Bible in one year January 16Genesis 31:1-551. И шундя́ Яково Лаваноскирэ-чхавэ́нгирэ лава́, савэ́ ракирдэ́: “Яково лыя́ пэ́скэ саро́, со сыс амарэстэ дадэ́стэ, и амарэ́-дадэ́скирэ миштыпна́стыр кэрдя́ саро́ дава́ барвалыпэ́н.”2. И Яково дыкхця́ Лаваноскиро муй, и ґа́да, ёв на сыс дасаво кэ ёв, сыр сыс тася́.3. И Рай Дэвэ́л пхэндя́ Яково́скэ: “Рисёв пэ тырэ́-дадэнгири пхув, кай ту бияндыян; и Мэ ява́ва ту́са.”4. И бичхадя́ Яково, и кхардя́ Рахиля и Лия пэ фэ́лда, кэ пэ́скири тыкнэ́-кхэритконэ́-мурдалэнгири стада,5. и пхэндя́ лэ́нгэ: “Мэ дыкха́ва тумарэ́-дадэ́скиро муй, со ёв кэ мэ исын на дасаво, сыр сыс тася́; нэ мирэ́-дадэ́скиро Дэвэ́л сыс ма́нца;6. тумэ́ джинэ́на кокорэ́, со мэ сарэ́ зорья́тыр дынариндём тумарэ́ дадэ́скэ,7. а тумаро́ дад хохадя ман и дэш мо́лы пирипарудя мири́ мазу́ри (награда). Нэ Дэвэ́л на дыя́ лэ́скэ тэ кэрэ́л чорипэ́н ма́нгэ.”8. Ке́ли ёв пхэндя́: ‘Со кхэри́тка мурдала́ (ското) крапинкэнца явэ́ла ту́кэ дрэ мазу́ри,’ тэды саро́ ското лыя́ тэ бияндёл крапинкэнца. А ке́ли ёв пхэндя́: “Ряба явэ́на ту́кэ дрэ мазу́ри, тэды саро́ ското бияндя́ ряба.”9. И Дэвэ́л отлыя тумарэ́ дадэ́стыр ското, и дыя́ ма́нгэ.10. Екхвар дрэ дасаво часо, ке́ли ското пхарьёла, мэ поддыкхцём, и дыкхцём дро суно́, и ґа́да, бузнэ (козлы), ґаздынэ́пэ пэ бузне́ндэ, ряба крапинкэнца и пятнэнца.11. Дэвлэ́скиро Янго́ло пхэндя́ ма́нгэ дро суно́: “Яково!” Мэ пхэндём: “Ѓа́да, мэ сом.”12. Ёв пхэндя́: “Газдэ тырэ́ якха́ и подыкх: сарэ́ бузнэ, савэ́ ґаздынэ́пэ пэ ското, ряба крапинкэнца и пятнэнца, палдава́ Мэ саро́ дыкха́ва, со Лава́но кэрэ́ла ту́са;13. Мэ сом Дэвэ́л, Саво́ сыкадыя́ ту́кэ дро Вефи́лё, кай ту чхудя́н елеё (оливи́тко дзэт) пэ рипирибнытко сты́лбо (помнико), и кай ту Ма́нгэ дыя́н лав; акана́, ушты́, выджа далэ́ пхувья́тыр и рисёв пэ тыри́ пхув, кай ту бияндыян.”14. Рахи́ль и Лия пхэндлэ́ дро отпхэныбэ́н лэ́скэ: “Ци исын вари-сави́ паш ци мэкно́ миштыпэ́н амэ́нгэ дро амарэ́-дадэ́скиро кхэр?15. Ци на пал пэскирэндэ ёв амэн гинэ́ла? Пал-дова́ со ёв бикиндя амэн, и прохая амаро́ руп;16. пир саро́ барвалыпэ́н, саво́ отлыя Дэвэ́л амарэ́ дадэ́стыр, исын амаро́ и амарэ́ чхавэ́нгирэ, и адя́кэ саро́ кэр, со Дэвэ́л пхэндя́ ту́кэ.”17. Тэ́ньци