава́ сыс, соб (кай) тэ кэрэ́лпэ дова́, со Дэвэ́л пхэндя́ пир пророкостэ:
23. “Акэ, патывалы́ тэрны́ джувлы́ явэ́ла пхари́, и биянэ́ла Чхавэ́с, и Лэ́скиро лав явэ́ла Эмануило” (со значынэ́ла: “Дэвэ́л исын амэ́нца”).
24. Ке́ли Ёза уштыя́ соибнастыр, ёв кэрдя́, сыр Дэвлэ́скиро Янго́ло (А́нгело) припхэндя́ лэ́скэ; ёв прилыя́ ромня́ пэскирья́,
25. и ёв на джиндя́ Ла сыр ромня́, анги́л дова́, сыр Ёй бияндя́ Чхавэ́с; и ёв дыя́ лав Лэ́скэ Ису́со.
Romani Bible Baltic 2019
United Bible Societies for the Baltic Romani Mission