уштыя́ Яково, чхудя́ пэ верблюдэндэ пэ́скирэ чхавэ́н и ромне́н,18. и лыя́ пэ́са саро́ пэ́скиро барвалыпэ́н и саро́ пэ́скиро ското, саво́ ёв дорэсця́, лэ́скиро барвалыпэ́н, саво́ ёв лыя́ пэ́скэ дрэ Месопотамия, соб (кай) тэ джал кэ Исаа́ко, пэ́скиро дад, пэ Ханаано́скири пхув.19. И сыр Лава́но гия́ тэ подчхинэл пэ́скиро тыкно́ ското (бакрэ́н), тэды Рахи́ль чордя и́долы, савэ́ сыс ла́кирэ дадэ́стэ.20. Яково чордя Лаваностыр Арамеяниностэ ило́, пал-дова́ со ёв на пхэндя́ лэ́скэ, со джа́ла.21. И гия́ ёв лэ́стыр сарэ́са, со лэ́стэ сыс; и уштыи, пиригия рэка (лэнь) и гия́ кэ бэ́рга Галаа́до.22. Пэ три́то дывэ́с Лаваноскэ пхэндлэ́, со Яково гия́ лэ́стыр.23. Тэды ёв лыя́ пэ́са сарэ́н пэскирэн сэмэнцэн, и традыяпэ пал лэ́стэ эфта́ дывэса́, и дотрадыя лэс пэ бэ́рга Галаа́до.24. И Дэвэ́л явдя́ кэ Арамеянино Лава́но раты́ дро суно́, и пхэндя́ лэ́скэ: “Ракхпэ, на ра́кир Яково́скэ ни лачхипэ́н, ни чорипэ́н.”25. И дотрадыя Лава́но Яково́с; а Яково чхудя́ пэ́скири ша́тра пэ бэ́рга, и Лава́но чхудя́ ша́тра пэ́скирэ сэмэнцаса пэ бэ́рга Галаа́до.26. И Лава́но пхэндя́ Яково́скэ: “Со ту кэрдя́н? Ваш со ту хохадян ман и лыджиян пэ́са мирэ́ чхае́н, сыр пленнонэн, савэ́н лэ́на куртала́са.27. Со́скэ ту чораханэ́с настян, и ґарадыян ма́ндыр, и на пхэндя́н ма́нгэ? Мэ отмэкавас тут скаминдэса и гиленца, тимпаноса и гусленца;28. ту на дыя́н ма́нгэ тэ чамудав пэ́скирэ ўнукэн и чхае́н; на годьварэс ту кэрдя́н.29. Исын дрэ миро васт зор тэ кэра́в тумэ́нгэ чорипэ́н; нэ тырэ́-дадэ́скиро Дэвэ́л тася́ ракирдя́ кэ мэ и пхэндя́: ‘Ракхпэ, на ра́кир Яково́скэ ни лачхипэ́н, ни чорипэ́н.’30. Нэ мэк ту ги́ян ма́ндыр, пал-дова́ со ту древа́н закамдян тэ явэс дрэ тырэ́-дадэ́скиро кхэр: палсо́ ту чордян мирэ́ дэвлорэ́?”31. Яково отпхэндя́ Лаваноскэ и пхэндя́: “Мэ дарандыём (дардёмпэ), мэ думиндём, соб (кай) ту тэ на отлэс пэ́скирэ чхае́н ма́ндыр,32. конэ́стэ ту латхэса тырэ́н дэвлорэ́, одова́ на явэ́ла джидо́. Анги́л амари́ сэмэ́нца пхучпэ, со ма́ндэ исын, и лэ пэ́скэ.” Яково на джиндя́, со Рахи́ль лэн чордя.33. И псирдя́ Лава́но дрэ Яковоскири ша́тра, и дрэ Лиякири ша́тра, и дрэ дуе́-дынарицэнгири ша́тра, нэ на латхя́. И выгия́ Лиякирэ шатратыр, загия́ дрэ Рахилякири ша́тра.34. Рахи́ль лыя́ идолэн, и чхудя́ лэн тэл верблюдоскири зэн (сидёлка), и бэстя́ пэ лэ́ндэ. И Лава́но обродыя сари́ ша́тра, нэ на латхя́ лэн.35. Ёй пхэндя́ пэ́скирэ дадэ́скэ: “Мэк тэ на холясол миро хула́й, со мэ нашты́ (на могинав) анги́л ту́тэ тэ уштав; пал-дова́ со ма́ндэ исын джувлитко.” И ёв родыя, нэ на латхя́ и́долы.36. Яково холя́сыя, и лыя́ тэ кошэлпэ Лаваноса. И лыя́ Яково тэ ракирэ́л, и пхэндя́ Лаваноскэ: “Сави́ исын мири́ банг, саво́ исын миро грэ́хо, со ту традэсапэ пал ма́ндэ?37. ту пиридыкхцян ма́ндэ саро́, со ту латхян сарэ́стыр, со исын тырэ́ кхэрэ́стыр? Сыка́в ада́й анги́л мирэ́ сэмэнцатэ и тырэндэ; мэк ёнэ тэ россэндякирэн амэн дуе́н.38. Ѓа́да, биш бэрш мэ со́мас кэ ту; бакрэ́ и бузнэ (козлы) тырэ́ на вычхурдынэ; тырэ́ гуртостыр (стадатыр) бакрэ́н мэ на хаём;39. заханэс, ци розрискирдэ рискирибна́скирэ мурдалэса (зверёса) мэ кэ ту на яндём; дава́ сыс бы мири́ уре́жа (убытко); ту ма́ндыр родэсас, ци дывэсэ́ со хасёлас, ци ратя́киро;40. мэ мэнчындёмпэ дывэсэ́ хачкирибнастыр, а раты́ шылыпнастыр; и соибэн миро нашэлас мирэ́ якхэ́ндыр.41. Дасавэ́ мирэ́ биш бэрш сыс дро тыро́ кхэр. Мэ дынариндём ту́кэ дэшуштар бэрш пал тырэ́ дуе́ндэ чхае́ндэ и шов бэрш пал тырэ́ кхэритконэ́ мурдалэ́ндэ; а ту дэш мо́лы парудян мири́ мазу́ри (награда).42. Ко́ли тэ на явэ́л ма́нца мирэ́-дадэ́скиро Дэвэ́л, Авраамо́скиро Дэвэ́л и Исаакоскири дар; то ту акана́ ман нисоса отмэкэсас. Дэвэ́л дыкхця́ миро пхаро́ джиибэ́н и мирэ́-вастэнгири пхари́ буты́ кэ притасаибэн; и сыкадя́ тыри́ банг пал ма́ндэ.”43. И отпхэндя́ Лава́но и пхэндя́ Яково́скэ: “Э чхая́ – мирэ́ чхая́; чхавэ́ – мирэ́ чхавэ́; ското – миро ското, и саро́, со ту дыкхэ́са, дава́ исын миро: ци сашты́ (могина́ва) мэ акана́ вари-со тэ кэра́в мирэ́ чхае́нца и лэ́нгирэ чхавэ́нца, савэ́н ёнэ бияндлэ?44. Акана́ кэра́са доракирибэ́н пал рама́нё (миро) мэ и ту, и дава́ явэ́ла допхэныбнаса машки́р ма́ндэ и ту́тэ.”45. И лыя́ Яково бар, и чхудя́ лэс дро рипирибнытко сты́лбо (помнико).46. И пхэндя́ Яково пэ́скирэ сэмэнцакэ: “Кэдэн бара́.” Ёнэ лынэ́ бара́, и кэрдэ́ бэ́ргица; и ханэ́ одо́й пэ бэ́ргица.47. И кхардя́ лэс Лава́но: Иегар-Сагадуфа [Егар-Сагадута-ю.о.]; а Яково кхардя́ лэс Галаа́до [Галь-Эдо-ю.о.].48. И пхэндя́ Лава́но: “Ададывэ́с дая́ бэ́ргица машки́р ма́ндэ и ту́тэ исын сы́рбы якхи́тко (свидетелё). Палдава́ и лэ́скэ дыно́ лав: Галаа́до,49. адя́кэ-паць кхарэ́лапэ: Мицпа, долэ́стыр, со пхэндя́ Лава́но: “Мэк тэ дыкхэ́л Рай Дэвэ́л пэ ма́ндэ и пэ ту́тэ, ке́ли амэ ява́са дур екх екхэстыр.50. Ко́ли ту явэ́са фуес тэ кэрэ́с мирэ́ чхаенца, ці, ко́ли ту лэ́са (тэ лэс ту) буты́р мирэ́ чхаендыр явирэ ромнен, усае́кх ко́ли нанэ манушэ́с машки́р амэ́ндэ, нэ дыкх, Дэвэ́л исын якхи́тко машки́р ма́ндэ и ту́тэ.”51. И пхэндя́ Лава́но Яково́скэ: “Ѓа́да, исын дая́ бэ́ргица и, ґа́да, исын рипирибнытко сты́лбо, саво́ мэ чхудём машки́р ма́ндэ и ту́тэ;52. дая́ бэ́ргица исын якхи́тко, и дава́ рипирибнытко сты́лбо (помнико) исын якхи́тко, со ни мэ на пириджава кэ ту пал дая́ бэ́ргица, ни ту на пириджаса кэ мэ пал дая́ бэ́ргица и пал дава́ рипирибнытко сты́лбо, ваш чорипэ́н.53. Авраамо́скиро и Нахороскиро Дэвэ́л, мэк тэ явэ́л сэндариса машки́р амэ́ндэ, лэ́нгирэ-дадэ́скиро Дэвэ́л.” Яково совлахадя́ пэ́скирэ дадэ́скирэ Исаакоскирэ дара́са.54. И зачхиндя́ и яндя́ Яково свэ́нто дыибэ́н (жэ́ртва) пэ бэ́рга, и кхардя́ пэ́скирэ сэмэнцэн тэ хан маро́; и ёнэ ханэ́ маро́ и ратькирдэ пэ бэ́ргица.55. И Лава́но уштыя́ тася́рлэс пэ зло́ко (ранкоса) и чамудя пэ́скирэ ўнукэн и чхае́н, и бахтякирдя́ лэн, и гия́, и рисия́ Лава́но пэ пэ́скиро штэ́то.Genesis 32:1-321. И гия́ Яково пэ́скирэ дромэ́са, и пирилынэ лэс Дэвлэ́скирэ Янго́лы.2. Яково дыкхця́ лэн, и пхэндя́: “Дава́ исын Дэвлэ́скиро таборо (лод).” И дыя́ лав долэ́ штэтоскэ: Маханаимо.3. И бичхадя́ Яково анги́л пэ́стэ манушэ́н кэ пэ́скиро пшал Иса́во пэ Сеироскири пхув, пэ Эдо́мо штэ́то,4. и припхэндя́ лэ́нгэ, ракири́: “Адя́кэ пхэнэ́н мирэ́ хула́скэ Исавоскэ: ‘Ѓа́да, со ракирэ́ла тыро́ писха́ри Яково: Мэ дживдём Лаваностэ, и дживдём пэ́скэ дава́ часо,5. и исын ма́ндэ гурува и ослы (мега́рья) и тыкно́ ското (бакрэ́), писхарицы (рабыни) и писха́рья (рабы); и мэ бичхадём манушэ́с тэ пхэнэ́л пал ма́ндэ мирэ́ хула́скэ, соб (кай) тэ латхав ла́ска анги́л тырэ́ якха́.’”6. И мануша́, савэ́ сыс бичхадэ́ тэ пхэнэ́н, рисинэ́ кэ Яково, и пхэндлэ́: “Амэ псирдям кэ тыро́ пшал Иса́во; ёв джа́ла муял кэ ту (пэ стреч), и лэ́са исын штаршэла́ мануша́.”7. Яково древа́н страхадыя и пыя́ дрэ дар, и манушэ́н, савэ́ сыс лэ́са, ёв роскэрдя́ пэ паш, и тыкно́ и баро́ ското и верблюдэн, пэ дуй табуны.8. И пхэндя́: “Ко́ли Иса́во пэрэ́ла марибна́са пэ екх табуно и лэс розмарла, тэды палатуно́ (последнё) табуно сашты́ (могинэ́ла) тэ зракхэлпэ.”9. Яково пхэндя́: “Мирэ́ дадэ́скиро Авраамо́скиро Дэвэ́л и Дэвэ́л мирэ́ дадэ́скиро Исаакоскиро, Раё Дэ́вла, Саво́ пхэндя́ ма́нгэ: “Рисён пэ тыри́ пхув, кай ту бияндыян, и Мэ ява́ва тэ помогинав ту́кэ!10. Мэ на сом мол саро́ лачхипэ́н и тангипэ́н, савэ́ Ту кэрдя́н Тырэ́ писхари́скэ; пал-дова́ со мэ мирэ́ кхияса пиригиём дава́ Иорда́но; а акана́ ма́ндэ исын дуй табуны.11. Зра́кх ман мирэ́-пшалэ́скирэ вастэ́стыр, Исаво́скирэ вастэ́стыр, пал-дова́ со мэ дарава лэ́стыр, соб (кай) ёв, сыр явэ́ла, тэ на замарэ́л ман и да ла́кирэ чхаворэнца.”12. Ту пхэндя́н: “Мэ ява́ва тэ дав васт (тэ помогинав) ту́кэ, и тырэ́ – чхавэ́нгиро ро́до кэра́ва, сыр морёскиро (дэрьявэ́скиро) пра́хо, саво́ тэ на гинэс, пал-дова́, со лэс бут.”13. И дрэ дая́ рат Яково ратькирдя одо́й. И лыя́ долэ́стыр, со лэ́стэ сыс, дро почастунко Исавоскэ, пэ́скирэ пшалэ́скэ:14. дуйшэла́ бузнен (козэн), биш бузнэн (козлэн), дуйшэла́ бакрен, биш бакрэ́н,15. трия́нда верблюдицэн, савэ́ дошэнапэ, лэ́нгирэ кхурорэнца штардэша́ гурумнен, дэш гурувэ́н, биш ослицэн, дэш ослэн.16. И пэ́скирэ писхарье́нгэ ёв дыя́ дрэ васта́ кажно стада пэскирэнца (розде́льнэс), и пхэндя́ пэ́скирэ дынарье́нгэ: “Джа́н анги́л ма́ндэ, и ячкирэн штэ́то стадатыр кэ стада.”17. И припхэндя́ англатунэскэ, и пхэндя́: “Ке́ли миро пшал Иса́во дыкхэлапэ ту́са и пхучэла ту́тыр, ракири́: “Конэ́скиро ту сан?” и “Карик джа́са?” и “Конэ́скири исын дая́ стада анги́л ту́тэ?”,18. то ту пхэн: ‘Тырэ́-писхарискиро Яково́скиро, дава́ исын почастунко, бичхадо́ мирэ́ хула́скэ Исавоскэ; ґа́да, и ёв кокоро́ исын пал амэ́ндэ’.19. Дова́-паць ёв припхэндя́ и явирэскэ и тритонэскэ, и сарэ́нгэ, савэ́ гинэ́ пал ста́ды, ракири́: “Адя́кэ пхэнэ́н Исавоскэ, ке́ли дыкхэнапэ лэ́са;20. и пхэнэ́н: ‘Ѓа́да, и тыро́ писха́ри Яково джа́ла пал амэ́ндэ’. Палдава́ ёв пхэндя́ кокоро́ дрэ пэ́стэ: ‘Ковлякирава мэ лэс почастункэнца (дарэнца), савэ́ джа́на анги́л ма́ндэ; и коригэды́р (позжэ) дыкха́ва лэ́скиро муй; сашты́ (могинэ́ла) тэ явэ́л, со ёв прилэ́ла ман.’”21. И гинэ́ почасту́нки анги́л лэ́стэ; а ёв доя́ рат ратькирдя дро таборо / лод (ста́но).22. И уштыя́ ёв дрэ доя́ рат, и лыя́ дуе́н пэ́скирэ ромне́н, и дуе́н пэ́скирэ писхарицэн, и пэскирэн дэшуе́кх чхавэ́н, пиригия пир пани́ Явоко бродоса.23. И лыя́ лэн, и пирилыджия пир тхадыпэн панескиро, и саро́, со лэ́стэ сыс.24. И яця́пэ Яково екхджино́. И спробинэлас зорья Вари-Кон лэ́са, пака лыя́ тэ шэринэлпэ дывэ́с;25. и одова́ Вари-Кон, дыкхи́, со Ёв на лэ́ла упралыпэ́н пэ Яковостэ, чиладя́ лэ́скири ґэро́й, кай исын стёгно (стаць) и дукхадя Яковоскири ґэрьякири пхабай (суставо), ке́ли Яково спробинэлас зорья Лэ́са.26. И пхэндя́: “Отмэк Ман; пал-дова́ со яця́ злокицо.” О Яково пхэндя́: “На отмэка́ва Тут, анги́л дова́, сыр Ту бахтякирэса ман.”27. И пхэндя́: “Сыр исын тыро́ лав?” Ёв пхэндя́: “Яково.”28. И пхэндя́: “Акана́ лав ту́кэ явэ́ла на Яково, а Израилё; пал-дова́ со ту спробиндян зорья Дэвлэ́са, и ту манушэ́н пиризорьякирэса.”29. И Яково пхуця́ лэ́стыр, ракири́: “Пхэн Тыро́ лав, мэ манга́ва.” Нэ Ёв пхэндя́: “Ваш со ту пхучэса пал Миро лав?” И бахтякирдя́ лэс одо́й.30. И дыя́ Яково долэ́ штэтоскэ лав: Пенуэло [Пэни-Эль-ю.о.], пал-дова́ со ракирдя́ ёв: “Мэ дыкхцёмпэ Дэвлэ́са муй кэ муй, и зракхцяпэ миро джиибэ́н.”31. И уштыя́ кхам, ке́ли ёв джа́лас пашы́л Пенуэло; и лангандыя ёв пэ пэ́скиро стёгно.32. Палдава́ и акана́ Израилёскирэ чхавэ́ на ха́на жылы, савэ́ исын пэ пхабай (суставо) стёгноскири, пал-дова́ со, Кон спробиндя зорья, чиладя́ жылы пэ Яково́скиро стёгно дрэ пхабай.Psalms 8:6-96. Ту кэрдя́н лэс на́бут тыкнэды́р Пэ́стыр, Дэвлэ́стыр. И Ту дыя́н лэ́скэ сла́ва и паты́в.7. Ту чхудя́н лэс хула́са пир саро́, со Ту кэрдя́н, и чхудя́н тэлэ́ саро́ анги́л лэ́скирэ ґэра́:8. Бакрорэ́н и гурувэ́н сарэ́н, адя́кэ-паць и рискирибна́скирэ мурдалэ́н (зверен), со исын пэ фэ́лда.9. Чириклэн болыбна́стыр, мачхэн морёстыр (дэрьявэстыр), и сарэ́н, кон дживэ́ла дро морёскиро (дэрьявэ́скиро) пани́.Proverbs 3:19-2019. Рай Дэвэ́л Пэ́скирэ годыпнаса создыя́ пхув, Ёв Пэ́скирэ ґалыибнаса создыя́ болыбэ́н.20. Лэ́скирэ джиныбнастыр хор ґанынга́ откэрдэпэ и болыбэ́н почхудя пахлыняса (росаса).Matuš 11:1-301. И сыс адя́кэ: ке́ли кончындя Ису́со тэ дэл упхэныбэна́ дэшудуенгэ Пэ́скирэ сыкляибнытконэ́нгэ, Ёв гия́ криг одотхы́р тэ сыклякирэ́л и тэ пхэнэ́л лав дрэ лэ́нгирэ (Галилеякирэ) фо́рья.2. Нэ ке́ли Иа́но шундя́ дро штарибэ́н пал Исусо́скири буты́, ёв бичхадя́ лав пэ́скирэ сыкляибнытконэ́нца3. тэ пхэнэ́л Лэ́скэ: “Ту сан Кодова́, Савэ́скэ трэй тэ явэ́л, ци явирэ́с амэ́нгэ тэ ужакирас?”4. И отпхэндя́ лэ́нгэ Ису́со, ракири́ “Джа́н и пирипхэнэн Ианоскэ, со тумэ́ дыкхнэ́ и шундлэ́.5. Корорэ́ мануша́ дыкхэ́на нэвэ́стыр и лангалэ псирэ́на; проказытка ячэ́на жужэ́, и кашукэ мануша́ шунэ́на, мулэ́ отджидёна, и богэнгэ пхэнэ́лапэ бахталы́ зан (звесь);6. бахтало́ сыс кодова́, кон на хасякирэ́ла патяибэ́н дрэ Ма́ндэ.7. А ке́ли ёнэ гинэ́ пэ́скэ, Ису́со лыя́ тэ ракирэ́л манушэ́нгэ пал Ианостэ: “Со псирдэ́ тумэ́ тэ дыкхэ́н пэ чхучи́ пхув? Сыр тришчынытко кашт (дрэ́во) тринскирлапэ балвалятыр?8. Со тумэ́ псирдэ́ одори́к тэ дыкхэ́н? Манушэ́с, саво́ сыс уридо́ дрэ шука́р и́дя? Над; мануша́, савэ́ уридэ́ дрэ шука́р и́дя, дживэ́на дрэ кралитка фэлатиня́ (колова́).9. Нэ, со ж тумэ́ псирдэ́ тэ дыкхэ́н? Пророко́с? Чачо́, Мэ ракира́ва тумэ́нгэ: ёв исын барэды́р пророкостыр:10. дава́ исын кодова́, пал савэ́стэ исын чхиндло́: ‘Акэ, Мэ бичхава́ва Мирэ́ выкэдынэ́ Манушэ́с анги́л Ту́тэ, Саво́ кэрэ́ла дром Тыро́ анги́л Ту́тэ.’11. Чачэс, Мэ ракира́ва тумэ́нгэ: нанэ барэды́р Иано́стыр Болдэипнаристыр машки́р одолэ́ндэ, савэ́н джувля́ биянэна, нэ най тыкнэды́р дро Болыбна́скиро Раё исын барэды́р Иано́стыр.12. Ианоскирэ Болдэипнарискирэ дывэсэ́ндыр кэ/жы́ко какана́ Кралипэ́н дро Болыбна́скиро Раё зорья́са лэ́лапэ, нарта (упорна) мануша́ лэ́на лэс зорья́са.13. Пал-дова́ со сарэ́ проро́ки и Зако́но ангилпхэнэнас анги́л Ианостэ.14. И ко́ли тумэ́ закамэна тэ прилэ́н лэс, Иа́но исын сы́рбы Или́я, савэ́скэ трэиндя́ тэ явэ́л.15. Конэ́стэ исын кана́, мэк тэ шунэ́л.16. Со Мэ тэ пхэна́в, савэ́ кадалэ́ мануша́ исын? Ёнэ исын сы́рбы чхаворэ́, савэ́ исын бэштэ́ пашы́л тарги и ке́ли дэ́на го́дла машки́р пэ́стэ,17. то ёнэ ракирэ́на: ‘Амэ башадям тумэ́нгэ пэ свиролька, тумэ́ на кхэлдэ; амэ багандям роибнытка гиля́, а тумэ́ на рундлэ.’18. И Иа́но явдя́, на ха́ла, на пьела, и ёнэ ракирэ́на: ‘Лэ́стэ исын на́лачхо ду́хо (фа́но).’19. Явдя́ и Чхаво́ Манушэ́скиро, ха́ла, и пьела, и ёнэ ракирэ́на: ‘Дава́ исын ману́ш, савэ́скэ исын пир ило́ тэ хал, тэ пьел, исын дру́го (мал) мытоскирэ скэдыибнарьенгэ и грэхэнгирэнгэ.’ Нэ Дэвлэ́скиро годьварипэн сыкавэ́ла пэ́скиро чачипэ́н манушэ́нгирэ рэндэ́нца (делэнца), савэ́ прилэ́на дава́ чачипэ́н.”20. Тэ́ньци Ёв лыя́ тэ ладжакирэл фо́рья, дрэ савэ́ Ёв кэрдя́ буты́р явирэндыр Пэ́скирэ ди́вы, пал-дова́ со ёнэ на рискирдэ́ пэ́скиро джиибэ́н кэ Дэвэ́л:21. “Бида ту́кэ, Хоразино! Бида ту́кэ, Вифсаида! Пал-дова́ со, ко́ли дасавэ́ ди́вы, со сыс кэрдэ́ дрэ тумэ́ндэ, тэ явэ́н кэрдэ́ дрэ Ти́ро и Сидоно, ёнэ ґара́ рискирэнас пэ́скиро джиибэ́н кэ Дэвэ́л дро урибэ́н балытконэ гонэстыр и дро пепло.22. Нэ Мэ пхэна́ва тумэ́нгэ, со явэ́ла локхэды́р дро сэндоскиро дывэ́с Тироскэ и Сидоноскэ, сыр явэ́ла тумэ́нгэ.23. И ту, Капернаумо, кэ болыбэ́н ґаздэсапэ? Дро лю́но (адо) ту явэ́са чхурдыно́ тэлэ́: пал-дова́ со, ко́ли дасавэ́ ди́вы тэ явэ́н кэрдэ́ дро Содо́мо, сыр дрэ ту́тэ, ёв ячэласпэ кэ ададывэ́с.24. Мэ ракира́ва тумэ́нгэ, со явэ́ла локхэды́р дро сэндоскирэ дывэ́с Содомоскэ, сыр ту́кэ.”25. Дро до-паць часо, ке́ли Ису́со отпхэнэ́лас лэ́нгэ, пхэндя́ Ёв дурэды́р: “Мэ славинава Тут, Да́до, Рай Дэвэ́л Болыбна́скиро и пхувья́киро, со Ту ґарадян дава́ годьварэндыр и барэ́-годякирэндыр, и откэрдян дава́ бияторэнгэ;26. Чачо́, Да́до, пал-дова́ со сыс адя́кэ, сыр Ту́кэ трэиндя́.27. Саро́ джиныбэ́н пал Пэ́стэ Дад Миро дыя́ Ма́нгэ, и нико́н сарэ́са на джинэ́ла Чхавэ́с апри́ч Дадэ́стэ и нико́н на джинэ́ла Дадэ́с апри́ч Чхавэ́стэ, и Ёв выкэдэ́ла одолэ́с, конэ́скэ Чхаво́ камэ́ла тэ откэрэл Дадэ́с.28. Явэ́н кэ мэ сарэ́, савэ́ кхинынэ пхарэ́ бутя́тыр и пхарипнастыр, – и Мэ да́ва откхиныбэн тумэ́нгэ.29. Лэн пэ пэ́стэ пхарипэ́н Мирэ́ джиибна́скиро и сыклён Ма́ндыр, пал-дова́ со Мэ сом ковлэ́-илытко и кандуно, и тумэ́ латхэ́на откхиныбэн ваш тумаро́ ило́;30. пал-дова́ со Миро джиибна́скиро пхарипэ́н локхэс тэ лыджа́н.” Romani Bible Baltic 2019 Maintained by the United Bible Societies for the Baltic Romani Mission